Lûk 7
7
Jisos o/chi Ḿgbán mú Onet-Dyishí-Basúja ḿbé Rûm o-nyange
(Mátyuu 8:5-13)
1Ké nkéré Jisos oo/man kángkáng byiraa emen ḿbyí mu o-sét ng banet, o/dim o-da-nung ké Kapánum. 2Onet-dyishí mú o/mû o-tún n bajam-basúja batánge ḿbé Rûm o/mû ne ḿgbán mú o/mû ǎ ké dyityém mú o/mû o-rwôm m, ne o/firi ké bukwóp-bukyû. 3Ké nkéré mú onet-dyishí-basúja ámu o/jwo kyi-kim ne Jisos, o-twóm kyicê-bakínkán-banet-Jûs o/fu, bada-tîm Jisos arông o-ba-chi ḿgbán emen ámu o-nyange. 4Ké nkéré mbé ba/bê ba-kâm Jisos, ba-tîm ǎ arông kanong kanong ba/fu, onyinchéng mún o/kwárê ké ntûntû mú wo ada ǎ echwáp, 5ké ebóng, banet eten ba-jê ng ǎ! ne nyǐ nké o/bi kyise-ékwâbashi eten o-kye bě.
6Ne Jisos o-dim ne mbé. Ké nkéré mú Jisos oo/fárâng kyise, onet-dyishí-basúja ámu o-twóm bacín emen ba-da-sét Jisos ba/fu, bonchí, *dachîkye byiko eyên afaníkong* ké ebóng, me n*da/kwárê mú wo adanung ké kyise ejí* 7nang me to n*da/kabe n/fu, n/kwárê mú ndabê me oyén n-kâm ǒ*. Nké raa ké ejá éja, ḿgbán ejí o/chi o-nyange. 8Me to mu onet mú mu ké bubwô ḿbú bakínkán-banet-ashí-basúja ne me mu to ne basúja ḿbé mbe ké bubwô ejí. Me n-sét ng mún n/fu, dim, o-dim. N-sét mú áku n/fu, bâ, o-bâ. M-bwa n-sét ósóng ejí n/fu, chi ńkyín, o-chi.
9Ké nkéré Jisos o/jwo ńkyín, kyi/chi ǎ wǎ chwǒm-akat. Ne o-bírî o-raa ne bujê-banet ḿbé mbe ba-bâ ǎ ké kyikû o/fu, me mu n-sét ng běn n/fu, nang ké Ézerel, me n*da/ri ne dyizong-dyityém efé ńdyí onet o/fé ne me wǎ ńdyín*.
10Bacín emen ḿbé o/mû o/twóm kámbé ba-bwa esim ké kyise ńkyí onet-dyishí-basúja ámu, ba-da-ri ḿgbán emen ámu ké oo/nyange.
Jisos o/jwóbê Wǎn-Onyinchéng mú o/mû Wǎn-Onyǐnkú, ké Bukyû
11Ka*da/chîbwon* Jisos o/dim o-wâa Nîin. Bǎmgbán emen ne bujê-banet chwóó ba-dim ne nyǐ ké kyikû. 12Jisos o-ribi ng o-câ ké ocím-dyifyi mú mu ké dyishí-bukwóp-oshê ámu, o-rángê e ké ba-kú ba-bâ ne kyikwóm-okúsí. Onyinchéng ámu mú o/kpú éné o/mû ncen-wǎn mú onyinyi obónge mú o/mû onyǐnkú. Bujê-banet chwóó ḿbé ba/fím oshê ámu ba/mû mbe ba-bâ ne onyinyi ámu ké kyikû. 13Ké nkéré mú Otu Kyítá o/ri mú onyinyi ámu, byiko byi-kpú ǎ ne nyǐ. Ne o-raa ne nyǐ o/fu, *dachîtii*. 14O-shwôm o-da-ta byichí ḿbyí ba/tû onyinchéng ámu. Banet ḿbé ba/mû ba/tû ǎ ba-bwom. Ne Jisos o-raa ne onet mú oo/kpú éné o/fu, wǎn-kyisat, me nké n/sét ǒ n/fu, jwóbê. 15Onyinchéng ámu mú o/mû oo/kpú o-bûu, o-kpet eraa. Ne Jisos o-níbî ǎ o-kye boné.
16Bushî bu-róng banet ḿbé ba/mû ányi kángkáng. Ne ba-kpet ekpee Osówo ba/fu, kiǐtí-mkpábé mú odasét byiraa-Osówo oo/bê o-kâm bě. Osówo oo/bê banet emen ebanyii.
17Bǎmpém kyi-kim ne ńkyí Jisos o/chi něen ba/káng ké kángkáng oshê omúmú mú banet-Jûs, ne ké eshê nyí nyi ányi fáráng.
