Ilu̍uku 13

Ɔpīyabɔ̄ta̍ hī lɛlā ɔdwɔ̄bi̍ ɔyɔ̍ɔ̄ya̍ kɛ̄ɛ ɔpīyaku̍

1Yɛ̄grāa ɔla̍ā, āchɛ ɛha̍ nīi gblāa abɔ̍ɔ ma̍ yɛ ē koko̍o de Iji̍sɔ̄ɔsi lɔkɔ nīi Ipa̍yi̍lēeti ngmo̍ Aliga̍līli ɛha̍ ma̍. E̍ ka ɔ̍lɔ ngmo̍ ɛ̍lɛ yɛ̄grāa nīi ɛ̍lɛ yɛ ē de ɔjā pā Ɔwɔ ma̍. 2Iji̍sɔ̄ɔsi hīya aa̍ ɔkɔ bɛ̍ɛ̄nɛ̄ hīka, “Ala̍ gbɛri̍ya̍ ka Aliga̍līli ɛla̍ā ɛ̍lɛ - āchɛ ɔdwɔ̄bi̍ ka̍ka̍ hi̍ Aliga̍līli ehēhī, anu̍ - ohu̍ nīi e̍ ngmo̍ wā i̍ngɔ̍ɔ a̍nɛ? 3I̍ i̍ngɔ̍ɔ ni̍! N ā koko̍o de ala̍! Ala̍ i̍ ge̍ pīyabɔ̄ta̍ hī lɛlā ɔdwɔ̄bi̍ ɔyɔ̍ɔ̄ya̍ yī ala̍ ni̍, ala̍ ge̍ē pīyēku̍ i̍ngɔ̍ɔ bāa aa̍ ma̍. 4Āchɛ igwa̍arāata̍ nīi u̍nu̍ ɔjɛ̄ gbo̍ri̍gbo̍ri̍ ɔla̍ā gbo ngmo̍ wā la Isilo̍ōm ma̍ bɛ̍ɛ? Ala̍ gbɛri̍ya̍ ka ɛ̍lɛ - āchɛ ɔdwɔ̄bi̍ ka̍ka̍ hi̍ Alijɛru̍sālɛm ehēhī - ohu̍ a̍nɛ? 5I̍ i̍ngɔ̍ɔ ni̍! N koko̍o de ala̍ mɛ̍! Ala̍ i̍ ge̍ pīyabɔ̄ta̍ hī lɛlā ɔdwɔ̄bi̍ ɔyɔ̍ɔ̄ya̍ yī ala̍ ni̍, ala̍ ge̍ē pīyēku̍ i̍ngɔ̍ɔ bāa aa̍ ma̍.”

Wɔ̄chīije yī ɔchi̍ nīi i̍ wa̍ īkpō ni̍ ma̍

6Bɛ̍ɛ̄nɛ̄, Iji̍sɔ̄ɔsi kɛlā la wɔ̄chīije de wa̍ hīka, “Ɔngrɔ̄ɔ ɔha̍ tū ejū rɛ la yɛrɔ̄ yī īkpɔ̄ɔ̄chi̍ yī nū. O̍ ē gāa ge̍ē jiya anu̍ ē ma̍ i̍ngi̍ngi̍ngɔ̍ɔ, o̍ i̍ ma̍ īkpō yī ejū ɔha̍lɔha̍ ku abɔ̍ɔ la anu̍ ni̍. 7O̍ koko̍o de ɔ̄chɛ odeyīrɛ yɛrɔ̄ ɔla̍ā hīka ɔ̍lɔ ge̍ ma̍ gɛ/. Ɔ̍lɔ gbajɛ lɛ̍yi̍ ɛta̍ mɛ̍ nīi anɔ̍lɔ yɛ ma̍ ē wɔ̄wā ge̍ē gāla̍ īkpō yī ejū nūma̍ ma̍; anɔ̍lɔ i̍ chī ma̍ īkpō ɔha̍lɔha̍ la ɔ̍lɔ je̍ ni̍. Ɔ̍lɔ ge̍ de ejū ɔla̍ā hɛ̍ tāajɛ. Ɔ̍lɔ ge̍ē rɛ abɔ̍ɔ ē bīya ajɛ i̍ngɔ̍ɔ ji ē ya̍ oji̍? 8Bū la ɛbɛ ɔla̍ā, ɔ̄chɛ odeyīrɛ yɛrɔ̄ ɔ̍lɔma̍ ka de ɔngrɔ̄ɔ ɔla̍ā hīka ɔ̍lɔ ge̍ pi̍ye̍mā hī ejū ɔla̍ā lɛ̍ɛ̄nɛ̄ ji. Anɔ̍lɔ ge̍ē bū lɛ̄gɔ̄ ta̍kaka ē tū ɔ̍lɔ, ē kpo̍ limū tū ɔ̍lɔ. 9Ɔ̍lɔ ge̍ wa̍ īkpō lɛ̍ɛ̍ha̍ mɛ, ɔ̍lɔma̍ ɔ̍lɔ re̍ka ɔ̍lɔ hwɔhi. Ɔ̍lɔ i̍ ge̍ chī gba̍a wa̍ gɛ ni̍ o̍bū mɛ̍, ɔ̍lɔ ge̍ ka nīi anɔ̍lɔ ge̍ de ɔ̍lɔ hɛ̍ tāajɛ.”

