Lûk 9

Jisos o/twóm Bǎmgbán Emen Ashí Diǐkpú ne Afee

(Mátyuu 10:5-15; Mâk 6:7-13)

1Jisos o/kó bǎmgbán emen ḿbé ashí diǐkpú ne afee, ne o-kye kámbé busa ḿbú badaró kángkáng byibî-bací ne ḿbú badachi banet-byirwóm ba-nyange. 2Ne o-twóm kámbé kâng o/fu, bada-sét banet kyi-kim ne Butu ḿbú Osówo, ba-chi to banet-byirwóm ba-nyange. 3O-sét kámbé o/fu, *da n̂g echi ba-yip nang chwǒm kyibónge ké bucen ḿbú bamu ba-wâa ng něen*. *Da n̂g echi ba-yip nang ochí-bucen* nang kiimbam ńkyí badarém akpuga* nang byiryíng* nang akpuga* nang nkyû okíri mú badayángê*. 4Nang nyá nké ba/koo běn kanong, kyú n̂g ké kyise ánkyi tete ba-mîng oshê ámu. 5Nang nyá nké banet ba*da běn ekoo kanong* mîng n̂g oshê ámu, ba-pâ ecing nyí ké abe enen ba-pwó wǎ ekó ekuri.

6Bǎmgbán emen ámbe ba-dim kâng ba-cen ké kángkáng eshê, ba-sét ng Bǎmpém ḿbé Banong ba-câ, ba-chi i to banet ḿbé ba/mû ba-rwôm m ba-nyange, ké kángkáng eshê ányi nyí ba/ce.

Kyi/yógê Otu Hérot ké Dyityém

(Mátyuu 14:1-12; Mâk 6:14-29)

7Otu Hérot mú otu mú Gályílyi o/jwo kángkáng byěm ḿbyí byi/mû byi-chi i. Kyi-firi ǎ yógeyóge ké dyityém, ké nǎ, kyicê-banet ba/mû mbe ba-raa ng ba/fu, Jǒn mú Nkye banet osoo mú Osówo nké oo/jwóbê ké bukyû. 8Bakíri ba/fu, Elája nké oo/byí. Bakíri ba-bwa ba-fu, mkpábé obónge mú odasét byiraa-Osówo, mú kpákpá nké oo/jwóbê ké bukyû. 9Otu Hérot o-raa o/fu, me n/kye busa ba-két Jǒn dyishí, nké ebóng dyizong-onet něen mú me mu n-jwo ng byěm ḿbyín kyi-kim ne nyǐ. Ne o-kpet ekyé bukwóp ḿbú odari Jisos.

Jisos o/nen Égot-Banet Bujam ne Etánge

(Mátyuu 14:13-21; Mâk 6:30-44; Jǒn 6:1-14)

10Banet-kyitwóm-Jisos ba/fím ba-fyi, ba-sét Jisos kángkáng byěm ḿbyí mbé ba/chi. Jisos o-kpî kámbé ba-dim mbé bayén báyen ké oshê mú badakó Bét-Sáda. 11Ké nkéré bujê-banet ba/jwo kyi-kim ne nkyí, ba/dim ne nyǐ ké kyikû. Nyǐ o-koo bujê-banet ámbe ne bunyîn-dyityém, o-pem kámbé kyi-kim ne Butu ḿbú Osówo, ne o-chi to banet ḿbé ba/mû ba-rwôm m ba-nyange.

12Ké nkéré mú esû e-kú e-ríbî ng, bǎmgbán emen ḿbé ashí diǐkpú ne afee ba/bê ba-kâm ǎ, ba-raa ne nyǐ ba/fu, sét banet ḿbén ba-dim, eringe nyí badace ké eshê ne ké bampyep ḿbé mbe nyín fáráng, ba-da-kyé byiryíng ne kyikit ńkyí badarí sáre, ké ebóng, kyikit ńkyín oshê o*fí*.

13Nké Jisos o/raa ne mbé o/fu, ben bayén, kye n̂g kámbé chwǒm ńkyí badaryí.

Mbé ba-faa ǎ ba/fu, kángkáng byiryíng ḿbyí be byimu ne mbyí byi/waa byirim-berêt byitánge ne ekworê efee nké nke. Wo amu a-ryuu ng a/fu, be byica byi-da-ré byiryíng byi-kye bujê-banet ḿbún dí. 14Banyinchéng ḿbé ba/mû ányi ba-byí i égot nang bujam ne etánge.

Jisos o-raa ne bǎmgbán emen o/fu, fu n̂g banet ámbe ba-kyú me ké azu ké azu, nyí adabyí nang bajam-banet bafee esim diǐkpú ké dyizu dyibónge.

