Lûk 4
4
Okan mú Jisos
(Mátyuu 4:1-11; Mâk 1:12-13)
1Jisos o/fím ḿbú kace ńké badakó Jódan o-fyi ne busa ḿbú Busun-Osówo ké byiko. Busun-Osówo ámbu bu-chi ǎ o-dim ké kyikim-dyikán, 2ké kyikit ńkyí Otu-Byibî-Barím o/kan ǎ ké bajam-ací bafee. Ké kyikim-nkéré ánkyi, Jisos o*da/ryí chwǒm*. Ké bubwô ámbu, esong e/mû e-kú e-nwa ng ǎ ké nkéré ací ányi aa/shwôm.
3Otu-Byibî-Barím o-raa ne nyǐ o/fu, â wo a-chi i Wǎn-Osówo, kye busa buká ḿbún bu-bírî berêt.
4Jisos o-faa o/fu, ejá-Osówo nyí ba/sáng kyísí e/fu, onet oo*man ekpen ké berêt nké nke*.
5Otu-Byibî-Barím o-kpî ǎ kâng o-da-yú ké kyikit ńkyí nkyi kyíbóng nyáám. Ké kaǎnyín-nkéré, oo/tông ǎ kángkáng eshê nyí ké ejíí ńnyín. 6O-sét Jisos o/fu, n-kyâ ǒ kángkáng busa ḿbú adakûtún byěm ḿbyín, ne kángkáng esang nyí nyi ké mbyí. Baa/kye mě kángkáng byěm ḿbyín, nké me m-man n ekye to nang yeě nang yeě mú o/nyîn mě. 7Â wo a/tím arông kyísí kâng a-fé mě, byěm ḿbyín kángkáng byi/chi byi-firi ḿbyí eyên.
8Jisos o-faa o/fu, ejá-Osówo nyí ba/sáng kyísí e/fu, fé Osówo Óburúkpâbí nké nke, a-kyú to ḿgbán emen nké nke.
9Otu-Byibî-Barím o-kpî ǎ kâng ba-dim Jerúsélem, o-da-twôom ǎ ké kyikit ńkyí kyi/nyâam kyi-shwôm, ké kiǐtí-kyise-kyifen-Osówo echi. O-sét ǎ o/fu, â wo a-chi i Wǎn-Osówo, nyíp nyín a-da-róng kyísí, 10ké ebóng, ejá-Osówo nyí ba/sáng kyísí e/fu, Osówo o/chi o-kye barím emen ḿbé banong busa ba-tún ǒ kanong kanong. 11E-chîfu to něen, barím emen ḿbé banong ba/chi ba-kpép ǒ kyíbóng zírízírí ké abwô ebe, eringe nyí wo aa*ba/chi a-némê byiká eyên ké aká*.
12Jisos o-faa ǎ o/fu, ejá-Osówo nyí ba/sáng kyísí e/fu, *dachi a-kan Osówo Óburúkpâbí*.
13Ké nkéré mú Otu-Byibî-Barím oo/kan Jisos ké kángkáng akwóp, o-dim o-mîng ǎ ké kaǎnyín-nkéré.
Jisos o/kpet Bǎmkpóngé Emen echi ké Gályílyi
(Mátyuu 4:12-17; Mâk 1:14-15)
14Jisos o-fím kâng o-fyi ké Gályílyi ne busa ḿbú Busun-Osówo. Byěm ḿbyí mbe ba-sét ng kyi-kim ne nyǐ byi-káng kángkáng byikit ké kyikim-esí ánkyi. 15Nyǐ o/tángê ké byise-ékwâbashi ḿbyí banet-Jûs, banet kángkáng ba-kpee ǎ.
