Ima̍tiyu 13

Wɔ̄chīije yī ɔ̄chɛ ɔnyɔjā

(Ima̍aki 4:1-9; Ilu̍uku 8:4-8)

1I̍chi̍chɛ ɔla̍ā pi̍i̍, Iji̍sɔ̄ɔsi pīya hī wɔlɛ̍ ɔla̍ā ga oko̍o yī li̍hu, gāa ge̍ hɔ̄ abɔ̍ɔ ē ngū āchɛ lɛlā. 2Āchɛ nīi grēeyī tū ɔ̄ ma̍ lyɛ̄mɛ̄ kpɛ̍ɛ ɛbɛ̍bɛ̍-ɛbɛ̍bɛ̍. Wu̍chē yī ɔla̍ā, Iji̍sɔ̄ɔsi pīya hyāhɔ̄ la wɔwu̍ ɔha̍ nīi che abɔ̍ɔ la yenyi ma̍. 3O̍ kɛlā yɛ̄mɛ̄mɛ̄ de wa̍ la wɔ̄chīije.

Ɔha̍, o̍ ka hīka, “Ala̍ ma̍ gɛ ko̍ō! Ɔngrɔ̄ɔ ɔha̍ pīya gāa ge̍ē mī īkpɔ̄ɔ̄chi̍ la yɛrɔ̄. 4O̍ yɛ ē kɔ̄ mī ma̍, ɛha̍ yī wā ngma̍ chīyēgblāa la ɔpɔ̄pū; a̍gba̍ana wā ge̍ de kpo̍ ku re̍. 5Ɛha̍ yī wā ngma̍ chīyēgblāa la ajɛ yī ichō yī lɛchɔ̄. Ajɛ yī lɛchɔ̄ ɔla̍ā i̍ lɛ ɛmla̍a ni̍. Ajɛ lɛ periperi ma̍, e̍ hli̍kpa̍ bū. 6Yɛnɔ wā ge̍ chɛ̄ bɛ̍ɛ̄nɛ̄ ma̍, o̍ de ayɛ̍ɛ̄chi̍ ɛla̍ā wɔla̍. E̍ i̍ chī ta̍ ɛgba hiyuu mɛ ni̍ ma̍, e̍ de ngmo̍ōngmo̍ ju̍wɛ̍ju̍wɛ̍ ɔpɔ̄ɔpɛ̄. 7Ɛha̍ yī wā ngma̍ chīyēgblāa lipu̍ yī ijē. Ijē ɛla̍ā jɛ̄ ge̍ mi̍ya tū ɛchi̍ ɛla̍ā, de wa̍ ku̍. 8Ehēhī yī wā chīyēgblāa la ajɛ ɔnɛ̄ɛhɛhi. E̍ wa̍ īkpō. Ɛha̍ wa̍ īkpō ohu ɛrwɔ̄, ɛha̍ ohu ɛta̍, ɛha̍ ohu che igwo̍.”

9Iji̍sɔ̄ɔsi de ɔ̍ chlɛhu̍ bɛ̍ɛ̄nɛ̄ hīka, “Ɔ̄chɛ otū arɔ̄ ɔplɛ̍ɛ̄lā ge̍ po̍ gɛ!”

Ohu̍ yī wɔ̄chīije ɛla̍ā

(Ima̍aki 4:10-12; Ilu̍uku 8:9-10)

10A̍chi̍kpo̍ yī Iji̍sɔ̄ɔsi gāa dikpo̍ba̍ ɔ̄ ge̍ che ɔ̍ ikpo̍ hīka, “Oji̍ - ohu̍ nīi a ge̍ kɛlā tāa aa̍ nīi a bī wɔ̄chīije ē ka ma̍/?”

