U̍ku̍rɔ̍ yī Alɛrɔ̄ 22

1“Aɛ̍nɛ̍ yī u ba̍la ādā yī u wa̍a̍! Ala̍ ā darɔ̄ku lɛlā yī u nīi n yɛ ma̍ ge̍ē koko̍o ē de ala̍ ma̍!” 2E̍ po̍ nīi Ipɔ̍ɔli yɛ ē kɛlā de wa̍ la oko̍o yī Ihi̍bru ma̍, e̍ hi̍ya cho̍o̍ ɔlamu ɔlamu.

Ipɔ̍ɔli kɛlā bɛ̍ɛ̄nɛ̄ hīka, 3“Ami - Iju̍u nɛ ko̍ō! E̍ ma u la ipwo̍gra Ita̍susi la ajɛ yī Isili̍siya. E̍ bī u jɛ̄ amu la Ijɛru̍sālɛm nūma̍. N ngū īpū amu la apli̍kpo̍ yī Igame̍līyɛli. E̍ ngū u hwɔhi hwɔhi lɔkɔ nīi n ge̍ē de lihɔ yī ɔ̍kɔ̄kū yī alɔ ē gbō ke̍e̍ ma̍. N ē de iyī amɔ̍lɔ wa̍a̍ ē kwɔbɔ̄ lā de u̍ku̍rɔ̍ yī Ɔwɔ lɔkɔ nīi ala̍ wa̍a̍ nīi gblāa ma̍ i̍chɛ ma̍ yɛ ē ya̍ ma̍. 4Āchɛ nīi chɛ̄ku Ɔpɔ̄pū yī Lɛlā Nūma̍ Nīi Ādā Chabɔ̄ Ma̍, n ya̍ wā ichi̍ dwɔ̄bi̍ dwɔ̄bi̍, ya̍ nīi e̍ ngmo̍ wā. N ē gāa ge̍ē ku̍ angrɔ̄ɔ tūla anyā yī wā kpo̍ wā tū igbakɔbɔ. 5A̍dā Aligbe ba̍la Ogrēeyī yī Alihiyo wa̍a̍ ge̍ē ya̍ ochi̍chi̍ hīka lɛlā lēchi̍ nīi amɔ̍lɔ yɛ ma̍ ē ka a̍nɛ. E̍ ta̍ īpū tū um ɛrɔ̄ hu Iju̍u nīi - aɛ̍nɛ̍ yī alɔ gblāa la Idama̍si̍kɔsi ma̍. Bū la ɛbɛ ɔla̍ā, n pīya yɛ gāa ge̍ē ku̍ āchɛ ɛla̍ā nīi chɛ̄ku Ɔpɔ̄pū yī Lɛlā Nūma̍ Nīi Ādā Chabɔ̄ Ma̍. N chikpo̍ ge̍ē tū wā agba̍ ē bī āā wā amu la Ijɛru̍sālɛm nīi e̍ ē ya̍ wā ichi̍.

Ipɔ̍ɔli ka lɔkɔ nīi o̍ de pīya ɔ̄chɛ yī Iji̍sɔ̄ɔsi ma̍

(U̍ku̍rɔ̍ yī Alɛrɔ̄ 9:1-19; 26:12-18)

