Lûk 12

Ekó ekuri kyi-kim ne Banet enîm

(Mátyuu 10:26-27)

1Ké nkéré bujê-banet chwóó ba/bacibi kyikit kyibónge, ba-tírîng ng barî byicê byimúmú, Jisos o/bwóp kpá kashú o-raa ne bǎmgbán emen o/fu, bám m̂ byiko enen kyi-kim ne bukye ḿbú banet-Fárasyî, ḿbú badafé ké berêt ne o-mut. Me mu n-raa ng kyi-kim ne onîm ebe mú mbe ba-nîm m banet. 2Nang ebóng chwǒm ńkyí ba/cít kánkyí ba/chi ba-bâa. Nang ebóng chwǒm to ńkyí nkyi ké kadip kyi/chi kyi-byí kyíjí. 3Nang ebóng chwǒm kâng ńkyí ben baa/raa ké kyifip ba/chi ba-jwo kánkyí ké esû gbúúl. Nang ebóng chwǒm to nké ben baa/tîm banet ocím ké butông ba-raa ké booju ne afyi cítcít, ba/chi ba-bwom ké ótíbingé ba-sét kánkyí ne ejá kyíbóng kyíbóng.

Onet mú bada ǎ eshî

(Mátyuu 10:28-31)

4Me mu n-sét ng běn, ǎ bacín ejí, n/fu, *da n̂g echi ba-kûshî banet ḿbé badaju enyam-byiko* nké baa*man to echîchi chwǒm kyikíri ńkyí kyi/bên kyi-shwôm éné*. 5Me n/chi n-tông běn onet mú bada ǎ eshî. Shî n̂g Osówo mú ké nkéré oo/ju, mu ne busa ḿbú odachîyip o-twóp ké kyikit-busông eri. Nkyi éné, me mu n-sét ng běn n/fu, shî n̂g ǎ.

6Ba*fí ba-shee ng agbâng atánge ké kóbo bafee dí*. Nké dyigbâng dyi*fí nang dyibónge ńdyí Osówo mu o-ráp ng kándyí*. 7Nang eji nyí nyi běn ké dyishí, Osówo oo/pan kányí kángkáng. Nké *da n̂g echi ba-shî*. Ben ba/shwôm bujê-agbâng nang burá.

Kanong esét kyi-kim ne Karâs, ne Karâs ené

(Mátyuu 10:32-33; 12:32; 10:19-20)

8Me mu n-sét ng běn n/fu, nang yeě nké o/bwom kyíjí o-sét wááng o/fu, nyǐ mu ké kyicê ńkyí ejí, Wǎn-Onet o/chi o-chi to eringe ebónge kyi-kim ne onet ámu ké bushú ḿbú barím ḿbé banong ḿbé Osówo. 9Nké nang yeě nké o/bwom kyíjí o-né mě, Wǎn-Onet to o/chi o-né ǎ ké bushú ḿbú barím ḿbé banong ḿbé Osówo.

10Nang yeě nké o/raa kyibî-kyiraa kyi-kim ne Wǎn-Osówo, Osówo o/chi o-pwoo ǎ. Nké nang yeě nké o/raa byibî-byiraa kyi-kim ne Busun-Osówo, Osówo oo*ba/chi o-pwoo ǎ*.

11Ké nkéré mú baa/bê běn mpan epan ké byise-ékwâbashi ḿbyí banet-Jûs nang ké bushú ḿbú batu-ashí nang ké ḿbú banet-ashí, *da n̂g echi ba-kûkérê kyi-kim ne eringe nyí ben ba/chi ba-pan mpan* nang kyi-kim ne ńkyí ben ba/chi ba-sét*. 12Ké ebóng, Busun-Osówo bu/chi bu-tángê běn ké nkéré ámu ńkyí ben ba/chi ba-sét.

Dyitím-Ekan kyi-kim ne Enyam-Nfang-Onet

13Onyinchéng obónge ké burwám-bujê-banet ámbu o-raa ne Jisos o/fu, ntánge byiraa-Osówo, sét wǎn-boné ejí mú onyinchéng o-kyii byěm ḿbyí bonchí eten o/kpú o-mîng bě ne mbyí o-kye mě kyicê ńkyí ejí.

