Mark 4

Awie guafuɛ'n i wun nyanndra

(An `nian Mat 13:1-9; Lik 8:4-8)

1Jésus boli like klelɛ'n bo ekun fɛtɛ'n nuan lɛ. Sran kpanngban kpa be yiɛli i wun lɛ, ɔ man ɔ fu trannin alie kun nun fɛtɛ'n su lɔ. Sran'm be kwlaa be kusu be guali nzue kpa'n nuan lɛ. 2Ɔ kannin ndɛ kpanngban kleli be nyanndra nun, ɔ seli be kɛ:

3«An `tie, bian kun ɔli awie gualɛ.» 4Kɛ ɔ ´sanndi awie'n, i wie tɔli atin mma'n nun, anunman'm be wa dili. 5Wie kusu tɔli akpuɛ su. Ɔ fifili ndɛndɛ kpa afin asiɛ nun-man lɛ kpa 6Sanngɛ kɛ wia'n ´bo'n, ɔ wɔnsɔnnin, ɔ wuli ndin bɔ ɔ'a nyɛn-mɛn i wlawlɛ kpa'n ti. 7Wie kusu tɔli nduin mma'n nun, nduin mma'n buali, ɔ trɛli i, ɔ man awie'n ɔ'a wlɔ-man. 8Wie kusu tɔli asiɛ kpa su, kɛ ɔ fifili'n, ɔ wlali nnya, ɔ wlɔli, tre kun wlɔli ablasan, kun ekun wlɔli ablesiɛn, yɛ kun kusu wlɔli ya. 9I sin ɔ seli be kɛ: «Sran ng'ɔ si ´fa sie'n man ɔ fa sie.»

Sa nga ti yɛ ɔ buli nyanndra'n

(An `nian Mat 13:10-17; Lik 8:9-10)

10Kɛ ɔ jaoli nzra'n nun lɛ'n, be nga be o i wun lɛ'n, be nin i sɔnnzɔnfuɛ blu-nin-nnyɔn'm be usɛli i nyanndra sɔ'n bo. 11Ɔ seli be kɛ: «Amun yɛ be yi Nyanmiɛn sielɛ'n i wun akunndan bɔ sran wun-mɛn i wlɛ'n i nglo kleli amun-ɔn, sanngɛ be nga be ti-man e liɛ'n, be liɛ'n kwlaa sin nyanndra nun 12nan kɛ be niɛn i kpa'n, b'a wun-mɛn i, yɛ kɛ be ti i kpa'n, b'a wun-mɛn i wlɛ nan b'a sa-man be sin Nyanmiɛn wun, nan ɔ'a yaci-man bé wun sa'n ɔ'a cɛ-man be .»

Nyanndra'n i bo tulɛ

(An `nian Mat 13:18-23; Lik 8:11-15)

13Ɔ seli be ekun kɛ: «?Sɛ an si-man nyanndra nga bo'n, ɔ ´yo sɛ yɛ amun ´kwla wun nyanndra uflɛ'm be bo-ɔ? 14Awie guafuɛ'n sanndi Nyanmiɛn ndɛ'n. 15Atin mma nga awie'n wie tɔli nun'n yɛlɛ sran nga kɛ be ti Nyanmiɛn ndɛ'n, Satan ba, ɔ wa yo man ndɛ nga be tili'n ɔ mlin be klun'n. 16I kunngba'n kusu akpuɛ nga awie'n wie tɔli su'n yɛlɛ be nga kɛ be ti Nyanmiɛn ndɛ'n, kpɛkuun be klun jɔ be fa su. 17Sanngɛ be ti kɛ awie b'ɔ lɛ-man ndin sa, be anwlɛn'n sɔ-man, kɛ afɛ'n nin yalɛ klelɛ'n tɔ bé su Nyanmiɛn ndɛ'n ti'n, kpɛkuun bé ti nun saci. 18Nduin mma nga kusu bɔ awie'n wie tɔli nun'n yɛlɛ be nga be ti Nyanmiɛn ndɛ'n 19sanngɛ mɛn'n nun ninnge'n i ngokoɛ'n, nin anyanbeun i klolɛ'n, nin bé nyin b'ɔ blo ninnge wie'm be su'n, ɔ tra Nyanmiɛn ndɛ'n, ɔ man ndɛ sɔ'n yo-man kpa. 20Asiɛ kpa nga kusu bɔ awie'n wie tɔli su'n yɛlɛ be nga kɛ be ti Nyanmiɛn ndɛ'n, be fa su. Be ti kɛ awie b'ɔ yo ye'n sa, kun wlɔ ablasan, kun ekun wlɔ ablesiɛn, yɛ kun ekun wlɔ ya.»

