Ilu̍uku 6

Lɛlā yī Ɔ̄chī Ɔmyɛ̍nyɛ̍

(Ima̍tiyu 12:1-8; Ima̍aki 2:23-28)

1I̍chi̍chɛ ɔha̍ la Ɔ̄chī Ɔmyɛ̍nyɛ̍, Iji̍sɔ̄ɔsi yɛ ē gɔpɛ̄ yī nū gala yɛrɔ̄ yī igu ɔha̍ nīi re̍ka iwi̍iti ma̍. A̍chi̍kpo̍ yī nū yɛ ē pīya abɔ̄ chē ahu̍ yī igu ɛha̍ re̍ yɛ̄grāa nīi e̍ yɛ ē ga ma̍. E̍ ge̍ de abɔ̄ re̍tū ɔ̄ re̍tū ɔ̄ mɛ̍, e̍ ē de ē re̍. 2Āchɛ yī Ifa̍rasīi ɛha̍ da wa̍ bɛ̍ɛ̄nɛ̄ hīka, “Oji̍ - ohu nīi ala̍ yɛ aa̍ ē yɛ̍ɛ̄lā nīi Lihɔ yī alɔ ka ɔ̄chɛ ɔ̍lɔ ge̍ e̍e ya̍ la Ɔ̄chī Ɔmyɛ̍nyɛ̍ ni̍ ma̍/?”

3Iji̍sɔ̄ɔsi hīya aa̍ ɔkɔ hīka, “O̍ re̍ka ala̍ i̍ ma̍ bū la īpū po̍ lɔkɔ nīi Ide̍bīidi ya̍ i̍chɔ̍lɔ yɛ̄grāa nīi anu̍ ba̍la āchɛ yī nū de kpo̍ ku̍ lɛmiyɛ ma̍ je̍ ni̍? 4Ɔ̍lɔma̍, Ide̍bīidi chɛ̄ ga u̍nu̍ yī Ɔwɔ ge̍ re̍ ibrɛ̍ɛdi nīi e̍ de kwɔbɔ̄ lā de Ɔwɔ abɔ̍ɔ ma̍. O̍ gba̍a nōnuni̍ kɔ̄ de āchɛ nīi yɛ tāa anu̍ ma̍ nīi e̍ re̍. Lihɔ nɛ; ɔ̄chɛ ji̍jiji̍ chī re̍ ibrɛ̍ɛdi ɔla̍ā ni̍, ɔ̍chi̍kpa̍kpa̍ - oligbe yī Ɔwɔ.”

5Iji̍sɔ̄ɔsi de che ɔ̄ hīka, “Ɔyi̍ yī Ɔngrɔ̄ɔ chī u̍tu - Ādādā yī Ɔ̄chī Ɔmyɛ̍nyɛ̍ nɛ.”

Iji̍sɔ̄ɔsi nyiya ɔngrɔ̄ɔ ɔha̍ nīi kwa̍ābɔ̄ oko̍ōku̍ ma̍

(Ima̍tiyu 12:9-14; Ima̍aki 3:1-6)

