Ilu̍uku 9

Iji̍sɔ̄ɔsi de a̍chi̍kpo̍ yī nū āchɛ igwo̍lɛpa tɛ̄rɔ̄

(Ima̍tiyu 10:5-15; Ima̍aki 6:7-13)

1Iji̍sɔ̄ɔsi hī a̍chi̍kpo̍ yī nū āchɛ igwo̍lɛpa ɛla̍ā ɛra̍ ge̍ grēeyī. O̍ de wɔhu̍ de wa̍ nīi e̍ ge̍ē nū yapri̍ija ɔdwɔ̄bi̍ ē mɛ; e̍ ge̍ē nyiya āchɛ iyē oko̍ōku̍ wa̍a̍ mɛ. 2O̍ tū wā ɛrɔ̄ ka ɛ̍lɛ ge̍ gāa ge̍ kā wɔ̄kā yī Ɔchwɔ̄lɛ̍ Oro̍ōre̍ yī Ɔwɔ de āchɛ, nīi ɛ̍lɛ ge̍ nyiya āchɛ okwi̍īyē. 3O̍ koko̍o de wa̍ hīka, “Ala̍ e̍e bī ɔjɔ̄jā yɛ ni̍. Ala̍ e̍e bī ɔchi̍ ɔkwajɛ kɛ̄ɛ liba ɔbɔjā tū ni̍. Ala̍ e̍e bī ojōre̍ kɛ̄ɛ okpo, o̍bū ge̍ hwabɔ̄ la aru̍ ikɛpa obōbī ni̍. 4Wɔlɛ̍ ɔha̍lɔha̍ nīi ala̍ ge̍ nyā ge̍ hɔ̄, ala̍ ā hɔ̄ abɔ̍ɔ kpɛ̍ɛ gbo̍ ɔ̄chī nīi ala̍ ge̍ē pīya ē hī ipwo̍gra ɔla̍ā ma̍. 5Āchɛ nīi i̍ ge̍ chī chikpo̍ yī ala̍ ni̍, ala̍ ge̍ yɛ ē pīya ē hī ipwo̍gra ɔla̍ā ma̍, ala̍ ā gwō obubu yī ikpo̍ yī ala̍ gblāa abɔ̍ɔ. Ɔla̍ā re̍ka ɔna lɛlā nīi ala̍ ta̍ wā a̍nɛ.”

6A̍chi̍kpo̍ yī Iji̍sɔ̄ɔsi wā ge̍ pīya bɛ̍ɛ̄nɛ̄. E̍ ta̍ ipwo̍gra-ipwo̍gra ta̍, kā Wɔ̄kā Ɔlwɔnyɛ yī Ɔwɔ de āchɛ, nyiya āchɛ yɛ̄mɛ̄mɛ̄ la ɛbɛha̍-ɛbɛha̍ wa̍a̍.

Ihɛ̍rɔ̄ɔdi chikpo̍ ge̍ē ma̍ Iji̍sɔ̄ɔsi

(Ima̍tiyu 14:1-12; Ima̍aki 6:14-29)

7Ihɛ̍rɔ̄ɔdi nīi - ɔlɛhu̍ yī ajɛ yī Iga̍līli ma̍ po̍ ohu yī lɛlā ɔla̍ā wa̍a̍ nīi yɛ ē ya̍ ma̍, o̍ de re̍ jɛjɛ la ūkpɔ̄tū ji bɛ̍ɛ̄nɛ̄. Wu̍chē oji̍ nɛ, āchɛ yɛ ē ka hīka Ijɔ̍ɔn Ohuyenyi ɔ̍lɔ hye̍ēyī la okū a̍nɛ. 8Ɛha̍ chī ka hīka, Ɛla̍yi̍ja ɔ̍lɔ wā a̍nɛ. Āchɛ ɛha̍ ma̍ ka hīka, ɔ̄chɛ ɔkɛrɔ̄ yī Ɔwɔ oli̍chɔ̍lɔ ɔha̍ ɔ̍lɔ hye̍ēyī la okū wā la yɛchɛ a̍nɛ. 9Ihɛ̍rɔ̄ɔdi ka anɔ̍lɔ chī ka nīi ɛ̍lɛ de Ijɔ̍ɔn Ohuyenyi hɛ̍ lɛhu̍ īchāha̍. Ɔngrɔ̄ɔ ɔna̍ kpa̍a ɔ̍lɔ hɔ̄ aa̍ nīi anɔ̍lɔ ē po̍ ohu yī lɛlā yī ɔ̍lɔ ma̍/? Wu̍chē yī ɔla̍ā Ihɛ̍rɔ̄ɔdi chikpo̍ ge̍ē ma̍ Iji̍sɔ̄ɔsi la eyī.