11Iji̍sɔ̄ɔsi hīya aa̍ ɔkɔ hīka, “Ala̍ ma̍, Ɔwɔ de lɛlā ɔtrɛ̍ba yī Ɔchwɔ̄lɛ̍ Oro̍ōre̍ yī nū chabɔ̄ hu̍ ala̍ nīi ala̍ ge̍ē jo̍ōkū mɛ̍. Aa̍ ɛla̍ā ma̍, o̍ i̍ de chabɔ̄ hu̍ wā ni̍. 12Wu̍chē oji̍ nɛ, ɔ̄chɛ nīi lɛ ɔjā o̍bū ma̍, e̍ ge̍ē de ē ba̍ ɔ̄ de ɔ̍, hɛ̄ɛbɛ nīi o̍ ē lɛ ē mwɛbɛ mwɛbɛ. Ɔ̄chɛ nīi i̍ lɛ ɔjɔ̄jā ni̍ ma̍, onīi o̍ lɔ̄lɛ pi̍nyɛ̍ ma̍, e̍ ge̍ē de ē nāa ē hī ɔ̄ abɔ̄. 13Anu̍ - ohu̍ nīi n ē bī wɔ̄chīije ē kɛlā tāa aa̍ a̍nɛ. Wu̍chē oji̍ nɛ, e̍ ge̍ dōdeyīrɛ, e̍ i̍ ge̍ē myɛ̍ma̍ ni̍. E̍ ge̍ dɔ̄darɔ̄ku, e̍ i̍ ē plɛ̍ɛ̄lā je̍ ochi̍chi̍ yī nū ni̍. 14Lɛlā yī wā nūma̍ ya̍ nīi lɛlā nīi Ayisa̍ya ɔ̄chɛ ɔkɛrɔ̄ yī Ɔwɔ mwɔ̍ɔmu ma̍ de gɔ̄grāa. O̍ ka ɔ̍lɔ ge̍:

“ ‘Ala̍ ge̍ darɔ̄ku kana̍-kana̍,

ala̍ i̍ ge̍ē po̍ la ochi̍chi̍ ni̍.

Ala̍ ge̍ deyīrɛ kana̍-kana̍,

ala̍ i̍ ge̍ē myɛ̍ma̍ ni̍

15Wu̍chē oji̍ nɛ, ūkpɔ̄tū yī āchɛ nūma̍ lɛ kwīkwī.

E̍ de iyī wā darɔ̄.

E̍ de iyī wā priyī.

Nɛ̄ni̍, īkprī yī wā ge̍ myɛ̍ma̍ nɛ,

kɛ̄ɛ wɔrɔ̄ yī wā ge̍ plɛ̍ɛ̄lā nɛ,

kɛ̄ɛ ūkpɔ̄tū yī wā ge̍ je̍ ochi̍chi̍ yī lɛlā nɛ.

E̍ ke̍ ge̍ pīya ūkpɔ̄tū ta̍ u;

N chī ge̍ de wa̍ nyiya ke̍e̍.

Ami Ɔwɔ ka i̍ngɔ̍ɔ a̍nɛ.’

16“A̍hōhi ge̍ - iyī ala̍ nūma̍! Wu̍chē oji̍ nɛ, īkprī yī ala̍ ē myɛ̍ma̍; arɔ̄ yī ala̍ ē plɛ̍ɛ̄lā. 17Lēchi̍-lēchi̍, n ā koko̍o de ala̍! Āchɛ ɔkɛrɔ̄ yī Ɔwɔ ba̍la āchɛ yɛ̄mɛ̄mɛ̄ nīi - āchɛ yī Ɔwɔ ma̍ hla̍ kpɛ̍ɛ ka aɛ̍lɛ ge̍ē ma̍ ɔjā nīi ala̍ ma̍ ma̍, e̍ i̍ ma̍ mɛ ni̍. E̍ hla̍ ka aɛ̍lɛ ge̍ē ē po̍ ɔjā nīi ala̍ po̍ ma̍, e̍ i̍ po̍ mɛ ni̍.

Ochi̍chi̍ yī wɔ̄chīije yī ɔ̄chɛ ɔnyɔjā

(Ima̍aki 4:13-20; Ilu̍uku 8:11-15)