6Iji̍sɔ̄ɔsi ga u̍nu̍ ogrēeyī yī Iju̍u la Ɔ̄chī Ɔmyɛ̍nyɛ̍ ɔha̍ ge̍ yɛ ē ngū āchɛ lɛlā. Ɔngrɔ̄ɔ ɔha̍ nīi hɔ̄ abɔ̍ɔ ma̍ kwa̍ābɔ̄ oko̍ōku̍. Abɔ̄ līre̍ nɛ. 7Āchɛ yī Ifa̍rasīi ba̍la āchɛ ongū Lihɔ yī Iju̍u yɛ ē gāla̍ ɔpɔ̄pū yī lɛlā ɔha̍ nīi e̍ ge̍ē bī ku̍ Iji̍sɔ̄ɔsi lɛlā abi̍ ɔyɔ̍ɔ̄ya̍ ɔha̍ ma̍. Wu̍chē yī ɔla̍ā, e̍ gblāa abɔ̍ɔ ē deyīrɛ ɔ̍ grigrigri, ɔha̍ni̍ e̍ ē ma̍ nīi o̍ ē de ɔngrɔ̄ɔ ɔla̍ā nyiya la Ɔ̄chī Ɔmyɛ̍nyɛ̍ ɔla̍ā. 8Iji̍sɔ̄ɔsi je̍ ɛri̍ya̍ ogbōgbo yī ūkpɔ̄tū yī wā ɔpɔ̄ɔpɛ̄. O̍ da ɔngrɔ̄ɔ ɔla̍ā ka ɔ̍lɔ ge̍ nīichō, nīi ɔ̍lɔ ge̍ ngmɛ̍ɛchɛ wā ge̍ yarɛ ma̍ la iyɔ̄bū yī āchɛ wa̍a̍. Ɔngrɔ̄ɔ ɔla̍ā nīichō ge̍ rɛ abɔ̍ɔ bɛ̍ɛ̄nɛ̄. 9Iji̍sɔ̄ɔsi ka de wa̍ wa̍a̍ bɛ̍ɛ̄nɛ̄ hīka, “N yɛ amu ē che ala̍ ikpo̍ yī lɛlā! Oji̍ nīi Lihɔ yī alɔ ma̍ u̍tu chɛ̄ ka ɔ̄chɛ ɔ̍lɔ ge̍ ya̍ la Ɔ̄chī Ɔmyɛ̍nyɛ̍ ma̍/? Ɔya̍ ɔ̄chɛ lɛhi kɛ̄ɛ ɔya̍ ɔ̄chɛ u̍hu̍? Ode ɔhɔ̄leyī yī ɔ̄chɛ hɛ̍ta̍, kɛ̄ɛ ode ɔhɔ̄leyī yī ɔ̄chɛ chāajɛ?” 10Iji̍sɔ̄ɔsi jiyeyī kaka ma̍ wā wa̍a̍. O̍ da ɔngrɔ̄ɔ ɔkwa̍ābɔ̄ oko̍ōku̍ ɔla̍ā ka ɔ̍lɔ ge̍ nā abɔ̄ yī ɔ̍lɔ ɔla̍ā kpaa. Ɔngrɔ̄ɔ ɔla̍ā nā abɔ̄ kpaa ma̍, o̍ de lɛ cha̍cha̍ i̍ngɔ̍ɔ ke̍e̍ ɔpɔ̄ɔpɛ̄.

11Āchɛ yī Ifa̍rasīi ɛla̍ā de kpo̍ ya̍ ɔtū ngurangura ɔlamu-ɔlamu. E̍ gblāa abɔ̍ɔ ē ka̍ārɔ̄ ē miya lɔkɔ nīi ē ge̍ē ya̍ tāa Iji̍sɔ̄ɔsi ma̍.

Alɛrɔ̄ āchɛ igwo̍lɛpa nīi Iji̍sɔ̄ɔsi hōhu ma̍

(Ima̍tiyu 10:1-4; Ima̍aki 3:13-19)

12Yɛ̄grāa ɔla̍ā, Iji̍sɔ̄ɔsi wā ge̍ pīya ga ichō yī u̍kpo̍chi ɔha̍ gāa ge̍ē jɔhā de Ɔwɔ. O̍ ji la oto̍tu̍ kpɛɛ ge̍ ku ɔ̄chī. 13Eyī de nyā ma̍, o̍ hī a̍chi̍kpo̍ yī nū ɛra̍ wa̍a̍ ge̍ grēeyī. O̍ hu āchɛ igwo̍lɛpa nīi ge̍ē re̍ka alɛrɔ̄ yī nū ma̍. 14Ɔha̍ re̍ka Isa̍yi̍mɔ̄ɔn, Iji̍sɔ̄ɔsi chī de ɔ̍ re̍ka Ipi̍ta. Anu̍ ba̍la ɔɔ̍nɛ̍ yī nū nīi re̍ka A̍ndru ma̍, ba̍la Ije̍mēehi, ba̍la Ijɔ̍ɔn, ba̍la Ifi̍līipu, ba̍la Ibato̍lōmiyu, 15ba̍la Ima̍tiyu, ba̍la Itɔ̍mɔ̄ɔsi, ba̍la Ije̍mēehi nīi - ɔyi̍ yī Alife̍yūsi ma̍, ba̍la Isa̍yi̍mɔ̄ɔn Ɔngma̍lo̍gra, 16ba̍la Iju̍dasi nīi - ɔyi̍ yī Ije̍mēehi ma̍, ba̍la Iju̍dasi Isikɛ̍rīyɔti nīi chɔ̄ɔwɛ tū Iji̍sɔ̄ɔsi ma̍.

