Mark 6

Nazarɛtfuɛ'm b'a lafi-man Jésus su

(An `nian Mat 13:53-58; Lik 4:16-30)

1Jésus tuli i bo lɛ ɔ ɔli i klɔ. I sɔnnzɔnfuɛ'm be ko sunmɛnnin i.

2Kɛ wunmiɛn-delɛ-cɛn'n juli'n, ɔ wa kleli be like Nyanmiɛn ndɛ suanlɛ nin i srɛlɛ sua'n nun. Sran kpanngban bɔ be tie i ndɛ'n bé nuan'n boli be wun, yɛ be usali kɛ: «?Eee, ɔ tili ndɛ nga'm be nin? ?Ɔ nin i ngwlɛlɛ nga fin nin? Ɔ yo sɛ yɛ ɔ yi atrɛ nga mun-ɔn? 3?Nán Mari wa b'ɔ ti ajuin difuɛ b'ɔ ti Zak, nin Zoz, nin Zid, nin Simɔn be niaan bian nin-ɔn? ?I niaan bla'm be nun-man e nun wa?» Ɔ man b'a lafi-mɛn i su.

4Jésus seli be kɛ: «Be bu Nyanmiɛn nuan ijɔfuɛ i sran lika'n kwlaa, sán i bɔbɔ i klɔfuɛ mun, nin i osufuɛ mun nin i awlofuɛ'm be yɛ be bu-mɛn i sran-an.» 5Ɔ man ɔ'a kwla yi-man atrɛ fi lɛ, san i sa b'ɔ fa fuɛli i tukpacɛfuɛ wie'm be su b'ɔ yoli bé juejue'n cɛ. 6I su bɔ be lafi-man'n ɔ bo i nuan kpa.

Sran blu-nin-nnyɔn bɔ Jésus sunmannin be'n

(An `nian Mat 10:5-15; Lik 9:1-6)

Jésus ɔli klɔ bɔ be mantan lɛ'n be su sran'm be like klelɛ. 7Kɛ ɔ yiɛli i sɔnnzɔnfuɛ blu-nin-nnyɔn mun'n, ɔ seli be kɛ be `kwla asiɛ usu mun, yɛ ɔ bo be nnyɔn-nnyɔn sunmanlɛ bo-ɔ. 8Ɔ wlali bé su nun kpa kɛ kɛ be ´kɔ'n, nán man be fa like fi tra nun, like diwa o, trɔ o. I waan nán man be fa sika be pata'n nun san kpɔnman kunngba cɛ yɛ be fa-a. 9I waan be `wla ngbabua sanngɛ nán man be wla tralɛ nnyɔn.

10Ɔ seli kɛ: «Klɔ kwlaa nga an ju su'n, yɛ awlo nga an ko sike nun'n, an `tran lɛ lele san amu'an tu amun bo klɔ sɔ'n su. 11Sɛ an ju lika wie nan b'a sike-man amun'n, bɔ be tie-man amun ndɛ'n, kɛ amun ´tu an bo klɔ sɔ'n su'n, an `kpukpu amún ja wun ndutre'n guɛ i lɛ, ɔ ´yo amun lalofuɛ .»

12Be ɔli, be kannin nzuɛn kacilɛ ndɛ. 13Be fuannin asiɛ usu kpanngban, be fa ngo guali tukpacɛfuɛ kpanngban bé su, be yoli be juejue .

Zan batɛm yofuɛ'n i kunlɛ

(An `nian Mat 14:1-12; Lik 9:7-9)

14Famiɛn Erɔd tili ndɛ sɔ'n, afin Jésus dunman'n ɔ'a fu dan kpa. Be waan: «Zan batɛm yofuɛ'n b'ɔ wuli'n yɛ ɔ'a cɛn-ɔn, i sɔ'n ti yɛ ɔ kwla yi atrɛ nin-ɔn.» 15Yɛ wie'm be waan: «Eli-ɔ,» yɛ wie'm be kusu be waan: «Ɔ ti Nyanmiɛn nuan ijɔfuɛ kun kɛ laa Nyanmiɛn nuan ijɔfuɛ mun sa.» 16Sanngɛ kɛ Erɔd tili i sɔ'n, i waan: «Zan bɔ n kpɛli i ti'n, i yɛ ɔ'a cɛn-ɔn.»