Iji̍sɔ̄ɔsi bī āchɛ u̍nɔ igwo̍lɛpa che ohu igwo̍ la ojōre̍

(Ima̍tiyu 14:13-21; Ima̍aki 6:30-44; Ijɔ̍ɔn 6:1-14)

10A̍chi̍kpo̍ yī Iji̍sɔ̄ɔsi cha wā bɛ̍ɛ̄nɛ̄ ge̍ koko̍o yī u̍ku̍rɔ̍ nīi e̍ ya̍ wa̍a̍ ma̍ de ɔ̍. O̍ bī wā pīya bɛ̍ɛ̄nɛ̄, aa̍ ba̍la anu̍ pīya lōri̍īwā ga ipwo̍gra ɔha̍ nīi re̍ka Ibɛsa̍yi̍da ma̍. 11Āchɛ yɛ̄mɛ̄mɛ̄ de jo̍ōkū ma̍, e̍ de ku ɔ̍ gāa. Iji̍sɔ̄ɔsi lɛ ɔwɔ̄wīyā nīi o̍ ma̍ wā ma̍. O̍ kā wɔ̄kā yī Ɔchwɔ̄lɛ̍ Oro̍ōre̍ yī Ɔwɔ de wa̍, nyiya āchɛ nīi kwi̍īyē wa̍a̍ ma̍.

12Yɛ̄grāa nīi yɛnɔ yɛ ge̍ē bi̍ ma̍, a̍chi̍kpo̍ yī Iji̍sɔ̄ɔsi gāa dikpo̍ba̍ ɔ̄ ge̍ ka de ɔ̍ hīka, “Ādā, ka nīi āchɛ nūma̍ ge̍ pīya, hɛ̄ɛbɛ nīi e̍ ge̍ ga wɔlɛ̍ɛchɛ ba̍la yɛrɔ̄ ɔha̍ amu la ɔta̍kakatū nūma̍ gāa ge̍ kwɔgu yī ojōre̍ ba̍la ɛbɛ ɔchɔ̄chā. Wu̍chē oji̍, lipu̍ a̍chi̍ chukuru hɔ̄ ma̍ a̍nɛ.”

13Iji̍sɔ̄ɔsi da a̍chi̍kpo̍ yī nū bɛ̍ɛ̄nɛ̄ hīka, “Ala̍ ɛlɛjā ala̍ ā de ojōre̍ oro̍ōre̍ de wa̍ gɛ!”

A̍chi̍kpo̍ yī nū hīya anu̍ ɔkɔ hīka, “Ɔjā nīi alɔ lɛ ka̍ta̍ ma̍ chī - ākpā yī ibrɛ̍ɛdi ɛrwɔ̄ ba̍la ɛbɛ̍yēenyi īkpɛ̄ɛpa nɛ. A chikpo̍ nīi alɔ ge̍ gāa ge̍ ra̍ ojōre̍ ɔrɔ̍ɔ̄ra̍ de okru̍utu yī āchɛ nūma̍?” 14Āchɛ ɛla̍ā ke̍e̍ gbajɛ la āchɛ u̍nɔ igwo̍lɛpa che āchɛ ohu igwo̍.

Iji̍sɔ̄ɔsi ka de a̍chi̍kpo̍ yī nū ka ɛ̍lɛ ge̍ ka lɛbɛ nīi āchɛ ɛla̍ā ɛ̍lɛ ge̍ gblāa la ribibi. Ɛ̍lɛ ge̍ lɛ āchɛ ohu ɛpa che igwi̍gwo̍ la ribi ūkpo̍he.

