Lik 1
1
Ndɛ klikli bɔ Lik kan kleli Teofil'n
1Teofil n sran kpa, sran sunman be boli manndrɛn be klɛli sa ng'ɔ yoli e nyrun wa'n. 2Kɛ sa sɔ'n ´yo'n, sran nga be wunnin nun'n, be fa Nyanmiɛn ndɛ kanlɛ'n kacili be junman, be kan kleli ye. Ndɛ sɔ'n yɛ be klɛli nin-ɔn. 3I sɔ'n ti, n kusu, kɛ n usa-usa sa sɔ'n nun kpa bɔ n wunnin kɛ ɔ fa boli i bo'n, n wun i kɛ ɔ ti kpa kɛ n klɛ ndɛ sɔ'n blɛ wɔ 4nan a si kɛ like nga be kleli wɔ'n ti nanwlɛ.
Zan batɛm yofuɛ'n i awuliɛ ndɛ kanlɛ
5 Erɔd b'ɔ ti Zide famiɛn'n i blɛ su Nyanmiɛn nyrun jranfuɛ kun o lɛ, be flɛ i kɛ Zakari, ɔ ti Nyanmiɛn nyrun jranfuɛ akpasua bɔ be flɛ i Abia'n, i nunfuɛ. Be flɛ i yi'n kɛ Elizabɛt, ɔ fin Aarɔn osu'n nun. 6Be nnyɔn'n be yo e Min Nyanmiɛn klun sa, be fɛ i ndɛ'n nin i mmla'n kwlaa su kpa.
7Sanngɛ b'a wu-man ba yɛlɛ kɛ Elizabɛt ti klun kpanfuɛ, yɛ be nnyɔn'n b'a yo kpɛnngbɛn.
8Le kun bɔ Nyanmiɛn nyrun jranlɛ junman'n toli Abia akpasua liɛ'n, bɔ Zakari o lɛ ɔ ´di i junman'n, 9be tuli fɔtɔ kɛ be yo i titi'n sa, nan ɔ'a tɔ i su kɛ ɔ `wlu e Min Nyanmiɛn i sua'n nun ɔ yra ansans'n . 10Kɛ ɔ ´yra ansans'n bɔ sran'm be kwlaa be o guasu lɛ be ´srɛ Nyanmiɛn kɛ ɔ ´nian be su'n, 11ɔ ´nian-an, e Min Nyanmiɛn i anz kun jin ansans yralɛ'n i fama su lɛ. 12Kɛ Zakari wunnin i'n, i akunndan sanngannin yɛ srɛ kunnin i. 13Yɛ anz'n seli i kɛ: «Zakari, nán srɛ kun wɔ, afin ndɛ nga a kan kleli Nyanmiɛn'n, ɔ tili. Ɔ yi Elizabɛt ɔ wa wu ba yasua kun man wɔ, a ´tɔn i dunman Zan. 14Ɔ klun wa jɔ, yɛ a ´si able, kɛ be ko wu i'n, sran sunman be klun ´jɔ. 15Afin ɔ ´yo sran dan e Min Nyanmiɛn'n nyrun, ɔ su nɔn-man nzan b'ɔ bo'n i wie fi, ɔ nin Nyanmiɛn Wawɛ'n fin blɔlɔ . 16Ɔ man Izraɛlfuɛ kpanngban be ´sa be sin be Min Nyanmiɛn i sin. 17Ɔ ´dun e Min'n i nyrun, akunndan kunngba nga Eli buli'n, ɔ ´bu wie, yɛ sa kekleekle nga Eli yoli'n, ɔ ´yo wie. Ɔ ´siesie ba'm be nin bé si'm be afiɛn, ɔ man nyin keklefuɛ'm be ´kaci, yɛ be ´bu akunndan kpa, ɔ man sran'm be ´buabua bé wun minndɛ e Min'n .» 18Zakari usali anz'n kɛ: «?Ɔ ´yo sɛ yɛ n ´kwla si sɔ sakpa-a? Afin m'an yo kpɛnngbɛn, yɛ min yi kusu ɔ'a di afuɛ lɔuun.» 19Anz'n seli i kɛ: « Min yɛ be flɛ min Gabriɛl nin-ɔn, n ti Nyanmiɛn i sran. Ɔ sunmannin min kɛ n wa wun ɔ wun nan n kan ndɛ fɛ nga n kle wɔ. 20Nian, a wa yo bobo, a su kwla-man ijɔ lele san b'a wu ba sɔ'n, yɛlɛ kɛ a lafi-man min ndɛ'n su, sanngɛ sɛ i cɛn'n ju'n sa sɔ'n ´yo.»
