Zefanyâ 2
2
Zefanyâ o/sét Banet ḿbé Júda o/fu, basaa Byiko ba-mîng Byibî echi
1Zefanyâ o/fu, ben banet ejí ḿbé ba*fí ne éshwân* nyît n̂g eringe nyí ben ba/bwom 2[ne ba-kûshí ba-kpú wǎ ekong-kyichí,] ne kafâ esa ńké Óburúkpâbí ńké nke ka-mang ng wǎ okwâ ka-shû ka-kâm běn, ne dyicí ńdyí o/chi o-tông busa-dyityém emen dyi-fyi. 3Bírî n̂g ba-kâm Óburúkpâbí, ben kángkáng mú bamu banet ḿbé ba/tî byiko enen kyísí ké esí eten, ḿbé bamu ba-chi i ńkyí mu o-sét ng běn. Chi n̂g ńkyí nkyi ké bukwóp, ba-jwâa byiko enen kyísí ké bushú-Óburúkpâbí. Katô ba/chi ba-fem busông ké dyicí ńdyí Óburúkpâbí o/chi o-tông kafâ esa emen.
Busông ḿbú Eshê nyí nyi Fáráng ne Ézerel
4Onet o*fí mú o/chi o-waa ké oshê mú Gáza*. Banet ba/chi ba-jaa ké Áshíkelon. Ba-kúng ng [kyicê-dyicí dyibónge] ba-ró banet ḿbé Áshídot, ne ba/chi ba-ró banet ḿbé Ékoron ba-byí ké oshê ebe. 5Ben banet ḿbé Fyilíta ḿbé bamu ba-kyú u ké bukô-baya ḿbé Medeterényan ba/firi ké busông. Óburúkpâbí oo/két mpan o-bên běn. O/chi o-ju běn, onet nang obónge oo*waa*. 6Esí enen nyí nyi ké bukô-baya ámbe e/chi e-waa kafâ dyikáá, ne boompyep ḿbú bambâm ebû ne bankám ḿbé ebû edarí. 7Banet ḿbé Júda ḿbé ba/chi ba-waa bakpó ba/chi ba-kûkyú ké esí enen. Ba/chi ba-kûnen byitú ebe ké esí ányi, ba-rí i ké byise ḿbyí ké Áshíkelon. Osówo Óburúkpâbí ebe o/chi o-kyú ne mbé, o-chi kámbé ba-chîjá byěm.
8Óburúkpâbí mú o/rêe o-shwôm o/raa o/fu, me nn/jwo ké banet ḿbé Mówep ne Ámon mbe ba-kyâ banet ejí edángé ba-shú u kámbé, ba-pám m ba/fu, mbé ba/chi ba-koo esí ebe. 9Eringe me mu Osówo mú Ézerel, mú mu okpó, me n/ryí ocím n-sem dyizîn ejí n/fu, n/chi m-bên Mówep ne Ámon wǎ eringe nyí m/bên Sódom ne Gomóra. Esí ebe e/chi e-bírî kyikit-abíng-bano ne e/chi e-waa biǐbwô-byise ne banyá, ḿbyí biǐbyâa bii/kán ké mbyí. Kyicê-banet ejí, ḿbé ba/chi ba-kpen, ba/chi ba-kpógê kámbé, ba-koo esí ebe.
10Zefanyâ o/fu, éné nké Óburúkpâbí o/chi o-kye banet ḿbé Mówep ne Ámon busông ké bubwô-byiko ebe etông ḿbyí mbe ba-kyâ banet ḿbé Óburúkpâbí mú o/rêe o-shwôm edángé. 11Óburúkpâbí o/chi o-fé kámbé bushî. O/chi o-bên kángkáng bakye ebe ḿbé ké ejíí, ne oshê nang orá o/chi o-kyú ké esí ebe o-kye ǎ ofê.
12Óburúkpâbí o/chi o-ju to banet ḿbé Sudân.
13Óburúkpâbí o/chi o-tan bubwô emen o-bên Asyírya. O/chi o-chi oshê mú Nyínyíve o-bírî biǐbwô-oshê ne kyikim-dyikán ńkyí kii*chi omu*. 14O/chi o-firi kyikit ńkyí abóng-byitú ne kángkáng azong-enyam-dyikán adakûcít. Biikong byi/chi byi-kûkyú ké biǐbwô-byise emen, byi-bwom ké bawíndu byi-tii ng. [Bunurung] bu/chi bu-kûwonge ké byise ebe. Ba/chi ba-zóngê byichí-séda ḿbyí ba/kúng ba-bi byise emen. 15Éné nké kyi/chi kyi-chi oshê mú mu o-jang ng etông byiko kyi-kim ne busa emen, o-kabe ng o/fu, chwǒm kii*chi kámú*. Banet-oshê ámu mbe ba-kabe ng ba/fu, oshê ebe nké mu kiǐtí o-shwôm ké ejíí emúmú. Kii*ba/chi kyi-nwa eri* eringe nyí oshê ámu o/chi o-waa kafâ dyikáá* o-firi kyikit ńkyí enyam-dyikán edakûkyú. Nang yeě mú o/shwôm ké oshê ámu o/chi o-nyîim byiko ké bushî.
Currently Selected:
Zefanyâ 2: BKY
Highlight
Share
Copy
Want to have your highlights saved across all your devices? Sign up or sign in
Published by the Bible Society of Nigeria @ 1985