18“Ala̍ darɔ̄ku gɛ, nīi ala̍ ge̍ po̍ ochi̍chi̍ yī wɔ̄chīije yī ɔ̄chɛ ɔnyɔjā: 19Āchɛ ɛla̍ā nīi ē po̍ ɛrɔ̄ yī Ɔchwɔ̄lɛ̍ Oro̍ōre̍ yī Ɔwɔ, nīi i̍ po̍ ochi̍chi̍ yī nū ni̍ ma̍, e̍ lɛ bāa īkpɔ̄ɔ̄chi̍ nīi ngma̍ chīyēgblāa la ɔpɔ̄pū ma̍. Ɔngūwɛ̄gā wā ge̍ē de ɔjā ɔla̍ā nīi e̍ de mī ma̍ ē kpo̍ hī wā ūkpɔ̄tū. 20Enīi gblāa la ajɛ yī ichō yī lɛchɔ̄ ma̍ lɛ bāa lɛlā yī āchɛ ɛha̍ nīi ē po̍ ɛrɔ̄ yī Ɔwɔ ɔpɔ̄ɔpɛ̄ de ē nāa la ɔwɔ̄wīyā ma̍. 21O̍ i̍ gwa̍ chɛ̄ wā ūkpɔ̄tū ni̍ ma̍, e̍ i̍ ē ri̍yɛchɛ ni̍. Yɛ̄grāa nīi akanya kɛ̄ɛ ichi̍ ɔdwɔ̄bi̍ ɔha̍ ge̍ wā la aa̍ wu̍chē yī ɛrɔ̄ yī Ɔwɔ mɛ̍, e̍ ē wa̍ābɔ̄ yī nū ɔpɔ̄ɔpɛ̄. 22Īkpɔ̄ɔ̄chi̍ ɛha̍ nīi chīyēgblāa lipu̍ yī ijē ma̍ lɛ bāa lɛlā yī āchɛ ɛha̍ nīi ē po̍ ɛrɔ̄ yī Ɔwɔ ma̍. Yɛ̄ngura yī ɛjā yī ɔhɔ̄leyī nūma̍ ba̍la wɔnyɛ yī wɔdu ogbōgbo ē da ē ba̍ ɛrɔ̄ yī Ɔwɔ, e̍ de ɔ̍ ku̍. E̍ i̍ wa̍ īkpō ni̍. 23Enīi gblāa la ajɛ ɔnɛ̄ɛhɛhi ma̍ lɛ bāa lɛlā yī āchɛ nīi ē po̍ ɛrɔ̄ yī Ɔwɔ, po̍ ochi̍chi̍ yī nū ma̍. E̍ wa̍ īkpō hwɔhi hwɔhi. Ɛha̍ wa̍ īkpō ohu ɛrwɔ̄, ɛha̍ ohu ɛta̍, ɛha̍ chī ohu che igwo̍.”

Wɔ̄chīije yī īkpāa̍chi̍ ɛha̍

24Iji̍sɔ̄ɔsi gba̍a chā wɔ̄chīije ɔha̍ de wa̍ hīka, “Ala̍ ma̍ ko̍ō! Ɔchwɔ̄lɛ̍ Oro̍ōre̍ yī Ɔwɔ lɛ bāa lɛlā yī ɔngrɔ̄ɔ ɔha̍ nīi mī īkpɔ̄ɔ̄chi̍ ɔnɛ̄ɛhɛhi la yɛrɔ̄ yī nū ma̍. 25La otu̍ ɔha̍, yɛ̄grāa nīi āchɛ gbwɔlā wa̍a̍ ma̍, oluji gāa ge̍ mī īkpāa̍chi̍ wa̍a̍ abɔ̍ɔ lipu̍ yī yɛrɔ̄ ɔla̍ā wā ge̍ ku̍ pīya. 26Yɛ̄grāa nīi e̍ de jɛ̄ yɛ ē chahu̍ ma̍, a̍chi̍ ɛla̍ā wu̍lā abɔ̍ɔ i̍ngɔ̍ɔ ke̍e̍. 27A̍chɛ̍ yī ɔngrɔ̄ɔ nīi lɛ yɛrɔ̄ ɔla̍ā ma̍ gāa ge̍ ka de ɔ̍ hīka, ‘Ādā, je̍ka īkpɔ̄ɔ̄chi̍ ɛnɛ̄ɛhɛhi nīi a mī la yɛrɔ̄ ɔla̍ā a̍nɛ? Aba̍ nīi a̍chi̍ ɛla̍ā chī bū ge̍ gblāa ma̍?’ 28Abā yī wā ka de wa̍ hīka, ‘Oluji ɔ̍lɔ yɛ̍ɛ̄lā ɔla̍ā a̍nɛ.’ E̍ che abā yī wā ikpo̍ ka aɛ̍lɛ ge̍ gāa ge̍ de a̍chi̍ ɛla̍ā kpo̍ hu bɛ̍ɛ̄nɛ̄ ni̍? 29Abā yī wā hīya aa̍ ɔkɔ hīka, ‘Ehe̍, ala̍ e̍e ya̍ i̍ngɔ̍ɔ ni̍. Nɛ̄ni̍ abɔ̄ ge̍ē ngmla̍a ala̍ ē hu ɛjāyɛ̄rɔ̄ ɛla̍ā nīi re̍ka iwi̍iti ma̍ ti̍yabɔ̄ la aa̍. 30Ala̍ pi̍ye̍mā nīi iwi̍iti ge̍ jɛ̄ ti̍yabɔ̄ la aa̍ i̍ngɔ̍ɔ kpɛɛ gbo̍ ɔ̄chī yī i̍kri̍wu̍. Yɛ̄grāa ɔla̍ā ma̍, n ge̍ē ka ē de alu̍ku̍rɔ̍ hīka ē ge̍ kpo̍ a̍chi̍ ɛla̍ā hu yɔbɔ̄ɔbū. E̍ ge̍ wā āā orī nīi e̍ ge̍ kpo̍ lɛwā yī wā ɛla̍ā chīyētū ga ɔla̍. O̍bū ma̍, e̍ ge̍ wā ge̍ kpo̍ iwi̍iti ɛla̍ā hɛ̍ wa̍a̍ nīi e̍ ge̍ kpo̍ tū la yākwɔ̄ yī u.’ ”

