Ima̍aki 16

Ohye̍ēyī la okū

(Ima̍tiyu 28:1-8; Ilu̍uku 24:1-12; Ijɔ̍ɔn 20:1-10)

1Ɔ̄chī Ɔmyɛ̍nyɛ̍ ɔla̍ā wā ge̍ ga ma̍, Imeri̍ Oyo̍olima̍gīdala ba̍la Isalo̍me ba̍la Imeri̍ nīi - ɛ̍nɛ̍ yī Ije̍mēehi ma̍ gāa ge̍ ra̍ ɔchi̍ oni̍pī kwɛ̍kwɛ̍ ɔha̍. E̍ chikpo̍ ge̍ē bī ge̍ē re̍tū okū yī Iji̍sɔ̄ɔsi. 2La eyī ɔnyɔ̄nyā yī Ɔ̄chī Ɔrāarāa yī Obri̍īhī nīi - I̍kɔ̍ɔbahɛ ma̍, yɛ̄grāa nīi yɛnɔ yɛ ē bīyɛchɛ ma̍, e̍ pīya ga u̍nwɔ̍wu̍ yī Iji̍sɔ̄ɔsi. 3E̍ kū abɔ̍ɔ che iyī wā ikpo̍ ka ɔ̄nyɛ kpɛ̍ɛ ɔ̍lɔ ge̍ē u̍tu mi̍ya lɛchɔ̄ ɔla̍ā hī oko̍o yī wɔ̄gɔ̄ de aa̍ ma̍/? 4E̍ nā eyī kpaa gāa ma̍, e̍ ma̍ nīi lɛchɔ̄ ɔ̍lɔma̍ mi̍ya ba̍ abɔ̍ɔ ga ɛkū. Lɛchɔ̄ ɔla̍ā chī lɛ bāa oke̍ke̍ni̍ ma̍. 5Anyā ɛla̍ā wā chɛ̄ ga wɔ̄gɔ̄ yī u̍nwɔ̍wu̍ ɔla̍ā bɛ̍ɛ̄nɛ̄. E̍ ma̍ oye̍kre̍biya ɔha̍ nīi hɔ̄ abɔ̍ɔ la wāā yī abɔ̄ līre̍, tū ɔjā ɔnɛ̄rɛ̍ fre̍te̍te̍ ku ajɛ. Anyā ɛla̍ā de kpo̍ hɛ̍ɛgbɛgba gblāa abɔ̍ɔ ji bɛ̍ɛ̄nɛ̄.

6Oye̍kre̍biya ɔla̍ā da wa̍ hīka, “Ala̍ e̍e de kpo̍ hɛ̍ɛgbɛgba ni̍! Je̍ka Iji̍sɔ̄ɔsi yī Ina̍jārɛ̄ɛti nīi e̍ de ɔ̍ gwōba̍ la ɔchi̍ ɔhrɛ̍ɛpa ma̍ nīi ala̍ ē gāla̍ a̍nɛ. O̍ hye̍ēyī la okū mɛ̍; o̍ i̍ hɔ̄ amu gɛ ni̍! Ala̍ ā ma̍ ɛbɛ nīi e̍ de ɔ̍ gbo ma̍ nīi hɔ̄ ma̍. 7Ala̍ ā pīya gɛ! Ala̍ ā gāa ge̍ koko̍o de a̍chi̍kpo̍ yī nū wa̍a̍ tūla Ipi̍ta hīka, ‘O̍ yɔbū de ala̍ yɛ abɔ̍ɔ yɛ gāa Iga̍līli mɛ̍. Abɔ̍ɔ nīi ala̍ ge̍ē ma̍ ɔ̄ a̍nɛ, lɔkɔ nīi anu̍ ɔlɔjā ka de ala̍ o̍bū ma̍.’ ”

8Anyā ɛla̍ā bīyɛchɛ hī u̍nwɔ̍wu̍ lɛnya-lɛnya, tūuhwi kpɛ̍ɛ hɛ̍ ibi̍īyē ejē bāa ɔkpa̍kpa̍ ma̍. E̍ i̍ koko̍o yī lɛlɛ̄lā de ɔ̄chɔ̄chɛ mɛ ni̍, wu̍chē lɔkɔ nīi e̍ yɛ ē tūuhwi gba̍a̍ ma̍.

Iji̍sɔ̄ɔsi de iyī nū chabɔ̄ hu̍ Imeri̍ Oyo̍olima̍gīdala

(Ima̍tiyu 28:9-10; Ijɔ̍ɔn 20:11-18)

9[Iji̍sɔ̄ɔsi hye̍ēyī la okū la ɔ̄chɔ̄chī yī Ɔ̄chī I̍kɔ̍ɔbahɛ ɔla̍ā ma̍, o̍ de iyī nū chabɔ̄ hu̍ Imeri̍ Oyo̍olima̍gīdala yɔbɔ̄ɔbū. Imeri̍ ɔla̍ā nīi o̍ nū yapri̍ija ɔdwɔ̄bi̍ arāapa hī ɔ̄ ibi̍īyē a̍nɛ. 10Imeri̍ pīya gāa ge̍ de koko̍o de a̍chi̍kpo̍ yī nū. Yɛ̄grāa ɔla̍ā, e̍ gblāa abɔ̍ɔ ē drɛ̄ɛgba ē he̍ēyīwɔnɔ. 11O̍ koko̍o de wa̍ ka Iji̍sɔ̄ɔsi ɔ̍lɔ hɔ̄leyī we̍, anɔ̍lɔ ma̍ ɔ̍lɔ mɛ̍. E̍ po̍ ma̍, e̍ i̍ chɛ̄ mɛ ni̍.