21Kɛ ɔ ´yo sɔ'n, wuun sran'm be su minndɛ Zakari, be klun titi be, yɛlɛ kɛ ɔ cɛli Nyanmiɛn i sua'n nun lɔ. 22Kɛ ɔ fin lɔ fiteli'n, i waan ɔ ´kan ndɛ kle be, sanngɛ ɔ kwla ijɔ-man, ɔ man be wun i wlɛ kɛ ɔ wunnin aolia nun like Nyanmiɛn i sua'n nun lɔ. Kpɛkuun ɔ fɛ i sa kan ndɛ kleli be, yɛ ɔ kali bobo lelele.
23Kɛ i cɛn'n juli'n, ɔ ɔli i awlo. 24Kɛ ɔ dili le nnyɔn kun'n, i yi Elizabɛt wunnzɛli, ɔ fiali anglo nnun. Ɔ seli kɛ: 25«Nian ye dan bɔ e Min Nyanmiɛn'n ɔ'a yo min-ɔn, siɛn'n, ɔ'a titi min nyrun nyannzuɛn'n sran'm be nyrun .»
Jésus i awuliɛ ndɛ kanlɛ
26Kɛ Elizabɛt wunnzɛli i anglo nsiɛn su'n, Nyanmiɛn sunmannin anz Gabriɛl kunngba'n Galile klɔ kun bɔ be flɛ i Nazarɛt'n su. 27Ɔ sunmɛnnin i talua kun b'ɔ nian si-man bian bɔ be flɛ i kɛ Mari'n i wun lɔ. Bian kun bɔ be flɛ i Zozɛf b'ɔ fin David osu nun'n, ɔ trɛli i ase. 28Ɔ wluli talua sɔ'n i awlo lɔ ɔ yoli i like, ɔ seli kɛ: «Ɔ liɛ su ti ye! Man e Min Nyanmiɛn'n jran ɔ sin!» 29Ndɛ sɔ'n sɛnngɛnnin i akunndan, yɛ ɔ seli kɛ: «?Like nga be yo min yɛ'n, i bo yɛlɛ onin?» 30Anz'n seli i kɛ: «Mari, nán srɛ kun wɔ, afin Nyanmiɛn a bu wɔ sran. 31Nian, a wa wunnzɛ, a ´wu ba yasua, yɛ a ´tɔn i dunman Jésus. 32Ɔ ´yo sran dan, be ´flɛ i kɛ Nyanmiɛn bɔ like fi nun-mɛn i sin'n i Wa, yɛ e Min Nyanmiɛn'n ɔ ´fɛ i nannan David bia'n mɛn i.» 33Ɔ ´sie Zakɔb awlo'n, yɛ ɔ ´ka be osu'n nun tititi . 34Mari usali anz'n kɛ: «?Kɛ bɔ n si-man yasua'n, ɔ ´yo sɛ yɛ sa sɔ'n kwla yo-ɔ?» 35Yɛ anz'n seli i kɛ: «Nyanmiɛn Wawɛ'n ɔ ´ba ɔ́ wun, yɛ Nyanmiɛn bɔ like fi nun-mɛn i sin'n, ɔ ´jran ɔ sin. I sɔ'n ti'n, ba'n bɔ a ´wu i b'ɔ ti Nyanmiɛn liɛ klonglo'n, be ´flɛ i Nyanmiɛn Wa . 36Nian, Elizabɛt b'ɔ ti ɔ osufuɛ'n, ɔ'a wunnzɛ i kpɛnngbɛn ba, bla sɔ'n bɔ be flɛ i klun kpanfuɛ'n, ɔ'a wunnzɛ i anglo nsiɛn yɛ. 37Afin sa kwlaa nga Nyanmiɛn waan ɔ ´yo'n, ɔ kwlɛ i yo.» 38Mari seli kɛ: «Min yɛ, n ti e Min Nyanmiɛn'n i afanniɛn, Nyanmiɛn nin ɔ́ nuan fɛ.» Yɛ anz'n yacili i lɛ ɔli-ɔ.