Wɔ̄chīije yī īkpɔ̄ɔ̄chi̍ ɔha̍ nīi re̍ka imɔ̍si̍tāadi ma̍

(Ima̍aki 4:30-32; Ilu̍uku 13:18-19)

31Iji̍sɔ̄ɔsi gba̍a chā wɔ̄chīije ɔha̍ de wa̍ hīka, “Ala̍ ma̍ gɛ ko̍ō! Ɔchwɔ̄lɛ̍ Oro̍ōre̍ yī Ɔwɔ lɛ bāa īkpɔ̄ɔ̄chi̍ ɔha̍ nīi re̍ka Imɔ̍si̍tāadi ma̍. Anu̍ bi̍hi hi̍ īkpɔ̄ɔ̄chi̍ wa̍a̍ a̍nɛ. 32Ɔngrɔ̄ɔ ɔha̍ de bī pīya ge̍ mī la yɛrɔ̄ yī nū. O̍ de jɛ̄ ma̍, o̍ lɔ̄kū ga ɔchi̍ ɔha̍lɔha̍ wa̍a̍ jimini, de pīya ɔchi̍ ɔnɔ̄kɔ̄kū, kpɛ̍ɛ nīi a̍gba̍ana ē wā ge̍ē lwɔ̄lɛ̍ la a̍bɔ̄ yī nū.”

Wɔ̄chīije yī ɔjā obī ibrɛ̍ɛdi nōnū

(Ilu̍uku 13:20-21)

33Iji̍sɔ̄ɔsi gba̍a chā wɔ̄chīije ɔha̍ de wa̍ hīka, “Ala̍ ma̍ ko̍ō! Ɔchwɔ̄lɛ̍ Oro̍ōre̍ yī Ɔwɔ lɛ bāa lɛlā yī ɔjā nīi ē bī ibrɛ̍ɛdi ē nōnū ma̍. Ɔnyā ɔha̍ kɔ̄ pi̍nyɛ̍ chīyētū la u̍kpu̍ūhā akpara yī igu ɔha̍ nīi e̍ ē gbɔ̄gbā re̍ka ifla̍wa ē bī ya̍ ibrɛ̍ɛdi ma̍. O̍ ti̍ya anu̍ tū i̍ngɔ̍ɔ kpɛɛ nīi āɛ̄jā yī ibrɛ̍ɛdi ɔla̍ā wa̍a̍ nū pu̍tu̍u̍ ga ichō.”