Iji̍sɔ̄ɔsi ngū āchɛ yɛ̄mɛ̄mɛ̄ lɛlā, nyiya aa̍ iyē oko̍ōku̍

(Ima̍tiyu 4:23-25)

17Iji̍sɔ̄ɔsi ba̍la aa̍ cha bū la u̍kpo̍chi ɔla̍ā wā la ɛbɛ nīi ajɛ lɛ pɛ̍pɛ̍ ma̍, a̍chi̍kpo̍ yī nū grēeyī kpɛ̍ɛji gblāa abɔ̍ɔ. Āchɛ pɛ̍ kpɛ̍ɛji bū la oe̍ ɔha̍lɔha̍ yī Ijudi̍ya wa̍a̍, ba̍la Ijɛru̍sālɛm ba̍la ipwo̍gra yī Ita̍ya ba̍la Isa̍yi̍dɔn nīi gblāa la oko̍o yī li̍hu ma̍. 18E̍ wā hɛ̄ɛbɛ ge̍ē plɛ̍ɛ̄lā yī Iji̍sɔ̄ɔsi, hɛ̄ɛbɛ nīi o̍ ge̍ē nyiya aa̍ iyē oko̍ōku̍ yī wā. Āchɛ ɛha̍ nīi yapri̍ija ɔdwɔ̄bi̍ ē ku̍ wā dwɔ̄bi̍-dwɔ̄bi̍ ma̍ wā nīi o̍ de wa̍ nyiya. 19Āchɛ wa̍a̍ yɛ ē chikpo̍ ge̍ē de abɔ̄ gwō Iji̍sɔ̄ɔsi. Wu̍chē yī oji̍ nɛ, wɔhu̍ yī obo̍chi̍ ɔnyɔ̄nyiya yɛ ē bū la ibi̍īyē yī nū ge̍ē de wa̍ ē nyiya wa̍a̍.

A̍hōhi ba̍la īlāanyī

(Ima̍tiyu 5:1-12)

20Iji̍sɔ̄ɔsi ma̍ a̍chi̍kpo̍ yī nū chi̍i̍, da wa̍ hīka,

“A̍hōhi ge̍ - iyī ala̍ nīi gbyeklo̍ ma̍!

Ɔpiyɛ yī Ɔchwɔ̄lɛ̍ Oro̍ōre̍ yī Ɔwɔ - iyī ala̍ nɛ.

21A̍hōhi ge̍ - iyī ala̍ nīi de ku̍ lɛmiyɛ u̍ma̍ama ma̍!

Ala̍ ge̍ē de ē nū lipu̍ hwɔhi hwɔhi.

A̍hōhi ge̍ - iyī ala̍ nīi yɛ ē drɛ̄ɛgba u̍ma̍ama ma̍!

Ala̍ ge̍ē hɛhɛ we̍.

22“A̍hōhi ge̍ - iyī ala̍ nīi de ta̍ āchɛ anyī ma̍! Ala̍ nīi āchɛ ta̍ ala̍, pra̍a ala̍ ɛcha̍ ka ala̍ ɔ̍lɔ - āchɛ ɔdwɔ̄bi̍ nɛ, wu̍chē yī ami Ɔyi̍ yī Ɔngrɔ̄ɔ ma̍ nɛ. 23Ala̍ ā lɛ ɔwɔ̄wīyā nīi ala̍ ge̍ jēejē la ɔwɔ̄wīyā yɛ̄grāa nīi e̍ ge̍ē ya̍ ala̍ i̍ngɔ̍ɔ ma̍! Wu̍chē oji̍ nɛ, Ɔwɔ ge̍ē kla̍ ala̍ ure̍ hwɔhi hwɔhi abɔ̍ɔ la ichō. I̍ngi̍ngɔ̍ɔ nīi aa̍ ɔ̍kɔ̄kū yī wā yɛ̍ɛ̄lā nūma̍ tāa āchɛ ɔkɛrɔ̄ yī Ɔwɔ i̍chɔ̍lɔ a̍nɛ.

24“I̍īyo̍ de ala̍ āchɛ nīi de gbwɔdu u̍ma̍ama ma̍!

Ala̍ de ɔhɔ̄leyī ɔnɛ̄ɛhɛhi yī ala̍ re̍ wa̍a̍ mɛ̍!

25I̍īyo̍ de ala̍ āchɛ nīi de nlīpu̍ u̍ma̍ama ma̍!

Ala̍ chī ge̍ē de ē ku̍ lɛmiyɛ we̍.

I̍īyo̍ de ala̍ āchɛ nīi yɛ ē hɛhɛ u̍ma̍ama ma̍!