15A̍chi̍kpo̍ yī nū gāa ge̍ ya̍ nīi ē hyāhɔ̄ i̍ngɔ̍ɔ wa̍a̍ lɔkɔ nīi o̍ ka ma̍. 16Iji̍sɔ̄ɔsi nāa ākpā yī ibrɛ̍ɛdi ɛrwɔ̄ ba̍la ɛbɛ̍yēenyi īkpɛ̄ɛpa ɛla̍ā bī la abɔ̄. O̍ hu eyī hwa̍a̍ ga ichō, da Ɔwɔ o̍be wu̍chē yī ojōre̍ ɔla̍ā. O̍ de ɔ̍ hɛ̍ mi̍ni̍mi̍ni̍, de nāa de a̍chi̍kpo̍ yī nū bɛ̍ɛ̄nɛ̄, ka ɛ̍lɛ ge̍ de kɔ̄ de āchɛ ɛla̍ā wa̍a̍. 17Aa̍ wa̍a̍ re̍ nīi o̍ jɛ̄ wā hwɔhi hwɔhi. A̍chi̍kpo̍ yī nū kpo̍ irwi yī onīi jɛ̄ wā hōhī ma̍ mu obri̍bri̍ igwo̍lɛpa.

Ipi̍ta de lɛlā yi̍ya hwōō de Iji̍sɔ̄ɔsi

(Ima̍tiyu 16:13-19; Ima̍aki 8:27-28)

18I̍chi̍chɛ ɔha̍, Iji̍sɔ̄ɔsi hɔ̄ abɔ̍ɔ lōri̍īnū ē jɔhā de Ɔwɔ. A̍chi̍kpo̍ yī nū wā gblāa abɔ̍ɔ i̍ngi̍ngɔ̍ɔ. O̍ che wa̍ ikpo̍ hīka, “Alɔgbādu ɛla̍ā wa̍a̍ ma̍ u̍tu gbɛri̍ya̍ ka amɔ̍lɔ - ɔ̄nyɛ nɛ ma̍/?”

19E̍ hīya anu̍ ɔkɔ hīka, “Āchɛ ɛha̍ ka aɔ̍lɔ - Ijɔ̍ɔn Ohuyenyi nɛ. Ɛha̍ ka aɔ̍lɔ - Ɛla̍yi̍ja nɛ. Āchɛ ɛha̍ chī ka hīka, ɔ̄chɛ ɔkɛrɔ̄ yī Ɔwɔ, oli̍chɔ̍lɔ ɔha̍ ɔ̍lɔ hye̍ēyī la okū wā la yɛchɛ a̍nɛ.”

20Iji̍sɔ̄ɔsi gba̍a che wa̍ ikpo̍ hīka, “Ala̍ bɛ̍ɛ? Ala̍ ma̍ gbɛri̍ya̍ ka amɔ̍lɔ - ɔ̄nyɛ nɛ?”

Ipi̍ta ka de ɔ̍ hīka, “Awɔ - Ɔhɔ̍ɔnyɛta̍ Nīi Ɔwɔ Hōhu Ma̍ a̍nɛ.”

21Bɛ̍ɛ̄nɛ̄, Iji̍sɔ̄ɔsi ta̍ wā ɔna lēchi̍ lēchi̍ ka ɛ̍lɛ ge̍ e̍e kɛlā ɔla̍ā de ɔ̄chɔ̄chɛ ni̍.

Iji̍sɔ̄ɔsi kɛlā ku̍ ichi̍ ɔmɔ̍ɔ̄ma̍ ba̍la ɔpīyaku̍ yī nū

(Ima̍tiyu 16:20-28; Ima̍aki 8:30—9:1)

22Iji̍sɔ̄ɔsi gba̍a ka de wa̍ bɛ̍ɛ̄nɛ̄ hīka, “Ala̍ ma̍ ko̍ō! Ɔyi̍ yī Ɔngrɔ̄ɔ ge̍ē mi̍chi̍ gba̍a̍. Ɛgabɔ̄ ba̍la alɛhu̍ aligbe ba̍la āchɛ ongū Lihɔ yī Iju̍u ge̍ē ta̍ ɔ̄. E̍ ge̍ē de ɔ̍ ē ngmo̍. Ɔ̄chī ɔmɛta̍, o̍ chī ge̍ē hye̍ēyī la okū.”

