Zákaryâ 7
7
Óburúkpâbí o/né Esong ecíp nyí e*fí ké Kafâ*
1Ké aje anyii nyí Otu Daráyas o/ryí butu, ké ací anyii nyí etukáku kátángekányi, ké otukáku mú Kyíselep, Óburúkpâbí o/twóm mě kyitwóm.
2Banet ḿbé Bétel ba/mû ba/twóm Sharéza ne Regemélek ne banet ebe ba/fu, baca ké kiǐtí-kyise-kyifen echi ńkyí Óburúkpâbí mú o/rêe o-shwôm ba-da-fé nshwam ba-kye Óburúkpâbí eringe nyí odajware kámbé, 3ba-bí to banchi kyifen-Osówo ne bamkpábé ḿbé badasét byiraa-Osówo ḿbím mún. Ba/fu, byica kashú byi-ta ng dyikán byi-câ ké esong ecíp ké otukáku mú etukáku etánge kángkáng dyije, wǎ eringe nyí bii/chi ké bujê-aje chwóó dí, ké nǎ, ba/bên kiǐtí-kyise-kyifen-Osówo echi dí.
4Nyín kyitwóm ńkyí kyi/fím ne Óburúkpâbí kyi-kâm mě. 5O/sét mě o/fu, sét banet ḿbé ké esí ńnyín ne banchi kyifen ejí a/fu, dyikán eta ne esong nyí baa/cíp ké kángkáng etukáku etánge ne káchâtkányi nyí kángkáng dyije ké bajam-aje ḿbén bachât esim diǐkpú, ba*da/chi ké ofê mú ejí*. 6Nang ké nkéré mú mbe ba-ryí i byiryíng ba-jwáp ng bato, mbe ba-chi i eringe nyí badazût mbé bayén.
7Něen nké Óburúkpâbí o/mû o/sét ké ocím mú bamkpábé ḿbé badasét byiraa emen, ḿbé baa/shwôm ké esim, ké nkéré mú kanong ka/mû ké Jerúsélem ne banet ké oshê chwóó ne ké nkéré mú banet chwóó ba/mû ba-kyú u ké eshê nyí e/wáp Jerúsélem e-fé ké kafâ cibicibi to ne kyikim-esí ńkyí busyísen ne ké byikû-eku nyí kyicê ńkyí esû nyi e-ríbî ng e-jâ.
Ńkyí kyi/chi ne ba-kám Banet-Ézerel ba-dim ne Mbé wǎ Básóng
8Óburúkpâbí o/sét mě kyitwóm ńkyín o/fu, 9ké nkéré mú o/shwôm ké esim chwóó, me n/kye banet ejí byije ḿbyín n/fu, ben baa*man ba-kûryí acît* ne ba-man ba-kûcángê dyityém ne barî, ba-ri ng barî bafip. 10*Da n̂g echi ba-kûcít banyǐnkú* ne bwǎn-byibén* ne bacinbánet ḿbé mbe ba-kyú u ké burwám enen* nang onet okíri mú chwǒm kyi/fárâng ǎ*. *Da n̂g ekyé akwóp nyí badanémê barî*.
11Nké banet ejí ba/tigi otigíng ba-né atông efwôo. Ba/cít atyém ebe, 12ba-chi atyém ebe a-shwane wǎ buká. Ké bubwô ḿbú mbé ba*da/fwôo atông ba-jwo byěm ḿbyí n/tángê kámbé* ké ocím mú bamkpábé ḿbé badasét byiraa ejí* ḿbé ba/kyú ké nkéré mú o/shwôm ké esim chwóó* kafâ ka/sa mě ne mbé. 13Ké nǎ, mbé ba*da/fwôo atông ké nkéré mú me n/raa* me to n*da/faa kámbé ojá ké nkéré mú ba/fé nshwam ba-kye mě*. 14Me n/kúng afú nyí aryên n-dim ne mbé ba-da-kyú ké eshê nyí ba/mû ba*fí ba-nyît ng*. Esí nyí enong ńnyín e/waa kafâ dyikáá, onet o*da/waa mú o/kyú ké nyǐ*.
Currently Selected:
Zákaryâ 7: BKY
Highlight
Share
Copy
Want to have your highlights saved across all your devices? Sign up or sign in
Published by the Bible Society of Nigeria @ 1985
