Mátyuu 11

Banet-Kyitwóm ḿbé Jǒn mú Nkye Banet Osoo mú Osówo o/twóm

(Lûk 7:18-35)

1Ké nkéré mú Jisos oo/kye bǎmgbán emen ḿbé ashí diǐkpú ne afee bacê ḿbén o-man, o-dim o-mîng kyikit ánkyi, o-wâa edatángê banet, o-sét to kámbé byiraa-Osówo ké eshê nyí nyi ányi fáráng.

2Ké nkéré mú Jǒn mú Nkye banet osoo mú Osówo mu ké mgbokobá, o/jwo kyi-kim ne bǎmkpóngé ḿbé Karâs mu o-chi i. O-twóm kyicê-bǎmgbán emen o/fu, baca kyikit-Karâs. 3Ba-da-bí ǎ ba/fu, sét bě, wo nké adachi onet mú Jǒn o/sét o/fu, o/chi o-bâ dí, aa byitî achi ké onet okíri.

4Jisos o-faa o/fu, bwa n̂g esim ba-da-sét Jǒn ńkyí ben bamu ba-jwo ng ne ńkyí bamu ba-ri ng. 5Bansêe achi ba-kú ba-rángê e, bankwa ba-kú ba-cen n, banet-byirwóm ba-kú ba-nyange e, banet ḿbé baa*jwo atông* ba-kú ba-jwo ng, banet ḿbé ba/mû baa/kpú ba-kú ba-jwóbê ng, ne banet-kyikpu to, ba-kú ba-sét ng kámbé Bǎmpém ḿbé Banong. 6Bunyîn-dyityém mbu ne onet mú o*fí ne atyém afee kyi-kim ne me*.

7Ké nkéré mú bǎmgbán-Jǒn ámbe ba-kú ba-bwa ng esim, Jisos o-kpet esét bujê-banet ḿbé ba/mû ányi kyi-kim ne Jǒn. O/fu, ké nkéré ben ba/ce ké kyikim-dyikán ba-kâm Jǒn, ben ba/mû ba/kabe ba/fu, ba-da ng eri ebóng. Kiǐbyâa ńkyí bufú mbu bu-náng ng kánkyí? 8Ben ba/ce ba/fu, ba-da ng eri ebóng. Onyinchéng mú o/bwá byídí ḿbyí byinong? Banet ḿbé badabwá azong-byídí ányi ba-kyú u ké byise-butu. 9Sét n̂g mě, ben ba/ce ba/fu, ba-da ng eri ebóng. Mkpábé mú odasét byiraa-Osówo? Âa, me mu n-sét ng běn n/fu, ben ba/ri onet mú o/shwôm mkpábé mú odasét byiraa-Osówo. 10Ké ebóng, Jǒn o-chi i onet ámu mú ejá-Osówo nyí ba/sáng kyísí nyi e-sét ng kyi-kim ne nyǐ e/fu, Osówo o/fu, nyín něen onet-kyitwóm ejí. Me n/chi n-twóm ǎ o-bwóp ǒ kashú o-da-bâa bukwóp o-tî ǒ. 11Zîim m̂ ńkyín ba/fu, Jǒn mú Nkye banet osoo mú Osówo o/rêe o-shwôm nang yeě mú baa/fwon ǎ. Nké onet mú mu kyísí kyísí o-shwôm ké Butu ḿbú Osówo o/rêe o-shwôm ǎ. 12Kyi-fím ké nkéré mú Jǒn o/sét banet kyitwóm ńkyí Osówo o/twóm ǎ tete kyi-ribi ké dyicí ńdyí kurún, Butu ḿbú Osówo boo/ri afaníkong ké anwa enwa nyí sóngsóng. Bakân-banet mbe ba-kan n ba/fu, mbé ba-kpógê ng. 13Tete kyi-ribi ké nkéré mú Jǒn, kángkáng bamkpábé ḿbé badasét byiraa-Osówo nang Nwet-Byije-Músis ba/sét kyi-kim ne Butu ḿbú Osówo. 14Nké â ben bamu ba-ryuu ng ba/fu, ba-bángê e ké byiraa ebe ne atyém enen, nyît n̂g ba/fu, Jǒn o-chi i Elája mú ba/mû ba/sét kpá kyikû ké esim ba/fu, o/chi o-bâ. 15Jwo n̂g kâng, â ben bamu ne atông.