Ala̍ chī ge̍ē drɛ̄ɛgba, ē gwe̍ejrīkā we̍.

26“I̍īyo̍ de ala̍ nīi āchɛ ge̍ yɛ ē ka ɔnɛ̄ɛhɛhi-ɔnɛ̄ɛhɛhi yī ala̍ ma̍! I̍ngi̍ngɔ̍ɔ nīi aa̍ ɔ̍kɔ̄kū yī wā ka iyī āchɛ nīi ē warīmɛ̄ ka aɛ̍lɛ ka ɛrɔ̄ yī Ɔwɔ ma̍ a̍nɛ.

Yɔ̍ɔhɔtū yī oluji yī wɔ kpɔ̍ɔ̍

(Ima̍tiyu 5:38-48; 7:12a)

27“Ala̍ āchɛ nīi yɛ ē plɛ̍ɛ̄lā yī u ma̍, n ge̍ē koko̍o de ala̍! Ala̍ ā yɔ̍ɔhɔtū yī aluji yī ala̍. Ala̍ ā lɛ̍ɛhi tāa āchɛ nīi ala̍ ta̍ wā anyī ma̍. 28Ala̍ ā ya̍ ɔpiyɛ de āchɛ nīi jɔhā tū ala̍ ma̍. Ala̍ ē jɔhā ɔnɛ̄ɛhɛhi de āchɛ nīi ē ya̍ ala̍ ichi̍ ji ma̍. 29Ɔ̄chɛ ge̍ dra̍ awɔ abɔ̄ la a̍ba̍a ɔha̍, pi̍ye̍mā nīi o̍ ge̍ gba̍a dra̍ awɔ la ɔ̍mɛpa. Ɔ̄chɛ ge̍ de aru̍ oru chelichō yī wɔ nāa, pi̍ye̍mā nīi o̍ ge̍ de i̍kpa̍aru̍ nāa i̍ngi̍ngɔ̍ɔ. 30Ɔ̄chaha̍-ɔ̄chaha̍ ge̍ che wɔ ikpo̍ yī ɔjā, de de ɔ̍. Ɔ̄chɛ ge̍ē nāa ɔjā yī wɔ, a ā ka hīka o̍ ge̍ ku̍chē la anu̍ pi̍i̍ gɛ ni̍. 31Yɛ̍ɛ̄lā tāa āchɛ lɔkɔ nīi a chikpo̍ nīi e̍ ge̍ē ya̍ tāa awɔ ɔlɔjā ma̍.

32“A ge̍ yɔ̍ɔhɔtū yī āchɛ nīi yɔ̍ɔhɔtū yī wɔ ke̍e̍ ma̍, ɔnɛ̄ɛhɛhi ɔna̍ hɔ̄ abɔ̍ɔ de wɔ ma̍? Je̍ka aa̍ āchɛ ɔdwɔ̄bi̍ titi ē yɔ̍ɔhɔtū yī āchɛ nīi yɔ̍ɔhɔtū yī wā ma̍! 33A ge̍ lɛ̍ɛhi tāa āchɛ nīi ē lɛ̍ɛhi ē tāa awɔ ke̍e̍ ma̍, ɔnɛ̄ɛhɛhi ɔna̍ hɔ̄ abɔ̍ɔ de wɔ ma̍? Je̍ka aa̍ āchɛ ɔdwɔ̄bi̍ titi ē ya̍ i̍ngi̍ngɔ̍ɔ! 34A ge̍ chī de ɔjā kpla̍ ɔ̄chɛ nīi a deyīche ka ɔ̍lɔ ge̍ē de ē de aɔ̍lɔ a̍nɛ ma̍, ɔnɛ̄ɛhɛhi ɔna̍ hɔ̄ abɔ̍ɔ de wɔ ma̍? Je̍ka aa̍ āchɛ ɔdwɔ̄bi̍ titi ē de ɔjā kpla̍ āchɛ ɔdwɔ̄bi̍ nīi e̍ ge̍ deyīche ka aɛ̍lɛ ge̍ē chōo̍chē de ē nāa i̍ngɔ̍ɔ ke̍e̍ we̍. 35Ala̍ ā yɔ̍ɔhɔtū yī aluji yī ala̍. Ala̍ ā lɛ̍ɛhi tāa aa̍. Ala̍ ā de ɔjā kpla̍ āchɛ; ala̍ e̍e deyīche yī oku̍chē la anu̍ pi̍i̍ ni̍. Ɔwɔ ɔlɔjā ge̍ē kla̍ ala̍ ure̍ hwɔhi hwɔhi. Bū la ɛbɛ ɔla̍ā, ala̍ ge̍ē re̍ka ayi̍ yī Ɔwɔ nīi - Ɔmaga ɔnɔ̄kɔ̄kū ma̍. Wu̍chē oji̍ nɛ, anu̍ hwɔhi lɛlā tāa āchɛ ɔdwɔ̄bi̍ ba̍la āchɛ nīi i̍ ē da ɔ̍ o̍be yī u̍ku̍rɔ̍ ni̍ ma̍. 36O̍ lɛ i̍ngɔ̍ɔ ma̍, ala̍ ā jyɛ̍ɛ̄lā tāa āchɛ lɔkɔ nīi A̍dā yī ala̍ ɔlɔjā jyɛ̍ɛ̄lā tāa āchɛ ma̍ gɛ.

