Bo Bolɛ 34

Simeɔn nin Levi be niaan bla bɔ be kuɛkuɛli i'n i su klunngbɔ tulɛ

1Be flɛ ba bla nga Lea nin Zakɔb be wuli i'n kɛ Dina. Cɛn kun Dina ɔli mɛn sɔ'n nun lɛ talua wie mun bé wun wunlɛ. 2Kpɛkuun Amɔr b'ɔ ti Evfuɛ'm be kpɛnngbɛn'n i wa Sisɛm ɔ'a wun i. Ɔ trɛli i, ɔ nin i be lali kekle nun. 3Ɔ kloli Zakɔb wa sɔ'n dan, ndɛ ng'ɔ ko kan nan ɔ'a nyɛn i'n, ɔ kan kleli i. 4Ɔ seli i si Amɔr kɛ: «Ja talua sɔ'n man min.»

5Kɛ Zakɔb ´ti i kɛ Sisɛm ɔ'a sokpɛ i wa'n, wuun i mma yasua'm b'a ɔ blo, nnɛn'm be kankanlɛ, i ti ɔ'a tɛ-man su ka nan b'a ba.

6Kpɛkuun Sisɛm i si Amɔr ɔ'a a to Zakɔb kɛ ɔ ´bo aja ndɛ'n su kle i. 7Kɛ Zakɔb i mma yasua'm be fin blo lɔ bali bɔ be tili sa nga Sisɛm yoli'n, ɔ'a yo-man be fɛ mlɔnmlɔn. Afin wafa nga Sisɛm nin Zakɔb i wa bla'n be lali'n, nán i atin su-ɔ. Ɔ ti tete yɛ ɔ'a bo i Izraɛl mɛn'n nun-ɔn, i ti be fali ya dan kpa. 8Amɔr seli be kɛ: «Mín wa Sisɛm ɔ klo amun niaan bla'n dan. An `yaci, an `fɛ i be mɛn i man ɔ jɛ i. 9Amun man e nuan sɛ ndɛ nga e wa kɛn i yɛ'n su: Man e ja amun mma bla mun, man amun kusu an ja e liɛ mun. 10Amun nin e `tran wa. E mɛn'n yɛ ɔ o lɛ-ɔ. An `tran wa, an `di aata, nan an `to amun bɔbɔ amun asiɛ.»

11Sisɛm bali-ɔ, ɔ wa seli Dina i si nin i niaan'm be kɛ: «An `yaci, like kwlaa nga amun waan an ´de min'n, n ´fa man amun. 12Amun li, an `fa talua'n be man min. An `bo i aja like'n dan kpa, man i sin ninnge'n sɔn, ngasi nun-man nun, n ´fɛ i kwlaa m ´man amun.»

13Kpɛkuun Zakɔb i mma'm be fali gblɛ be fa tɛli Sisɛm nin i si Amɔr be su sokpalɛ bɔ Sisɛm sokpali be niaan bla Dina'n ti. 14Be seli be kɛ: «E fa e niaan bla'n e man yasua nga b'a wlɛ-mɛn i klɛn nin-ɔn, ɔ yo-man ye. Ɔ ti é nyin ase gualɛ. 15Sɛ an ´wun kɛ e ´fa ndɛ nga an kan'n su'n, wuun amun nvle'n nun lɔ yasua'm be kwlaa b'a wla klɛn kɛ e sa. 16I liɛ'n, e ´fa é wa bla mun e ´man amun an ´ja be, yɛ kusu e ´ja amun lɔ bla. Yɛ e nvle nnyɔn'n e ´tran likawlɛ, e ´kaci nvle kun. 17Nan sɛ amu'an wla-man klɛn'n, e ´fa e niaan bla'n e ´kɔ.»

18Amɔr nin i wa Sisɛm be kplinnin ndɛ nga be kannin'n su. 19Klolɛ bɔ gbanflɛn'n klo Zakɔb i wa bla'n ti, ɔ'a sisi-mɛn i bo sa sɔ'n i yolɛ nun. Kusu i si i awlo'n nun'n, i yɛ ɔ lɛ nyrun tra be ngba-a. 20Amɔr nin Sisɛm be ɔli klɔ'n i anuan'n nun lɔ kan be kan ndɛ lɛ'n, nan b'a se be klɔ sufuɛ'm be kɛ: 21«Minniɛn sɔ'm be klo e sa. Man be ka é mɛn'n nun wa be di aata. E `yaci e lika'n lɛ e `man be. Man e `ja be lɔ bla nan be kusu be `ja é wa bla. 22Sanngɛ be waan sɛ e waan e nin be e ´kaci nvle kun'n, wuun é wa yasua'm be kwlakwla b'a wla klɛn kɛ be sa. 23I liɛ'n be nnɛn nin bé bo ninnge'm be ´yo e liɛ mlɔnmlɔn. Nan i ti-ɔ, amun man e kplin nga be kannin'n su nan be nin e tran.»

24Be kwlaa nga be ɔli ndɛ kanwlɛ lɔ klɔ'n i anuan'n nun lɔ'n, be kplinnin Amɔr nin Sisɛm be ndɛ'n su, ɔ man klɔ'n su yasua'm be kwlaa be wlali klɛn. 25I le nsan'n su'n, bɔ be keje be wun-ɔn ɔ yo-man ye'n, Zakɔb i mma'm be nun nnyɔn, Simeɔn nin Levi bɔ be nin Dina bé nin ti kun'n, kun fali tokofi kun, kun fali tokofi kun, be wluli klɔ'n nun blɛlɛlɛ kpɛkuun be kunnin yasua'm be kwlaa. 26Be kunnin Amɔr nin i wa Sisɛm wie nan b'a fa Dina b'a ba. Be fɛli i Sisɛm i sua'n nun lɔ.

27Zakɔb i mma nga mun be fali be nga be kunnin be'n bé bo ninnge mun. Be fɛnnin klɔ'n su ninnge'm be kwlaa be niaan bla bɔ be sokpɛli i'n ti. 28Be fali be bua nin bé boli nin be nannin ɔ nin be aflunmun mun. Be fali klɔ wa ninnge nin blo lɔ liɛ mun. 29Be fali bé bo ninnge kpakpa'm be ngba. Be fali bé yi nin be mma mun, ɔ nin sua'm be nun ninnge mun.

30Zakɔb seli Simeɔn nin Levi be kɛ: «Amun man m'an mian. Amun ti man mɛn nga nun sran mun, Kanaanfuɛ nin Ferezfuɛ mun bé nyin wa ci min. Mín sa nun sran'm be ti ba nnyɔn cɛ. Mɛn nga nun sran sɔ'm be wa ju gua mín wun, be ´kwla min, yɛ be ´nunnun min nin min awlofuɛ mun.»

31Kpɛkuun be tɛli i su kɛ: «?Wuun tekle bla yɛlɛ e niaan bla'n yɛ man be yo i sɔ-ɔ?»

Currently Selected:

Bo Bolɛ 34: BB98

Highlight

Copy