16
O Dewel krell o Jesuses i mulendar djides
1Har o Debleskro diwes trujel his, djan i Maria dran Magdala un i Maria, koi dai o Jakobestar, un i Salome un ginan djet, hoi sungella mishto, te makenn le les dren. 2Sik taissarlake pal o Debleskro diwes djan jon pash o mulengro kheer, har o kham pre djas. 3Un jon rakran mashkral pende: “Koon lell menge ko bar krik, hoi glan o mulengro kheer tardo hi?”
4Kowa his i baro bar. Un har jon pash ko mulengro kheer wan, dikan le, kai ko bar krik lino was.
5Un jon djan an o mulengro kheer dren. Kote dikan le i terno murshes ap i tchatchi rig beshdo, koles his trul peste i lengsto bijalo ripen. Un jon trashan.
6Job penas ap lende: “Ma trashenn! Tumer rodenn o Jesuses dran Nazaret, kai was ap o trushel dino. Job stas i mulendar pre. Job hi gar kate. Dikenn kote, kai job tchiddo his. 7Kanna djan pash leskre malende! Penenn lenge un o Petreske, kai djal job glan tumende an o them Galilea! Kote dikenn tumer les, har job les tumenge penas.”
8Un jon djan dran ko mulengro kheer win, un nashan penge. Jon trissan i trashatar un penan kekeske tchomone, jaake baro his lengri daar.
9Har o Jesus i mulendar pre stas, sik taissarlake pal o Debleskro diwes, his i Maria dran Magdala koi ersti, kolatar mukas lo pes te dikell. Joi hi koja, kolatar job glan i tsiro efta bengen win tradas. 10Un joi djas pash kolende, kai djan o Jesuseha, un kolengro dji kanna dukas, un kai rowan pral leste. Un joi penas lenge, te dikas li les. 11Un har jon shunan, kai job djiwella, un kai dikas li les, patsan le kowa gar.
12Pal kowa mukas job pes dui wawar peskre malendar te dikell, kai his ap o drom glan o foro. Pash lende dikas lo wawartchandes win har jon les prindjran.
13Un kolla dui djan pale, un penan les kol wawar malenge. Kolen patsan le witar gar. 14Koi pre, har kol deesh-te-jek pash o chapen beshdo his, mukas lo pes lendar te dikell un tchingras ap lende, kai hi lengre djia har barra, un te patsan le gar kolenge, kai les dikan, har job i mulendar pre stas.
O Jesus bitchrell peskre malen pash i tsele menshende ap i phub
15Un job penas ap lende: “Djan pash i tsele menshende ap i phub un sikrenn hakeneste miro drom!” 16“Koon patsell ap mande un well taufedo, kowa djal gar nashedo. Koon gar ap mande patsella, kowa djal nashedo!
17Kolla, kai patsenn ap mande, krenn baro koowa an o Debleskri soor. An miro lab tradenn le bengen i menshendar win, un rakrenn an wawar rakepen. 18Jon te lenn sapa an pengre wasta, un te pijenn le i pipen, kai nai merenn le, palle wenn le gar nasselo. Ap i nasslende tchiwenn le i wasta pre. Un kolla wenn sasto.”
19Har o rai Jesus jaake lentsa rakras, was lo pral an o bolepen hadedo, un beshas pes ap o Debleskri tchatchi rig.
20Un jon djan, te penenn le i menshenge o latcho lab o Jesus Kristestar an hake gaba un forja. Un o rai Jesus his pash lende peskri sorjah, un kras baro koowa, kai nai krell kek mensho. Un jaake dikan i menshe, kai leskro lab tchatcho hi.