Mari i Elizabɛt wun wunlɛ
39Kɛ ɔ yoli sɔ'n, le kun Mari fali atin ɔli Zida klɔ kun b'ɔ o oka'm be nun lɔ'n su trɛlɛlɛ. 40Ɔ wluli Zakari awlo lɔ, ɔ yoli Elizabɛt like. 41Kɛ Elizabɛt tili like bɔ Mari yoli i'n, i ku'n jaojaoli, Nyanmiɛn Wawɛ'n wluli'n i nun, ɔ kpannin kekle kpa kɛ: 42«Eee, mmla'm be nun Nyanmiɛn a bu wɔ sran, yɛ ba'n b'ɔ o ɔ klun lɔ'n, i kusu Nyanmiɛn bu i sran. 43?Wan yɛlɛ min bɔ min Min'n i nin'n ba min wun wa-a? 44Afin kɛ n tili like bɔ a yoli min'n cɛ'n, ba'n b'ɔ o n klun lɔ'n, i klun jɔli, ɔ man n ku'n jaojao. 45Mmo, ɔ bɔ a lafi ndɛ bɔ e Min Nyanmiɛn kannin'n su kɛ ɔ ´yo'n, ɔ liɛ su ti ye.»
Jue bɔ Mari to manmannin Nyanmiɛn'n
46Mari seli kɛ:
« Mín wun blibli min, ɔ man
m ´manman min Min Nyanmiɛn'n.
47Nyanmiɛn b'ɔ ti n defuɛ'n ti, n klun jɔ,
48yɛlɛ kɛ ɔ'a nian m bɔ
n ti i afanniɛn aenvuɛfuɛ kan'n i osu.
Afin kɛ ɔ fin ndɛ'n, sran'm be kwlaa be wa se n kɛ:
‹Mmo, ɔ liɛ su ti ye!›
49Nyanmiɛn b'ɔ kwla like kwlaa yo'n,
ɔ'a yo sa dan ɔ'a man min.
I dunman'n lɛ-man wunsu.
50Kɛ ɔ fin lalafuɛ nun
lele b'ɔ ´fa ju ndɛ'n,
ɔ si be bɔ be sro i'n be aunnvuɛ titi.
51Ɔ yili i kwlalɛ'n nglo,
Ɔ buli wun tufuɛ'm
bɔ be gugu dandan'n bé bue.
52Ɔ kpaloli famiɛn ngbli-ngbli'm bé bo bia'n,
ɔ mannin yalɛfuɛ'm be su.
53Be nga awe kun be'n,
ɔ man be like kpakpa man be ku yi.
Ɔ man anyanbeunfuɛ'm be fa bé sa ngbɛn kɔ.
54-55Ɔ jrɛn i sran Izraɛlfuɛ'm be sin.
Yɛ ndɛ b'ɔ kan kleli e nannan mun'n,
nin Abraam nin i osufuɛ mun
kɛ ɔ ´si be aunnvuɛ titi'n,
i wla o su .»
56Mari dili anglo nsan Elizabɛt wun lɛ, i sin ɔ ɔli i klɔ.
