U̍ku̍rɔ̍ yī Alɛrɔ̄ 20

Ipɔ̍ɔli ga Imɛsɛdo̍niya ba̍la Igri̍isi

1Ɛbɛ ɔti̍yatū ɔla̍ā wā ge̍ gboba̍ ma̍, Ipɔ̍ɔli tu̍ āchɛ yī Iji̍sɔ̄ɔsi grēeyī, kɛlā de wa̍, mla aa̍ ɔtū. O̍ wā ge̍ ta̍ wā ɔhɔ̄lɛhi o̍bū pīya ga Imɛsɛdo̍niya bɛ̍ɛ̄nɛ̄. 2O̍ ga la ajɛ yī ɛbɛ ɔla̍ā wa̍a̍, kɛlā yɛ̄mɛ̄mɛ̄ de wa̍, mla aa̍ ɔtū. O̍ pīya bū abɔ̍ɔ bɛ̍ɛ̄nɛ̄ ga ɔcha yī Igri̍isi. 3O̍ hɔ̄ abɔ̍ɔ la ɔyɔ̍ɔ ɛta̍. O̍ yɛ ē tībi̍īyē ge̍ē gāa Isi̍riya ma̍, o̍ po̍ hīka Iju̍u ɛha̍ ɛ̍lɛ yɛ abɔ̍ɔ ē miya ē tū anu̍. Wu̍chē yī ɔla̍ā, o̍ ka anɔ̍lɔ ge̍ē ga la Imɛsɛdo̍niya bɛ̍ɛ̄nɛ̄. 4Āchɛ ɛha̍ yɛ ba̍la anu̍: Isopa̍ta, ɔyi̍ yī Ipi̍rūusi nīi - Olibɛri̍ya ma̍, ba̍la Ari̍si̍tākusi ba̍la Isɛku̍ndusi nīi - Alitɛsalona̍yīka ma̍ yɛ abɔ̍ɔ ba̍la anu̍. Ige̍yusi nīi - Olidɛ̍bɛ ma̍ ba̍la Iti̍mōti yɛ abɔ̍ɔ. Iti̍kīkusi ba̍la Itrofi̍mūsi nīi bū la ajɛ yī E̍siya ma̍ yɛ abɔ̍ɔ. 5Aa̍ ma̍ yɔbū ge̍ gbēyī yī alɔ la Itro̍asi. 6Ɔwɔ̄wīyā Nīi Ojōre̍ yī Nū I̍ Tū Ɔjā Obī Ibrɛ̍ɛdi Nōnū Ni̍ Ma̍ wā ge̍ ga ma̍, alɔ tū wɔwu̍ bū la Ifili̍pāyi pīya bɛ̍ɛ̄nɛ̄. Alɔ gbajɛ gāa dikpo̍ba̍ wā abɔ̍ɔ la Itro̍asi la ɔ̄chī ɔmɛrwɔ̄. Alɔ hɔ̄ abɔ̍ɔ ɔ̄chī arāapa.