Iji̍sɔ̄ɔsi nyiya ɔnyā okwi̍kpo̍ oko̍ōku̍ ɔha̍ la Ɔ̄chī Ɔmyɛ̍nyɛ̍

10I̍chi̍chɛ ɔha̍ la Ɔ̄chī Ɔmyɛ̍nyɛ̍, Iji̍sɔ̄ɔsi yɛ ē ngū āchɛ lɛlā abɔ̍ɔ la u̍nu̍ ogrēeyī ɔha̍. 11Ɔnyā ɔha̍ nīi hɔ̄ abɔ̍ɔ ma̍ ku̍ yapri̍ija ɔdwɔ̄bi̍. O̍ de ɔ̍ ya̍ oku̍ku ke̍e̍ lɛ̍yi̍ igwa̍arāata̍ mɛ̍. O̍ i̍ ē hu hwa̍a̍ ē mɛ ni̍, ba̍ ku̍ku̍ku̍. 12Iji̍sɔ̄ɔsi ma̍ ɔ̄ ma̍, o̍ hī ɔ̄ ɛra̍ ka de ɔ̍ hīka, “Ɔnyā! N de wɔ hɛ̍ta̍ hī iyē oko̍ōku̍ yī wɔ ɔla̍ā mɛ̍!” 13Iji̍sɔ̄ɔsi de abɔ̄ che ɔ̍ ɔpɔ̄ɔpɛ̄, o̍ nīichō dedede, kū la ɔkā Ɔwɔ ɔkɔ̄kā ɔpɔ̄ɔpɛ̄.

14O̍ wu̍ ɔlɛhu̍ yī u̍nu̍ ogrēeyī ɔla̍ā ɔtū kpɛ̍ɛji nīi Iji̍sɔ̄ɔsi nyiya ɔ̄chɛ la Ɔ̄chī Ɔmyɛ̍nyɛ̍ ma̍. O̍ ka de āchɛ hwōō bɛ̍ɛ̄nɛ̄ hīka, “Ala̍ ma̍ ko̍ō! Ɔ̄chī nīi alɔ ē ya̍ u̍ku̍rɔ̍ ma̍ lɛ erīiyī. Ɔ̄chī ɛla̍ā nīi ala̍ ge̍ē wā nīi o̍ ē nyiya ala̍ a̍nɛ; i̍ Ɔ̄chī Ɔmyɛ̍nyɛ̍ ni̍!”

15Ādā Iji̍sɔ̄ɔsi hīya anu̍ ɔkɔ, ka bɛ̍ɛ̄nɛ̄ hīka, “Ala̍, āchɛ ɔkɛlā ɔha̍ chōo̍chē ya̍ ɔha̍ ɛla̍ā! Ɔ̄nyɛ hɔ̄ abɔ̍ɔ lipu̍ yī ala̍ nīi i̍ ge̍ē wī orī hī yɛna kɛ̄ɛ wɔnya yī nū hī ɛbɛ nīi e̍ tū ma̍, ē bī ɔ̄ gāa yenyi ɔgwɔ̍ɔ̄gwa̍ la Ɔ̄chī Ɔmyɛ̍nyɛ̍ ni̍ ma̍? 16O̍bū ge̍ē hwabɔ̄ la ɔnyā nūma̍ nīi - ɔyi̍ yī A̍brahāam nīi yapri̍ija tū ɔ̄ orī la lɛ̍yi̍ igwa̍arāata̍ hɔ̄ ma̍ ma̍! Anu̍ nīi o̍ ngma̍ la ode ɔ̍ hɛ̍ta̍ la Ɔ̄chī Ɔmyɛ̍nyɛ̍ ni̍ a̍nɛ?” 17Ɔkɔ yī lɛlā nūma̍ nīi Iji̍sɔ̄ɔsi hīya ma̍ ya̍ nīi aluji yī nū ɛla̍ā wa̍a̍ de ya̍ iyī wā liwēyī-liwēyī. Āchɛ ji wa̍a̍ chī lɛ ɔwɔ̄wīyā wu̍chē yī lɛlā ɔlɛbɛ̍bi̍ ɛla̍ā wa̍a̍ nīi o̍ ē ya̍ ma̍.