Lɛpɔ̄ ɔka tāa ɔ̍nyīnū

(Ima̍tiyu 7:1-5)

37“Ala̍ e̍e de lɛpɔ̄ ku̍ āchɛ ni̍, nīi Ɔwɔ ge̍ e̍e de lɛpɔ̄ ku̍ ala̍ ni̍. Ala̍ e̍e hɛ̍ āchɛ lɛpɔ̄ ɔdwɔ̄bi̍ ni̍, nīi Ɔwɔ ge̍ e̍e hɛ̍ ala̍ lɛpɔ̄ ɔdwɔ̄bi̍ ni̍. Ala̍ ā de lɛlā ɔdwɔ̄bi̍ kɔ̄ de āchɛ, nīi Ɔwɔ ge̍ de iyī ala̍ kɔ̄ de ala̍. 38Ala̍ ā kɔ̄ ɔjā de āchɛ nīi Ɔwɔ ge̍ kɔ̄ de ala̍ titi. Iyī ala̍ nīi ala̍ ge̍ē nāa ma̍ ge̍ē mōmu ē kɔ̄ kpɔ̍tɔ̍kpɔ̍tɔ̍ chīyētū la riba yī ala̍, nīi o̍ ē mu lēchi̍ lēchi̍. Wu̍chē oji̍ nɛ, ɔjā nīi a bī miya ɔjā de āchɛ ma̍, anu̍ nīi Ɔwɔ ge̍ē bī miya ē de wɔ a̍nɛ.”

39Iji̍sɔ̄ɔsi chā wɔ̄chīije ɔha̍ de wa̍ bɛ̍ɛ̄nɛ̄ hīka, “Ɔ̄chɛ opriyī gba̍a ē bī ɔ̄chɛ opriyī la ogblo̍? O̍ ge̍ ya̍ i̍ngɔ̍ɔ, aa̍ āchɛ ɛpɛpa ge̍ē ngma̍ ē ta̍tū la wɔ̄gɔ̄ ɔha̍. 40Ɔ̄chɛ nīi yɛ ē ngū ɔjā la abɔ̄ yī abābā ma̍ i̍ ga abābā nīi ē ngū ɔ̄ ɔjā ma̍ ɔgɔ̄ga ni̍. O̍ ge̍ kwɛ̍ɛjī la ɔjā nīi o̍ yɛ ē ngū ma̍, o̍ ge̍ē lɛ bāa abā yī nū ma̍ bɛ̍ɛ̄nɛ̄.

41“Oji̍ - ohu̍ nīi a ē ma̍ īwī ɔbɔbɔ nīi tū la īkprī yī ɔɔ̍nɛ̍ yī wɔ ɔha̍ ma̍/? Ligbo̍ yī ɔchi̍ nīi gbo abɔ̍ɔ la īkprī yī awɔ ɔlɔjā ma̍, a ma̍ ɔ̄/? 42Kana̍ nīi a ge̍ē da ɔɔ̍nɛ̍ yī wɔ ka ɔ̍lɔ ge̍ kɔ̍ɔ̄ nīi aɔ̍lɔ ge̍ wu̍ ɔ̍lɔ īwī la īkprī ma̍/? Ligbo̍ yī ɔchi̍ nīi gbo amu la īkprī yī awɔ ɔlɔjā ma̍, a u̍tu ma̍ ɔ̄? Awɔ ɔ̄chɛ ɔkɛlā ɔha̍ chōo̍chē ya̍ ɔha̍ ɔla̍ā! De ligbo̍ yī ɔchi̍ ɔla̍ā wu̍ hī iyī wɔ īkprī o̍bū, hɛ̄ɛbɛ nīi a ā myɛ̍ma̍ wu̍ īwī hī ɔɔ̍nɛ̍ yī wɔ īkprī!

