Matie 21
21
Jésus i Zerizalɛm klɔ'n nun wlulɛ
(An `nian Mar 11:1-11; Lik 19:28-40; Zan 12:12-19)
1Kɛ be wa ju Zerizalɛm bɔ be juli Bɛtfaze b'ɔ o Olivie Oka'n i wun lɛ'n su'n, Jésus sunmɛnnin i sɔnnzɔnfuɛ'm be nun nnyɔn, 2ɔ seli be kɛ: «An `wɔ klɔ'n bɔ wo amun nyrun lɛ'n su. Kɛ an ju lɔ'n, amun ´wun aflunmun kun b'a minndɛ i lɛ, ɔ nin i wa. An `nyannji i blɛ min. 3Sɛ sran wie usa amun sa'n, an `se i kɛ: ‹E Min'n i sa miɛn i wun, i waan e fa blɛ i.› Kpɛkuun ɔ ´yaci be nun kɛ an fa be bla.» 4Sa sɔ'n yoli sɔ nan Nyanmiɛn nuan ijɔfuɛ'n i ndɛ'n `kpɛn su, afin ɔ seli kɛ:
5«Se Siɔn wa bla'n kɛ:
Nian, ɔ famiɛn'n su ba ɔ sin.
Ɔ ti wɛtɛɛfuɛ dan kpa, ɔ fu aflunmun su,
ɔ fu aflunmun b'ɔ ti nnɛn
b'ɔ sua trɔ'n i wa bɔ ɔ'a kpɛ cro'n i su .»
6Jésus sɔnnzɔnfuɛ'm be ɔli nan b'a yo i kɛ ng'ɔ kan kleli be'n sa. 7Be fali aflunmun'n nin i wa'n bali, be fa bé tannin mun sɛsɛli be su, nan Jésus a tran su. 8Sran kaka kpa be sɛsɛli bé tannin mun atin'n nun, yɛ wie'm be kusu be bubuli nnya guɛguɛli atin'n nun. 9Sran nga be dun mmua Jésus nyrun'n ɔ nin be nga be su i su'n, be kpan se kɛ:
«Ozanna David Anunman!
‹Sran ng'ɔ ba e Min Nyanmiɛn dunman nun'n
man ɔ nyan nguan!›
Man Ozanna'n tɛ nyanmiɛn su lɔ !»
10Kɛ ɔ wluli Zerizalɛm klɔ nun'n, klɔ wunmuan'n kejeli, yɛ be usali kɛ: «?Wan-an?» 11Sran nga be su i su'n be se kɛ: «Jésus b'ɔ ti Nyanmiɛn nuan ijɔfuɛ'n b'ɔ fin Nazarɛt Galile mɛn'n nun nin-ɔn.»
Aata difuɛ'm be Nyanmiɛn i sua'n nun fuanlɛ
(An `nian Mar 11:15-19; Lik 19:45-48; Zan 2:13-22)
12Jésus wluli Nyanmiɛn i sua'n nun nan ɔ'a fuan be kwlaa nga be yo like atɛ lɔ'n, nin be nga be to like'n, yɛ ɔ su sika mma kacifuɛ'm be tabli'n nin be nga be yo okunmomo atɛ'n be bia'm be bo guali. 13Yɛ ɔ seli be kɛ: «Be klɛli i kɛ: ‹Be wa flɛ ń sua'n lika bɔ sran nin Nyanmiɛn be koko yalɛ nun,› sanngɛ amu'an fa kaci awiefuɛ'm be fiawlɛ .»
14Anyansifuɛ nin cɛcɛwafuɛ'm be bɛli i wun Nyanmiɛn i sua'n nun lɛ, nan ɔ'a yo be juejue.
15Sanngɛ abonuan sa bɔ Jésus yoli be'n, ɔ nin ba kanngan bɔ be kpan Nyanmiɛn i sua'n nun kɛ: «Nyanmiɛn man David Anunman'n cɛ é su'n!», ɔ yoli Nyanmiɛn nyrun jranfuɛ dandan nin mmla klefuɛ'm be ya. 16Be usali Jésus kɛ: «?A ti ndɛ nga be kan'n?» Jésus seli be kɛ: «N ti. ?Ndɛ nga be klɛli kɛ: ‹A fa ɔ manmanlɛ'n wlɛli ba kanngan nin be nga be tɛ nɔn'n bé nuan'n,› an nian kɛnngɛn-mɛn i le ?»