Banet ḿbé Jǒn mú Nkye Banet Osoo mú Osówo o/twóm
(Mátyuu 11:2-19)
18Bǎmgbán-Jǒn mú Nkye banet osoo mú Osówo ba-sét Jǒn kángkáng byěm ḿbyín. Ne Jǒn o-kó bǎmgbán emen ashí afee ba-kâm ǎ. 19Ne o-twóm kámbé kyikit-Otu Kyítá o/fu, bada-bí ǎ ba/fu, wo nké amu onet mú Osówo o/kúng ǎ butu? mú byimu byi-tî ng achi byi/fu, o/chi o-bâ dí, aa be byitî achi ké onet okíri.
20Ké nkéré mbé ba/kâm Jisos, ba-sét ǎ ba/fu, Jǒn mú Nkye banet osoo mú Osówo nké o/twóm bě o/fu, be byibí ǒ ńkyín. Wo nké amu onet mú Osówo o/kúng ǎ butu? mú byimu byi-tî ng achi byi/fu, o/chi o-bâ dí, aa be byitî achi ké onet okíri.
21Ké ochíchí-nkéré ámu, Jisos o/chi banet chwóó kángkáng azong-byirwóm ebe a-man. O-ró to byibî-bací, o-chi to bansêe achi chwóó ba-kpet erángê. 22Ne o-faa banet ḿbé Jǒn o/twóm kámbé o/fu, bwa n̂g esim ba-da-sét Jǒn ńkyí ben baa/ri ké achi, ba-jwo to ké atông. Bansêe achi ba-kú ba-rángê e, bankwa ba-kú ba-cen n, banet-kyibî-orwôm ba-kú ba-nyange e, banrwôm atông ba-kú ba-jwo ng, banet ḿbé ba/mû baa/kpú ba-kú ba-jwóbê ng, banet-byikpu ba-kú ba-jwo ng Bǎmpém ḿbé Banong. 23Bunyîn-dyityém mbu ne onet mú o*fí ne atyém afee kyi-kim ne me*.
24Ké nkéré mú banet ḿbé Jǒn o/twóm kámbé baa/dim, Jisos o-kpet esét bujê-banet kyi-kim ne Jǒn o/fu, ké nkéré mú ben ba/ce ba-kâm Jǒn ké kyikim-dyikán, ben ba/mû ba/kabe ba/fu, ba-ri ng ebóng. Kyiká-kiǐbyâa ńkyí bufú mbu bu-náng ng kánkyí dí. 25Ben ba/ce kyíjí ba/fu, ba-da ng eri ebóng. Onyinchéng mú o/bwá byídí ḿbyí byinong byinong dí. Ké ntûntû, banet ḿbé badabwá azong-byídí ányi ba-kyú u ké dyikpen ńdyí aryî áryi, ba-ri ng kámbé ké byise-batu. 26Sét n̂g mě, ben ba/ce kyíjí ba/fu, ba-da ng eri ebóng. Mkpábé mú odasét byiraa-Osówo dí. Âa, me mu n-sét ng běn n/fu, ben ba/ri ńkyí kyi/shwôm mkpábé mú odasét byiraa-Osówo. 27Ké ebóng, Jǒn o-chi i onet mú ejá-Osówo nyí ba/sáng kyísí e/raa kyi-kim ne nyǐ e/fu, Osówo o/fu, nyín onet-kyitwóm ejí. Me n/chi n-twóm ǎ o-bwóp ǒ kashú, o-da-bâa kiǐfáng o-tî ǒ. 28Jisos o-chîraa o-ca kashú o/fu, me mu n-sét ng běn n/fu, Jǒn mu kiǐtí-onet o-shwôm onet nang orá mú baa/fwon ǎ. Nké onet mú mu kyísí kyísí o-shwôm ké Butu ḿbú Osówo mu kiǐtí o-shwôm ǎ.
29Kángkáng banet ne bankoo akpuga-dyishí ba/jwo ǎ. Mbé nké ba/chi kanong ńké Osówo o/sét kámbé o/fu, bachi, ne mbé to nké Jǒn o/kye kámbé osoo mú Osówo. 30Nké banet-ncibi mú badakó Fárasyî ne bantánge Byije-Músis ba/né okabe mú Osówo, ba/fu, o*da/tyeem kámbé* ne ba-né to osoo mú Osówo ekoo ké abwô nyí Jǒn.
31Jisos o-chîraa o/fu, me n-kúng ng ebóng ne n-kan banet ḿbé ejíí nyí kántîk. Mbé mbe wǎ ebóng. 32Mbe wǎ bwǎsíng ḿbé ba/kyú ké ntim-kasî. Dyizu dyibónge dyi-wonge dyi-kó dyizu ńdyí áku dyi/fu, be byi/kim běn ane-dyijî-dyibé, nké ba*da/ne* byi-kwán běn ekwan-bukyû etii, ba*da/tii*. 33Jǒn mú Nkye banet osoo mú Osówo o/bê, o-cíp esong, bato o*da/jwáp*. Ben ba/fu, mu ne kyibî-bucí. 34Wǎn-Onet o/bê, o-ryí i byiryíng, o-jwáp ng bato. Ben ba/fu, kan n̂ achi ba-ri onyinchéng mún. Kiinryî aryî ne kiinjwâp bato. Ocín-bankoo akpuga-dyishí ne banchi byibî. 35Banet ḿbé mbe ba-koo ng byinyídíng ḿbyí Osówo kâng nké mbe ba-nyît ng ba/fu, mbyi ntûntû.