23Iji̍sɔ̄ɔsi koko̍o de āchɛ wa̍a̍ bɛ̍ɛ̄nɛ̄ hīka, “Ɔ̄chɛ nīi ge̍ chikpo̍ ge̍ē yɛ ē tāa ami, ɔlɔjā ge̍ mwanyī hī lɛlā yī anu̍ ɔlɔjā. O̍ ge̍ chrōoko̍o yī ichi̍ ɔmɔ̍ɔ̄ma̍ mɔ̄chīmɔ̄chī nīi o̍ ge̍ ku u la u̍tu. 24Wu̍chē oji̍ nɛ, ɔ̄chɛ nīi ge̍ē chikpo̍ yī ɔhɔ̄leyī yī nū ode gbōgbō, o̍ ge̍ē ngmla̍a ɔlɔjā ē pīyēbi̍. Ɔ̄chɛ nīi ge̍ chī de ɔhɔ̄leyī yī nū pīyēbi̍ wu̍chē yī u, o̍ re̍ka o̍ de ɔ̍ gbōgbō. 25Ɔ̄chɛ ge̍ de yɛchɛ wa̍a̍ ligbo̍-ligbo̍ lɔ̄lɛ nīi ɔhɔ̄leyī yī nū ge̍ pīyabi̍, kɛ̄ɛ nīi o̍ tū la ichi̍ ɔmɔ̍ɔ̄ma̍ ma̍ bɛ̍ɛ? Ɛpiyabuna yī nū kɔ̍ɔ̄ nɛ? 26Ɔ̄chɛ nīi ge̍ chi̍hi̍ya̍ yī ami ba̍la lɛlā ongōngū yī u, ami Ɔyi̍ yī Ɔngrɔ̄ɔ titi ge̍ē chi̍hi̍ya̍ yī ɔlɔjā yɛ̄grāa nīi n ge̍ē wā ma̍. Yɛ̄grāa ɔla̍ā, Ɔyi̍ yī Ɔngrɔ̄ɔ ge̍ē wā la rīgā ɔnɔ̄kɔ̄kū yī nū ba̍la iyī Ɔwɔ Nīi - Ādādā Ma̍ ba̍la ayɛ̍ɛ̄chɛ̄rɔ̄ ɔnɛ̄ɛhɛhi yī nū. 27Lēchi̍-lēchi̍, n koko̍o de ala̍! Āchɛ ɛha̍ gblāa amu u̍ma̍ama nīi i̍ ge̍ē pīyaku̍ ni̍ kpɛɛ nīi e̍ ē ma̍ Ɔchwɔ̄lɛ̍ Oro̍ōre̍ yī Ɔwɔ o̍bū.”

Ibi̍īyē yī Iji̍sɔ̄ɔsi pīyata̍ ke̍e̍

(Ima̍tiyu 17:1-8; Ima̍aki 9:2-8)

