Aliro̍om 2

Lɛpɔ̄ ɔhɔ̍ɔ̄hɛ̍ yī Ɔwɔ

1Ɔya ami, a de lɛpɔ̄ ku̍ āchɛ? N ge̍ē koko̍o ē de wɔ hīka, a ge̍ ro̍ōre̍ka ɔ̄chɛmɔ̄chɛ, a i̍ lwɔhu̍ ɔha̍lɔha̍ yī ɔya̍ i̍ngɔ̍ɔ ni̍. Wu̍chē oji̍ nɛ, a ge̍ de lɛpɔ̄ ku̍ āchɛ i̍ngɔ̍ɔ, nīi awɔ ɔlɔjā chī yɛ abɔ̍ɔ ē yɛ̍ɛ̄lā nīi āchɛ ɛla̍ā ya̍ ma̍, o̍ re̍ka a yɛ ē hɛ̍ iyī awɔ ɔlɔjā lɛpɔ̄. 2Alɔ wa̍a̍ jo̍ōkū ka Ɔwɔ hwɔhi gɔ̄grāa nīi o̍ ē hɛ̍ āchɛ nīi ē ya̍ ita yī lɛlā i̍ngɔ̍ɔ lɛpɔ̄ ɔdwɔ̄bi̍ ma̍. 3Ɔya ami, awɔ ma̍ ē chī ya̍ ita yī lɛlā nūma̍ pi̍i̍ nīi a ē de lɛpɔ̄ ku̍ āchɛ wu̍chē yī nū ma̍! Bɛ̍ɛ̄nɛ̄ ma̍, a gbɛri̍ya̍ ka aɔ̍lɔ ge̍ē hɛ̍ga ē hī lɛpɔ̄ ɔhɔ̍ɔ̄hɛ̍ yī Ɔwɔ ē mɛ? 4Kɛ̄ɛ a ka̍a yɛ ē chi̍hi̍ya̍ yī onīi Ɔwɔ jyɛ̍ɛ̄lā gba̍a̍ tāa āchɛ ma̍, ba̍la onīi o̍ ē ma̍ lɛlā hīdīdū ji ma̍, ba̍la onīi o̍ ē mlɔtū kpɔ̍ɔ̍ ma̍ oo! A jo̍ōkū hwɔhi hwɔhi hīka Ɔwɔ jyɛ̍ɛ̄lā tāa awɔ wu̍chē lɔkɔ nīi o̍ yɛ ē ya̍ nīi a ge̍ē pīyabɔ̄ta̍ hī lɛlā ɔdwɔ̄bi̍ ɔyɔ̍ɔ̄ya̍ ma̍. 5Ūkpɔ̄tū yī wɔ chī de ngmu̍wɔ̍hu̍ kpɛ̍ɛ nīi a i̍ chikpo̍ ge̍ē rīya kpe̍e̍ ni̍. Bū la ɛbɛ ɔla̍ā, a yɛ ē ya̍ nīi ichi̍ yī wɔ ge̍ē de ē hɛ̍ wɔbi̍ ē dɛ̄ la Ɔ̄chī ɔla̍ā nīi ɔtū ngurangura yī Ɔwɔ ba̍la lɛpɔ̄ ɔhɔ̍ɔ̄hɛ̍ kpakpa yī nū ge̍ē hi̍yɛchɛ ma̍. 6Wu̍chē oji̍ nɛ, Ɔwɔ ge̍ē kla̍ ɔ̄chɛmɔ̄chɛ ure̍ yī lɛlā lɔkɔ nīi ɔlɔjā ya̍ ma̍. 7Āchɛ ɛha̍ ma̍ ē kwɔgu yī rīgā ba̍la otūlichō ba̍la i̍ko̍ōku̍ ni̍. Āchɛ eli̍ngɛ̍ɛ̄nɛ̄ nūma̍, Ɔwɔ ge̍ē de ɔhɔ̄leyī i̍mɔ̄mɛni̍ ē de wa̍. 8Āchɛ ɛha̍ ma̍ ē chī de ɔjā gbō iyī wā iyī wā. E̍ ē hi̍hi̍yo̍ yī lɛlā nīi ku kpakpa ma̍ ē chōo̍chē kwɔgu yī onīi i̍ ku ni̍ ma̍. Āchɛ nūma̍, Ɔwɔ ge̍ē ya̍ tāa aa̍ la ɔtū ngurangura ba̍la otōwu̍ yī nū. 9Ichi̍ ɔmɔ̍ɔ̄ma̍ ba̍la wɔnɔ ge̍ē hɔ̄ de āchɛ wa̍a̍ nīi ē yɛ̍ɛ̄lā abi̍ ma̍. O̍ ge̍ē hɔ̄ de āchɛ yī Iju̍u yɔbɔ̄ɔbū, o̍bū mɛ̍ - Ɛchɛkɔcha. 10Ɔwɔ chī ge̍ē de rīgā ba̍la otūlichō ba̍la ogbodɔ̍dɔ̍ ē de āchɛ wa̍a̍ nīi ē yɛ̍ɛ̄lā ɔnɛ̄ɛhɛhi ma̍. O̍ ge̍ē de ē de āchɛ yī Iju̍u yɔbɔ̄ɔbū, o̍bū mɛ̍ - Ɛchɛkɔcha. 11Wu̍chē oji̍ nɛ, āchɛ̄ɛchɛ wa̍a̍ jɔ̄ɔ̄jɛ̄ la īkprī yī Ɔwɔ.