Ipɔ̍ɔli ga Itro̍asi ojōjī

7La ɔ̄nɛ̄ yī Ɔ̄chī Ɔmyɛ̍nyɛ̍, alɔ tu̍ grēeyī ge̍ē re̍ ojōre̍ ē ngmo̍tu̍chɛ̄ ma̍, Ipɔ̍ɔli ka ɛrɔ̄ yī Ɔwɔ de wa̍. Wu̍chē lɔkɔ nīi o̍ ge̍ē pīya la ɔ̄chī ɔmɛpa ma̍, o̍ kɛlā kpradada ku iyārōtu̍. 8Otīnīkā lyɛ̄mɛ̄mɛ̄ che abɔ̍ɔ la ipu̍nu̍ ichō nīi alɔ grēeyī gblāa ma̍. 9Oye̍kre̍biya ɔha̍ nīi re̍ka Iyu̍tīkusi ma̍ hyāhɔ̄ abɔ̍ɔ la iwi̍ndo yī ipu̍nu̍ ɔla̍ā. Ipɔ̍ɔli kū abɔ̍ɔ ē kɛlā ma̍, ɔngrɔ̄ɔ ɔla̍ā hɔ̄ abɔ̍ɔ ē gbwɔlā, ji ble̍e̍ ji ble̍e̍; kpɛɛ wɔlā de ɔ̍ ngmo̍ ɔlamu ɔlamu. O̍ ha̍ābɔ̄ bū abɔ̍ɔ la ipu̍nu̍ ichō ɔla̍ā ge̍ dra̍ ajɛ. Lipu̍ ɔmɛta̍ bū la ichō ga ajɛ nɛ. Āchɛ gāa ge̍ nāa anu̍ ma̍, o̍ pīyaku̍ i̍ngɔ̍ɔ ke̍e̍. 10Ipɔ̍ɔli hrāajɛ ɔpɔ̄ɔpɛ̄, gāa ge̍ gbo kla̍ anu̍, de abɔ̄ hā tū ɔ̄. O̍ koko̍o de wa̍ ka ɛ̍lɛ ge̍ e̍e hi̍yɛ̄ngura ni̍, ma̍a ɔ̍lɔ e̍e hɔ̄leyī. 11Ipɔ̍ɔli wā ge̍ ku̍chē pīya ga u̍nu̍ ichō bɛ̍ɛ̄nɛ̄. O̍ de ibrɛ̍ɛdi hɛ̍ wa̍a̍ ma̍, anu̍ ba̍la aa̍ wa̍a̍ re̍ ojōre̍ ngmo̍tu̍chɛ̄. O̍ kɛlā ba̍la aa̍ i̍ngɔ̍ɔ kpɛɛ nīi eyī nyā ma̍, o̍ wā ge̍ pīya bɛ̍ɛ̄nɛ̄. 12Āchɛ ɛla̍ā bī oye̍kre̍biya ɔla̍ā pīya yī wɔlɛ̍ bɛ̍ɛ̄nɛ̄. Ūkpɔ̄tū gbo wa̍ dɔ̍ɔ̍ ɔlamu ɔlamu.

Ipɔ̍ɔli pīya bū la Itro̍asi ga Imayi̍le̍tusi

13Alɔ pīya bū abɔ̍ɔ ge̍ tū wɔwu̍ pīya yī A̍sōosi. Abɔ̍ɔ nīi alɔ ge̍ē nāa Ipɔ̍ɔli ē tū nīi anu̍ ɔlɔjā ka a̍nɛ. Wu̍chē oji̍ nɛ, o̍ chikpo̍ ge̍ē ga yɛchɛchɛ ē gāa abɔ̍ɔ. 14Alɔ wā ge̍ grāa iyī alɔ abɔ̍ɔ la A̍sōosi ma̍, alɔ de ɔ̍ nāa. Alɔ wā ge̍ pīya ga Imi̍tilīin. 15Alɔ gba̍a pīya bū abɔ̍ɔ la ɔ̄chī ɔmɛpa ge̍ gbajɛ ga oe̍ ɔla̍nū yī Iki̍yɔ̄ɔsi. Ɔ̄chī ɔmɛpa yī nū, alɔ gbajɛ ga Isa̍mōosi. Alɔ pīya bū abɔ̍ɔ ga Imayi̍le̍tusi la eyī ɔnyɔ̄nyā yī nū bɛ̍ɛ̄nɛ̄. 16Ipɔ̍ɔli i̍ chikpo̍ ge̍ē ku̍ chi̍yɛ abɔ̍ɔ la Ɛ̍fɛ̄susi ni̍. O̍ i̍ chikpo̍ ge̍ē nāa yɛ̄grāa ē ta̍anū abɔ̍ɔ la ajɛ yī E̍siya ē gɛ ni̍. O̍ yɛ ē kɔ̄leyī hɛ̄ɛbɛ ge̍ē gbajɛ ē gāa Ijɛru̍sālɛm la ɔ̄chī yī Ɔwɔ̄wīyā yī Ipɛ̍ntīkɔ̄ɔsi nīi o̍ ge̍ yɛ ge̍ē ngmɛ̍rɛ̍ mɛ̍.