6“N pīya yɛ gāa nīi n tu̍ bla̍a Idama̍si̍kɔsi bɛ̍ɛ̄nɛ̄ ma̍, ɔla̍ ɔnɔ̄kɔ̄kū ɔha̍ wu̍ rɛ u bū abɔ̍ɔ la ichō ɔpɔ̄ɔpɛ̄. Yɛ̄grāa nīi yɛnɔ ē rɛ yakpalɛ̄hu̍ ma̍ nɛ. Ɔla̍ ɔ̍lɔma̍ fi̍yajɛ kpɛ̍ɛ ta̍kakatū u. 7N wu̍ gwāajɛ ɔpɔ̄ɔpɛ̄. Ɔkɔlɛ̄lā ɔha̍ ka grāa ami bɛ̍ɛ̄nɛ̄ ka ɔ̍lɔ ge̍, ‘Isɔ̍ɔli be̍e! Isɔ̍ɔli! Oji̍ nīi a yɛ aa̍ ya̍ um ichi̍ dwɔ̄bi̍ dwɔ̄bi̍ i̍ngɔ̍ɔ ma̍/?’ 8N chikpo̍ hīka anu̍ - ɔ̄nyɛ nɛ, Ādā? O̍ ka grāa ami hīka, ‘Ami - Iji̍sɔ̄ɔsi yī Ina̍jārɛ̄ɛti nīi a yɛ aa̍ ya̍ um ichi̍ i̍ngɔ̍ɔ a̍nɛ.’ 9Āchɛ nīi yɛ tāa ami ma̍ ma̍ ɔla̍ ɔ̍lɔma̍, e̍ i̍ chī po̍ ɔkɔlɛ̄lā ɔla̍ā nīi yɛ ē kɛlā tāa ami ma̍ ni̍. 10N gba̍a chikpo̍ bɛ̍ɛ̄nɛ̄ hīka, ‘Oji̍ nīi n chī ge̍ē ya̍ ma̍, Ādā?’ Ādā ka de u hīka, amɔ̍lɔ ge̍ nīichō nīi amɔ̍lɔ ge̍ pīya ga Idama̍si̍kɔsi. Ɛ̍lɛ ge̍ē kɛlāha̍ ɛlāha̍ wa̍a̍ nīi Ɔwɔ ɔ̍lɔ chikpo̍ nīi amɔ̍lɔ ge̍ē ya̍ ma̍ de amɔ̍lɔ abɔ̍ɔ. 11N i̍ myɛ̍ma̍ mɛ̍ gɛ ni̍, wu̍chē yī ɔla̍ ɔla̍ā nīi hu̍ nya̍ri̍nya̍ri̍ ɔ̄kɔ̄kū ma̍. Alikpɛ̍ɛ yī u de abɔ̄ ku̍ u, bī u ga Idama̍si̍kɔsi bɛ̍ɛ̄nɛ̄ a̍nɛ.

12“Ɔngrɔ̄ɔ ɔha̍ hɔ̄ abɔ̍ɔ re̍ka Anana̍yāasi. Ɔ̄chɛ ɔya̍ otūlichō de Ɔwɔ nɛ. O̍ ē gbō lihɔ yī alɔ Iju̍u tɛri̍tɛri̍. Iju̍u yī Idama̍si̍kɔsi wa̍a̍ ē tū Anana̍yāasi lichō. 13Ɔngrɔ̄ɔ nūma̍ wā dikpo̍ba̍ u, wā ge̍ rɛ abɔ̍ɔ bla̍a ami. O̍ da u hīka, Isɔ̍ɔli ɔɔ̍nɛ̍ anu̍, amɔ̍lɔ ge̍ de myɛ̍ma̍ gɛ! Ɔpɔ̄ɔpɛ̄, n de myɛ̍ma̍ i̍ngɔ̍ɔ ke̍e̍. N ma̍ ɔ̄ chi̍i̍. 14O̍ ka de u hīka, Ɔwɔ nīi ɔ̍lɔ Ɔwɔ yī ɔ̍kɔ̄kū yī aa̍ ma̍ ɔ̍lɔ hu amɔ̍lɔ ohōhu hɛ̄ɛbɛ nīi amɔ̍lɔ ge̍ē je̍ ɔjā nīi ɔ̍lɔ chikpo̍ ge̍ē ya̍ ma̍. Ɔwɔ ɔ̍lɔ hu amɔ̍lɔ hɛ̄ɛbɛ nīi amɔ̍lɔ ge̍ē ma̍ Ɔ̄chɛ Ɔlɛkpakpa Gɔ̄grāa yī ɔ̍lɔ ē plɛ̍ɛ̄lā bū la oko̍o yī ɔ̍lɔ ke̍e̍. 15Amɔ̍lɔ ge̍ē de ē pīya ɔ̄chɛ okoko̍o yī lɛlā yī ɔ̍lɔ, ē bī lɛlā nīi amɔ̍lɔ ma̍ la eyī gba̍a po̍ la arɔ̄ wa̍a̍ ma̍ ge̍ē koko̍o de āchɛ wa̍a̍. 16O̍ da u bɛ̍ɛ̄nɛ̄ hīka, amɔ̍lɔ chī gba̍a hɔ̄ kpɛɛ i̍ngɔ̍ɔ kana̍ gɛ? Amɔ̍lɔ ge̍ nīichō nīi amɔ̍lɔ ge̍ hu yenyi, hɛ̄ɛbɛ nīi lɛlā ɔdwɔ̄bi̍ yī amɔ̍lɔ wa̍a̍ ɔ̍lɔ ge̍ ngmo̍nyi̍ bū la riyī yī Ādā nīi amɔ̍lɔ ge̍ē de ɔtū che ma̍.