12Ɛchɛkɔcha ma̍ i̍ lɛ Lihɔ yī Imo̍sīisi ni̍; e̍ chī yɛ̍ɛ̄lā ɔdwɔ̄bi̍ ma̍, e̍ pīyabi̍ gala ɔgu ɔha̍ hwɛɛ hī Lihɔ yī Imo̍sīisi ɔla̍ā. Āchɛ yī Iju̍u ma̍ je̍ Lihɔ yī Imo̍sīisi; e̍ yɛ̍ɛ̄lā ɔdwɔ̄bi̍ ma̍, Lihɔ yī Imo̍sīisi ɔla̍ā pi̍i̍ hɛ̍ wā lɛpɔ̄. 13Wu̍chē oji̍ nɛ, ode lɛ kpakpa ba̍la Ɔwɔ i̍ bū la lɛlā opo̍ ji lɔkɔ nīi Lihɔ yī Imo̍sīisi ka ma̍ ni̍; o̍ bū la ɔya lɔkɔ nīi Lihɔ yī Imo̍sīisi ka ɔ̄chɛ ɔ̍lɔ ge̍ ya̍ ke̍e̍ ma̍. 14Ɛchɛkɔcha wa̍a̍ i̍ je̍ Lihɔ yī Imo̍sīisi ni̍. Yɛ̄grāa ɔha̍lɔha̍ nīi e̍ ge̍ chī yɛ ē yɛ̍ɛ̄lā wɔ̄bɔ̄bɔ̄ yī wā gɔgu lɔkɔ nīi Lihɔ yī Imo̍sīisi ka ɔ̄chɛ ɔ̍lɔ ge̍ ya̍ ma̍, o̍ re̍ka aa̍ ɛlɛjā - lihɔ wɔ̄bɔ̄bɔ̄ yī aa̍ ɛlɛjā nɛ, nīi e̍ i̍ jo̍ōje̍ Lihɔ yī Imo̍sīisi ni̍ nyaa ma̍. 15Lɛlā nīi e̍ ē ya̍ ma̍ chabɔ̄ hīka ɛ̍lɛ de lɛlā yī Lihɔ yī Imo̍sīisi tɔ̍ɔ̄ta̍ gblāa la ūkpɔ̄tū yī ɛ̍lɛ. Ɛri̍ya̍ yī ūkpɔ̄tū titi de chabɔ̄ hīka ɔ̍lɔ lɛ i̍ngɔ̍ɔ ichɛ̄ɛhi. Wu̍chē oji̍ nɛ, ɛri̍ya̍ ogbōgbo yī wā de lɛpɔ̄ ku̍ wā yɛ̄grāa ɔha̍. Yɛ̄grāa ɔha̍, o̍ ē chī de ē ngma̍ la aa̍. 16Gala ɔgɔgu yī Wɔ̄kā Ɔlwɔnyɛ yī Ɔwɔ nīi n ē ka ē de āchɛ ma̍, i̍ngɔ̍ɔ nīi o̍ ge̍ē lɛ I̍chi̍chɛ Ɔla̍ā Nīi Ɔwɔ Ge̍ Ē Hlɛ̍ɛ̄pɔ̄ yī ɛri̍ya̍ yī lɛlā ɔtrɛ̍ba yī āchɛ̄ɛchɛ wa̍a̍ ē gala abɔ̄ yī Iji̍sɔ̄ɔsi Ikra̍yisi ma̍ a̍nɛ.