28La ɔ̄chī ɔmarāata̍ nīi Iji̍sɔ̄ɔsi kɛlā ɔla̍ā ma̍, o̍ wā ge̍ pīya ga ichō yī yɛwu ɔha̍ gāa ge̍ē jɔhā de Ɔwɔ. O̍ bī Ipi̍ta ba̍la Ijɔ̍ɔn ba̍la Ije̍mēehi ku iyī nū gāa. 29O̍ kū abɔ̍ɔ ē jɔhā ma̍, inēyī yī nū pīyata̍ ɔpɔ̄ɔpɛ̄. Ɔjā nīi o̍ tū la ibi̍īyē ma̍ de lɛ̍rɛ̍ bāa ɔfra̍ta̍ta̍ ma̍, o̍ hu̍ bāa ɔnya̍ri̍nya̍ri̍ ma̍. 30Ɔpɔ̄ɔpɛ̄, āchɛ ɛpa ɛha̍ gblāa abɔ̍ɔ ē kɛlā tāa anu̍; Imo̍sīisi ba̍la Ɛla̍yi̍ja nɛ. 31Aa̍ bīyɛchɛ la oho̍ōhu̍ ɔlɛbɛ̍bi̍ yī ɛbɛ yī Ɔwɔ ge̍ rɛ yɛ ē kwɔ̄kā ba̍la Iji̍sɔ̄ɔsi a̍nɛ. Wɔ̄kā lɔkɔ nīi Iji̍sɔ̄ɔsi ge̍ē pīyaku̍ abɔ̍ɔ la Ijɛru̍sālɛm hɛ̄ɛbɛ nīi lɛlā nīi Ɔwɔ chikpo̍ ma̍ de ē gɔ̄grāa ma̍ anu̍ nīi e̍ ka a̍nɛ. 32Wɔlā de Ipi̍ta ba̍la alikpɛ̍ɛ yī nū ngmo̍. E̍ ho̍ōhye̍ēyī ge̍ ma̍ oho̍ōhu̍ yī Iji̍sɔ̄ɔsi ba̍la āchɛ ɛpa ɛla̍ā nīi rɛ abɔ̍ɔ ba̍la anu̍ ma̍ bɛ̍ɛ̄nɛ̄. 33Āchɛ ɛpa ɛla̍ā yɛ ē pīya ē hī Iji̍sɔ̄ɔsi ma̍, Ipi̍ta ka de Iji̍sɔ̄ɔsi hīka, “Ādā be̍e! O̍ hwɔhi kpɛ̍ɛji nīi alɔ hɔ̄ amu ma̍. Alɔ ge̍ē gwō a̍ywɔ̍da̍ ɛta̍ amu: ɔha̍ - iyī wɔ; ɔha̍ - iyī Imo̍sīisi; ɔha̍ - iyī Ɛla̍yi̍ja.” Ipi̍ta i̍ jo̍ōje̍ ɔjā nīi o̍ yɛ ē kɔ̄ka ma̍ ni̍.

34O̍ rɛ abɔ̍ɔ ē kɛlā ma̍, akpɔ̍ɔwɔ ɔha̍ wā ge̍ gbuhu kla̍ āā ɔpɔ̄ɔpɛ̄. A̍chi̍kpo̍ yī Iji̍sɔ̄ɔsi de kpo̍ tūuhwi wu̍chē yī akpɔ̍ɔwɔ ɔla̍ā nīi gbuhu kla̍ āā ma̍. 35Ɔpɔ̄ɔpɛ̄, ɔkɔlɛ̄lā ɔha̍ bū lipu̍ yī akpɔ̍ɔwɔ ɔla̍ā hīka, “Ɔyi̍ yī U Ɔnɔ̄ngrɔ̄ɔ nīi hu ɔ̍ ohōhu ma̍ hɔ̄ ma̍ a̍nɛ. Ala̍ ā darɔ̄ku lɛlā yī nū.”

36Ɔkɔlɛ̄lā ɔla̍ā pi̍ye̍mā ma̍, o̍ de hī Iji̍sɔ̄ɔsi lōri̍īnū rɛ abɔ̍ɔ. A̍chi̍kpo̍ yī nū hīdīdū yī lɛlā nūma̍ wa̍a̍. E̍ i̍ koko̍o yī lɛlɛ̄lā de ɔ̄chɔ̄chɛ yɛ̄grāa ɔla̍ā ni̍ lachi̍lachi̍.

Iji̍sɔ̄ɔsi nyiya ɔɔ̍pɛ̄ ɔnɔ̄ngrɔ̄ɔ ɔha̍ nīi ku̍ yapri̍ija ɔdwɔ̄bi̍ ma̍

(Ima̍tiyu 17:14-18; Ima̍aki 9:14-27)

