Matie 6
6
Yalɛfuɛ'm be like manlɛ'n i su ndɛ
1«An `nian amún wun nán an yo amún sa kpa bɔ Nyanmiɛn sulɛ'n ti yɛ an yo'n, sran'm be ti. Sɛ an yo sɔ'n, an su nyan-man like fi amun Si b'ɔ o nyanmiɛn su lɔ'n i sa nun.
2I sɔ'n ti, sɛ a ´cɛ yalɛfuɛ like'n, nán bo i ndolo kɛ dunman klofuɛ'm be yo i Nyanmiɛn ndɛ suanlɛ nin i srɛlɛ sua'm be nun nin atin'm be su, kɛ sran'm be wun be nan be yi be ayɛ'n be liɛ'n sa. Nanwlɛ, mo nga Nyanmiɛn ko yo be'n, yɛ sran'm be yoli be lɛ-ɔ. 3Sanngɛ ɔ liɛ'n, sɛ a ´fa like man yalɛfuɛ'n, nán man ɔ́ sa bɛ'n si nga ɔ́ sa fama'n yo'n 4nan like nga a fa man yalɛfuɛ'n ɔ'a yo nvialiɛ nun, nan ɔ Si b'ɔ wun nvialiɛ nun sa'n ɔ'a yo wɔ mo.»
Sran nin Nyanmiɛn be yalɛ kokolɛ'n i su ndɛ
(An `nian Lik 11:2-4)
5«Kɛ amun nin Nyanmiɛn amun ´koko yalɛ'n, nán an yo kɛ dunman klofuɛ'm bɔ be klo nglo jranlɛ Nyanmiɛn ndɛ suanlɛ nin i srɛlɛ sua'm be nun nin klɔ'n nun anngɔnda'm be su kɛ sran'm be wun be kɛ be nin Nyanmiɛn su ijɔ'n be liɛ'n sa. Nanwlɛ, mo nga Nyanmiɛn ko yo be'n, yɛ sran'm be yoli be lɛ-ɔ. 6Sanngɛ ɔ liɛ'n, kɛ a nin Nyanmiɛn amun ´koko yalɛ'n, wlu ɔ́ sua ba'n nun lɔ nyin anuan'n nan a nin ɔ Si b'ɔ o nvialiɛ nun'n amu'an ijɔ, yɛ ɔ́ Si b'ɔ wun nvialiɛ nun sa'n, ɔ wa yo wɔ mo.
7Kɛ amun nin Nyanmiɛn amun ´koko yalɛ'n, nán an kan ndɛ kunngba'n flan nun kɛ be bɔ be ti-man Zuif'n be yo'n sa, afin be bu i kɛ sɛ be kan ndɛ kpanngban'n, yɛ Nyanmiɛn ´ti-ɔ . 8Nán an fa be nzuɛn'n mlɔnmlɔn, afin amun Si si like nga amún sa miɛn i wun'n i sin nan amu'an se i. 9I sɔ'n ti'n, amun liɛ'n, an `se kɛ: E si bɔ a o nyanmiɛn su lɔ'n, man sran'm be wun i wlɛ kɛ wɔ ngunmin yɛ a ti Nyanmiɛn nin-ɔn, 10man ɔ sielɛ blɛ'n ju, man e bɔ e wo asiɛ'n su wa'n e yo ɔ klun sa kɛ be bɔ be o nyanmiɛn su lɔ'n be yo'n sa. 11Man ye aliɛ ng'ɔ ju ye ndɛ'n. 12Yaci sa nga e yo wɔ'n cɛ e kɛ e yaci be bɔ be yo é tɛ'n be liɛ'n cɛ be'n sa. 13Nán yaci e lɛ man Lakafuɛ'n laka e, sanngɛ de ye i sa nun. [Afin a ti kpli, a sie like'n kwlaa, yɛ manmanlɛ'n ti ɔ liɛ tititi. Man ɔ yo sɔ!]
14Sɛ an yaci sa nga sran'm be yo amun'n cɛ be'n, amún Si b'ɔ o nyanmiɛn su lɔ'n, i kusu ɔ ´yaci amun liɛ'n cɛ amun. 15Sanngɛ sɛ an yaci-man sa nga sran'm be yo amun'n cɛ-man be'n, amun Si kusu su yaci-man amun liɛ'n cɛ-man amun.»
Srɛ nun kpɛlɛ'n i su ndɛ
16«Sɛ amun ´kpɛ srɛ nun kɛ amun nin Nyanmiɛn amun ´koko yalɛ'n, nán an mlan amun nyrun kɛ dunman klofuɛ'm be yo'n sa, be yo bé wun fiɛn be fa kle sran mun kɛ be su kpɛ srɛ nun. Nanwlɛ, mo nga Nyanmiɛn ko yo be'n, yɛ sran'm be yoli be lɛ-ɔ . 17Sanngɛ ɔ liɛ'n, sɛ a ´kpɛ srɛ nun kɛ a nin Nyanmiɛn amun ´koko yalɛ'n, wunnzin, gua ɔ́ ti'n su parfɛn, toli nun 18nan ɔ'a yo-man kɛ a su fa ɔ́ wun kle sran mun kɛ a su kpɛ srɛ nun. Sanngɛ fa ɔ́ wun kle ɔ Si b'ɔ o nvialiɛ nun'n, yɛ ɔ Si b'ɔ si nvialiɛ nun sa mun'n, ɔ wa yo wɔ mo.»