Ipɔ̍ɔli kɛlā de ɛgabɔ̄ yī Ogrēeyī yī āchɛ yī Ɔwɔ la Ɛ̍fɛ̄susi

17Ipɔ̍ɔli tɛ̄rɔ̄ hu ɛgabɔ̄ yī ogrēeyī yī āchɛ yī Ɔwɔ la Ɛ̍fɛ̄susi ka ɛ̍lɛ ge̍ yewā dikpo̍ba̍ anu̍ la Imayi̍le̍tusi. 18E̍ wā ma̍, lɛlā nīi o̍ ka de wa̍ ma̍ hɔ̄ ma̍ a̍nɛ: “Je̍ka aa̍ ala̍ ma̍ lɔkɔ nīi n hɔ̄ yɛ ē ya̍ u̍ku̍rɔ̍ ba̍la ala̍ wa̍a̍ bū la yɛ̄grāa nīi n gbajɛ wā la ajɛ yī E̍siya ma̍! 19Ala̍ jo̍ōkū hīka ɛba̍achɛ ɔha̍lɔha̍ i̍ hɔ̄ la ūkpɔ̄tū yī u la ɛrɔ̄ yī Ādā nīi n yɛ ē chɛ̄ ma̍ ni̍. Āchɛ yī Iju̍u miya tū, ya̍ nīi n mi̍chi̍, ya̍ nīi n drɛ̄ɛgba. 20N i̍ chī pi̍ye̍mā la ɔkɛlā nīi ge̍ē tū ala̍ wɔbɔ̄ ma̍ de ala̍ ni̍. N ē kɛlā de ala̍, ē ngū ala̍ lɛlā la ɔgbādu ba̍la wɔlɛ̍ yī ala̍ ɛlɛjā. 21Iju̍u tūla Ɛchɛkɔcha wa̍a̍, n ē ta̍ wā ɔna hīka e̍ ge̍ pīyabɔ̄ta̍ hī lɛlā ɔdwɔ̄bi̍ ɔyɔ̍ɔ̄ya̍ yī wā. E̍ ge̍ wā dikpo̍ba̍ Ɔwɔ nīi e̍ ge̍ chɛ̄ku Ādā Iji̍sɔ̄ɔsi Ikra̍yisi. 22Wu̍chē yī otūlichō yī Uhu Ɔnɛ̄ɛhɛhi yī Ɔwɔ n yɛ amu yɛ gāa Ijɛru̍sālɛm mɛ̍. N i̍ je̍ ɔjā nīi ge̍ ya̍ u abɔ̍ɔ ma̍ ni̍. 23N jo̍ōkū hīka ipwo̍gra mipwo̍gra nīi n ge̍ yɛ ma̍ Uhu Ɔnɛ̄ɛhɛhi yī Ɔwɔ ē ta̍ um ɔna hīka igbakɔbɔ ba̍la akanya ɔ̍lɔ hɔ̄ abɔ̍ɔ tīgbē yī amɔ̍lɔ. 24Ami ma̍, n i̍ nāa ɔhɔ̄leyī yī u bāa ɔjɔ̄jā ma̍ ni̍, hɛ̄ɛbɛ nīi n ge̍ē jɔ̍ɔkɔ ē kwɛ̍ɛjī la u̍ku̍rɔ̍ nīi Ādā Iji̍sɔ̄ɔsi de de u ma̍. Wɔ̄kā Ɔlwɔnyɛ yī uhwa ɔnɛ̄ɛhɛhi nīi Ɔwɔ ē de ē de āchɛ nīi ami yɛ ē koko̍o ma̍, anu̍ - u̍ku̍rɔ̍ nīi o̍ de de u a̍nɛ.

25“N ta̍ ala̍ ta̍ wa̍a̍ ka ɛrɔ̄ yī Ɔchwɔ̄lɛ̍ Oro̍ōre̍ yī Ɔwɔ de ala̍ mɛ̍. U̍ma̍ama, n jo̍ōkū hīka ala̍ i̍ ge̍ē ma̍ u la eyī ge̍ē gbo̍ gɛ ni̍. 26N ge̍ē koko̍o ē de ala̍ hwōō i̍chɛ nūma̍! Ɔ̄chɛ ɔha̍ yī ala̍ ge̍ pīyabi̍ hī Ɔwɔ, ikpo̍ yī u - abɔ̄ yī u i̍ tū abɔ̍ɔ ni̍. 27Wu̍chē oji̍ nɛ, n i̍ pi̍ye̍mā hī ɔjā nīi Ɔwɔ miya ge̍ē ya̍ ma̍ la ɔkɔ̄ka de ala̍ ni̍. 28Ala̍ ā deyīrɛ iyī ala̍ hwɔhi hwɔhi. Ala̍ ā deyīrɛ āchɛ nīi Uhu Ɔnɛ̄ɛhɛhi yī Ɔwɔ de tū ala̍ la apli̍kpo̍ ma̍ hwɔhi hwɔhi. Lɔkɔ nīi ɔ̄chɛ ɔgbyɛ̄wū ē deyīrɛ anyīyɛrɔ̄ yī nū ma̍, i̍ngɔ̍ɔ nīi ala̍ ge̍ē deyīrɛ ogrēeyī yī āchɛ yī Ɔwɔ a̍nɛ. Ala̍ jo̍ōkū hīka e̍ de pīya āchɛ yī nū bū la ɔpīyaku̍ yī Ɔyi̍ yī nū mɛ̍. 29N jo̍ōkū wa̍a̍ hīka n ge̍ē pīya ma̍, āchɛ ɛha̍ ge̍ē wā dikpo̍ ē ba̍ ala̍. Āchɛ ɛla̍ā lɛ bāa ɛbɛ̍ ɔkwɔ̍ɔ̄chɛ ma̍. E̍ ge̍ē yɛ̍ɛ̄lā ji̍gījigī tāa āchɛ yī Ɔwɔ. 30Āchɛ ɛha̍ chī ge̍ē nyɔ̄ lipu̍ yī ala̍ ɛlɛjā i̍ngi̍ngɔ̍ɔ, ē kū la ongū āchɛ lɛlā yī arīmɛ̄, ē ya̍ nīi āchɛ yī Ɔwɔ ge̍ē pīya ē ku wa̍. 31O̍ lɛ i̍ngɔ̍ɔ ma̍, ala̍ ā deyīrɛ grigri. Ala̍ ā bla nīi ala̍ ge̍ jo̍ōkū hīka, n bī lɛgba la oko̍o ngū ala̍ lɛlā lipu̍ yī lɛ̍yi̍ ɛta̍ ligbo̍ ligbo̍. Yɛnɔ ba̍la otu̍ nīi n bī ngū ɔ̄chɛmɔ̄chɛ yī ala̍ lɛlā a̍nɛ.