Ba/né Jisos ké Názáret
(Mátyuu 13:53-58; Mâk 6:1-6)
16Jisos o-dim kâng o-ca Názáret, oshê mú ba/nen ǎ tata o-kán. Ké dyicí-ékwâbashi, nyǐ o/ce ké kyise-ékwâbashi ńkyí banet-Jûs wǎ eringe nyí mu o-fwam m ece. O-dim nensang o/fu, nyǐ o-kó ng ejá-Osówo nyí ba/sáng kyísí. 17Ne ba-kye ǎ nwet mú mkpábé mú odasét byiraa-Osówo obónge, mú o/mû o-bángê e Azáya o/sáng. O-bâa kámú, ne o-ri kyikit kyibónge ńkyí ba/sáng ba/fu, 18busa ḿbú Busun-Otu Kyítá mbu ne me, ké nǎ, nyǐ oo/cá mě o/fu, me nsét banet-byikpu Bǎmpém ḿbé Banong. Nyǐ oo/twóm mě o/fu, me nsét banet ḿbé mbe ké busông ba-firi ké byiko ebe, n-sét to bansêe achi ba-kûrángê, n-chi banet ḿbé banet mbe ba-cít ng kámbé ba-fem. 19Me nsét dyije ńdyí Otu Kyítá o/chi o-ba-nyii banet emen.
20Jisos o-cít nwet ámu o-bwa ne mǔ o-kye onet mú mu o-tî ng kámú, ne o-kyú me. Kángkáng banet ḿbé ba/mû ányi ké kyise-ékwâbashi ba-bi ǎ achi ké bushú. 21Nyǐ o-kpet esét kámbé o/fu, kyikit-nwet-ejá-Osówo ńkyín kii/chi ntûntû kurún, wǎ eringe nyí me n/kó kánkyí něen ba-jwo.
22Kyi/nyîn kángkáng banet ḿbé ba/mû ányi kanong kanong ne nyǐ. Ne ba-waa ocím ké dyishí fúú ké dyizong-bunyîn-ejá ḿbú o/raa. Ne ba-kpet ebí ba/fu, *chí wǎn-Josêf něen*.
23Nyǐ o-raa ne mbé o/fu, me mu n-nyît ng n/fu, ben ba/chi ba-tím mě dyitím-ekan ńdyín ké byiko ba/fu, nchi bakye, chi orwôm mú eyên to o-man. Ben ba/chi ba-sét mě to ba/fu, chi to nyín ké oshê eyên azong-byěm nyí ba/sét bě ba/fu, wo a/chi ké Kapánum. 24Jisos o-chînye o-raa o/fu, me mu n-sét ng běn ké ntûntû n/fu, mkpábé mú odasét byiraa-Osówo o*fí nang obónge mú bada ǎ ekye ofê ké oshê emen*. 25Fwôo n̂g atông ba-jwo mě. Nkyi něen ké ntûntû, banyǐnkú ba/mû ba/jê chwóó ké Ézerel, ké nkéré mú Elája. Nkéré ámu mú omu o/mû o*da/na ké aje jangjang achât ne kyicê*. Ne byiryíng byi-ba-kaa ḿbyí bii*nwa kafwa efé* ké kyikim-esí ánkyi kángkáng. 26Nké Osówo o*da/twóm Elája ké kyikit-onyǐnkú mú Ézerel nang obónge*. O/bwa o-twóm ǎ ké kyikit-onyǐnkú obónge mú o/fím Záréfat, ké Sádon. 27Banet-byibî-byirwóm ba/mû to chwóó ké Ézerel, ké nkéré mú mkpábé mú odasét byiraa-Osówo obónge, mú o/mû o-bángê e Elásha. Elásha o*da/chi onet-orwôm ámu mú Ézerel nang obónge o-nyange*. Nké o/bwa o-chi onyinchéng obónge mú o/mû o-bángê e Náman, mú o/fím Syírya.
28Kafâ ka-bírî kángkáng banet ḿbé ba/mû ányi ké kyise-ékwâbashi, ké nkéré ba/jwo byiraa ḿbyín. 29Ba-bûu nensang, ba-tut Jisos ba-dim ne nyǐ tete ba-shwôm oshê kángkáng. Ba-shwôm ne nyǐ kyíbóng-kaku ńké ba/bi oshê ebe, ba/fu, mbé ba-da ng ǎ etwóp o-bírî ké kiǐmbém o-róng ké owo. 30Nké Jisos o/ryuu ké otyém-bujê-banet ámbu, o-dim kiǐfáng ńkyí emen.