16Nké me n-kúng ng ebóng kâng ne n-kan ne bwǎn-bafî. Mbé mbe wǎ bwǎsíng ḿbé mbe ké ntim-kasî. Dyizu dyibónge dyi-wonge dyi-sét ńdyí áku dyi/fu, 17be byi/kim běn ane nyí dyibé, nké ben ba*da/ne*. Byi-kwán běn ekwan nyí bukyû echi, nké ben ba*da/tii*. 18Jǒn o/bê, o-cíp esong, nang bato to o*da/jwáp*. Nké kángkáng banet ba/raa ba/fu, nyǐ mu ne kyibî-bucí. 19Wǎn-Onet o-bâ, o-ryí byiryíng, o-jwáp bato. Kángkáng banet ba/raa ba/fu, kû n̂g eri onyinchéng mún. Nyǐ o-chi i kiinryî aryî ne kiinjwâp bato. Ne o-chi i ocín-bankoo akpuga-dyishí ne banchi byibî. Nké byinyídíng ḿbyí Osówo mbyi byi-tông ng byi/fu, mbyí mbyi ntûntû ké byěm ḿbyí mbyí mbyi byi-chi i.

Eshê nyí ba*da/fé Atyém Ebe ne Jisos*

(Lûk 10:13-15)

20Jisos kâng o-kpet eshú eshê nyí nyǐ o/chi byěm-akat emen chwóó ké nyǐ. Ké ebóng, banet ámbe byiko byi*da/kpú kámbé ba-mîng byibî ebe*. 21O-kpet eraa o/fu, kyi/chi kyi-bên ne ben kanong kanong, ben banet ḿbé Korázin. Kyi/chi kyi-bên ne ben to kanong kanong, ben banet ḿbé Bét-Sáda. Ké ebóng, byěm-akat ḿbyí me n/chi kámbyí ké bushú enen, â m/mû n/chi kámbyí ké Táya ne Sádon, kyikúri ńkyín nyáá, něen banet ḿbé eshê ányi baa/fé byídí-dyikán eta, ba-wuri ecing ba-pwó ké byiko, eringe nyí kyidatông kyi/fu, mbé byiko bii/kpú kámbé, ba-mîng byibî ebe. 22Zîim m̂ kâng ba/fu, ké Dyicí-Mpan ándyi, Osówo o/chi o-ri banet ḿbé Táya ne ḿbé Sádon bafip o-shwôm běn ben. 23Kyi-kim kâng ne ben, ǎ banet-Kapánum, ben ba/mû bamu ba-ryuu ng ba/fu, ba-bêem m byiko enen ba-jâ kyíbóng. Osówo o/chi o-twóp běn ké kyikit-busông eri. Â byěm-akat ḿbyí me n/chi kámbyí ké bushú enen, nké m/mû n/chi kámbyí ké Sódom, něen oshê ámu o/tôong tata kurún. 24Zîim m̂ kâng ba/fu, ké Dyicí-Mpan ándyi, Osówo o/chi o-ri banet-Sódom bafip o-shwôm běn ben.

Bâ n̂g ba-kâm Mě, ba-jáng

(Lûk 10:21-22)

25Ké nkéré ámu Jisos o/raa o/fu, Kyítá, Oyén-bubóng ne esí. Me n/kó ǒ asǎma, ké ebóng, wo aa/tông banet ḿbé baa*nyît chwǒm* ńkyí wo aa/rôo banet-byinyídíng. 26Nkyi éné, ǎ Kyítá, wo a/chi ńkyín ké okabe mú eyên ne ké bunyîn-dyityém eyên.

27Bonchí ejí oo/kye mě kángkáng byěm. Onet nang obónge o*fí mú mu o-nyît ng mě* kyi-cibi ne Bonchí ejí*. Ne onet nang obónge to o*fí mú mu o-nyît ng Bonchí ejí* kyi-cibi ne me* ne banet ḿbé me mu n-ryuu ng n/fu, n-tông ng kámbé Bonchí ejí wááng*.

28Bâ n̂g ba-kâm mě, ben ḿbé baa/kyee ké biǐróró-atû enen etû. Ne me n/chi n-kye běn dyijâng. 29Koo n̂g dyitû ńdyí ejí ba-tû, ba-kwâa ne me, ké ebóng, me mu ne dyityém degere ne ofê. Ne ben ba/chi ba-já dyijâng. 30Dyitû ńdyí ejí dii*ró*.

Currently Selected:

Mátyuu 11: BKY

Highlight

Copy