Iji̍sɔ̄ɔsi de iyī nū chabɔ̄ hu̍ a̍chi̍kpo̍ yī nū āchɛ ɛpa

(Ilu̍uku 24:13-35)

12La okwi̍ihi yī ɔla̍ā, Iji̍sɔ̄ɔsi gba̍a̍ de iyī nū chabɔ̄ la īgbla ɔha̍ hu̍ āchɛ ɛpa ɛha̍ yɛ̄grāa nīi e̍ yɛ ga wɔlɛ̍ɛchɛ ɔha̍ ma̍. 13E̍ cha wā la wɔlɛ̍ ge̍ ka de a̍chi̍kpo̍ yī nū ehēhī ma̍, e̍ i̍ gba̍a chɛ̄ mɛ ni̍.

Iji̍sɔ̄ɔsi de iyī nū chabɔ̄ hu̍ a̍chi̍kpo̍ yī nū āchɛ igwo̍lɛpa

(Ima̍tiyu 28:16-20; Ilu̍uku 24:36-49; Ijɔ̍ɔn 20:19-23; U̍ku̍rɔ̍ yī Alɛrɔ̄ 1:6-8)

14La okwi̍ihi yī ɔla̍ā, Iji̍sɔ̄ɔsi gba̍a de iyī nū chabɔ̄ hu̍ a̍chi̍kpo̍ yī nū āchɛ igwo̍lɛpa yɛ̄grāa nīi e̍ gblāa yɛ ē re̍ ojōre̍ ma̍. Iji̍sɔ̄ɔsi ka tāa aa̍ wu̍chē yī ɔtū nīi e̍ i̍ de che ɔ̍ ni̍ ma̍ ba̍la ūkpɔ̄tū yī wā nīi ko̍ōku̍ ma̍. Wu̍chē oji̍ nɛ, e̍ i̍ chɛ̄ku āchɛ nīi ma̍ ɔ̄ nīi o̍ hye̍ēyī la okū ma̍ ni̍.

15Iji̍sɔ̄ɔsi koko̍o de wa̍ bɛ̍ɛ̄nɛ̄ hīka, “Ala̍ gāa ga ɛbɛha̍-ɛbɛha̍ wa̍a̍ la ajɛyɛ̄ɛchɛ ge̍ kā Wɔ̄kā Ɔlwɔnyɛ yī Ɔwɔ de āchɛ. 16Ɔ̄chɛ nīi ge̍ chɛ̄ku Wɔ̄kā Ɔlwɔnyɛ yī Ɔwɔ, de yenyi hu, ɔlɔjā ge̍ē lɛ ɔhɛ̍ta̍. Ɔ̄chɛ nīi i̍ ge̍ chɛ̄ ni̍, Ɔwɔ ge̍ē hɛ̍ ɔlɔjā lɛpɔ̄ ɔdwɔ̄bi̍. 17Lɛlā ode chabɔ̄ nūma̍ ge̍ē hɔ̄ de āchɛ nīi de ɔtū che u ma̍ a̍nɛ: E̍ ge̍ē nū yapri̍ija ɔdwɔ̄bi̍ la riyī yī u. E̍ ge̍ē ka ɔcha onīpīpɛ̄. 18E̍ ge̍ de abɔ̄ nāa yɛgwā, kɛ̄ɛ nāa lɛ̍hwa gwa̍, o̍ i̍ ge̍ē ya̍ wā ɔjɔ̄jā mɛ ni̍. E̍ ge̍ē de abɔ̄ che āchɛ ekwi̍īyē lɛhu̍ nīi e̍ ē de ē lɛ cha̍cha̍ ke̍e̍.”

Ɔpīya ga Ichō yī Iji̍sɔ̄ɔsi

(Ilu̍uku 24:50-53; U̍ku̍rɔ̍ yī Alɛrɔ̄ 1:8-11)

19Ādā Iji̍sɔ̄ɔsi kwɛ̍ɛjī lɛlā ɔka tāa aa̍ ma̍, Ɔwɔ bī ɔ̄ pīya ga ichō ge̍ hyāhɔ̄ la abɔ̄ līre̍ yī nū. 20A̍chi̍kpo̍ yī nū pīya ge̍ ka ɛrɔ̄ yī Wɔ̄kā Ɔlwɔnyɛ yī nū de āchɛ ta̍ ɛbɛbɛ ta̍ wa̍a̍. Ādā Iji̍sɔ̄ɔsi tū wā wɔbɔ̄ la u̍ku̍rɔ̍. O̍ ya̍ nīi ɛrɔ̄ nīi e̍ yɛ ē ka ma̍ lwɔhɔ̍hu̍ brii bū la wɔhu̍ yī lɛlā ɔlɛbɛ̍bi̍ ɔya̍ chabɔ̄ nīi o̍ de de wa̍ ma̍.]

Currently Selected:

Ima̍aki 16: YBASR

Highlight

Copy