Onyinchéng mú o/mû ne Kyibî-Bucí
(Mâk 1:21-28)
31Jisos o/dim kâng o-ca Kapánum, oshê mú mu ké Gályílyi. Ányi nké nyǐ o/tángê banet ké dyicí-ékwâbashi ńdyí banet-Jûs. 32Kángkáng banet ḿbé ba/mû ányi ba/waa ocím ké dyishí fúú ké dyizong-bukwóp ḿbú nyǐ o/tángê. Ké nǎ, ejá emen e/mû ne busa. 33Onyinchéng obónge o/mû ányi ké kyise-ékwâbashi mú o/mû ne kyibî-bucí. Onyinchéng ámu o-wonge ejá kakân kakân o/fu, 34wo amu a-ryuu ng ebóng ne be, ǎ Jisos mú o/fím Názáret. Wo a/bê nyín a/fu, a-bâ ng bě eju? Me mu n-nyît ng dyizong-onet ńdyí wo amu. Wo a-chi i onet-kyitwóm-Osówo mú onong.
35Jisos o-nyán bucí ámbu o/fu, cíbî pyêp. Byí onyinchéng mún ké byiko. Bucí ámbu bu-nwam onyinchéng ámu bu-sît kyísí ké bushú ebe. Ne bu-byí ǎ ké byiko, bu*da ǎ enémê*.
36Kyi/yógê kángkáng banet ḿbé ba/mû ányi, ne ba-raa ne barî ba/fu, ebóng byiraa ḿbyí mu o-raa ng něen. Ké butu ne busa, onyinchéng mún o-nyán n byibî-bací o/fu, byibyí, ne byi-byí i to. 37Ne byiraa ḿbyí mbe ba-sét ng kyi-kim ne Jisos byi-káng kángkáng byikit ké esí ányi.
Jisos o/chi Banet Chwóó Erwôm Ebe e-man
(Mátyuu 8:14-17; Mâk 1:29-34)
38Jisos o-byí ké kyise-ékwâbashi o-dim ké kyise ńkyí Sámon. Boné-onyi-Sámon o/mû mu o-rwôm m mbyép-byiko. Ne ba-sét Jisos kyi-kim ne nyǐ. 39Jisos o-dim o-da-bwom ǎ ké bukô-karíng. Ne o-kye busa o/fu, mbyép-byiko oman. Mbyép-byiko o-zú ǎ abwô. Ne mú onyinyi o-bûu ké abe ányi o-kpet ekye kámbé byiryíng.
40Ké nkéré esû ee/ríbî, kángkáng banet ḿbé ba/mû ne bacín ebe ḿbé ba/mû ba-rwôm m azong-byirwóm chwóó ba/yip kámbé ba-bâ ne mbé kyikit-Jisos. Nyǐ o-yip abwô emen o-twôom kángkáng banet ámbe ké byiko, ne o-chi kámbé ba-nyange ashí amúmú. 41Bací to ba/byí banet chwóó ké byiko, ba-wonge e ba/fu, wo a-chi i Wǎn-Osówo.
Jisos o-nyán kámbé o/fu, ba*dachîfaa ojá* ké ebóng, bací ba/mû mbe ba-nyît ng ba/fu, nyǐ o-chi i onet mú Osówo o/kúng ǎ butu.
Jisos o/pem Bǎmpém ké Byise-Ékwâbashi ḿbyí Banet-Jûs
(Mâk 1:35-39)
42Ké nkéré mú dyicófóróng dii/cé, Jisos o/mîng oshê ámu o-dim o-da-kyú ké kyikit ńkyí banet ba*fí*. Banet ba-kpet ǎ ekyé. Ké nkéré mú ba/ri ǎ, ba-kpet ekan ba/fu, mbé ba-chi i ǎ eringe nyí oo*ba/chi o-dim*. 43Nké Jisos o/sét kámbé o/fu, me m-man m-pem Bǎmpém ḿbé Banong kyi-kim ne Butu ḿbú Osówo ké eshê ekíri to, ké ebóng, ńkyín nké Osówo o/twóm mě o/fu, me mba-chi.
44Nyǐ o-dim kâng o-da-pem bǎmpém ké byise-ékwâbashi ḿbyí banet-Jûs, ḿbyí mbyi ké kángkáng kyikim-oshê ánkyi.
Currently Selected:
Lûk 4: BKY
Highlight
Share
Copy
Want to have your highlights saved across all your devices? Sign up or sign in
Published by the Bible Society of Nigeria @ 1985
