Efɛzfuɛ Mun 1

Pɔl klɛ fluwa nga ko mannin Efɛz lɔ Kristfuɛ mun

1M Pɔl yɛ n klɛ fluwa nga blɛ amun bɔ an wo Efɛz lɔ mun-ɔn.

Ɔ ti amun bɔ an ti Kristfuɛ bɔ amun nin Krist-Jésus amu'an kaci sran wunmuan'n bɔ amun nin i nanti kpa'n amun liɛ. Krist-Jésus sunmannin min yɛ n sunmanlɛ sɔ'n ti Nyanmiɛn klun su. 2Man e Si Nyanmiɛn nin e Min Jésus-Krist be man an nyan ye, yɛ man amún wun jɔ amun fɔuun!

Ninnge kpakpa nga Nyanmiɛn yo man e Krist ti'n

3E Min Jésus-Krist i Si Nyanmiɛn i kwla o! Kɛ e nin Jésus-Krist e kacili sran wunmuan'n, ɔ fali nyanmiɛn su lɔ ninnge kpakpa'n kwlaa b'ɔ kwla yo e wun sa ye'n mannin ye. 4I sin nan ɔ'a bo mɛn'n i bo'n, ɔ dun mmua kpali e fali ye kɛ e nin Krist e `kaci sran wunmuan, nan e `yo i bɔbɔ i liɛ, ɔ dun mmua fali ye kɛ nán man ɔ wun sa kaan sa é wun. 5Klolɛ b'ɔ klo ye'n ti, ɔ dun mmua buli ye akunndan kɛ sa nga Jésus-Krist yoli'n ti ɔ ´fa e kaci i klun ba. I klun jɔli su kɛ ɔ ´yo i sɔ'n ti yɛ ɔ yoli sɔ 6nan y'a bo i dunman ye dan b'ɔ fɛli i anwlɛn su Ba'n yoli ye'n ti. 7Kɛ Krist wuli bɔ i mmoja'n guali'n ti, Nyanmiɛn deli é, ɔ yacili sa nga e yoli i'n cɛli ye. I sɔ'n nun e wun ye dan nga ɔ yoli ye 8i klun-ufue'n ti. I ngwlɛlɛ b'ɔ si i'n nin i sa kwlaa wlɛ wunlɛ'n ti, 9ɔ man e si i klun sa b'ɔ fiɛli sran'm be nyrun'n, ɔ nin sa klanman nga i waan Krist `yo man ye'n. 10Sa sɔ'n bɔ i waan ɔ ´yo'n, sɛ i cɛn'n ju'n, ɔ ´yo. Sa sɔ'n yɛlɛ kɛ ɔ ´kan sran'm be kwlaa nin asiɛ'n su like'n kwlaa nin nyanmiɛn su lɔ liɛ'n kwlaa bo nun, yɛ ɔ ´fa Krist sie bé su. 11Like kwlaa nga Nyanmiɛn klo kɛ ɔ yo'n, ɔ yo, ɔ man kɛ e nin Krist e kacili sran wunmuan'n ɔ fa e kacili i liɛ, afin i bɔbɔ yɛ ɔ sieli i sɔ-ɔ. 12Ɔ yo e sɔ nan e bɔ e dun mmua fali é wla guali Krist su'n, e `mɛn i kɔmin su. 13Amun kusu, kɛ an tili jasin fɛ'n b'ɔ ti nanwlɛ'n, b'ɔ man amun kwla nyan amún ti'n, an lafili Krist su. Kɛ amun nin i amu'an kaci sran wunmuan'n ti, Nyanmiɛn fɛli i Wawɛ'n b'ɔ kɛn i ndɛ'n mannin amun b'ɔ kle kɛ an ti i liɛ mlɔnmlɔn. 14Like nga Nyanmiɛn seli e kɛ e ´nyɛn i'n, i Wawɛ sɔ'n yɛ ɔ kle kɛ e ´nyɛn i sakpa nin-ɔn. Ɔ kle e weiin kɛ cɛn nga ɔ ko de i sran'm bé ti mlɔnmlɔn'n e ´nyɛn, yɛ ɔ ´nyan kɔmin.

Sa nga Pɔl srɛli Nyanmiɛn kɛ ɔ yo'n

15I sɔ'n ti'n, n kusu kɛ n tili e Min Jésus i su bɔ an lafi'n nin klolɛ bɔ an klo Nyanmiɛn i sran mun'n, 16ɔ man n la Nyanmiɛn ase, yɛ m bo amun dunman kle i tititi. 17Yɛ n srɛ e Min Jésus-Krist i Nyanmiɛn b'ɔ ti e Si b'ɔ lɛ nyrun'n kɛ ɔ fɛ i Wawɛ'n man amun man an si ngwlɛlɛ. Yɛ n srɛ i kɛ ɔ `yi i wun nglo nan an si i kpa. 18N srɛ i ekun kɛ ɔ `yo nan an wun sa wlɛ weiin kpa nan kɛ ɔ flɛli amun'n, an si like nga i sran'm be nyin o i sin'n. Yɛ n srɛ i kɛ an si kɛ i sran'm be anyanbeun'n ɔ ´yo dan, afin like nga i waan ɔ ´fa man be'n ɔ ti like kpa sakpa. 19Yɛ n srɛ i ekun kɛ an si i kwlalɛ dan b'ɔ lɛ-man wunsu b'ɔ yi i nglo kle e bɔ e lafili i su'n. I kwlalɛ kunngba sɔ'n 20yɛ man ɔ kwla cɛnnin Krist yɛ ɔ fɛ i sieli i fama su nyanmiɛn su lɔ nin-ɔn. 21Krist sie like'n kwlaa blɛ nga e o nun yɛ'n. Yɛ ɔ ´sie like'n kwlaa blɛ ng'ɔ ´ba lɔ'n. Krist sie mmusu mun, nin kpɛnngbɛn mun, nin bae, nin be nga be sie sran mun ɔ nin sran nga be lɛ dunman'm be kwlaa. 22Nyanmiɛn man ɔ sie like'n kwlaa yɛ ɔ fɛ i sieli Asɔnun'n su kpɛn . 23Kristfuɛ'm be kwlaa be ti i wunnɛn, i bɔbɔ yɛ ɔ ti i ti nin-ɔn. I b'ɔ o lika'n kwlaa'n, ɔ wo Asɔnun'n nun.

Currently Selected:

Efɛzfuɛ Mun 1: BB98

Highlight

Copy