Wɔ̄chīije yī īkpɔ̄ɔ̄chi̍ nīi re̍ka imɔ̍si̍tāadi ma̍

(Ima̍tiyu 13:31-32; Ima̍aki 4:30-32)

18Iji̍sɔ̄ɔsi gba̍a ka bɛ̍ɛ̄nɛ̄ hīka, “Oji̍ nīi Ɔchwɔ̄lɛ̍ Oro̍ōre̍ yī Ɔwɔ u̍tu gbla anu̍ ma̍ dɛdɛ? Oji̍ kpa̍a nīi n ge̍ē nāa ē kwichi̍ ē tāa anu̍ ma̍? 19O̍ lɛ bāa īkpɔ̄ɔ̄chi̍ ɔha̍ nīi re̍ka imɔ̍si̍tāadi nīi ɔngrɔ̄ɔ ɔha̍ bī ge̍ nyi la yɛrɔ̄ ma̍. O̍ bū, jɛ̄ de pīya ɔchi̍ ɔnɔ̄kɔ̄kū. A̍gba̍ana yɛ̄mɛ̄mɛ̄ gāa ge̍ lwɔ̄lɛ̍ la a̍bɔ̄ yī nū.”

Wɔ̄chīije yī ɔjā obī ibrɛ̍ɛdi nōnū

(Ima̍tiyu 13:33)

20Iji̍sɔ̄ɔsi gba̍a ka hīka, “Oji̍ kpa̍a nīi n ge̍ē nāa Ɔchwɔ̄lɛ̍ Oro̍ōre̍ yī Ɔwɔ ē ku ē tāa anu̍ ma̍ dɛdɛ? 21O̍ lɛ bāa ɔjā obī ibrɛ̍ɛdi nōnū nīi ɔnyā ɔha̍ nāa de chi̍ya tū ifla̍wa obī ya̍ ibrɛ̍ɛdi lipu̍ yī u̍kpu̍ūhā ma̍. O̍ ē chi̍ya anu̍ tū i̍ngɔ̍ɔ kpɛɛ nīi ɛjā yī ibrɛ̍ɛdi ɔla̍ā nū pu̍tu̍u̍ ē wā la ichō.”

Ɔpu ɔlɛfi̍ye̍

(Ima̍tiyu 7:13-14, 21-23)

22Iji̍sɔ̄ɔsi ga la ipwo̍gra ba̍la wɔlɛ̍ɛchɛ yɛ̄mɛ̄mɛ̄ ngū āchɛ lɛlā nīi o̍ yɔ̄yɛ gāa Ijɛru̍sālɛm ma̍. 23Ɔngrɔ̄ɔ ɔha̍ che ɔ̍ ikpo̍ bɛ̍ɛ̄nɛ̄ hīka, “Ādā be̍e! Āchɛ kplɛ̄ɛ̄ ji ge̍ē lɛ ɔhɛ̍ta̍ a̍nɛ?”

Iji̍sɔ̄ɔsi hīyɔkɔ ka de wa̍ hīka, 24“Ala̍ ā chɛ̄rī lēchi̍ lēchi̍ lɛbɛ nīi ala̍ ge̍ chɛ̄ gala ɔpu ɔlɛfi̍ye̍ ɔla̍ā. Lēchi̍, n ā koko̍o de ala̍! Āchɛ yɛ̄mɛ̄mɛ̄ ge̍ē chikpo̍ ge̍ē chɛ̄ gāa, e̍ i̍ chī ge̍ē chɛ̄ gāa mɛ ni̍. 25A̍dāwɔ̄lɛ̍ ɔlɔjā ge̍ē nīichō de ɔpu ē gū hī ala̍ ē gblāa abɔ̍ɔ la yɛchɛ. Ala̍ ge̍ de abɔ̄ ku ɔpu hɛ̄ra̍ ka hīka, ‘Ādā chu̍chu̍u, lwāa ɔpu de alɔ!’ O̍ ge̍ē hīya ala̍ ɔkɔ ka anɔ̍lɔ i̍ je̍ ɛbɛ nīi ala̍ ɔ̍lɔ bū ma̍ ni̍. 26Ala̍ ge̍ ka grāa anu̍ bɛ̍ɛ̄nɛ̄ hīka, ‘Ādā, je̍ka alɔ re̍ ɔjā gba̍a gwa̍ ɔjā ba̍la awɔ je̍! A chī ngū āchɛ lɛlā abɔ̍ɔ la ipwo̍gra yī alɔ je̍’ 27Ādā ɔla̍ā ge̍ē ka ē de ala̍ bɛ̍ɛ̄nɛ̄ hīka, ‘N ka de ala̍ mɛ̍ hīka n i̍ je̍ ɛbɛ nīi ala̍ bū ma̍ ni̍! Ala̍ ē tu̍rɛ gāa hwɛɛ hī um, ala̍ āchɛ ɔdwɔ̄bi̍!’ 28Ala̍ ge̍ē ma̍ A̍brahāam ba̍la A̍yi̍sāaki ba̍la Ije̍kɔ̄ɔpu ba̍la āchɛ ɔkɛrɔ̄ yī Ɔwɔ wa̍a̍ abɔ̍ɔ la ɛbɛ yī Ɔchwɔ̄lɛ̍ Oro̍ōre̍ yī Ɔwɔ. Ala̍ ma̍, e̍ chī ge̍ē wu̍ ala̍ ta̍anū hī abɔ̍ɔ. Ala̍ ge̍ē drɛ̄ɛgba ē rāngūu ɛbɛ̍bɛ̍-ɛbɛ̍bɛ̍ bɛ̍ɛ̄nɛ̄. 29Āchɛ ge̍ē bū la wā yī yɛnɔ ɔ̄chī ba̍la yɛnɔ ɔ̄nɛ̄, bū la wāā yī ichō ba̍la ihi̍yajɛ ē wā ge̍ē hyāhɔ̄ abɔ̍ɔ ē re̍ ɔjā la okpōkōlō yī ɛbɛ yī Ɔwɔ. 30Bɛ̍ɛ̄nɛ̄ ma̍, āchɛ nīi gwīihi u̍ma̍ama ma̍ ge̍ē de ē pīya ɛyɔbū; enīi yɔbū ma̍ chī ge̍ē de ē pīya egwīihi.”