15Bǎmgbán emen ba-chi éné, ne ba-chi kángkáng banet ámbe ba-kyú me. 16Jisos o-yip byirim-berêt ámbyi byitánge ne ekworê ányi efee, o-bírî achi kyíbóng, o-kó Osówo asǎma ké mbyí, o-ját kámbyí, ne o-kye bǎmgbán emen o/fu, bakyii kámbyí ba-kye banet ámbe. 17Banet ámbe kángkáng ba-ryí ba-zût. Ne bǎmgbán emen ba-bwóp ekén nyí ba/ryí e-waa kyísí, e-sú bookye diǐkpú ne bufee.

Pyíta o/sét Wááng kyi-kim ne Jisos

(Mátyuu 16:13-19; Mâk 8:27-29)

18Nkéré obónge, ńdyí Jisos o/kyú kǎnchí mu o-fâ nshwam, bǎmgbán emen ba/bê ba-kâm ǎ. Jisos o-bí kámbé o/fu, banet mbe ba-raa ng ba/fu, me n-chi i ebóng dyizong-onet.

19Mbé ba-faa ǎ ba/fu, kyicê-banet mbe ba-raa ng ba/fu, wo a-chi i Jǒn mú o/mû o-kyâ banet osoo mú Osówo. Bakíri ba/fu, wo a-chi i Elája. Bakíri ba-bwa ba-fu, wo a-chi i mkpábé obónge mú odasét byiraa-Osówo, mú kpákpá, mú oo/jwóbê ké bukyû.

20Jisos o-bí kámbé o/fu, aa ben kâng. Ebóng dyizong-onet ńdyí ben ba/fu, me mu.

Pyíta o-faa o/fu, wo a-chi i onet mú Osówo o/kúng ǎ butu.

Jisos o/raa kyi-kim ne Busông ne Bukyû Emen

(Mátyuu 16:20-28; Mâk 8:30-38; 9:1)

21Jisos o-nyibi kámbé atông o/fu, ba*dachi ba-sét onet nang obónge kyi-kim ne dyizong-onet ńdyí nyǐ mu*. 22Ne o-chîraa o-ca kashú o/fu, Wǎn-Onet o-man o-ri busông chwóó, ne biǐtí-banet ne batu-banchi kyifen-Osówo ne bantánge Byije-Músis ba/chi ba-né ǎ. Ba/chi ba-ju ǎ, ne ké ací achât, Osówo o/chi o-jwóbê ǎ ké bukyû.

23Ne o-raa ne kángkáng banet ḿbé ba/mû ányi o/fu, nang yeě nké o/fu, nyǐ o-bâ ne me, o-man o-ráp kyi-kim ne enyam-byiko emen, o-yip kyikwap ńkyí bada ǎ eshwân, kángkáng dyicí, o-bâ ne me ké kyikû. 24Ké ebóng, nang yeě nké mu o-jang ng eryú kyi-kim ne dyikpen emen, dyikpen emen ándyi dyi/chi dyi-tánê ǎ. Nké nang yeě to nké dyikpen emen dyi/tánê ǎ ké dyishí ejí o/chi o-kpen. 25Ebóng mpún mú onet odaryí, â o/já kángkáng byěm ḿbyí mbyi ké ejíí ńnyín o-rím dyikpen emen. Mpún o*fí*. 26Â éshwân nyi e-chi i onet kyi-kim ne me ne byěm ḿbyí me mu n-tángê e, Wǎn-Onet o/chi o-kyú kâng to ne éshwân ne onet ámu ké nkéré mú oo/fím ké busan emen ḿbú ragerage ne ḿbú Bonchí emen ne ḿbú barím ḿbé banong o-bâ. 27Zîim m̂ ńkyín. Me mu n-sét ng běn n/fu, kyicê-banet mbe nyín, ḿbé baa*ba/chi ba-kpú* tete ba-ri Butu ḿbú Osówo.

Byiko ḿbyí Jisos byi/yángê

(Mátyuu 17:1-8; Mâk 9:2-8)

