ZĨRINƆ 4

Yãkpatɛkɛna kũ Pitao kũ Yuhanao

1Kũ Pita kũ Yuhanao tɛn yã o gbɛ̃nɔnɛ, sa'orinɔ kũ Luda kpɛ́ dogari gbɛ̃ zɔ̃kɔ̃ɔo kũ Sadusinɔ gɛ̃̀ńyĩ. 2Ń pɔ fɛ̃̀ kũ òtɛn yã da gbɛ̃nɔnɛ yãi, òtɛn gɛ̀nɔ vuna Yesu gũn kpàkpa kɛ. 3Akũ ò ń kũ ò ń dá kpɛ́siran ari gu dɔ̀, zaakũ gu gĩnakɛ à sì kɔ̀. 4Ama gbɛ̃ dasi kũ ò ń yã mànɔ Yesu náani kɛ̀ ari ń gɔ̃gbɛ̃nɔ dasi kũ̀ à kà gbɛ̃nɔn dúbu sɔɔro taka bà.

5Kũ gu dɔ̀, Yuda gbãnadenɔ kũ gbɛ̃ zɔ̃kɔ̃nɔ kũ ludayãdannɛrinɔ kàkara Yurusalɛmu. 6Sa'oriki Anasa kú gwe kũ Kayafao kũ Yuhanao kũ Alɛsandao kũ gbɛ̃ kũ ò de sa'oriki pìi danɛ ũnɔ ń pínki. 7Ò sù kũ Pitao kũ Yuhanao gbãnade pìnɔ arɛ, akũ ò ń lá ò pì: Bɔ́ gbãna ke dí tɔ́n a abirekũ kɛ̀oo? 8Akũ Luda Nini sù Pitaa à pìńnɛ: Gbãnadenɔ kũ gbɛ̃ zɔ̃kɔ̃nɔ, 9lákũ átɛni ó lala gbãra nà yã mana kũ o kɛ̀ ɛrɛɛnɛ yãi, deran o kɛ̀ à wèrekɔ̃a nà, 10ákɔ̃nɔ kũ Isarailanɔ pínki àgɔ̃ dɔ̃ kũ gbɛ̃ kũ à zɛna á arɛ dí aafiaa lè kũ Yesu Kirisi Nazɛra kũ a a pà lía Luda a vù bona gan tɔ́omɛ. 11Lɛmɛ gbɛ̀ kũ ákɔ̃nɔ kpɛ́borinɔ a pã kpài mɛ́ à gɔ̃̀ kpɛ́ kusuru gbɛ̀ mìde ũ. 12Gbɛ̃ pãnde ke kun kũ ani gbɛ̃ sura baro, zaakũ andunia gũn pínki Luda dí gbɛ̃ke ditɛ bisãsirinɔnɛ à ń sura baro, séde àpii.

13Kũ ò Pita kũ Yuhanao kùgbãnakɛnaa è, akũsɔ̃ ò dɔ̃̀ kũ talaka wɛ́siradenɔmɛ ń ũ, à bò ń sarɛ, akũ ò dɔ̃̀ sà kũ ò gĩnakɛ ò kú kũ Yesuomɛ yã. 14Lákũ ò gbɛ̃ kũ à werekɔ̃anaa pìi è zɛ nà ń sarɛ, odi fɔ̃ ò yãke ò doro. 15Ò pìńnɛ ò bɔtɛ, akũ ò yã gɔ̃̀gɔ̃ 16ò pì: Óni kɛ dera kũ gbɛ̃ pìnɔoo? Zaakũ Yurusalɛmudenɔn dɔ̃ pínki kũ ò daboyã zɔ̃kɔ̃ɔ kɛ̀, óni fɔ̃ ò gíiro. 17De yã pì sún dagula de adilaro, ò kpã̀kɛ̃ńyĩ pãsĩpãsĩ de òsun yã o gbɛ̃kenɛ kũ tɔ́ pìio doro. 18Akũ ò ń sísi ò yã dìtɛńnɛ òsun yã o kesɔ̃ ò yã dańnɛ kũ Yesu tɔ́oro sãnsãn. 19Akũ Pita kũ Yuhanao wèḿma ò pì: À gwa á zĩdanɛ. Á yãn óni ma yá, ke Luda pɔ́? A kpate mɛ́ à mana Ludanɛɛ? 20Zaakũ óni fɔ̃ ò gí ò yã kũ o mà akũsɔ̃ o è oiro. 21Gbãnade pìnɔ ɛ̀ra ò vĩna dàdańyĩ, akũ ò ń gbárɛ. Odi wɛ́tãmmana zɛ́ lero, zaakũ baadi pínki tɛn Luda sáabu kpá yã kũ à kɛ̀ɛ pì yãi. 22Gbɛ̃ kũ ò werekɔ̃ana daboyã bire kɛ̀nɛɛ pì zĩ kũ̀ de wɛ̃̀ buplala.

