Mátyuu 6

Byěm etángê kyi-kim ne Eyáré ekye

1Bám m̂ byiko enen, eringe nyí baa*chi byěm kyíjí gbúúl* ḿbyí Osówo o/fu, bachi* eringe nyí banet bada běn eri*. Â ben ba/chi byěm ḿbyín kyíjí gbúúl, ben baa*ba/chi ba-koo eyáré nang ebónge ké abwô nyí Bonchí enen mú kyíbóng*.

2Ké bubwô ámbu kâng, â a/kye onet-kyikpu chwǒm, *dachi a-kûyip esim ké nkyí* wǎ eringe nyí bannîm banet mbe ba-chi i* ké byise-ékwâbashi ḿbyí banet-Jûs* ne ké etyém-étíbingé*. Mbé ba-chi i éné, eringe nyí banet badakpee kámbé. Zîim m̂ ńkyín ba/fu, mbé baa/koo eyáré nyí ebe e-man. 3Nké ké nkéré mú aa/kye onet-kyikpu chwǒm, chi kánkyí ké bukwóp ḿbú nang ocín eyên mú ba/jang efárâng barî oo*ba/chi o-nyît kyi-kim ne nkyí*. 4Nké kyi-man kyi-kyú chwǒm ńkyí kadip. Ne Bonchí eyên mú mu o-ri ng ńkyí a/chi ké kadip, o/chi o-kye ǒ eyáré.

Byěm etángê kyi-kim ne Nshwam efé

(Lûk 11:2-4)

5Ké nkéré mú ba-kú ba-fâ nshwam, *da n̂g echi ba-kyú wǎ bannîm banet*. Mbé kyi-nyîn n kámbé ńkyí badabûu nensang ne ba-fé nshwam ké byise-ékwâbashi ḿbyí banet-Jûs ne ké étíbingé, eringe nyí kángkáng banet badari kámbé. Zîim m̂ ńkyín ba/fu, mbé baa/koo eyáré nyí ebe e-man. 6Nké ké nkéré mú a-kú a-fâ nshwam, jâ ké nfût eyên a-cít dyifyi, ne a-fé nshwam a-kye Bonchí eyên mú baa*ri ǎ*. Ne Bonchí eyên mú mu o-ri ng ńkyí amu a-chi i ké kadip, o/chi o-kye ǒ eyáré. 7Ké banshwam enen, *da n̂g echi ba-kûraa byiraa chwóó* ḿbyí byi*fí ne dyishí* wǎ eringe nyí banet ḿbé ba*fí banet-Jûs* mbe ba-chi i* ḿbé mbe ba-kabe ng ba/fu, Osówo o/chi o-jwo kámbé ké bubwô ḿbú biintintang-banshwam ebe efé*. 8*Da n̂g echi ba-kyú wǎ mbé*. Bonchí enen oo/nyît kyikû ké esim ńkyí bamu ba-ryuu ng, ne ben ba-kû ǎ ebí. 9Nyín něen eringe nyí ben badakûfé nshwam. Kû n̂g efé ba/fu,

Kyítá mú eten mú mu kyíbóng,

kyi/bát dyizîn eyên ńdyí dyinong dyikyú ne ofê.

10Kyi/bát butu eyên bubyí kyíjí wááng.

Kyi/bát ńkyí wo amu a-ryuu ng kyichi ké ejíí ńnyín

wǎ eringe nyí nkyi kyíbóng.

11Kye bě byiryíng ḿbyí byimu byi-ryuu ng ké dyicí ńdyí kurún.

12Pwoo bě ké byibî ḿbyí byimu byi-chi i,

wǎ eringe nyí byimu byi-pwoo ng banet ḿbé mbe ba-chi i bě byibî.

13*Dachi a-mîng bě byi-nung ké okan*.

Nké chi bě byi-fem ké abwô nyí Otu-Byibî-Barím.

14Â ben ba/pwoo barî-banet ké byibî ḿbyí ba/chi běn, Bonchí enen mú kyíbóng to o/chi o-pwoo běn ké ḿbyí enen. 15Nké â ben ba*da/pwoo barî-banet ké byibî ḿbyí ba/chi běn* Bonchí enen mú kyíbóng to kâng oo*ba/chi o-pwoo běn ké byibî ḿbyí baa/chi*.

Byěm etángê kyi-kim ne Esong ecíp

16Ké nkéré mú ba-kú ba-cíp ng esong, *da n̂g echi ba-kûkpút kashú* wǎ eringe nyí bannîm banet mbe ba-chi i*. Mbé ba-cen n ne bashú-esong ésong, eringe nyí nang yeě o/chi o-ri o/fu, mbé mbe ba-cíp ng esong. Zîim m̂ ńkyín ba/fu, mbé baa/koo eyáré nyí ebe e-man. 17Ké nkéré mú ba-kú ba-cíp ng esong, kû n̂g esoo bushú ba-sáp dyishí, 18eringe banet baa*nyît ba/fu, ben bamu ba-cíp ng esong*. Kyi*da/shwôm Bonchí enen kǎnchí mú baa*ri ǎ* nké odanyît*. Ne Bonchí enen mú mu o-ri ng ńkyí bamu ba-chi i ké kadip, o/chi o-kye běn eyáré.