Iji̍sɔ̄ɔsi bī wɔ̄chīije ke̍e̍ ngū āchɛ lɛlā

(Ima̍aki 4:33-34)

34Iji̍sɔ̄ɔsi bī wɔ̄chīije-wɔ̄chīije ke̍e̍ kɛlā de āchɛ ɛla̍ā nīi grēeyī ma̍. O̍ i̍ kɛlɛ̄lā tāa aa̍ pi̍ye̍mā la obī wɔ̄chīije ka ni̍. 35O̍ ya̍ i̍ngɔ̍ɔ hɛ̄ɛbɛ nīi lɛlā nīi ɔ̄chɛ ɔkɛrɔ̄ yī Ɔwɔ mwɔ̍ɔmu lɔ̄lā ma̍ ge̍ē de ē gɔ̄grāa ke̍e̍:

“N ge̍ē kɛlā tāa aa̍ ma̍, wɔ̄chīije nīi n ge̍ē bī ka a̍nɛ.

N ge̍ē de lɛlā nīi trɛ̍ba gbi̍chɛ gbi̍chɛ bū la owu̍tu yī yɛchɛ ma̍ ē ka ē de wā.”

Ochi̍chi̍ yī wɔ̄chīije yī īkpāa̍chi̍ ɛla̍ā

36Iji̍sɔ̄ɔsi ku̍ pīya hī ɔgbādu yī āchɛ, pīya chɛ̄ ga u̍nu̍ ɔha̍. A̍chi̍kpo̍ yī nū gāa dikpo̍ba̍ ɔ̄ ge̍ che ɔ̍ ikpo̍ ka ɔ̍lɔ ge̍ ka ochi̍chi̍ yī wɔ̄chīije yī īkpāa̍chi̍ yī yɛrɔ̄ ɔla̍ā de aa̍.

37Iji̍sɔ̄ɔsi koko̍o de wa̍ hīka, “Ala̍ ma̍ ko̍ō! Ɔngrɔ̄ɔ nīi mī īkpɔ̄ɔ̄chi̍ ɛnɛ̄ɛhɛhi ɛla̍ā ma̍ - Ɔyi̍ yī Ɔngrɔ̄ɔ nɛ. 38Yɛrɔ̄ ɔla̍ā - yɛchɛ nūma̍ nɛ. Īkpɔ̄ɔ̄chi̍ ɛnɛ̄ɛhɛhi ɛla̍ā - āchɛ nīi tū la ɔchwɔ̄lɛ̍ Oro̍ōre̍ yī Ɔwɔ ma̍ nɛ. Īkpāa̍chi̍ ɛla̍ā - āchɛ nīi tū tāa Ɔngūwɛ̄gā ma̍ nɛ. 39Oluji nīi bī īkpāa̍chi̍ ge̍ mī ma̍ - Ɔngūwɛ̄gā ɔlɔjā nɛ. Yɛ̄grāa i̍kri̍wu̍ ɔla̍ā - ɔkwɛ̍ɛjī yī yɛchɛ wa̍a̍ nɛ. Āchɛ nīi ya̍ u̍ku̍rɔ̍ yī ɛjāyɛ̄rɔ̄ ɔhɔ̍ɔ̄hɛ̍ ma̍ - ayɛ̍ɛ̄chɛ̄rɔ̄ yī Ɔwɔ nɛ. 40Lɔkɔ nīi e̍ kpo̍ īkpāa̍chi̍ ɔdwɔ̄bi̍ ɛla̍ā ge̍ kwɔla̍ ma̍, i̍ngi̍ngɔ̍ɔ nīi o̍ ge̍ē lɛ la ɔ̄chī nīi yɛchɛ ge̍ē kwɛ̍ɛjī ma̍ a̍nɛ. 41Yɛ̄grāa ɔla̍ā, Ɔyi̍ yī Ɔngrɔ̄ɔ ge̍ē de ayɛ̍ɛ̄chɛ̄rɔ̄ yī nū tɛ̄rɔ̄ gāa yɛchɛ wa̍a̍. E̍ ge̍ē gāa ge̍ē kpo̍ āchɛ ɛla̍ā nīi ē ya̍ nīi āchɛ ē yɛ̍ɛ̄lā abi̍ ma̍ ba̍la āchɛ ɛdwɔ̄bi̍ ehēhī wa̍a̍ hā hī ɛbɛ yī Ɔchwɔ̄lɛ̍ Oro̍ōre̍ yī nū. 42E̍ ge̍ē gū wa̍ duu ge̍ē chīyētū la u̍nu̍ yī ɔla̍ ɔnɔ̄kɔ̄kū. Abɔ̍ɔ nīi e̍ ge̍ē gblāa ē drɛ̄ɛgba ē rāngūu a̍nɛ. 43Yɛ̄grāa ɔla̍ā, āchɛ nīi - āchɛ yī Ɔwɔ ma̍ ge̍ē gblāa abɔ̍ɔ ē hu̍ bāa yɛnɔ ma̍ la ɛbɛ yī Ɔchwɔ̄lɛ̍ Oro̍ōre̍ yī A̍dā yī wā. Ɔ̄chɛ otū arɔ̄ ɔplɛ̍ɛ̄lā ge̍ po̍ gɛ!