Yesudenɔ kùgbãna wɛ́kɛnaa

23Kũ ò ń gbárɛ, akũ ò tà ń gbɛ̃nɔ kĩnaa, ò òńnɛ lákũ sa'orikinɔ kũ gbɛ̃ zɔ̃kɔ̃nɔ òńnɛ nà. 24Kũ ò mà, ò ɔ́ gbãna dɔ̀ Ludaa lɛɛlɛ ò pì: Dikiri, mɔkɔ̃n mɛ́ n musu kɛ̀ kũ zĩtɛo kũ ísirao kũ pɔ́ kũ ò kú ń gũnnɔ pínki. 25N dà n zĩkɛri ó dizi Daudanɛ kũ n Nini gbãnao, akũ à pì:

Bɔ́ yã mɛ́ à tò burinɔ tɛn zuka káa?

À kɛ̀ dera òtɛn lɛ́ pã kpákũsũu?

26Andunia kínanɔ tɛn zĩ̀ soru kɛ,

kpatablerinɔ tɛn kakara Dikirii

kũ Kína kũ à kàao.

27Yãpuramɛ, Hɛrɔdu kũ Pɔntiu Pilatio kàkara wɛ̃tɛ dí gũn kũ Isarailanɔ kũ buri pãndenɔ n zĩkɛri kũ à kú adona Yesu kũ ń kà kína ũ pìii. 28Ò kɛ̀ lákũ n gĩnakɛ n zɛo nà n gbãna kũ n pɔyenyĩnaaooa. 29Tera sà Dikiri, ǹ yã pãsĩ kũ ò ò ma gwe. Ókɔ̃nɔ n zɔ̀blerinɔ, ǹ ó gba lɛ́ ò n yã o kũ kùgbãnao manamana. 30Ǹ ɔ dawá de ò gbɛ̃nɔ werekɔ̃a ò daboyãnɔ kũ yãbonsarɛnɔ kɛ kũ n zĩkɛri kũ à kú adona Yesu tɔ́o. 31Kũ ò adua kɛ̀ ò làka, gu kũ ò kɔ̃kakaranan yĩ̀gãyĩgã, Luda Nini sùḿma ń pínki, akũ ò gɛ̀ɛ òtɛn Luda yã ońnɛ kũ kùgbãnao.

Yesudenɔ nɛ̀sɛdokɔ̃nɔkɛna kũ kɔ̃o

32Yesu náanikɛrinɔ laasun dokɔ̃nɔ vĩ kũ lɛ́dokɔ̃nɔo. Ń gbɛ̃ke dì pi a pɔ́ kũ á vĩnɔ bi a pɔ́mɛ adoro. Ń pɔ́ pínki bi ń pínki pɔ́mɛ. 33Luda zĩ̀rinɔ tɛn Dikiri Yesu vuna gan yã o gbɛ̃nɔnɛ kũ gbãna zɔ̃kɔ̃ɔo. Ò Luda gbɛ̃kɛ zɔ̃kɔ̃ lè ń pínki. 34Pɔ́ke dí kĩa ń gbɛ̃kearo, zaakũ gbɛ̃ kũ ò bú ke kpɛ́ vĩnɔ dì yía ò su kũ a ɔgɔo 35ò kpá zĩ̀rinɔa, de ò kpá baadia lákũ à a bɔkɔtɛ de nà. 36Levi buri Yusufu kũ à bò Sipiru bùsun kú ń tɛ́. Luda zĩ̀rinɔ tɔ́ kpànɛ Baanaba. Tɔ́ pìi pì Laakarikpatɛrii. 37À bú kũ à vĩ yìa, akũ à sù à a ɔgɔ kpà zĩ̀rinɔa.

Currently Selected:

ZĨRINƆ 4: BB2005

Highlight

Copy