Ɔwɔ hu Ipɔ̍ɔli de ɛchɛkɔcha

17“N wā ge̍ cha ga Ijɛru̍sālɛm bɛ̍ɛ̄nɛ̄. I̍chi̍chɛ ɔha̍, n kū abɔ̍ɔ ē jɔhā la u̍nu̍ yī Ɔwɔ ma̍, n myɛ̍ma̍ ɔlɛbɛ̍bi̍ ɔha̍. 18N ma̍ Ādā nīi o̍ yɛ ē ka ē grāa ami hīka amɔ̍lɔ ge̍ pa̍pa̍! Amɔ̍lɔ ge̍ pīya hī Ijɛru̍sālɛm! Āchɛ nūma̍ ɛ̍lɛ i̍ yɛ amu ge̍ē chɛ̄ lɛlā yī anu̍ nīi amɔ̍lɔ ē ka ma̍ ni̍. 19N ka de Ādā bɛ̍ɛ̄nɛ̄ hīka, ‘Ādā, e̍ jo̍ōkū wa̍a̍ hīka amɔ̍lɔ ē ga u̍nu̍ ogrēeyī ge̍ē ku̍ āchɛ nīi - ɔ̍lɔ chɛ̄ku aɔ̍lɔ ma̍, ē gwō ɛ̍lɛ lijē mɛ̍/. 20Yɛ̄grāa ɔha̍ nīi e̍ de ɔ̄chɛ ɔkɛlā yī wɔ nīi re̍ka Isiti̍bīin ngmo̍ ma̍, n yɛ abɔ̍ɔ. N chɛ̄ hīka e̍ ge̍ de ɔ̍ ngmo̍. Ami deyīrɛ āgbādā yī āchɛ nīi ngmo̍ ɔ̄ ma̍ de wa̍ a̍nɛ.’ 21Ādā da um ka amɔ̍lɔ ge̍ pīya gānyɔ̄ ji, ma̍a anɔ̍lɔ ge̍ē de amɔ̍lɔ ē tɛ̄rɔ̄ hwɛɛ ē dikpo̍ba̍ Ɛchɛkɔcha!”

22Āchɛ ɛla̍ā wa̍a̍ darɔ̄ku lɛlā yī Ipɔ̍ɔli kpɛɛ nīi o̍ wā ge̍ kɛlā ogwīihi nūma̍. E̍ to̍ohwe̍e bɛ̍ɛ̄nɛ̄ hīka, “Ala̍ ā de ɔ̍ ngmo̍! O̍ i̍ ngma̍ la ɔhɔ̄leyī ni̍! Ala̍ ā kwɛ̍ɛjī la anu̍!” 23E̍ gblāa abɔ̍ɔ ē to̍ohwe̍e, ē gwō aru̍ gbrugbru, e̍ ta̍ obubu tu̍u̍. 24A̍dā icho̍ojiya ɔla̍ā ka de āchɛ yī nū ka ɛ̍lɛ ge̍ bī Ipɔ̍ɔli pīya ga u̍nu̍ ɔla̍ā nīi āchɛ ɔkplɛ̍wu̍ ē gbō ɔ̄ ogbōgbō ma̍. Ɛ̍lɛ ge̍ gwō ɔ̍lɔ lijē hɛ̄ɛbɛ nīi ɛ̍lɛ ge̍ je̍ ochi̍chi̍ yī ɔjā nīi Iju̍u ɛ̍lɛ yɛ ē to̍ohwe̍e i̍ngɔ̍ɔ ē tū ɔ̍lɔ ma̍. 25E̍ wā ge̍ de okri wā Ipɔ̍ɔli hɛ̄ɛbɛ ge̍ē gwō ɔ̄ lijē bɛ̍ɛ̄nɛ̄. Ipɔ̍ɔli da ɔlɛhu̍ yī icho̍ojiya nīi rɛ abɔ̍ɔ ma̍ hīka, “Ɔ̄chɛ ge̍ - ɔ̄chɛ yī Iro̍om nīi ala̍ i̍ de lɛpɔ̄ ku̍ ɔ̄ o̍bū ni̍ ma̍, ala̍ ē gwō ɔ̄ lijē ji?”