Jisos o/ce ké Kyise ńkyí Sámon mú mu ké Ncibi mú badakó Fárasyî
36Onet obónge mú mu ké ncibi mú badakó Fárasyî o/kó Jisos o/fu, oda-ryí byiryíng ne nyǐ. Jisos o-dim ké kyise ńkyí onyinchéng ámu, o-da-kyú me ké kyikit ńkyí badaryí byiryíng. 37Onyinyi obónge o/mû ké oshê ámu mú o/mû o-kyú u kyibî-dyikpen. Onyinyi ámu o/jwo ba/fu, Jisos mu o-ryí i byiryíng ké kyise-onet-Fárasyî ámu. Ne o-yip ókpúmá ne bakút-kyinung ké kafâ, 38o-da-bwom Jisos ké esim, ké byiká emen. O-kpet etii o-cok ng Jisos abe-byiká ne batíí. Ne o-yip kâng eji emen o-shî Jisos byiká, o-yip byibî-ocím emen o-nyám kámbyí, ne o-yip bakút-kyinung ámbe o-pwó ǎ ké mbyí. 39Ké nkéré onet-Fárasyî mú o/kó Jisos byiryíng éné o/ri ńkyín, o-raa ké dyityém emen o/fu, â onyinchéng mún ntûntû o/mû mkpábé mú odasét byiraa-Osówo, o/mû o/chi o-nyît dyizong-onyinyi ńdyín ńdyí ndyi dyi-ta ng ǎ. O/mû o/chi o-nyît dyizong-kyibî-dyikpen ńdyí mu o-kyú u.
40Jisos o-raa, o-sét ǎ o/fu, Sámon, me mu ne chwǒm ńkyí nda ǒ esét.
Sámon o-faa ǎ o/fu, m/bángê, ǎ ntánge byiraa-Osówo, sét mě.
41Jisos o-tím ǎ dyitím-ekan o/fu, banyinchéng ashí afee ba/ryí mpwoo banet akpuga obónge dyifwá. Obónge o/ryí ǎ égot-akpuga-syílyíba efee ne kyicê, mú obónge bajam bafee esim diǐkpú. 42Onet nang obónge mú o/man ǎ eré dyifwá emen o*fí*. Onyinchéng ámu o-waa kâng o-pwoo kámbé afwá ebe ányi amúmú. Yeě kâng ké ashí ebe ányi afee nké mú onyinchéng ámu o/chi o-jê ǎ o-shwôm.
43Sámon o-faa o/fu, me n/kabe n/fu, kyi/chi kyi-kyú onet mú o/pwoo ǎ dyifwá ńdyí dyi/jê dyi-shwôm.
Jisos o-sét ǎ o/fu, a/man efaa. 44Ne Jisos o-bírî kâng o-tún mú onyinyi ámu, ne o-raa ne Sámon o/fu, wo a/ri onyinyi mún dí. Me m/bê ké kyise eyên, wo a*da mě ekye omu mú ndasoo byiká ejí*. Nké nyǐ oo/kúng batíí emen o-soo mě byiká, o-kúng eji emen o-shî kámbyí. 45Wo a*da mě erwâm kanong kanong ńdyí me n/nung ké kyise eyên*. Nké kyi-fím ké nkéré mú me m/bê nyín, nyǐ o*da/mîng ne byiká ejí enyám*. 46Wo a*da mě ekye bakút ḿbé ndafé ké dyishí*. Nké nyǐ oo/zók byiká ejí ne bakút ḿbé kyinung. 47Me mu n-sét ng ǒ kâng n/fu, kiǐtí-kyijé ńkyí nyǐ oo/tông kyi/tông kyi/fu, byibî emen ámbyi chwóó Osówo oo/pwoo ǎ kámbyí. Onet mú ba/pwoo ǎ boǒnyín-byibî o-tông ng to kaǎnyín-kyijé.
48Ne Jisos o-raa kâng ne mú onyinyi ámu o/fu, Osówo oo/pwoo ǒ byibî eyên.
49Banet ḿbé ba/mû ba/kyú ké ókpákpúrúk-byiryíng ne nyǐ ba-kpet eraa ne barî ba/fu, nyín yeě mú mu o-pwoo ng to ne byibî.
50Nké Jisos o/sét mú onyinyi ámu o/fu, dyityém eyên ńdyí a/fé ne me dii/nyii ǒ, jâ ne bunyîn-dyityém.
Currently Selected:
Lûk 7: BKY
Highlight
Share
Copy
Want to have your highlights saved across all your devices? Sign up or sign in
Published by the Bible Society of Nigeria @ 1985