17Ɔ yaci be lɛ ɔli Betani, nan ɔ'a la lɔ.
Figie'n bɔ Jésus boli i sannzan'n
(An `nian Mar 11:12-14,20-24)
18Kɛ aliɛ cɛnnin'n nglɛmun bɔ Jésus ´sɛ i sin Zerizalɛm'n, awe kunnin i. 19Ɔ wunnin figie bo kun atin'n nun, ɔ ɔli i bo lɔ, ɔ'a wun-man mma su, san nnya yɛ ɔ o su-ɔ. Yɛ ɔ seli kɛ: «Ɔ waka nga, a su su-man kun le! Kpɛkuun figie sɔ'n wuli kee be osu kunngba'n nun lɛ.» 20Kɛ i sɔnnzɔnfuɛ'm be wunnin sa sɔ'n, ɔ boli bé nuan, yɛ be usali kɛ: «?Eee, ɔ yo sɛ yɛ man figie nga wuli i ja nun lɛ sɔ-ɔ?» Nan Jésus a se be kɛ: 21«Nanwlɛ, sɛ an lafi Nyanmiɛn su bɔ amun anwlɛn'n ti-man nnyɔn-nnyɔn'n, nán kɛ like nga n yoli figie nga kunngba yɛ amun ´yo-ɔ, sanngɛ sɛ an se oka ng'ɔ o yɛ'n kɛ ɔ tu i bo lɛ ɔ ko tɔ jenvie'n nun'n, ɔ ´kɔ . 22Like kwlaa nga an kan kle Nyanmiɛn kɛ ɔ yo bɔ an lafi i su kɛ ɔ ´yo'n, ɔ ´yo man amun.»
Jésus i atin b'ɔ lɛ'n
(An `nian Mar 11:27-33; Lik 20:1-8)
23Jésus ɔli Nyanmiɛn i sua'n nun lɔ. Kɛ ɔ ´kle like'n, Nyanmiɛn nyrun jranfuɛ dandan nin mɛn kpɛnngbɛn'm be wa usɛli i kɛ: «?Wan dunman nun yɛ a yo sa nga mun-ɔn? ?Yɛ wan yɛ ɔ tuli wɔ kɛ a yo-ɔ?» 24Jésus seli be kɛ: «N kusu, m ma usa amun sa kun, sɛ an tɛ n su'n, n ´kle amun sran ng'ɔ man min atin bɔ n yo sa sɔ mun'n. 25?Zan i batɛm b'ɔ yoli'n, Nyanmiɛn yɛ o mɛnnin i atin annzɛ sran yɛ ɔ mɛnnin i atin yɛ ɔ yoli-ɔ?» Be buli i akunndan nan b'a se be bɔbɔ be afiɛn kɛ: «Sɛ e se kɛ Nyanmiɛn yɛ ɔ mɛnnin i atin'n, ɔ ´usa e kɛ: ‹?Sɛ ɔ ti sɔ'n, nguɛ ti yɛ amu'an lafi-mɛn i su-ɔ?› 26Kusu, sɛ e se kɛ sran yɛ ɔ mɛnnin i atin'n, e su fite-man nun, afin sran'm be kwlaa be bu Zan i Nyanmiɛn nuan ijɔfuɛ.» 27Nan b'a se Jésus kɛ: «E si-man sran ng'ɔ mɛnnin i atin'n.» Yɛ Jésus kusu seli be kɛ: «N kusu, n su kle-man amun sran ng'ɔ man min atin bɔ n yo sa sɔ mun'n.»
Ba yasua nnyɔn bé wun nyanndra
28«An `tie. Bian kun lɛ ba yasua nnyɔn, le kun ɔ seli kpɛnngbɛnfuɛ'n kɛ: ‹N wa, ndɛ kɔ n vinyi fie'n su lɔ.› 29Ɔ seli i kɛ: ‹N kɔ-man.› I sin ɔ buli i akunndan nan ɔ'a wɔ. 30Yɛ bian'n ɔli ba'n i sinma'n i wun lɔ nan ɔ'a kan ndɛ kunngba'n ɔ'a kle i, yɛ i wa waan: ‹Baba, n ´kɔ,› sanngɛ ɔ'a ɔ-man. 31?Ba nnyɔn sɔ'n, onin yɛ ɔ yoli i si klun sa nin-ɔn?» Yɛ be waan: «Klikli nin-ɔn.» Yɛ Jésus seli be kɛ: «Nanwlɛ, gua bo sika defuɛ nin tekle mmla'm be ´dun mmua fa bé wun man Nyanmiɛn kɛ ɔ `sie be amun nyrun. 32Afin Zan wa kleli amun atin ng'ɔ ti kpa'n, amu'an lafi-mɛn i su. Sanngɛ gua bo sika defuɛ nin tekle mmla'm be lafili i su, yɛ amun bɔ an wunnin sa sɔ'n, amu'an kaci-man amun nzuɛn'n kɛ amun ´lafi i su.»