26Ɔlɛhu̍ yī icho̍ojiya ɔla̍ā po̍ i̍ngɔ̍ɔ ma̍, o̍ ka de a̍dā yī wā hīka, “Oji̍ nīi a yɛ ma̍ ge̍ē ya̍ ma̍/? Ɔngrɔ̄ɔ nūma̍ - ɔ̄chɛ yī Iro̍om nɛ/”

27A̍dā icho̍ojiya ɔla̍ā wā dikpo̍ba̍ Ipɔ̍ɔli ge̍ che ɔ̍ ikpo̍, ɔ̍lɔ ge̍ ka de anu̍! Re̍ka ɔ̍lɔ - ɔ̄chɛ yī Iro̍om nɛ?

Ipɔ̍ɔli de chɛ̄ ka anɔ̍lɔ - ɔ̄chɛ yī Iro̍om nɛ.

28A̍dā icho̍ojiya ɔla̍ā koko̍o de Ipɔ̍ɔli ka, anu̍ ma̍ anɔ̍lɔ de okpo mwɛbɛ o̍bū nīi anɔ̍lɔ de pīya ɔ̄chɛ yī Iro̍om a̍nɛ.

Ipɔ̍ɔli ka de ɔ̍ ka anu̍ ma̍, anɔ̍lɔ - ɔ̄chɛ yī Iro̍om la ɔmɔ̄ma nɛ.

29Ɔpɔ̄ɔpɛ̄, āchɛ nīi yɛ ge̍ē gwō Ipɔ̍ɔli lijē, o̍bū che ɔ̍ ikpo̍ yī lɛlā ma̍ pi̍ye̍mā hī ɔ̄. A̍dā icho̍ojiya ɔla̍ā tūuhwi kpɛ̍ɛji nīi o̍ de jo̍ōkū hīka Ipɔ̍ɔli ɔ̍lɔ - ɔ̄chɛ yī Iro̍om nɛ ma̍. O̍ de tūuhwi wu̍chē yī agba̍ nīi o̍ de tū Ipɔ̍ɔli ma̍.

E̍ bī Ipɔ̍ɔli ga ogrēeyī yī alihiyo

30A̍dā icho̍ojiya ɔla̍ā yɛ ē chikpo̍ ge̍ē je̍ ochi̍chi̍ yī ɔjā nīi Iju̍u ɛla̍ā ka hīka Ipɔ̍ɔli ɔ̍lɔ ya̍ ma̍. Wu̍chē yī ɔla̍ā, o̍ de agba̍ kpo̍ wu̍ hī Ipɔ̍ɔli. O̍ ka de alɛhu̍ aligbe tūla Ogrēeyī yī Alihiyo wa̍a̍ ka ɛ̍lɛ ge̍ tu̍ grēeyī. O̍ bī Ipɔ̍ɔli ge̍ rɛ abɔ̍ɔ la iyɔ̄bū yī wā wa̍a̍ bɛ̍ɛ̄nɛ̄.

Currently Selected:

U̍ku̍rɔ̍ yī Alɛrɔ̄ 22: YBASR

Highlight

Copy