37Ɔ̄chī ɔ̍mɛpa yī nū, e̍ yɛ ē cha ē bū la yɛwu ɔla̍ā ma̍, āchɛ lyɛ̄mɛ̄ kpɛ̍ɛji nīi gāa ge̍ grāa anu̍ ma̍. 38Ɔngrɔ̄ɔ ɔha̍ to̍ohwe̍e bū abɔ̍ɔ lipu̍ yī āchɛ ɛla̍ā hīka, “Ɔngūlɛ̄lā be̍e! Chu̍chu̍u, n ra̍ābɔ̄ de wɔ wu̍chē yī ɔyi̍ yī u. Ɔyi̍ yī u ɔnɔ̄ngrɔ̄ɔ ūkpo̍he kpo̍kpo̍ nɛ. 39Yɛ̄grāa ɔha̍, yapri̍ija ɔdwɔ̄bi̍ ē wā la anu̍ ugbo̍he-ugbo̍he la ohwe̍e la ohwe̍e, ē wu̍ ɔ̄ gwō ju̍bɛ̍ju̍bɛ̍, ē ya̍ nīi o̍ ē hu̍ū la oko̍o pu̍tu̍pu̍tu̍. O̍ ē ya̍ tāa anu̍ ɛbɛ̍bɛ̍-ɛbɛ̍bɛ̍, o̍ i̍ ē diya gee ē hī ɔ̄ ni̍ kpɛkpɛ. 40N ra̍ābɔ̄ de a̍chi̍kpo̍ yī wɔ hīka e̍ ge̍ de yapri̍ija ɔdwɔ̄bi̍ ɔla̍ā nū hī ɔ̄ ibi̍īyē; e̍ i̍ ya̍ i̍ngɔ̍ɔ mɛ ni̍.”

41Iji̍sɔ̄ɔsi ka bɛ̍ɛ̄nɛ̄ hīka, “Ala̍ āchɛ i̍chɛ ku Ɔwɔ ni̍, bi̍yēyī hī ɔpɔ̄pū kpakpa nīi gblāa ma̍ la yɛchɛ nūma̍ ma̍! N ge̍ē u̍tu ē hɔ̄ tāa ala̍ ge̍ē ba̍ aba̍ ma̍/? N ge̍ē hɔ̄ tāa ala̍ ligbo̍ kana̍ o̍bū ma̍?” O̍ pīya kpa̍ta̍ de a̍dā yī ɔyi̍ ɔla̍ā hīka, “Gāa ge̍ bī ɔyi̍ yī wɔ wā!”

42Ɔyi̍ ɔla̍ā yɛ ē wā bɛ̍ɛ̄nɛ̄ ma̍, yapri̍ija ɔdwɔ̄bi̍ ɔla̍ā wu̍ ɔ̄ mla̍ajɛ, gwō ɔ̄ ju̍bɛ̍ju̍bɛ̍. Iji̍sɔ̄ɔsi ka alābi̍ tāa yapri̍ija ɔla̍ā. O̍ de ɔyi̍ ɔla̍ā nyiya i̍ngɔ̍ɔ ke̍e̍. O̍ ku̍chē la ɔyi̍ de a̍dā yī nū bɛ̍ɛ̄nɛ̄. 43Āchɛ wa̍a̍ de kpo̍ kwi̍ibū gblāa abɔ̍ɔ wu̍chē yī wɔhu̍ ɔnɔ̄kɔ̄kū yī Ɔwɔ nīi e̍ ma̍ hɔ̄ ma̍ ma̍.

Iji̍sɔ̄ɔsi gba̍a kɛlā ku̍ ɔpīyaku̍ yī nū

(Ima̍tiyu 17:22-23; Ima̍aki 9:30-32)

Lɛlā nīi Iji̍sɔ̄ɔsi yɛ ē ya̍ wa̍a̍ ma̍ e̍e lɛ āchɛ lɛbɛ̍bi̍ kpɛ̍ɛji we̍. Yɛ̄grāa ɔla̍ā, Iji̍sɔ̄ɔsi gba̍a ka de a̍chi̍kpo̍ yī nū bɛ̍ɛ̄nɛ̄ hīka, 44“Ala̍ e̍e mwanyī yī lɛlā nīi yɛ ma̍ ge̍ē ka ē de ala̍ ma̍ ni̍! E̍ yɛ amu ge̍ē wa̍ābɔ̄ la Ɔyi̍ yī Ɔngrɔ̄ɔ tū āchɛ̄ɛchɛ la abɔ̄ mɛ̍.” 45Aa̍ wa̍a̍ i̍ je̍ ochi̍chi̍ yī lɛlā ɔla̍ā nīi o̍ ka ma̍ ni̍. Ochi̍chi̍ yī nū trɛ̍ba hī wā hɛ̄ɛbɛ nīi e̍ i̍ ge̍ē je̍ ɔ̄ ni̍. O̍ chī de ya̍ wā uhuhwi la oche ɔ̍ ikpo̍.