Wɔ̄chīije yī u̍gbru̍ɔ̄jā nīi trɛ̍ba ma̍

44“Ɔchwɔ̄lɛ̍ Oro̍ōre̍ yī Ɔwɔ lɛ bāa u̍gbru̍ɔ̄jā ɔha̍ nīi trɛ̍ba la ajɛ ɔha̍ ma̍. Ɔngrɔ̄ɔ ɔha̍ de ɔ̍ pīyɛ̄ ma̍, o̍ de ajɛ tu̍ kla̍ anu̍. O̍ wīyā kpɛ̍ɛji, pīya ge̍ de āɛ̄jā yī nū kpo̍ ra̍ cha̍cha̍, ku̍chē pīya ge̍ de ajɛ ɔla̍ā ra̍ ligbo̍-ligbo̍.

Wɔ̄chīije yī akpānā

45“Ɔchwɔ̄lɛ̍ Oro̍ōre̍ yī Ɔwɔ gba̍a lɛ bāa ɔlɔ̍hi̍ ɔha̍ nīi yɛ ē gāla̍ akpānā ɛnɛ̄ɛhɛhi la ɔrɔ̍ɔ̄ra̍ ma̍. 46O̍ gāa ge̍ ma̍ ɔha̍ nīi - ɔlamu-ɔlamu, gba̍a lwɔ̍la̍ gba̍a̍ ma̍; o̍ pīya ge̍ de āɛ̄jā yī nū kpo̍ ra̍ cha̍cha̍, gāa ge̍ de akpānā ɔla̍ā ra̍.”

Wɔ̄chīije yī a̍bagalā

47“Ɔchwɔ̄lɛ̍ Oro̍ōre̍ yī Ɔwɔ gba̍a lɛ bāa a̍bagalā nīi e̍ ta̍ la li̍hu nīi ku̍ ɛbɛ̍ ita ɔha̍lɔha̍ wa̍a̍ ma̍. 48Ɛbɛ̍ ge̍ mu ɔ̍ rɛ abɔ̍ɔ mɛ̍, ɔlwɔtɛ̍ ɔlɔjā ē pi ɔ̍ ga o̍chi bɛ̍ɛ̄nɛ̄. O̍ ē pīya ē hyāhɔ̄, de ɛbɛ̍ ɛla̍ā hɔ̄hā gblāa. O̍ ē de ɛbɛ̍ ɔnɛ̄ɛhɛhi ē tū gāa origō yī nū, de ɛdwɔ̄bi̍ yī wā ē ta̍anū hwɛɛ. 49I̍ngi̍ngɔ̍ɔ nīi o̍ ge̍ē lɛ la ɔ̄chī ɔkwɛ̍ɛjī a̍nɛ. Ayɛ̍ɛ̄chɛ̄rɔ̄ yī Ɔwɔ ge̍ē gāa ge̍ē kpo̍ āchɛ ɔdwɔ̄bi̍ wa̍a̍ ē hā hī āchɛ ɛnɛ̄ɛhɛhi. 50E̍ ge̍ē kpo̍ āchɛ ɛdwɔ̄bi̍ ɛla̍ā chīyētū gāa u̍nu̍ yī ɔla̍ ɔnɔ̄kɔ̄kū. Abɔ̍ɔ nīi e̍ ge̍ē gblāa ē drɛ̄ɛgba ē rāngūu a̍nɛ.”

