Ima̍tiyu 28

Ohye̍ēyī la okū yī Iji̍sɔ̄ɔsi

(Ima̍aki 16:1-10; Ilu̍uku 24:1-12; Ijɔ̍ɔn 20:1-10)

1Ɔ̄chī Ɔmyɛ̍nyɛ̍ wā ge̍ kwɛ̍ɛjī ma̍, Imeri̍ Oyo̍olima̍gīdala ba̍la Imeri̍ ɔ̍mɛpa pīya la obūrɔ̍ɔ̄chī yī ɔ̄chī I̍kɔ̍ɔbahɛ yɛ gāa ge̍ē ma̍ u̍nwɔ̍wu̍ yī Iji̍sɔ̄ɔsi. 2Ɔpɔ̄ɔpɛ̄, ajɛ he̍ejē wɔhu̍-wɔhu̍ wa̍a̍; ɔyɛ̍ɛ̄chɛ̄rɔ̄ yī Ādā bū la ichō wā ge̍ de lɛchɔ̄ ɔla̍ā mi̍ya lā ga ɛkū, pīya hyāhɔ̄ la anu̍. 3Ɔyɛ̍ɛ̄chɛ̄rɔ̄ ɔla̍ā lɛ i̍ngɔ̍ɔ ke̍e̍ bāa ɔla̍ yī yakplɔ̍ɔwɔ ma̍. Ɛjā otūlibi̍īyē yī nū lɛ̍rɛ̍ kpɛ̍ɛ bāa ɔfra̍ta̍ta̍ ma̍. 4Āchɛ nīi yɛ ē gbō ɛbɛ ɔla̍ā ma̍ de kpo̍ tūuhwi ɔlamu-ɔlamu. E̍ hɛ̍ ibi̍īyē ejē bāa ɔkpa̍kpa̍ ma̍, de ya̍ bāa okū ma̍ gblāa abɔ̍ɔ.

5Ɔyɛ̍ɛ̄chɛ̄rɔ̄ ɔla̍ā da anyā ɛla̍ā bɛ̍ɛ̄nɛ̄ hīka, “Ala̍ e̍e tūuhwi ni̍! N jo̍ōkū hīka Iji̍sɔ̄ɔsi nīi e̍ de ɔ̍ gwōba̍ la ɔ̄chī ɔhrɛ̍ɛpa ma̍ nīi ala̍ ē gāla̍ a̍nɛ. 6O̍ i̍ hɔ̄ amu gɛ ni̍. O̍ hye̍ēyī la okū lɔkɔ nīi o̍ ka ma̍ mɛ̍. Ala̍ ē yewā ge̍ ma̍ ɛbɛ nīi o̍ gbo o̍bū ma̍ nīi hɔ̄ ma̍. 7Ala̍ pīya ngla̍ gāa ge̍ koko̍o de a̍chi̍kpo̍ yī nū gɛ hīka o̍ hye̍ēyī la okū mɛ̍. Ala̍ ā ka de wa̍ hīka o̍ yɔbū de wa̍ yɛ abɔ̍ɔ yɛ gāa Iga̍līli mɛ̍. Abɔ̍ɔ nīi e̍ ge̍ē ma̍ ɔ̄ bɛ̍ɛ̄nɛ̄ a̍nɛ. Ala̍ ā bla lɛlā nīi n koko̍o de ala̍ ma̍ bɛ̍ɛ̄nɛ̄.”

8Ɔpɔ̄ɔpɛ̄, anyā ɛla̍ā kɔ̄leyī krūkrukrū pīya hī u̍nwɔ̍wu̍. E̍ yɛ ē tūuhwi; ūkpɔ̄tū chī lɛ wa̍ bāa ɔyaya ma̍. E̍ pīya lɛnya-lɛnya yɛ gāa ge̍ē koko̍o ē de a̍chi̍kpo̍ yī Iji̍sɔ̄ɔsi.

9Ɔpɔ̄ɔpɛ̄, Iji̍sɔ̄ɔsi wā ge̍ grāa aa̍ da wa̍ o̍be hīka, “Ogbodɔ̍dɔ̍ ge̍ hɔ̄ ba̍la ala̍!” E̍ yɛ grāa anu̍ ɔpɔ̄ɔpɛ̄ ge̍ ngma̍ ta̍gbo la ikpo̍ yī nū hā abɔ̄ tū ɔ̄, ya̍ otūlichō de ɔ̍. 10Iji̍sɔ̄ɔsi da wa̍ bɛ̍ɛ̄nɛ̄ hīka, “Ala̍ e̍e tūuhwi ni̍! Ala̍ gāa ge̍ ka de aɛ̍nɛ̍ yī u hīka e̍ ge̍ pīya īcha ga Iga̍līli. Abɔ̍ɔ nīi e̍ ge̍ē ma̍ u a̍nɛ.”