Lɛlā yī ɔ̄chɛ nīi gɔ̄ga ma̍

(Ima̍tiyu 18:1-5; Ima̍aki 9:33-37)

46A̍chi̍kpo̍ yī Iji̍sɔ̄ɔsi kū la ahu̍ la ɔta̍ iyī wā ɔtɔ̍ɔ̄ta̍ bɛ̍ɛ̄nɛ̄. E̍ yɛ ē ta̍ahu̍ yī ɔ̄chɛ nīi - ɔmaga abɔ̍ɔ lipu̍ yī wā ma̍. 47Iji̍sɔ̄ɔsi je̍ ɛri̍ya̍ nīi e̍ yɛ ē gbo ma̍ ɔpɔ̄ɔpɛ̄. Wu̍chē yī ɔla̍ā, o̍ bī ɔɔ̍pɛ̄ onīchi̍chɛ̍ ɔha̍ ge̍ rɛ abɔ̍ɔ la yɛgɔ̄ yī nū. 48O̍ koko̍o de wa̍ hīka, “Ɔ̄chɛ nīi ge̍ wu̍chē yī u ywɔ̍ɔnyɛ yī ɔɔ̍pɛ̄ ita nūma̍, o̍ re̍ka ɔlɔjā ywɔ̍ɔnyɛ yī u. Ɔ̄chɛ nīi ge̍ chī ywɔ̍ɔnyɛ yī u mɛ̍, o̍ re̍ka ɔlɔjā ywɔ̍ɔnyɛ yī ɔ̄chɛ nīi de u tɛ̄rɔ̄ ma̍. Ɔ̄chɛ nīi lɛ pi̍nyɛ̍ gɔ̄ga lipu̍ yī ala̍ ma̍, anu̍ - ɔmaga yī ala̍ wa̍a̍ a̍nɛ.”

Ɔ̄chɛ nīi i̍ ge̍ - oluji yī wɔ ni̍ ɔ̍lɔma̍ - ɔya wɔ nɛ

(Ima̍aki 9:38-40)

49Ijɔ̍ɔn hu oko̍o kpa̍ ka bɛ̍ɛ̄nɛ̄ hīka, “Ādā be̍e! Alɔ ma̍ ɔngrɔ̄ɔ ɔha̍ nīi yɛ ē bī riyī yī wɔ ē nū yapri̍ija ɔdwɔ̄bi̍ ē hī āchɛ. Alɔ ka tāa anu̍ hīka o̍ ge̍ pi̍ye̍mā. Wu̍chē oji̍ nɛ, o̍ i̍ tū ribi yī alɔ nūma̍ ni̍.”

50Iji̍sɔ̄ɔsi koko̍o de anu̍ ba̍la āchɛ ehēhī bɛ̍ɛ̄nɛ̄ hīka, “Ala̍ e̍e da ɔ̍ hīka o̍ ge̍ pi̍ye̍mā ni̍. Wu̍chē oji̍ nɛ, ɔ̄chɛ nīi i̍ ge̍ - oluji yī alɔ ni̍; ɔ̍lɔma̍ ɔlɔjā ɔya alɔ nɛ.”