Āchɛ yī Iju̍u ba̍la Lihɔ yī Imo̍sīisi

17Awɔ ɔla̍ā nīi ē hī iyī wɔ ka Iju̍u ma̍ bɛ̍ɛ? Ala̍ Iju̍u de ihi gbō la Lihɔ yī Imo̍sīisi nīi ala̍ lɛ ma̍ yɛ ē bī Ɔwɔ ē gbogū. 18Bāa ɔ̄chɛ yī Iju̍u ma̍, a jo̍ōkū yī ɔjā nīi Ɔwɔ chikpo̍ ka aɔ̍lɔ ge̍ ya̍ ma̍. A ngū bū abɔ̍ɔ la Lihɔ yī Imo̍sīisi jo̍ōkū yī lɛlā nīi lɛ kpakpa gɔ̄grāa ma̍. 19A jo̍ōkū gblɛ̍ɛgblɛ̍ɛ hīka aɔ̍lɔ re̍ka ɔ̄chɛ ɔchabɔ̄ yī ɔpɔ̄pū hu̍ ɔ̄chɛ opriyī a̍nɛ; aɔ̍lɔ re̍ka ɔla̍ ɔmyɛ̍ma̍ de āchɛ nīi gblāa la ɛbɛ odobū ma̍ a̍nɛ. 20A jo̍ōkū gblɛ̍ɛgblɛ̍ɛ ka aɔ̍lɔ re̍ka ɔ̄chɛ ɔka ochi̍chi̍ yī lɛlā de ali̍bobo a̍nɛ; aɔ̍lɔ re̍ka ɔ̄chɛ ongū aɛ̍pɛ̄ lɛlā a̍nɛ. Wu̍chē oji̍ nɛ, ala̍ Iju̍u de ɔtū che hīka abɔ̍ɔ lipu̍ yī Lihɔ yī Imo̍sīisi ɔla̍ā nīi lɛlā ojo̍ōje̍ ka̍ka̍ ba̍la lɛlā olēchi̍ lēchi̍ ɔ̍lɔ tū la ɔgɔ̄grāa a̍nɛ. 21A ē ngū āchɛ ehēhī lɛlā; oji̍ - ohu̍ nīi a ē ngū iyī awɔ lɛlā ni̍ ma̍/? A koko̍o ē de āchɛ hīka ɛ̍lɛ ge̍ e̍e wūwī ni̍; awɔ i̍ ē wūwī ni̍? 22A ē ka hīka ɛ̍lɛ ge̍ e̍e la̍ ɔ̍bɔ̍ɔ̄nyā ni̍; awɔ i̍ ē la̍ ɔ̍bɔ̍ɔ̄nyā ni̍? A i̍ chikpo̍ nīi āchɛ ge̍ ya̍ otūlichō de i̍kpe̍ēkū ni̍; awɔ ma̍ ē yɛ̍ɛ̄lā ɔgɔgu lɔkɔ nīi o̍ ngma̍ nīi e̍ ē ya̍ otūlichō de Ɔwɔ ma̍? 23A bī lihɔ nīi Ɔwɔ de ma̍ ē gbogū, a chī de liwēyī de Ɔwɔ bū la lihɔ yī nū ɔla̍ā nīi a ē de ɔ̍ ē bīya ma̍. 24Īpū yī Ɔwɔ ka i̍ngɔ̍ɔ hīka, “Wu̍chē yī ala̍ Iju̍u, anu̍ nīi Ɛchɛkɔcha ē ka ɔdwɔ̄bi̍ yī Ɔwɔ a̍nɛ.”