Oko̍o yī lɛlā āchɛ nīi gbō u̍nwɔ̍wu̍ ma̍

11Anyā ɛla̍ā wā ge̍ pīya bɛ̍ɛ̄nɛ̄ ma̍, icho̍ojiya ɛla̍ā nīi e̍ hu gbō u̍nwɔ̍wu̍ ma̍ pīya ga ipwɔ̍ɔ̄lɛ̍. E̍ gāa ge̍ koko̍o yī lɛlā nīi ya̍ abɔ̍ɔ wa̍a̍ ma̍ de alɛhu̍ aligbe. 12Alɛhu̍ aligbe ba̍la ɛgabɔ̄ yī Iju̍u tū grēeyī, ya̍ ɔmɔ̄miya ɔpɔ̄ɔpɛ̄. E̍ de okpo mwɛbɛ tū icho̍ojiya ɛla̍ā la oko̍o. 13E̍ ba̍ wā tū hīka ɛ̍lɛ ge̍ ka hīka a̍chi̍kpo̍ yī Iji̍sɔ̄ɔsi ɔ̍lɔ wā ge̍ de okū yī ɔ̍lɔ nāa la uwī la otu̍ nīi ɛ̍lɛ gbwɔlā ma̍. 14Ɔ̄chɛ Odeyīrɛ Ɔcha Ɔla̍ā ɔ̍lɔ ge̍ de po̍ i̍ngɔ̍ɔ, aɛ̍lɛ ge̍ē de lɛlāha̍-ɛlāha̍ wa̍a̍ ka ba̍la ɔ̍lɔ la abɔ̄ yī aa̍ ɛlɛjā. Lɛlā ɔhi̍yɛ̄ngura ɔ̍lɔ i̍ hɔ̄ de ɛ̍lɛ ni̍.

15Āchɛ ɔgbɛ̄ɛbɛ ɛla̍ā de okpo ɔla̍ā nāa. E̍ ya̍ i̍ngɔ̍ɔ ke̍e̍ lɔkɔ nīi e̍ ba̍ wā tū ma̍. Ɔkpɛɛ ku yɛnɔ oli̍chɛ nūma̍, oko̍o yī lɛlā nīi Iju̍u wa̍a̍ ē bī ka bɛ̍bɛ̍ ma̍ hɔ̄ aa̍ a̍nɛ.

Iji̍sɔ̄ɔsi de iyī nū chabɔ̄ hu̍ a̍chi̍kpo̍ yī nū

(Ima̍aki 16:14-18; Ilu̍uku 24:36-49; Ijɔ̍ɔn 20:19-23; U̍ku̍rɔ̍ yī Alɛrɔ̄ 1:6-8)

16A̍chi̍kpo̍ yī Iji̍sɔ̄ɔsi āchɛ igwo̍lo̍he ɛla̍ā pīya gāa ga yɛwu ɔha̍ abɔ̍ɔ la Iga̍līli la ɛbɛ nīi Iji̍sɔ̄ɔsi ka ɛ̍lɛ ge̍ yɛ ma̍. 17E̍ ma̍ ɔ̄ ma̍, aa̍ wa̍a̍ ngma̍ ta̍gbo la ajɛ ya̍ otūlichō de ɔ̍. Ibiha̍ yī wā chī yɛ ē ta̍ahu̍ kpɔ̍ɔ̍ we̍. 18Iji̍sɔ̄ɔsi tu̍ bla̍a aa̍ koko̍o de wa̍ hīka, “Wɔhu̍ yī ajɛ wa̍a̍ ba̍la iyī ichō wa̍a̍, Ɔwɔ de de u mɛ̍. 19Ala̍ ā pīya dikpo̍ba̍ āchɛha̍-āchɛha̍ wa̍a̍ la ɛbɛha̍-ɛbɛha̍ wa̍a̍ gāa ge̍ de wa̍ pīya a̍chi̍kpo̍ yī u gɛ! Ala̍ ā hu wa̍ yenyi la riyī yī A̍dā ba̍la Ɔyi̍ ba̍la Uhu Ɔnɛ̄ɛhɛhi yī Ɔwɔ. 20Ala̍ ā ngū wā hɛ̄ɛbɛ nīi e̍ ge̍ po̍ ɔkɔlɛ̄lā yī u wa̍a̍ nīi n ka hīka ala̍ ge̍ ya̍ ma̍. Ala̍ ā lɛ ɔbɔ̄bla hīka, ami ɔlɔjā ge̍ē hɔ̄ abɔ̍ɔ ba̍la ala̍ yɛ̄grāa ɔha̍lɔha̍ wa̍a̍ kpɛɛ ge̍ ku yɛ̄grāa ɔkwɛ̍ɛjī.”

Currently Selected:

Ima̍tiyu 28: YBASR

Highlight

Copy