Efang nyí Kyíbóng

(Lûk 12:33-34)

19*Da n̂g ekûtî byiko enen esang ké ejíí ńnyín* kyikit ńkyí ebá ne bajâng byidabên kányí* ne banet-kajii to badaman esé ba-nung ba-jii kányí*. 20Nké kû n̂g etî byiko enen esang kyíbóng, kyikit ńkyí ebá ne bajâng bii*man ebên kányí* ne banet-kajii to baa*man esé ba-nung ba-jii kányí*. 21Ké ebóng, dyityém eyên dyi-waa ng kángkáng nkéré ké kyikit ńkyí esang eyên nyi.

Kiinwángé ńkyí Enyam-Byiko

(Lûk 11:34-36)

22Achi nyi wǎ otyuryíkáng mú enyam-byiko. Â achi eyên nyi wááng, kyirim-enyam-byiko eyên kyimúmú kyi-kyú u ne kiinwángé. 23Nké â achi eyên a*fí kanong* kyirim-enyam-byiko eyên kyimúmú kyi-kyú u ké kyifip. Nké â kiinwángé ńkyí ké enyam-byiko eyên kyi/firi kyifip, kyifip ánkyi kii*nwa eri*.

Osówo ne Byěm ejá

(Lûk 16:13; ne ké12:22-31)

24Onet o*fí mú odaman ekyú ḿgbán mú banchí bafee*. Obónge o-kû ng ǎ ejê o-shwôm mú obónge. O/chi o-kûbángê byitwóm ḿbyí onet obónge, ḿbyí mú obónge oo*bángê*. Ben baa*man ekyú ḿgbán mú Osówo ne mú akpuga ké nkéré obónge*.

25Nkyí nké kyi/chi ne me mu n-sét ng běn n/fu, *da n̂g echi ba-kûkérê kyi-kim ne byiryíng ḿbyí ben badaryí* ne chwǒm ńkyí ben badajwáp ne ba-kpen* nang kyi-kim to ne byídí ḿbyí ben badafé ké byiko*. Â a/kabe dííng, dyikpen dyi*da/rêe dyi-shwôm byiryíng dí*. Enyam-byiko to e*da/rêe e-shwôm byídí dí*. 26Tún n̂ achi kâng ba-ri bunurung ḿbú mbu bu-wáp ng kyíbóng. Bu*fí bu-kwón n esang-byichí* bu-fuu ng byiryíng bu-fâ ké bankám*. Bonchí enen mú mu kyíbóng nké mu o-nen n kámbú. Ben kâng ba*da/rêe ba-shwôm bunurung dí*. 27Yeě ké burwám enen mú mu o-jang ng ekérê kyi-kim ne dyikpen emen, mú odaman etín aje emen a-ca kashú.

28Ebóng ben bamu ba-kérê ng kyi-kim ne byídí. Tún n̂ kâng achi ba-ri biǐbyâa ḿbyí mbyi ké dyikán, ḿbyí mbyi byi-chi i ekong, eringe nyí mbyi byi-kán n. Byi*fí byi-chi i bǎmkpóngé* nang byídí ḿbyí byidabwá*. 29Nké me mu n-sét ng běn n/fu, nang Otu Sólómon mú o/mû o/já esang, o/mû o*fí ne byídí ḿbyí byi/mû byi-nwa ng jangjang wǎ ekong nang ebónge nyí biǐbyâa ḿbyín*. 30Osówo nké mu o-bwá ng kámbyí byídí, biǐbyâa ḿbyí byidabyí kurún, nencí byi-kpú, ba-wuri kámbyí ba-fé ké okwâ. Eringe nyí Osówo mu o-bwá ng kámbyí byídí éné, nyǐ kii*ba/chi kyi-kyú ǎ ké dyityém ńkyí oda běn ebwá to byídí dí*. Dyityém enen ńdyí ba/fé ne Osówo dyi*da/jê*. 31Nké *da n̂g ekûkérê ké atyém enen ba/fu, byiryíng ejí ne chwǒm ejí ńkyí ndajwáp ne byídí ejí byi-fím m mě nyá*. 32Byěm ḿbyín nké banet ḿbé baa*nyît chwǒm kyi-kim ne Osówo* mbe ba-kyé ng. Bonchí enen mú kyíbóng mu o-nyît ng o/fu, ben bamu ba-ryuu ng kángkáng byěm ḿbyín. 33Ké mbwôp kashú, kû n̂g ekérê kpá kyi-kim ne byěm ḿbyí Butu emen ne byěm ḿbyí nyǐ mu o-ryuu ng o/fu, ben bachi. Ne nyǐ o/chi o-kye běn kángkáng byěm byikíri ḿbyí bamu ba-ryuu ng. 34Nké *da n̂g echi ba-kûkérê kyi-kim ne nencí*. Ké ebóng, dyicí nang dyirá ndyi ne afaníkong nyí emen. Kii*nwa ńkyí badakûyip afaníkong nyí kángkáng ací ba-nye ng kyikit kyibónge*.

Currently Selected:

Mátyuu 6: BKY

Highlight

Copy