25A ge̍ ya̍ lɔkɔ nīi Lihɔ yī Imo̍sīisi ka ma̍, ɔ̍lɔma̍ wɔwu̍ ɔtɔ̍ɔ̄ta̍ yī wɔ - ɔjā ɔlamu ɔlamu de wɔ nɛ. A i̍ ge̍ chī ya̍ lɔkɔ nīi Lihɔ yī Imo̍sīisi ka ma̍ ni̍, ɔkɔkɔ ɔla̍ā a ke̍ ge̍ pi̍ye̍mā la wɔwu̍ ɔtɔ̍ɔ̄ta̍ kpɛ̍ɛ. 26Wu̍chē oji̍ nɛ, Ɛchɛkɔcha nīi i̍ je̍ wɔwu̍ ɔtɔ̍ɔ̄ta̍ ni̍ ma̍ ge̍ ya̍ lɔkɔ nīi Lihɔ yī Imo̍sīisi ka ɔ̄chɛ ɔ̍lɔ ge̍ ya̍ ma̍, Ɔwɔ ge̍ē nāa anu̍ bāa ɔ̄chɛ ɔtwɔ̍wu̍ ma̍. 27Bū la ɛbɛ ɔla̍ā, āchɛ nīi - Ɛchɛkɔcha ma̍ ge̍ē de lɛpɔ̄ ku̍ ala̍ Iju̍u, wu̍chē yī Lihɔ yī Imo̍sīisi nīi ala̍ ē bīya ma̍. Wu̍chē oji̍ nɛ, ala̍ Iju̍u nīi e̍ de Lihɔ yī Imo̍sīisi tɔ̍ɔ̄ta̍ tū de ala̍, ala̍ nīi twɔ̍wu̍ ɔ̍lɔma̍ ma̍, ala̍ pi̍i̍ i̍ chī ya̍ lɔkɔ nīi Lihɔ yī Imo̍sīisi ka ma̍ ni̍. Ɛchɛkɔcha nīi i̍ twɔ̍wu̍ ɔlamu ɔla̍ā ni̍ ma̍ chī ya̍ lɔkɔ nīi Lihɔ yī Imo̍sīisi ka ma̍. 28Bɛ̍ɛ̄nɛ̄ ma̍, ɔ̄nyɛ u̍tu re̍ka Iju̍u ɔlamu ɔlamu nīi twɔ̍wu̍ la olēchi̍ lēchi̍ ma̍/? I̍ ɔ̄chɛ nīi - Iju̍u ji amu la yɛchɛchɛ nīi twɔ̍wu̍ ɔlamu ji ma̍ ni̍. 29Ɔkɔkɔ ɔla̍ā, ɔ̄chɛ nīi re̍ka Iju̍u ɔlamu ɔlamu ma̍ - ɔ̄chɛ nīi wɛ Iju̍u abɔ̍ɔ lipi̍pu̍ ma̍ nɛ. Ɔ̄chɛ nīi twɔ̍wu̍ la ūkpɔ̄tū ma̍ nɛ. Ɔla̍ā chī - u̍ku̍rɔ̍ yī Uhu yī Ɔwɔ nɛ; i̍ Lihɔ yī Imo̍sīisi nīi e̍ de tɔ̍ɔ̄ta̍ tū ma̍ ni̍. Ɔ̄chɛ oli̍ngɛ̍ɛ̄nɛ̄ ē nāa ɔkɔ̄kā yī nū bū la abɔ̄ yī Ɔwɔ; o̍ i̍ ē nāa ē bū la abɔ̄ yī āchɛ̄ɛchɛ ni̍.

Currently Selected:

Aliro̍om 2: YBASR

Highlight

Copy