28Ké nkéré mú kii/shwôm wǎ kyipyán kyibónge, ńdyí Jisos o/raa byiraa ḿbyín, o-kpî Pyíta ne Jǒn ne Jêmsyi ba-da-yú kyíbóng-kaku, nshwam edafé. 29Ké nkéré mú nyǐ mu o-fâ nshwam, bushú emen bu-yángê dyizong. Byídí emen byi-kpet ecé kpárádádát, byi-san n wǎ óbyísû. 30Banyinchéng ba-waa ba-byí ányi ashí afee, ba-kpet epem ne nyǐ. Banet ámbe ba/mû okúsí-Músis ne okúsí-Elája. 31Mbé ba/byí ké busan ḿbú ragerage ḿbú kyíbóng. Ne ba-pem ne Jisos kyi-kim ne bukyû emen ké Jerúsélem ḿbú boo/fárâng, wǎ eringe nyí Osówo o/kabe. 32Pyíta ne be Jǒn ba/mû ba-kú ba-rê ng kanong kanong. Nké mbé ba/jwóbê ba-ri busan ḿbú Jisos ḿbú ragerage ne banyinchéng ámbe ashí afee, ḿbé ba/mû ba/bwom ányi ne nyǐ. 33Ké nkéré mú banyinchéng ámbe ba-kú ba-dim m ba-mîng Jisos, Pyíta o-raa ne nyǐ o/fu, bonchí, nkyi chwǒm ńkyí kyinong eringe nyí byimu něen nyín. Be byi/chi byi-bi boompyep buchât. Kabónge ńké eyên, kabónge ńké Músis, ne kabónge to ńké Elája. Nyǐ o/mû o*fí o-nyît ng ké ntûntû ńkyí nyǐ mu o-raa ng*.

34Nkéré mú Pyíta mu o-raa ng éné, ófíbí o-waa ányi o-byí o-cít kámbé. Mbé bǎmgbán-Jisos ba/mû ba-kú ba-shî ng ńdyí ófíbí o/cít kámbé éné. 35Ejá e-fím ányi ké ófíbí e-raa e/fu, nyín něen, Wǎn ejí mú me nn/cá ǎ. Tî n̂g atông ba-jwo ǎ.

36Ńdyí ejá ee/raa éné e-mîng, Jisos o/waa ányi kǎnchí. Ne bǎmgbán-Jisos ámbe ba-cíbî pyêp kyi-kim ne chwǒm ńkyín. Ké nkéré ámu, mbé ba*da/sét onet nang obónge kyi-kim ne ńkyí mbé ba/ri*.

Jisos o/chi Wǎsíng-Onyinchéng mú mu ne Kyibî-Bucí o-nyange

(Mátyuu 17:14-18; Mâk 9:14-27)

37Ké orî-dyicí, Jisos ne bǎmgbán emen ba/shû kyíbóng-kaku. Bujê-banet bu-byí bu-kâm ǎ. 38Onyinchéng obónge o-wonge ké burwám-bujê-banet ámbu o/fu, ntánge byiraa-Osówo, n/tîm ǒ arông, kamgbe, bírî achi a-tún wǎn ejí, kaancen-wǎn-onyinchéng ejí kabónge. 39Kyibî-bucí nkyi kyi-kám m ǎ, o-byí i ne dyiwonge ké ocím, kyi-ziri ng ǎ banê ké byiko tete biimpún byi-byí ǎ ké ocím. Kyi-chi i ǎ o-némê e chwóó, kii*bángê ǎ ezú abwô*. 40Nn/tîm bǎmgbán eyên arông n/fu, bafîm ǎ kámbú ké byiko, nké ba*da ǎ eman efîm*.

41Jisos o-raa ne banet ḿbé ba/mû ányi o/fu, ben ba*fí dyizong-banet ńdyí ben ba/mû ba/chi ba-kyú* obánge o*fí běn*. Me n-rí i nǎ ne ben. N-cíp ng dyityém n-kyú ne ben ké aje afěng. Ne o-raa kâng ne mú onyinchéng ámu o/fu, bâ ne wǎn eyên nyín.

42Ké nkéré mú wǎn-onyinchéng ámu mu o-cen n o-bâ, kyibî-bucí ánkyi kyi-nwam ǎ kyi-sît kyísí, kyi-kpet ǎ eziri banê ké byiko. Jisos o-nyán kyibî-bucí ánkyi, o-chi mú wǎn-onyinchéng ámu o-nyange, ne o-bwa ne nyǐ o-kye bonchí. 43Kángkáng banet ḿbé ba/mû ányi ba-waa ocím ké dyishí fúú ké kiǐtí-busa ńkyí Osówo mu ne nkyí.

Jisos o/chîraa kyi-kim ne Bukyû Emen

(Mátyuu 17:22-23; Mâk 9:30-32)

Byiko byi/mû byi/tôong banet kaakaa ké byěm ḿbyí Jisos o/mû o-chi i, ké nkéré nyǐ o/raa ne bǎmgbán emen o/fu, 44*da n̂g echi ba-ráp ńkyí me mu m-bâ běn esét*. Ba/chi ba-kúng Wǎn-Onet ba-fé ǎ ké abwô nyí busa ḿbú banet. 45Nké mbé ba*da/nyît eringe ńkyí nyǐ o/raa něen kyi/byí*. Osówo o/mû oo/rôo kámbé kánkyí, eringe nyí baa*ba/chi ba-nyît kyikû emen* ne mbé ba/mû mbe ba-shî ng ǎ ebí kyi-kim ne kyiraa ánkyi.