Lɛlā olēchi̍ lēchi̍ ɔnɛ̄chɛ̄ ba̍la onīpīpɛ̄

51Iji̍sɔ̄ɔsi che wa̍ ikpo̍ hīka ɛ̍lɛ po̍ ochi̍chi̍ yī lɛlā ɛla̍ā wa̍a̍ mɛ̍? E̍ de chɛ̄. 52O̍ wā ge̍ koko̍o de wa̍ bɛ̍ɛ̄nɛ̄ hīka, “Ala̍ ma̍ ko̍ō! Ɔ̄chɛ ongū Lihɔ yī Iju̍u nīi ge̍ de pīya a̍chi̍kpo̍ yī Ɔchwɔ̄lɛ̍ Oro̍ōre̍ yī Ɔwɔ, ɔlɔjā lɛ ke̍e̍ bāa ɔngrɔ̄ɔ nīi lɛ wɔlɛ̍ wɔ̄bɔ̄bɔ̄ yī nū, nīi ē nāa ɔjā onīpīpɛ̄ ba̍la ɔnɛ̄chɛ̄ bū abɔ̍ɔ la ɛbɛ nīi o̍ de gbōgbō ma̍.”

Alina̍jārɛ̄ɛti ta̍ Iji̍sɔ̄ɔsi

(Ima̍aki 6:1-6; Ilu̍uku 4:16-30)

53Iji̍sɔ̄ɔsi kwɛ̍ɛjī lɛlā nūma̍ la ɔkɔ̄ka la wɔ̄chīije de āchɛ ɛla̍ā ma̍, o̍ ku̍ pīya hī ɛbɛ ɔla̍ā. 54O̍ ku̍chē pīya ga ipwo̍gra yī anu̍ ɔlɔjā, gāa ge̍ ngū āchɛ lɛlā abɔ̍ɔ la u̍nu̍ ogrēeyī yī wā. Āchɛ nīi plɛ̍ɛ̄lā nīi o̍ ngū wa̍a̍ ma̍, o̍ de ya̍ wa̍ lɛbɛ̍bi̍ ɔlamu-ɔlamu. E̍ che iyī wā ikpo̍ bɛ̍ɛ̄nɛ̄ hīka, “Aba̍ kpa̍a nīi o̍ u̍tu bī lɛlā ojo̍ōje̍ ita nūma̍ bū ma̍/? Lɛlā ɔlɛbɛ̍bi̍ nūma̍ wa̍a̍ nīi o̍ ē chī ya̍ ma̍ bɛ̍ɛ? 55I̍ anu̍ - ɔyi̍ yī ika̍pi̍ta ɔla̍ā a̍ni̍? I̍ ɛ̍nɛ̍ yī nū re̍ka Imeri̍ a̍ni̍? Kɛ̄ɛ i̍ aɛ̍nɛ̍ yī nū anāngrɔ̄ɔ re̍ka Ije̍mēehi ba̍la Ijo̍sɛ̄ɛfu ba̍la Isa̍yi̍mɔ̄ɔn ba̍la Iju̍dasi a̍ni̍? 56Kɛ̄ɛ i̍ aɛ̍nɛ̍ yī nū anānyā gblāa ma̍ wa̍a̍ ba̍la alɔ ni̍? Aba̍ kpa̍a nīi ɔngrɔ̄ɔ nūma̍ chī bī lɛlā ɛla̍ā wa̍a̍ bū ma̍?” 57Bū la ɛbɛ ɔla̍ā, aa̍ wa̍a̍ ta̍ ɔ̄.

Iji̍sɔ̄ɔsi ka de wa̍ bɛ̍ɛ̄nɛ̄ hīka, “Ɔ̄chɛ ɔkɛrɔ̄ yī Ɔwɔ i̍ ē lɛ otūlichō la ipwo̍gra kɛ̄ɛ u̍kpu̍fi̍ye̍ yī anu̍ ɔlɔjā ni̍. Ɔcha yī āchɛ lōri̍īnū nīi o̍ ē lɛ otūlichō a̍nɛ.” 58Bū la ɛbɛ ɔla̍ā, Iji̍sɔ̄ɔsi i̍ chɛ̄ yɛ̍ɛ̄lā ɔlɛbɛ̍bi̍ yɛ̄mɛ̄mɛ̄ abɔ̍ɔ gɛ ni̍, wu̍chē lɔkɔ nīi alɛbɛ ɔla̍ā i̍ chɛ̄ku ɔ̍ ni̍ ma̍.

Currently Selected:

Ima̍tiyu 13: YBASR

Highlight

Copy