17Afin Erɔd bɔbɔ i nian bian Filip i yi Erɔdias b'ɔ deli jɛli i'n ti, ɔ man be trali Zan wlɛli i bisua. 18Afin titi Zan se i kɛ i niaan bian i yi'n i jalɛ'n ti-mɛn i su. 19Erɔdias fali Zan wun ndɛ sieli i klun, ɔ klo kɛ ɔ ´kun i, sanngɛ ɔ'a kwlɛ-mɛn i yo. 20Afin Erɔd sro Zan, ɔ si kɛ ɔ ti sran kpa yɛ ɔ ti Nyanmiɛn i sran, i sɔ'n ti ɔ man be niɛn i su. Kɛ ɔ tili ndɛ'n bɔ Zan kannin'n, i akunndan sanngannin, sanngɛ kusu i ndɛ'n i tielɛ yo i fɛ.

21Sanngɛ Erɔd i awuliɛ cɛn dilɛ nun b'ɔ yiɛli i awa junman difuɛ kaklaakla mun, nin i sonja sasufuɛ mun, ɔ nin Galile sran dandan mun kɛ be wa di cɛn'n, cɛn nga Erɔdias minndɛ'n ɔ juli. 22Kɛ Erɔdias i wa talua'n wluli lɔ b'ɔ ´si able'n, Erɔd nin be b'ɔ yiali be kɛ be wa di like'n be klun jɔli i wun kpa. Yɛ famiɛn'n seli talua'n kɛ like ng'ɔ klo'n ɔ `kan kle i ɔ ´fa mɛn i. 23Nan ɔ'a ta nda kɛ: «Like nga a se n kɛ n fa man wɔ'n, kannzɛ mɛn nga n sie'n i bue bɔbɔ-ɔ, n ´fa man.» 24Ɔ fite ko usɛli i nin kɛ: «?Nguɛ yɛ n `srɛ i-ɔ?» I nin seli i kɛ: «Srɛ Zan batɛm yofuɛ'n i ti'n.» 25Kpɛkuun ɔ kɛn i wun ndɛndɛ sɛli i sin famiɛn'n wun lɔ nan ɔ'a se i kɛ: «Fa Zan batɛm yofuɛ'n i ti'n man min talie kpɛkplɛkpɛ kun nun icra'n.» 26Ɔ'a yo-man famiɛn'n i fɛ, sanngɛ nda b'ɔ tali'n nin be ng'ɔ yiali be kɛ be wa di like'n be ti, ɔ klo-man kɛ ɔ kpɛ talua'n. 27Kpɛkuun ɔ sunmannin sonja nga be niɛn i su'n be nun kun, ɔ seli i kɛ ɔ ko kpɛ Zan batɛm yofuɛ'n i ti'n blɛ i. 28Sonja'n ko kpɛli Zan i ti'n bisua'n nun, ɔ fɛ i talie kpɛkplɛkpɛ kun nun bali. Ɔ fa mannin talua'n, yɛ i kusu fa ko mɛnnin i nin-ɔn. 29Kɛ Zan i sɔnnzɔnfuɛ'm be tili ndɛ sɔ'n, be wa fɛli i fuɛn'n nan b'a ko sie i ndia b'ɔ ti kɛ sua ba sa'n nun.

Sran akpi nnun (5.000) bɔ Jésus mannin be like be dili'n

(An `nian Mat 14:13-21; Lik 9:10-17; Zan 6:1-14)

30Be nga Jésus sunmannin be'n be yiɛli i wun lɛ, be kan like nga be yoli'n i kwlaa nin like nga be kleli'n i kwlaa kleli i. 31Ɔ seli be kɛ: «An bla man e wɔ e ngunmin blo lɔ e ko de wunmiɛn kan.» Be nyan-man bé ti di-man like bɔbɔ, afin sran nga be ba be kɔ'n, be sɔnnin. 32I sɔ'n ti'n, be fuli alie kun nun kɛ be ´kɔ be ngunmin blo lɔ. 33Sanngɛ kɛ sran sunman kpa be wunnin be kɛ be su kɔ'n, be wunnin be wlɛ, ɔ man sran wie'm be fin klɔ nga be mantan lɛ'n be kwlaa bé su be wanndi dunnin mmua Jésus nin i sɔnnzɔnfuɛ'm be nyrun lika nga be kɔ lɔ'n nun. 34Kɛ Jésus fin alie'n nun jrali'n, ɔ wunnin sran sɔ mun b'a bo nzra dan kpa, nan b'a yo i annvɔ, afin be ti kɛ bua'm bɔ be lɛ-man tafuɛ'n sa, yɛ ɔ boli be like klelɛ'n bo-ɔ, ɔ kleli be like kpanngban.