Yeě o/rêe o-shwôm

(Mátyuu 18:1-5; Mâk 9:33-37)

46Okân ké dyishí o-ba-róng bǎmgbán emen kyi-kim ne onet mú mu kiǐtí o-shwôm ké burwám ebe. 47Jisos o/nyît ńkyí mbé ba/mû ba-kabe ng, ne o-kúng kâng wǎsíng-ojújwô o-bi ǎ cip ké bukô emen. 48Ne o-raa ne mbé o/fu, nang yeě nké o/koo wǎsíng-ojújwô mún o-tî ǎ kanong ké bubwô ejí, onet ámu o/koo mě to. Nké nang yeě nké o/koo mě, o/koo to nyǐ mú o/twóm mě. Ké ebóng, nang yeě nké mu kyísí kyísí o-shwôm ké burwám enen, nyǐ nké mu kiǐtí o-shwôm.

Onet mú o*fí o-ciring ǒ* mu ne Wo

(Mâk 9:38-40)

49Jǒn o-sét Jisos o/fu, bonchí, be byi/ri onyinchéng obónge mú mu o-yip ng dyizîn eyên o-ró ng byibî-bací. Be byi/sét ǎ byi/fu, omîng, ké ebóng, nyǐ o*fí ké burwám eten*.

50Jisos o-raa ne nyǐ ne bǎmgbán emen ḿbé áku o/fu, *da n̂g ǎ echîsét ba/fu, omîng* ké ebóng, nang yeě nké o*fí o-ciring ǒ* mu ne wo.

Oshê Obónge ké Samérya ba/né Jisos ekoo

51Ké nkéré mú ací a/mû nyi a-fárâng ng a-bâ nyí Osówo o/chi o-yip Jisos o-jâ ne nyǐ kyíbóng, nyǐ o/tigi ne dyityém emen ne o-dim Jerúsélem. 52Nyǐ o-twóm banet ba-bwóp ǎ kashú, ḿbé ba/dim ba-ca ké oshê obónge ké Samérya ba/fu, mbé ba-da ng ekpá byiko ké kángkáng byěm ba-tî ǎ. 53Nké banet-oshê ámu ba-né ba/fu, mbé baa*koo ǎ* ké ebóng, kyi/mû kyi/tông wááng kyi/fu, nyǐ mu o-wâa ng Jerúsélem. 54Ké nkéré bǎmgbán emen ḿbé badabángê Jêmsyi ne Jǒn ba/ri ńkyín, ba-raa ne Jisos ba/fu, Otu Kyítá, amu a-ryuu ng a/fu, byichi okwâ o-fím kyíbóng o-ba-shí kámbé dí.

55Jisos o-bírî o-nyán kámbé. 56Ne mbé ba-shwôm ba-jâ ké oshê okíri.

Banet ḿbé ba/fu, Mbé ba-kû ng ecen ne Jisos ké Kyikû

(Mátyuu 8:19-22)

57Ké nkéré mbe ba-cen n ba-câ, onyinchéng obónge o/sét Jisos o/fu, me mu n-ryuu ng n/fu, m-bâ ne wo ké kyikû, nang nyá nang nyá nké amu a-wâa ng.

58Jisos o-faa ǎ o/fu, banfâ mbe ne bǎmbwó, bunurung mbu ne aju, nké Wǎn-Onet o*fí ne kyikit ńkyí odarí sáre o-jáng*. 59Jisos o-bwa o-raa ne onyinchéng okíri o/fu, bâ ne me ké kyikû.

Nké onyinchéng ámu o/sét ǎ o/fu, bonchí, mîng mě n-ca kpá n-da-ryii bonchí ejí.

60Jisos o-faa ǎ o-fu, mîng banet ḿbé baa/kpú ba-ryii banet ebe ḿbé baa/kpú. Wo dim a-da-pem banet bǎmpém kyi-kim ne Butu ḿbú Osówo.

61Onyinchéng okíri o-bwa o-sét Jisos o/fu, me n/chi m-bâ ne wo ké kyikû, nké mîng mě kpá n-da-sét kyikû-banet ejí n/fu, bakyú kanong.

62Jisos o-sét ǎ o/fu, nang yeě nké o/kpet otáng-kyifát ekpang, kaǎnyín-nkéré o-kan achi ké esim, kaǎnyín-nkéré o-kan achi ké esim, onet ámu o*da/kwárê mú odachi bǎmkpóngé ké Butu ḿbú Osówo*.

Currently Selected:

Lûk 9: BKY

Highlight

Copy