Vinyi fie sunianfuɛ'm bé wun nyanndra
(An `nian Mar 12:1-12; Lik 20:9-19)
33«An `tie nyanndra kun ekun. Awlo bo kpɛn kun o lɛ, ɔ dili vinyi fie, ɔ sili i wun. Ɔ kpɛli vinyi'n i mma i nzue cuɛnwlɛ, yɛ ɔ kplannin akpa fleiin kun, i sin ɔ kunndɛli sran ɔ fa fie'n wlali bé sa nun nan ɔ'a ɔ nvle wie nun . 34Kɛ vinyi i mma'n i tilɛ mantannin'n, ɔ sunmɛnnin i sran mun vinyi fie'n i sunianfuɛ'm bé sin kɛ be ko fɛ i liɛ blɛ i. 35Vinyi fie'n i sunianfuɛ'm be trɛli i sran mun, be boli kun, yɛ be kunnin kun, nan b'a finfin nsan su'n i yɛbuɛ. 36Ɔ sunmɛnnin i sran wie mun ekun bɔ be sɔnnin kpa tra klikli liɛ mun, sa kunngba nga vinyi fie sunianfuɛ'm be fa yoli klikli liɛ mun'n, yɛ be fa yoli be wie-ɔ. 37Kɛ ɔ yoli sɔ'n, i awieliɛ su ɔ sunmɛnnin i bɔbɔ i wa'n bé wun lɔ, afin ɔ seli i wun kɛ: ‹N wa'n liɛ'n, be wa bu i sran.› 38Sanngɛ kɛ vinyi fie sunianfuɛ'm be wunnin i wa'n, be seli be wiengu kɛ: ‹I aja difuɛ'n yɛ, an bla man e kun i nan e fɛ i ninnge mun.› 39Be trɛ i fa ɔli vinyi fie'n sin lɔ nan b'a kun i. 40?Sɛ fie i fuɛ'n ba'n, an bu i kɛ ɔ ´yo sran sɔ'm be sɛ?» 41Be waan: «Ɔ ´kun sran tɛtɛ sɔ mun nyrɛnnɛnnɛnnɛn, ɔ ´fa fie'n wla sran uflɛ'm bé sa nun, i liɛ'n, vinyi mma'n i tilɛ blɛ nun'n, ɔ ´nyan su like .»
42Jésus usali be kɛ: «?Ndɛ nga be klɛli i kɛ:
‹Yɛbuɛ nga sua kplanfuɛ'm
be yili blo'n i yɛ ɔ'a kaci yɛbuɛ kpa
b'ɔ tra sua'n i cɔnjɔ'n i ase'n,
i sɔ'n fin e Min Nyanmiɛn,
yɛ kɛ e wun i'n, ɔ bo é nuan'n,›
an nian kɛnngɛn-mɛn i le?
43I sɔ'n ti, n ´kan kle amun kɛ, be wa de Nyanmiɛn famiɛn dilɛ'n amún sa nun, be ´fa man nvle uflɛ bɔ be wa yo sa kpa mɛn i'n. [ 44Sran kwlaa ng'ɔ tɔ yɛbuɛ sɔ'n su'n, ɔ ´titi i nun tritri, yɛ sran nga yɛbuɛ sɔ'n tɔ i su'n ɔ ´kpɔtɔ i .]» 45Kɛ Nyanmiɛn nyrun jranfuɛ dandan mun nin Farizifuɛ'm be tili nyanndra sɔ mun'n, be wunnin i wlɛ kɛ be ndɛ yɛ Jésus kɛn i sɔ nin-ɔn. 46Be klo kɛ be ´trɛ i, sanngɛ srɛ kun be sran'm bé wun, yɛlɛ kɛ be bu Jésus i Nyanmiɛn nuan ijɔfuɛ.
Currently Selected:
Matie 21: BB98
Highlight
Share
Copy
Want to have your highlights saved across all your devices? Sign up or sign in
Baoulé Bible © Alliance Biblique de Côte d'Ivoire, 1998.
