Mátyuu 2

Bacinbánet ḿbé ba/fím ké Kyicê ńkyí Esû edabyí

1Ba/fwon Jisos ké Bételehêm, ké esí nyí Judyâ, ké nkéré mú Otu Hérot o/mû otu mú Judyâ. Ka*da/rí* banet ḿbé ba/mû ba-kwâa ng byěm kyi-kim ne ékpére ba-fím ké kyicê ńkyí esû edabyí ba-bâ ké Jerúsélem. 2Ba-ba-bí ba/fu, wǎn ámu mú ba/fwon, mú o/chi o-kyú otu mú banet-Jûs mu nyá. Be byi/ri ókpére emen ké nkéré mú o/byí ké kyicê ńkyí esû edabyí, nké bii/bê ǎ ofê ekye.

3Nkéré mú Otu Hérot o/jwo kyi-kim ne kyiraa ńkyín, ofong o/kédê ǎ kanong kanong. Éné to nké o/kédê nang yeě nang yeě mú o/mû ké Jerúsélem. 4Otu Hérot o-kó kángkáng batu-banchi kyifen-Osówo ne kángkáng bantánge Byije-Músis kyikit kyibónge. O-bí kámbé o/fu, ba/chi ba-fwon onet mú Osówo o/kúng ǎ butu nyá.

5Mbé ba-faa ǎ ba/fu, ké Bételehêm, ké esí nyí Judyâ. Něen nké mkpábé obónge mú odasét byiraa-Osówo o/sáng, o/fu, Osówo o/fu, 6ben banet ḿbé Bételehêm mú mu ké esí nyí Júda, kyi*fí wǎ ben bamu banryî esim-banet ké burwám-batu ḿbé Júda*. Ké ebóng, ké burwám enen nké otu o/chi o-byí mú o/chi o-kûtông banet ejí ḿbé Ézerel kiǐfáng.

7Otu Hérot o-kó ḿbé bacinbánet ámbe kâng, ḿbé ba/fím ké kyicê ńkyí esû edabyí, ké ncibi mú booju. Ba-sét ǎ ochíchí-nkéré mú ókpére ámu o/byí. 8Ne o-twóm kámbé kâng ba-dim Bételehêm, o/fu, ca n̂g ba-da-kyé wǎn ámu kanong kanong ba-ri ǎ. Ké nkéré mú baa/ri ǎ, chi n̂g mě n-nyît, eringe nyí me to ndace n-da-kye ǎ ofê.

9Ńdyí oo/sét kámbé éné, ba-dim. Nkéré mú mbe ba-cen n ba-câ ké bukwóp, ba-chîri ochíchí-ókpére ámu mú ba/mû ba/ri ké kyicê ńkyí esû edabyí, ké mu o-cen n o-câ kámbé ké kashú tete o-da-bwom ké kyikit ńkyí wǎn ámu o/mû. 10Dyityém dyi/nyîn kámbé kanong kanong, ba-jêe to kanong kanong ńdyí ba/ri ókpére ámu. 11Ba-nung ké kyise, ba-ri wǎn ámu ne Méryi mú boné emen. Ba-tím arông kyísí ba-fé ǎ. Ba-bâa biimbam ebe, ba-fîm eyáré ńnyín, gûl ne burwan ḿbú badakó faránkínsen ne ḿbú badakó mîi, ba-yárê ǎ.

12Osówo o-ba-kuri kámbé ekó ké burê o/fu, ba*dachi ba-chîbwa esim kyikit-Otu Hérot*. Ne ba-cen kâng bukwóp bukíri, ba-bwa esim dyijê ké oshê ebe.

Ba/chêe ne Jisos ba-jâ ne Nyǐ Éjip

13Ké nkéré mú bacinbánet ámbe baa/dim, orím mú onong mú Otu Kyítá o/byí o-kâm Josêf ké burê, o-sét ǎ o/fu, bûu nensang a-kúng wǎn ne boné emen ba-chêe ba-jâ Éjip. Kyú áku tete n-sét ǒ n/fu, dim. Ké ebóng, Otu Hérot o/chi o-kûkyé wǎn ámu o/fu, nyǐ o-ju ng ǎ.

14Josêf o-bûu kâng, o-kúng wǎn ne boné o-dim Éjip ne buchú. 15Ányi nké ba/kyú tete Otu Hérot o-kpú.

Ńkyín něen kyi/chi, eringe nyí ńkyí Otu Kyítá o/raa ké ocím mú mkpábé mú odasét byiraa-Osówo, kyidakyú ntûntû, ńkyí o/fu, n/kó wǎn ejí n/fu, obyí ké Éjip.

Ba/ju Bwǎn ḿbé ba/tôong ké Abwô, ké Bételehêm

16Ké nkéré mú Otu Hérot o/nyît o/fu, bacinbánet ámbe baa/nîm ǎ, kafâ ka-sa ǎ kanong kanong. O-kye busa o/fu, baju kángkáng bwǎn-banyinchéng ḿbé ké Bételehêm ne ḿbé ké eshê nyí nyi ányi fáráng, ḿbé baa/rí aje afee kyi-bwa kyísí. Wǎ eringe nyí nyǐ oo/jwo ne bacinbánet ámbe kyi-kim ne nkéré mú ókpére ámu o/byí.

17Ké bukwóp ḿbún, ńkyí mkpábé mú odasét byiraa-Osówo, mú odabángê Jeryimáya o/sét kyi/chi ntûntû. 18Ńkyí o/fu, banet ba/jwo ejá ké oshê mú Ríma, ejá nyí bukyû etii ḿbú boo*nwa eri*. Ríchel mu o-tii ng bwǎn emen. Mu o-tii ng bukyû ḿbú boo*nwa ekám* ké ebóng, baa/kpú kángkáng.

Ba/yip Jisos ké Éjip ba-bwa Dyijê ne Nyǐ

19Ké nkéré mú Otu Hérot oo/kpú, orím mú onong mú Otu Kyítá o/byí o-kâm Josêf ké burê, ké Éjip. 20O-sét ǎ o/fu, bûu a-kúng wǎn ne boné emen a-bwa esim ké Ézerel, ké ebóng, banet ḿbé ba/mû ba/kan ba/fu, mbé ba-ju ng wǎn mún baa/kpú. 21Josêf o-bûu kâng o-kúng wǎn ne boné emen o-bwa esim ké Ézerel.

22Ké nkéré mú Josêf o/jwo ba/fu, baa/kúng Ákelus butu ké kyikit ńkyí bonchí emen Otu Hérot, o/firi otu mú Judyâ, Josêf kyi/chi ǎ bushî ekyú ányi. Orím mú onong o-chî ǎ ebasét byěm ké burê, ne kyi-chi ǎ o-kúng kámbé o-jâ Gályílyi. 23Ba-kûkyú ké Názáret. Eringe nyí ńkyí bamkpábé ḿbé badasét byiraa-Osówo ba/mû ba/sét kyi-kim ne wǎn emen, kyidakyú ntûntû, ńkyí ba/fu, ba/chi ba-kû ǎ ekó onet-Názáret.

Currently Selected:

Mátyuu 2: BKY

Highlight

Copy