35Kɛ aliɛ'n sannin'n, i sɔnnzɔnfuɛ'm be wunngeli i wun lɛ nan b'a se i kɛ: «Wa ti blo, yɛ kusu aliɛ'n ɔ'a san. 36Man be atin man be ko to like diwa nanmue nin klɔ nga be mantan wa'n be su.» 37Jésus seli be kɛ: «An bɔbɔ an `man be like.» Sanngɛ be seli i kɛ: «?Denie ya nnyɔn kpaun yɛ e ko to man be nan be di-ɔ ?» 38Yɛ ɔ usali be kɛ: «?An lɛ kpaun nnyɛ? An `ko nian.» Be ko niannin nan b'a se i kɛ: «Kpaun'n ti nnun yɛ kpatra'n ti nnyɔn.» 39Yɛ ɔ seli be kɛ be se sran mun man be gua ase akpasua-akpasua ijre nɔnman'n su lɛ, 40nan b'a tran ase nyanman-nyanman yaya ɔ nin ablenun-ablenun. 41Ɔ fali kpaun nnun'n nin kpatra nnyɔn'n yɛ ɔ mɛnnin i nyin'n su nyanmiɛn su lɔ nan ɔ'a la Nyanmiɛn ase. Ɔ bubuli kpaun'n nun nan ɔ'a fa mɛn i sɔnnzɔnfuɛ mun kɛ be fa cɛ sran mun. Ɔ fali kpatra nnyɔn'n kusu cɛli be kwlaa. 42Be kwlaa be dili be ku yili, 43yɛ be isali kpaun sinsin'n nin kpatra ng'ɔ kali'n gbogbo blu-nin-nnyɔn. 44Be bɔ be dili kpaun'n, be nun yasua'm be ti akpi nnun (5.000).

Jésus i nzue'n nyin su nantilɛ

(An `nian Mat 14:22-33; Zan 6:15-21)

45Kɛ ɔ yoli sɔ'n, kpɛkuun ɔ miɛnnin i sɔnnzɔnfuɛ'm be fuli alie'n nun dunnin mmua i nyrun nzue cenje'n su Bɛtsaida bue liɛ'n su lɔ. Kɛ be ´kɔ'n, i bɔbɔ mannin sran'm be atin kɛ be wɔ. 46Kɛ ɔ yoli be blandɛ'n, ɔ ɔli oka kun su ɔ nin Nyanmiɛn be ko kokoli yalɛ.

47Kɛ aliɛ'n jɔ'n, wuun alie'n wo fɛtɛ'n i afiɛn lɔ, yɛ Jésus kunngba yɛ ɔ o asiɛ wun lɛ-ɔ. 48Ɔ wunnin i sɔnnzɔnfuɛ'm be alie kanlɛ'n i afɛ'n, afin aunngban'n fin be nyrun lɔ yɛ ɔ ba-a. Kɛ ɔ wa ju aliɛ njɛnniɛn su bɔ akɔ nyinman klikli'm be ´bo'n, Jésus nantili fɛtɛ'n nyin su ɔli bé wun lɔ, ɔ yoli kɛ ɔ ´bu bé wun. 49Kɛ be wunnin kɛ ɔ su nanti fɛtɛ'n nyin su'n, be buli i kɛ wunmiɛn-ɔn, nan b'a kpan, 50afin be kwlaa bé nyin tɛ i, ɔ man be klun tili be. Kpɛkuun Jésus nin be su ijɔ, ɔ seli kɛ: «An `gua amún wla ase, min-ɔn, nán srɛ kun amun.» 51Nan ɔ'a fu bé sin alie'n nun, yɛ aunngban'n yacili kpɛlɛ-ɔ. Bé nuan boli bé wun dan, 52afin b'a wun-man kpaun'n i atrɛ'n i wlɛ, yɛlɛ kɛ b'a kete.

Jésus yoli Zenezarɛt tukpacɛfuɛ'm be juejue

(An `nian Mat 14:34-36)

53Kɛ be kpɛli nzue'n bɔ be juli Zenezarɛt mɛn'n nun'n, be sili alie'n nan b'a minndɛ i. 54Kɛ be fin alie'n nun jrali'n, kpɛkuun sran'm be wunnin kɛ Jésus-ɔ. 55Be wanndi ɔli mɛn sɔ'n i akpasua'n kwlaa su, lika'n kwlaa bɔ be ti i kɛ ɔ o lɛ'n, be fa tukpacɛfuɛ mun tɛ nun blɛ i. 56Lika kwlaa ng'ɔ kɔ'n, klɔ kaan o, klɔ dan o, nanmue'm be nun o, be fa tukpacɛfuɛ mun be gua be gua'n su, be srɛ i kpa kɛ man be kɛn i tralɛ'n i nuan njɔlɛ'n kunngba cɛ. Be kwlaa nga be kɛn i'n be yo juejue.

Currently Selected:

Mark 6: BB98

Highlight

Copy