Mâk 5

Jisos o/ró Byibî-Bací ké Byiko-Onyinchéng Obónge

(Mátyuu 8:28-34; Lûk 8:26-39)

1Ba-da-ribi kâng ké bukô-baya ḿbé Gályílyi ḿbú áku, ké esí nyí banet ḿbé Gérasa. 2Ńdyí Jisos o-byí i o-bâ ké kafâ-ókpǐ, onyinchéng obónge mú o/fím ké akun, o-kwárê ne nyǐ. 3Onyinchéng ámu o/mû ne kyibî-bucí, ne nyǐ o/mû o-kyú u ké akun. Onet o*fí to mú oda ǎ echîman efé bamgbokobá o-tî kyikit kyibónge*. 4Baa/bwá ǎ byiká ne abwô kampén chwóó, nké kángkáng nkéré, o-két ng bamgbokobá, o-sé ng biǐré ḿbyí ba/fé ǎ ké byiká. O/mû o-jang ng eshwane o-shwôm mú onet nang orá oo*man ǎ to echîkám*. 5Buchú ne esû, mu o-zóp ng o-bírî ng ké akun ne ké eku, o-wonge e, o-yip ng aká o-ját ng byiko emen.

6O/waa áku cát o-ri Jisos, ne o-zóngê o-da-tím arông kyísí ké bushú-Jisos. 7Ne o-wonge ejá kyíbóng kyíbóng o/fu, Jisos mú Wǎn-Osówo, Osówo mú kyíbóng kyíbóng, wo amu a-ryuu ng a/fu, a-chi i mě ebóng. Ké bubwô-Osówo, me n/tîm ǒ arông, kamgbe, *da mě echi n-ri busông*. 8Nyǐ o/raa ńkyín, ké ebóng, Jisos o/mû mu o-raa ng ne nyǐ o/fu, kyibî-bucí, byí onyinchéng mún ké byiko.

9Jisos o-bí ǎ kâng o/fu, wo a-bángê e nǎ.

Onyinchéng ámu o-faa o/fu, me m-bángê e Bujê, ké ebóng, be byi/jê chwóó. 10Ne o-kpet etîm Jisos arông o-bírî ng o/fu, o*dachi o-ró byibî-bací byi-byí ké kyikim-oshê ánkyi*.

11Dyibóng-akûk ńdyí dyi/jê kanong kanong dyi/mû ányi fáráng dyi-ryí i baryî ké bukô-kaku. 12Bací ámbe ba-tîm Jisos arông ba/fu, ró bě a-kye akûk, a-mîng bě byi-nung kányí ké byiko. 13Jisos kâng o-mîng kámbé. Byibî-bací ámbyi byi-byí onyinchéng ámu ké byiko byi-da-nung ké akûk ányi. Kángkáng dyibóng-akûk ándyi, nang égot-akûk diǐkpú, dyi-zóngê dyi-shû ké bukô-kiǐmbém dyi-da-róng ké baya, dyi-jwáp omu dyi-kpú.

14Banet ḿbé ba/mû ba-bám m akûk ányi ba-chêe. Ba-sét ng ńkyí kyi/chi ba-câ ké oshê ne ké boǒshê. Banet ba-dim ba-wâa edari ńkyí kyi/chi. 15Ba/bê ba-kâm Jisos, ba-ri onet ámu mú o/mû ne bujê-byibî-bací ké byiko. Mu ányi me ne byídí ké byiko, ne dyityém emen kanong kanong. Ne banet kángkáng ba-kpet eshî. 16Banet ḿbé ba/mû ba/ri kánkyí ba-sét banet ńkyí kyi/chi onyinchéng ámu mú o/mû ne byibî-bací, ne kyi-kim to ne akûk. 17Ne banet ámbe kâng ba-kpet esét Jisos ba/fu, odim ké esí ebe.

18Ké nkéré mú Jisos o-kú o-nung ng ké ókpǐ, onyinchéng ámu mú o/mû ne byibî-bací o-tîm ǎ arông o/fu, mîng mě m-bâ ne wo ké kyikû.

19Nké Jisos o*da ǎ ebángê*. O-bwa o-sét ǎ o/fu, bwa esim dyijê, a-kâm kyikû-banet eyên, a-da-sét kámbé kiǐtí-chwǒm ńkyí Otu Kyítá oo/chi ǒ, ne eringe nyí oo/cángê dyityém to ne wo.

20Onyinchéng ámu kâng o-dim o-cen ké esí nyí badakó Eshê Diǐkpú, o-sét ng o-câ ńkyí Jisos o/chi ǎ. Ne kángkáng banet ḿbé ba/jwo kánkyí, kyi/chi kámbé wǎ chwǒm-akat.

Wǎn-Járos mú Onyinyi ne Onyinyi mú o/ta Nkyû mú Jisos

(Mátyuu 9:18-26; Lûk 8:40-56)

21Jisos o-nyáng o-bwa esim ké bukô-baya ḿbú bubónge. Ké bukô-baya ámbu, bujê-banet chwóó bu-wárê bu-wáp ǎ bu-fé ké kafâ. 22Onyinchéng obónge mú odabángê Járos, mú o/mû onet-dyishí-kyise-ékwâbashi ńkyí banet-Jûs, ńkyí nkyi ké oshê ámu o/bê. Ńdyí o/ri Jisos, o-tím arông kyísí ké bushú emen. 23Ne o-tîm Jisos arông kanong kanong o/fu, wǎn ejí mú onyinyi o-kú o-kpú u. Kamgbe, bâ a-ba-twôom ǎ abwô eyên ké byiko, eringe nyí o/chi o-nyange o-kpen.