32“Aɛ̍nɛ̍ yī u! U̍ma̍ama nūma̍, n de ala̍ tū Ɔwɔ la abɔ̄ ba̍la ɛrɔ̄ yī uhwa ɔnɛ̄ɛhɛhi nīi Ɔwɔ ē de ma̍. Anu̍ ge̍ē bī ala̍ ē jɛ̄ hwɔhi hwɔhi, gba̍a ē de ɔpiyɛ ɔla̍ā nīi o̍ de lā de āchɛ yī nū ma̍ ē de ala̍ a̍nɛ. 33Ala̍ ɛlɛjā jo̍ōkū wa̍a̍ hīka okpo kɛ̄ɛ ɔjā otūlibi̍īyē yī ɔ̄chɛ i̍ ē hla̍ ami ni̍. 34Ami ɔlɔjā ya̍ u̍ku̍rɔ̍ la abɔ̄ yī u, ē bī okpo yī nū ya̍ ɔjā nīi ku̍ ami ba̍la āchɛ yī u ɔkɔ ma̍ a̍nɛ. 35N ē chabɔ̄ hu̍ ala̍ la ɔpɔ̄pū ɔha̍lɔha̍ wa̍a̍ hīka ala̍ ge̍ de abɔ̄ ngmu̍wɔ̍hu̍ la u̍ku̍rɔ̍ bāa ami ma̍, hɛ̄ɛbɛ nīi ala̍ ge̍ tū āchɛ nīi lɛ kwīkwī ma̍ wɔbɔ̄. Ɔla̍ā re̍ka ala̍ yɛ abɔ̍ɔ ē bla lɛlā nīi Ādā Iji̍sɔ̄ɔsi ɔlɔjā ka ma̍. O̍ hīka ɔwɔ̄wīyā ɔ̍lɔ hɔ̄ la ɔjā ode kɔ̄ de ɔ̄chɛ hi̍ ɔnāa la abɔ̄ yī ɔ̄chɛ.”

36Ipɔ̍ɔli kwɛ̍ɛjī lɛlā ɔkɔ̄ka ma̍, o̍ pīyēkū ba̍la aa̍ wa̍a̍ nīi e̍ jɔhā. 37Aa̍ wa̍a̍ ta̍ kpu̍u la lɛgba. E̍ ku̍ ɔ̄ ba̍ ɔtū, de oko̍o tū ɔ̄, ta̍ ɔ̄ ɔhɔ̄lɛhi bɛ̍ɛ̄nɛ̄. 38E̍ he̍ēyīwɔnɔ kpɛ̍ɛji wu̍chē lɔkɔ nīi o̍ ka de wa̍ ka ɛ̍lɛ i̍ ge̍ē ma̍ anu̍ ge̍ē gbo̍ gɛ ni̍ ma̍. E̍ bī ɔ̍ ɔtū wa̍a̍ ge̍ chɛ̄ la ɛbɛ yī wɔwu̍.

Currently Selected:

U̍ku̍rɔ̍ yī Alɛrɔ̄ 20: YBASR

Highlight

Copy