Zan batɛm yofuɛ'n i awuliɛ
57Kɛ Elizabɛt ku'n beli b'ɔ juli i awuliɛ'n, ɔ wuli ba yasua. 58Kɛ Elizabɛt i tranfuɛ nin i osufuɛ'm be tili kɛ e Min Nyanmiɛn'n ɔ'a si i aunnvuɛ dan'n, be klun jɔli. 59Kɛ ba'n dili le mɔcuɛ'n, be ko wlɛli i klɛn, be waan be ´fɛ i tɔn i si Zakari . 60Sanngɛ i nin waan: «Cɛcɛ, man be flɛ i Zan.» 61Yɛ be seli i kɛ: «Be flɛ-man sran fi sɔ ɔ osu'n nun.» 62Be fali bé sa usɛli i si kɛ ɔ kle dunman ng'ɔ klo kɛ be fa flɛ i'n. 63Zakari man be mɛnnin i waka bue kun nan ɔ'a klɛ su kɛ: «Be flɛ i Zan.» Ɔ boli be kwlaa bé nuan. 64Bé ja osu kunngba'n nun kpɛkuun ɔ'a kwla ijɔ, yɛ ɔ yili Nyanmiɛn ayɛ-ɔ. 65Srɛ kunnin be kwlaa nga be mantan-mantan lɛ'n. Be kannin sa sɔ'n i ndɛ Zide akpasua b'ɔ o oka-oka lika kwlaa nun su. 66Be kwlaa nga be tili ndɛ sɔ'n, be buli i akunndan. Be seli kɛ: ?Nguɛ yɛ ba nga ɔ wa yo-ɔ? Afin e Min Nyanmiɛn jin i sin.
Sa ng'ɔ wa yo bɔ Zakari kannin'n
67Nyanmiɛn Wawɛ'n wluli i si Zakari i nun, ɔ kannin sa ng'ɔ wa yo'n, ɔ seli kɛ:
68«Izraɛl'm be Nyanmiɛn
b'ɔ ti e Min'n, i kwla o,
yɛlɛ kɛ ɔ'a niɛn i sran'm be osu,
ɔ'a de bé.
69Yɛ ɔ'a fɛ i sran David awlofuɛ kun
b'ɔ kwla de ye'n ɔ'a man ye.
70Kɛ ɔ fin lalafuɛ nun'n,
ɔ man i nuan ijɔfuɛ'm be seli kɛ:
71‹Ɔ wa de ye be nga be nin ye kun'n,
bé sa nun yɛ ɔ wa de ye
be kwlaa nga be kpɔ ye'n bé sa nun kusu.
72Ɔ si e nannan'm be aunnvuɛ,
yɛ i wla o ndɛ b'ɔ kan kleli be'n su.
73-75Afin Nyanmiɛn tɛli i wun nda
kleli e nannan Abraam kɛ
ɔ ´de ye e kpɔfuɛ'm bé sa nun,
ɔ man srɛ kun-man ye kun.
E ´kwla yo i klun sa,
e ´su i nanwlɛ su lele fa ju e wie cɛn.
76Bakan, ɔ kusu, be wa flɛ wɔ
Nyanmiɛn bɔ like fi nun-mɛn i sin'n
i nuan ijɔfuɛ, afin a ´dun mmua
e Min'n nyrun a ´siesie i akpɔ'n .
77Wɔ yɛ man Nyanmiɛn sran'm be ´si kɛ
kɛ ɔ yaci bé wun sa'n cɛ be'n
b'a nyan bé ti-ɔ.
78Aunnvuɛ dan bɔ e Nyanmiɛn'n si ye'n ti'n,
ɔ fin nglo lɔ ɔ wa nian e osu kɛ ɔ ´yo
nan kɛ aliɛ'n cɛn bɔ wia'n fite'n ,
79ɔ ´kpaja be bɔ be o aosin'n nun
nin wie'n i fɔnvɔ nun'n be su.›
Yɛ ɔ ´kle ye atin nga e sin su-ɔ
e ´di alaje'n .»
80Bakan sɔ'n nyinnin klanman, ɔ yoli sran. Ɔ trannin aawlɛ flɛnnɛn nun lɔ lele fa juli cɛn ng'ɔ yi i wun kleli Izraɛlfuɛ mun'n.
Currently Selected:
Lik 1: BB98
Highlight
Share
Copy
Want to have your highlights saved across all your devices? Sign up or sign in
Baoulé Bible © Alliance Biblique de Côte d'Ivoire, 1998.