Alwɔlɛ̍ɛchɛ yī Isame̍riya ɔha̍ ta̍ Iji̍sɔ̄ɔsi

51Yɛ̄grāa wā ge̍ hōhī kurɛkurɛ nīi Ɔwɔ ge̍ē de Iji̍sɔ̄ɔsi ē nāa ē pīya gāa ichō ma̍, Iji̍sɔ̄ɔsi wā ge̍ gbɛri̍ya̍ yī oge̍ pīya ga Ijɛru̍sālɛm bɛ̍ɛ̄nɛ̄. 52O̍ de āchɛ tɛ̄rɔ̄ ga iyɔ̄bū. Alɛrɔ̄ ɛla̍ā pīya ga wɔlɛ̍ɛchɛ yī Alisame̍riya gāa ge̍ē ya̍ lɛbɛ nīi āchɛ ge̍ē ti̍bi̍īyēchɛ̄ tīgbē yī nū. 53Āchɛ ɛla̍ā i̍ chɛ̄ nāa lɛlā yī nū ni̍, wu̍chē oji̍ nɛ, o̍ lā nyaa hīka Ijɛru̍sālɛm nīi Iji̍sɔ̄ɔsi ga yɛ gāa a̍nɛ. 54A̍chi̍kpo̍ yī nū ɛha̍ nīi re̍ka Ije̍mēehi ba̍la Ijɔ̍ɔn ma̍ ma̍ i̍ngɔ̍ɔ ma̍, e̍ da Iji̍sɔ̄ɔsi hīka, “Ādā! O̍ ge̍ hi wɔ ɔtū i̍ngɔ̍ɔ, alɔ ā ka gɛ nīi ɔla̍ ge̍ bū la ichō wā ge̍ de āchɛ nūma̍ chāajɛ!”

55Iji̍sɔ̄ɔsi pīya kpa̍ta̍ ka alābi̍ tāa alikpɛ̍ɛ yī nū ɛla̍ā. 56E̍ wā ge̍ pīya bū abɔ̍ɔ ga ipwo̍gra ɔha̍ bɛ̍ɛ̄nɛ̄.

Āchɛ ɛha̍ nīi ka aa̍lɛ ge̍ē ku Iji̍sɔ̄ɔsi la u̍tu ma̍

(Ima̍tiyu 8:19-22)

57E̍ yɛ la ɔpɔ̄pū yɛ gāa ma̍, ɔngrɔ̄ɔ ɔha̍ da Iji̍sɔ̄ɔsi ka anɔ̍lɔ ge̍ē ku ɔ̍lɔ ē gāa ɛbɛha̍-ɛbɛha̍ nīi ɔ̍lɔ yɛ gāa ma̍.

58Iji̍sɔ̄ɔsi ka de ɔ̍ hīka, “Ma̍ gɛ! Yangūudu wa̍a̍ lɛ lɛ̄gɔ̄ nīi e̍ ē chā ma̍. A̍gba̍ana chī lɛ a̍chwɔ̍lɛ̍ yī wā. Ami, Ɔyi̍ yī Ɔngrɔ̄ɔ i̍ chī lɛ ɛbɛ ode lɛhu̍ kɔ̍ myɛ̍nyɛ̍ ni̍” 59Ɔ̄chɛ ɔha̍, Iji̍sɔ̄ɔsi da ɔ̍ hīka, “Ku um la u̍tu!”

Ɔ̄chɛ ɔla̍ā ka de Iji̍sɔ̄ɔsi hīka, “Ādā, pi̍ye̍mā nīi n ā gāa ge̍ de a̍dā yī u nyi o̍bū gɛ!”

60Iji̍sɔ̄ɔsi hīya anu̍ ɔkɔ hīka, “Pi̍ye̍mā nīi āchɛ nīi pīyaku̍ ma̍ ge̍ nyi āchɛ ɔpīyaku̍ yī wā. Pīya nīi a ā gāa ge̍ koko̍o yī lɛlā yī Ɔchwɔ̄lɛ̍ Oro̍ōre̍ yī Ɔwɔ de āchɛ.”

61Ɔngrɔ̄ɔ ɔha̍ gba̍a ka de Iji̍sɔ̄ɔsi hīka, “Ādā be̍e! Ami ma̍, n ge̍ē ku wɔ la u̍tu. Pi̍ye̍mā nīi n ā gāa ge̍ ta̍ alwɔlɛ̍ yī u ɔhɔ̄lɛhi o̍bū gɛ!”

62Iji̍sɔ̄ɔsi koko̍o de ɔ̍ hīka, “Ɔ̄chɛ nīi ge̍ de abɔ̄ bī inyɛ̄rɔ̄ yɛ ē ya̍ u̍ku̍rɔ̍ nīi o̍ ge̍ chōo̍chē yɛ ē pīyeyīhii, ɔ̍lɔma̍ ɔlɔjā i̍ ɔjɔ̄jā de Ɔchwɔ̄lɛ̍ Oro̍ōre̍ yī Ɔwɔ ni̍.”

Currently Selected:

Ilu̍uku 9: YBASR

Highlight

Copy