Iji̍sɔ̄ɔsi mlɛ̍ha̍ de Ijɛru̍sālɛm

(Ima̍tiyu 23:37-39)

31Yɛ̄grāa ɔla̍ā, Āchɛ yī Ifa̍rasīi ɛha̍ wā dikpo̍ba̍ Iji̍sɔ̄ɔsi. E̍ ka de Iji̍sɔ̄ɔsi ka ɔ̍lɔ ge̍ gwɛ̍ɛnya pīya ga ɛbɛ ɔha̍, ma̍a Ihɛ̍rɔ̄ɔdi ɔ̍lɔ yɛ abɔ̍ɔ chikpo̍ ge̍ē de ɔ̍lɔ ē ngmo̍.

32Iji̍sɔ̄ɔsi hīya aa̍ ɔkɔ hīka, “Ala̍ ā gāa ge̍ koko̍o de abīɛhɔ ɔla̍ā gɛ hīka, ‘N yɛ amu ē nū yapri̍ija ɔdwɔ̄bi̍ ē hī āchɛ; n yɛ amu ē nyiya obo̍chi̍ yɛ̄mɛ̄mɛ̄. I̍chɛ ba̍la i̍chi̍chi̍ nɛ. Īchīhɔ̄, n ge̍ē kwɛ̍ɛjī la u̍ku̍rɔ̍ yī u.’ 33N chī ge̍ē nyɔ̄ la ɛyɛ yī u nūma̍ i̍chɛ ba̍la i̍chi̍chi̍ ba̍la īchīhɔ̄. O̍ i̍ ngma̍ nīi e̍ ē de ɔ̄chɛ ɔkɛrɔ̄ yī Ɔwɔ ē ngmo̍ la ɛbɛ ɔha̍ ē hī Ijɛru̍sālɛm ni̍.

34“Ijɛru̍sālɛm be̍e! Ijɛru̍sālɛm! Awɔ ē ngmo̍ āchɛ ɔkɛrɔ̄ yī Ɔwɔ a̍nɛ! Awɔ ē ta̍ alɛrɔ̄ nīi Ɔwɔ de ē tɛ̄rɔ̄ hu wɔ ma̍ lɛchɔ̄ a̍nɛ! Myɛ̄grāa-myɛ̄grāa, n chikpo̍ ge̍ē tu̍ āchɛ yī wɔ ē tū la acha̍ lɔkɔ nīi ɛ̍nɛ̍ yī ugū tu̍ ayi̍ yī nū tū la acha̍ ma̍, a i̍ ē chī chɛ̄ ni̍. 35U̍ma̍ama, wɔlɛ̍ yī wɔ ta̍lā aa̍ ji mɛ̍. N ā koko̍o de wɔ! A i̍ ge̍ē ma̍ um ē gɛ ni̍, kpɛɛ gbo yɛ̄grāa nīi a ge̍ē ka hīka, ‘Ɔpiyɛ ge̍ - iyī ɔ̄chɛ ɔla̍ā nīi ē wā la riyī yī Ādā ma̍!’ ”

Currently Selected:

Ilu̍uku 13: YBASR

Highlight

Copy