Ɔchi̍ ba̍la īkpō nīi o̍ ē wa̍ ma̍

(Ima̍tiyu 7:16-20; 12:33-35)

43“Ɔchi̍ ohiyē gba̍a ē wa̍ īkpō ɔdwɔ̄bi̍? Kɛ̄ɛ ɔchi̍ ogbi̍tɛ̄ wa̍ īkpō ɔnɛ̄ɛhɛhi ma̍? 44E̍ ē je̍ ɔchi̍ bū la ita īkpō nīi o̍ ē wa̍ ma̍. Ɔ̄chɛ ɔha̍ ngmla̍a ūkpō yī ejū bū la ɔkpa̍chichi̍ je̍? Kɛ̄ɛ oromu̍ nīi e̍ ē ngmɔ̍ɔ̄ngmla̍a ē bū la ɛkwɔ ma̍/? 45Ɔ̄chɛ ɔnɛ̄ɛhɛhi ē bī lɛlā ɔnɛ̄ɛhɛhi ē bīyɛchɛ ē bū la lɛlā ɔnɛ̄ɛhɛhi nīi o̍ de gbōgbō lipu̍ yī ūkpɔ̄tū yī nū ma̍. Ɔ̄chɛ ɔdwɔ̄bi̍ chī bī lɛlā ɔdwɔ̄bi̍ ē bīyɛchɛ ē bū lɛlā ɔdwɔ̄bi̍ nīi o̍ de gbōgbō lipu̍ yī ūkpɔ̄tū yī nū ma̍. Wu̍chē yī oji̍ nɛ, ɔjā nīi mōmu rɛ la ūkpɔ̄tū ma̍ nīi oko̍o ē de ē ka a̍nɛ.

Wɔ̄chīije yī u̍nu̍ ɔlɛ brii ba̍la onīi lɛ geegee ma̍

(Ima̍tiyu 7:24-27)

46“Wu̍chē oji̍ nīi ala̍ ē chī hī u ka, ‘Ādā, Ādā,’ nīi ala̍ i̍ ē chī chɛ̄ yɛ̍ɛ̄lā nīi n ka de ala̍ ni̍ ma̍? 47Ɔ̄chɛ nīi ē wā dikpo̍ba̍ u ge̍ē plɛ̍ɛ̄lā yī u, ya̍ otūlichō yī nū ma̍, n ge̍ē chabɔ̄ lɔkɔ nīi ɔlɔjā lɛ ma̍ ē hu̍ ala̍! 48Ɔlɔjā lɛ bāa ɔngrɔ̄ɔ ɔha̍ nīi gāa ge̍ gwō wɔlɛ̍ ɔha̍ ma̍. O̍ bū wɔ̄gɔ̄ hiyuu ga ajɛ, de owu̍tu yī u̍nu̍ che la ichō yī lɛchɔ̄ ɔlwɔhɔ̍hu̍. Yenyi mu hɛ̍rɛ̍ wa̍a̍ ge̍ dra̍ wɔlɛ̍ ɔla̍ā; o̍ rɛ abɔ̍ɔ la ɛbɛbɛ nīi o̍ rɛ ma̍ brii. Wu̍chē oji̍ nɛ, e̍ gwo̍ ɔ̄ yɛ̍yɛ̍. 49Ɔ̄chɛ nīi plɛ̍ɛ̄lā yī u nīi i̍ ya̍ otūlichō yī nū ni̍ ma̍, ɔlɔjā lɛ bāa ɔngrɔ̄ɔ ɔha̍ nīi gāa ge̍ gwo̍ wɔlɛ̍ che la ichō yī ajɛ ɔlamu ji ma̍. O̍ i̍ de owu̍tu yī nū tū la ajɛ hiyuu o̍bū ni̍. Yenyi ɔhɛ̍rɛ̍ wā ge̍ dra̍ wɔlɛ̍ ɔ̍lɔma̍ ɔpɔ̄ɔpɛ̄ ma̍, o̍ miya tū ajɛ. Ajɛ ogwōgwō yī nū ya̍ ojiya bāa ahuhu ma̍!”

Currently Selected:

Ilu̍uku 6: YBASR

Highlight

Copy