Kannin'n i wun nyanndra

(An `nian Lik 8:16-18)

21Jésus usali be ekun kɛ: «?Be sɔ kannin be fa sie gbogbo bo annzɛ li bo? ?Nán nglo yɛ be sie i-ɔ? 22Afin sa fi su ka-man nvialiɛ nun b'ɔ su tɛ-man nglo-ɔ, yɛ aswre nun ndɛ fi su ka-man lɛ b'ɔ su fite-man su-ɔ. 23Sran ng'ɔ si fa sie'n, man ɔ fa sie.»

24Ɔ seli be ekun kɛ: «Ndɛ nga an ti'n, an `nian su kpa. Suliɛ nga an su nun man sran wie mun'n, i kunngba'n nun yɛ Nyanmiɛn ´su man amun-ɔn, ɔ ´uka amun liɛ'n su.» 25Afin sran ng'ɔ lɛ like'n yɛ be ´mɛn i wie-ɔ, sanngɛ ng'ɔ lɛ-man like'n, kaan ng'ɔ o i sa nun bɔbɔ'n, be ´de.

Awie'n i kpa yolɛ

26Ɔ seli ekun kɛ: «Nyanmiɛn sielɛ'n fa sran kun b'ɔ gua awie.» 27Sɛ ɔ lafi o, sɛ i nyin o su o, wia nun o, kɔnguɛ o, awie'n bɔbɔ fifi, ɔ nyin, ɔ si-man kɛ ɔ yo b'ɔ yo sɔ'n. 28Asiɛ'n bɔbɔ yo i kpa, ɔ fifi, i sin ɔ wlɔ, kpɛkuun ɔ nɔn nzue kpa. 29Kɛ ɔ ko blo'n, be fa wlɔsɔ'n wla nun, afin i kpɛlɛ'n ɔ'a ju .

Mutard'n i wun nyanndra

(An `nian Mat 13:31-32,34; Lik 13:18-19)

30Ɔ seli be ekun kɛ: «?Nguɛ yɛ e ´fa Nyanmiɛn sielɛ'n sunnzun i-ɔ annzɛ nyanndra onin yɛ e ´fa kle i bo-ɔ? 31Ɔ fa tro bɔ be flɛ i mutard'n , kɛ be ´lua'n, ɔ ti kaan tra ninnge mma nga be lua be'n, be kwlaa 32sanngɛ kɛ be ko lua'n, ɔ nyin, ɔ yo dan tra tro'n kwlaa, ɔ trɛ, ɔ man anunman'm be kwla yo bé sua i sama'm be fɔnvɔ'n nun.»

33Ɔ kan Nyanmiɛn ndɛ nga be kwla wun i wlɛ'n kpanngban nyanndra nun kle be. 34Ndɛ ng'ɔ kan kleli be'n, ɔ kɛnnin i kwlaa nyanndra nun, sanngɛ kɛ ɔ nin i sɔnnzɔnfuɛ'm be ngunmin be o lɛ'n, ɔ tu i kwlaa bo kle be.

Jésus i aunngban dan'n i jranlɛ

(An `nian Mat 8:23-27; Lik 8:22-25)

35Le kunngba sɔ'n i nnɔsua su Jésus seli i sɔnnzɔnfuɛ'm be kɛ: «Man e wɔ fɛtɛ'n bue kun lɔ.» 36Kɛ be tuli be bo sran'm be wun lɛ'n, be fa Jésus alie ng'ɔ o nun'n i nun be ɔli, alie wie'm be ko sunmɛnnin i. 37Seke dan kpa kpɛli nzue'n su, ɔ man nzue'n bo guali alie'n nun, ɔ ka kaan nan ɔ'a yi. 38Sanngɛ Jésus la alie'n sin lɔ sunmun'n su ɔ su lafi. Be tinngeli i yɛ be seli i kɛ: «?Baba, kɛ e su wu'n, a bu-mɛn i ndɛ?» 39Ɔ tinngeli nan ɔ'a ijɔ aunngban'n, yɛ ɔ seli nzue'n kɛ: «Yaci bolɛ'n, jran diin!» Kpɛkuun kpe yɛ aunngban'n kpɛli-ɔ, nan lika'n ɔ'a tɔ bliin. 40Yɛ ɔ usali be kɛ: «?Nguɛ ti yɛ srɛ kun amun sɔ-ɔ? ?Ɔ yo sɛ ti yɛ an lafi-man Nyanmiɛn su-ɔ?» 41Srɛ kunnin be dan kpa nan b'a usa bé wun kɛ: « ?Nguɛ sran yɛlɛ nga bɔ aunngban'n nin nzue'n bɔbɔ be sro i sɔ-ɔ?»

Currently Selected:

Mark 4: BB98

Highlight

Copy