Be anwlɛn su ninnge'm be siewlɛ
(An `nian Lik 12:33-34)
19«Nán an sie amun anwlɛn su ninnge'm be wa, afin nvɔlɛ nin annganblalɛ be saci be, yɛ awiefuɛ'm be bu anuan'n be wua asiɛ'n su wa. 20Sanngɛ an `sie amun anwlɛn su ninnge mun nyanmiɛn su lɔ, lɔ liɛ'n nvɔlɛ nin annganblalɛ be saci-man like, yɛ awiefuɛ'm be bu-man anuan'n be wua-man. 21Afin lika nga wɔ anwlɛn su ninnge'n wo lɛ'n, lɛ yɛ wɔ akunndan'n wo-ɔ.»
Be wunnɛn'n i kannin
(An `nian Lik 11:34-36)
22«Be wunnɛn'n i kannin yɛlɛ be nyinma, i sɔ'n ti, sɛ ɔ nyinma'n ti kpa'n a wun ase weiin, 23sanngɛ sɛ ɔ nyinma'n ti-man kpa'n, a wun-man ase mlɔnmlɔn. Yɛ sɛ ɔ kannin sɔ'n ɔ kpaja-man'n, i aosin'n ti tɛ!»
Nyanmiɛn nin sika
(An `nian Lik 16:13)
24«Sran kun i min kwla yo-man nnyɔn, san ɔ ´kpɔ kun yɛ ɔ ´klo kun, ɔ ´fɛ i wun mantan kun yɛ ɔ ´yo kun finfin. An kwla yo-man Nyanmiɛn i sran nan amun kunngba'n amu'an yo sika'n i klofuɛ.
25I sɔ'n ti, n ´kan kle amun kɛ, nán an koko ninnge bɔ an lɛ-mɛn'n ti se kɛ: ‹?Nguɛ yɛ e ´di-ɔ? ?Nguɛ yɛ e ´nɔn-ɔn? Annzɛ, ?E ´nyan tannin nin yɛ e ´kla-a? ?Nguan ndɛ'n ti-man cinnjin tra-man aliɛ'n? ?Be wunnɛn'n ti-man kpa tra-man tannin?› »
Bé wla bɔ be fa gua Nyanmiɛn su'n
(An `nian Lik 12:22-31)
26«An `nian anunman'm bɔ be tu sin'n, be gua-man awie, be kpɛ-man awie guɛ-mɛn i tanngannin nun, sanngɛ amún Si bɔ o nyanmiɛn su lɔ'n ɔ ta be. ?An ti-man kpa tra-man be? 27?Amun nun onin yɛ i kokolɛ nun ɔ kwla guɛ i afuɛ'n su bɔ kan-an ? 28?Yɛ nguɛ ti yɛ an koko tralɛ ti-ɔ? An `nian waka nyrɛ bɔ be o blo lɔ'n, be di-man fie, be to-man jese. 29Ɔ nin i sɔ'n ngba, an `nian, Salomɔn bɔbɔ ɔ nin i anyanbeun'n kwlaa ɔ'a kla-man be nun wafa kun i wunsu tannin le . 30?Sɛ Nyanmiɛn yo ijre'n bɔ ndɛ ɔ o blo lɔ bɔ ainman be ´guɛ i sin nun'n i klanman kɛ nga sa'n, ɔ su kata-man amún wun sɔ kpɛ blu? ?An lafi-man Nyanmiɛn su? 31I sɔ'n ti, nán an koko se kɛ: ‹?Ndɛ nguɛ yɛ e ´di-ɔ? Annzɛ, ?Nguɛ yɛ e ´nɔn-ɔn? Annzɛ, ?Nguɛ yɛ e ´kla-a?› 32Like sɔ'n kwlaa be bɔ be su-man Nyanmiɛn'n be yɛ be kunndɛ-ɔ. Nán an yo sɔ, afin amún Si b'ɔ o nyanmiɛn su lɔ'n si kɛ amún sa mian like sɔ'm bé wun. 33An `dun mmua fa amún wun man Nyanmiɛn man ɔ sie amun, yɛ an `yo i klun sa'n, i sin ɔ wa fa ninnge sɔ'n kwlaa uka su man amun. 34I sɔ'n ti, nán an koko ainman liɛ'n, afin ainman bɔbɔ yɛ ɔ ´kunndɛ i wun like-ɔ. Cɛn ba kun nun afɛ'n ɔ ju cɛn sɔ'n nun.»
Currently Selected:
Matie 6: BB98
Highlight
Share
Copy
Want to have your highlights saved across all your devices? Sign up or sign in
Baoulé Bible © Alliance Biblique de Côte d'Ivoire, 1998.