24Jisos o-dim kâng ne nyǐ ké kyikû. Banet ba/mû ba/jê ba-shwôm ḿbé mbe ba-cen n ba-câ ne nyǐ ké kyikû, ba-fárâng ng ǎ ba-câ byicê byimúmú.

25Onyinyi obónge to o/mû ányi, mú oo/ri busông chwóó ké bunyinyi ḿbú bu/waa ǎ ké kyikû, ké aje diǐkpú ne afee, 26nang ké banchi bakye chwóó baa/chi ǎ bakye. Oo/bên akpuga emen kángkáng. Nké ńkyí o/mû o/chi o-firi kanong, orwôm emen mu o-yógê ng oyógóng o-câ kashú kángkáng nkéré. 27Nyǐ o/mû oo/jwo kyi-kim ne Jisos, ké bubwô ámbu, o-ba-nung ké bujê-banet ámbu, o-câ Jisos ké kyikû. 28O-raa ké dyityém o/fu, â n/ta nang byídí emen nké nke, n/chi n-nyange.

29O-ta nkyû-Jisos, ne bunyinyi emen bu-waa ányi ké abe bu-man. Ne kyi-chi ǎ ké dyityém emen o/fu, orwôm emen oo/man. 30Ké abe ányi, Jisos o-waa o-nyît o/fu, busa boo/byí ǎ ké byiko. Ne nyǐ kâng o-pín achi, o-bí bujê-banet ámbu o/fu, yeě o/ta byídí ejí.

31Bǎmgbán emen ba-faa ba/fu, wo amu a-ri ng eringe nyí banet mbe ba-fárâng ng ǒ byicê byimúmú. Ebóng ńkyí wo a/bwa amu a-bí ng a/fu, yeě o/ta ǒ.

32Nké Jisos o/waa mu o-tún n o-wáp ng o/fu, nyǐ o-ri ng onet mú o/ta ǎ. 33Onyinyi ámu o-nyît ńkyí kii/chi ǎ éné, ne nyǐ o-byí o-tím m banê o-câ ne bushî, o-da-myii Jisos ké byiká. Ne o-sét Jisos ntûntû kángkáng. 34Jisos o-raa ne nyǐ o/fu, wǎn ejí, dyityém eyên ńdyí a/fé ne me dii/chi ǒ a-nyange. Ca kanong ké bunyîn-dyityém, ne afaníkong eyên aman.

35Ké nkéré mú Jisos mu o-raa ng ńkyín, banet-kyitwóm ba/fím ké kyise ńkyí Járos, ba-ba-sét Járos ba/fu, wǎn eyên ámu oo/kpú. *Dachi a-chîkye ntánge byiraa-Osówo afaníkong*.

36Jisos o*da/tî otǐng atông ké ńkyí ḿbé mbe ba-sét ng*. Nké nyǐ o/sét Járos o/fu, *dashî* fé dyityém eyên ne me nké nke. 37Nké Jisos kâng o*da/bángê onet okíri o-ca ne nyǐ* kyi-cibi ne Pyíta ne Jêmsyi ne Jǒn mú wǎn-boné Jêmsyi*. 38Ba-da-ribi ké kyise ńkyí kiǐtí-onet ámu. Jisos o-ri eringe nyí byěm byi/firi yógeyóge, o-jwo to kángkáng bukyû ḿbú mbe ba-tii ng ba-wonge e. 39O-nung o-bí kámbé o/fu, ebóng kyi/chi ńkyí byěm byi/firi něen yógeyóge. Ebóng kyi/chi ńkyí ben bamu ba-tii ng. Mú wǎsíng o*da/kpú* mu o-rê ng oréng.

40Mbé ba-kpet ejwó Jisos, ne nyǐ o-ró kámbé kâng ashí amúmú ba-byí kyíjí. O-kpî bonchí ne boné-wǎn ne bǎmgbán emen ámbe ashí achât ba-da-nung ké kafâ-nfût mú ba/mû ba/ren mú wǎsíng ámu. 41Jisos o-níbî mú wǎsíng-onyinyi ké bubwô, ne o-raa ne nyǐ o/fu, talyíta kówum, ányi kyi/byí, wǎsíng-onyinyi, me nké n/sét ǒ n/fu, bûu nensang.

42Mú wǎsíng-onyinyi o-waa ké abe ányi o-bûu nensang, o-kpet ecen. Nyǐ o/mû oo/rí aje diǐkpú ne afee. Ké nkéré ńkyín kyi/chi, byiko byi/kaa banet ḿbé ba/mû ányi kanong kanong. 43Nké Jisos o/kuri kámbé ekó kanong kanong o/fu, ba*dasét onet nang obónge*. Ne o-raa o/fu, kye n̂g ǎ chwǒm o-ryí.

Currently Selected:

Mâk 5: BKY

Highlight

Copy