14Jisos o-faa ǎ o/fu, ebóng onyinchéng něen. Yeě o/kye mě busa ḿbú ndapan bampan nang ḿbú ndakyii bukyû n-kye běn ashí afee. 15Ne o-chîraa o-ca kashú o-sét kámbé ashí kángkáng o/fu, kû n̂g etún achi ba-bám m byiko enen ké kángkáng azong-byěm eshwam. Ké ebóng, ochíchí-dyikpen ńdyí onet dyi*fí ké byěm ḿbyí nyǐ mu ne mbyí* nang o-bwa o-já esang nǎ*.

16Ne Jisos o-tím kámbé kâng dyitím-ekan ńdyín o/fu, nfang-onet obónge o/mû ne esí nyí o/kpang kyifát, byiryíng byi-fé ǎ! 17Ne o-kpet ekabe ne dyityém emen o/fu, me n*fí ne kyikit ńkyí ndatî kángkáng byiryíng ejí ḿbyín*. Me n-chi i nǎ. 18O-raa ké dyityém emen o/fu, ńkyín nké n/chi n-chi. N/chi m-bú bankám ejí, m-bi ḿbé baryên baryên. Ányi nké n/chi n-fé esang-byichí ne kángkáng byěm ejí byikíri. 19N/chi n-raa kâng ne byiko ejí n/fu, onyinchéng mú dyishí dyi/nwa ǎ, wo a/firi ne kángkáng byěm ḿbyí byinong, ḿbyí amu a-ryuu ng ké bujê-aje nyí nyi a-bâ ké kashú. Kúng dyikpen eyên degere. Ryí byiryíng, jwáp bato, a-firi ké bunyîn-dyityém. 20Nké Osówo o/raa ne onyinchéng ámu o/fu, enyam-onet wǎ wo, ké buchú ḿbún ḿbú kurún, me mu m-bâ ǒ ekúng dyikpen eyên. Yeě kâng mú o/chi o-kúng kángkáng byěm ḿbyín ḿbyí wo aa/tî byiko eyên.

21Ne Jisos o-raa kâng ké nkuli kyikû o/fu, éné to nké kyi/chi kyi-chi banet ḿbé mbe ba-wuri ng esang ba-rôo ng ba-tî ng byiko ebe, nké ba*fí banfang-banet ké bushú-Osówo*.

Fé Dyityém ne Osówo

(Mátyuu 6:25-34)

22Jisos o-raa kâng ne bǎmgbán emen o/fu, nkyí nké me mu n-sét ng běn n/fu, *da n̂g echi ba-kûkérê kyi-kim ne byiryíng ḿbyí ben badaryí ne ba-kpen* nang kyi-kim ne byídí ḿbyí badabwá ké byiko*. 23Ké ebóng, dyikpen ndyi kiǐtí dyi-shwôm byiryíng. Enyam-byiko to nyi kiǐtí e-shwôm byídí. 24Kan n̂ achi ba-ri bunurung. Mbú boo*kwón esang-byichí* bu-fuu byiryíng bu-fé ké bankám*. Bu*fí nang ne byise* nang ne bankám*. Osówo nké mu o-kyâ kámbú byiryíng. Ben ba/shwôm bunurung kájékájé. 25Yeě ké burwám enen mú mu o-jang ng ekérê kyi-kim ne dyikpen emen, mú odaman etín aje emen a-ca kashú. 26Â ben baa*man echi kaǎnyín-kaǎchwóm wǎ ńké nké* ebóng ben bamu ba-kérê ng kyi-kim ne byěm byikíri. 27Tún n̂ kâng achi ba-ri eringe nyí biǐbyâa mbyi byi-kán n. Byi*fí byi-chi i bǎmkpóngé* byi-zim m byídí byi-bwá ng*. Nké me mu n-sét ng běn n/fu, nang Otu Sólómon mú o/mû o/já esang o/mû o*fí ne byídí ḿbyí byi/mû byi-nwa ng jangjang wǎ ekong-biǐbyâa ḿbyín nang ebónge*. 28Osówo nké mu o-bwá ng biǐbyâa byídí, biǐbyâa ḿbyí byidabyí kurún, nencí byi-kpú, ba-wuri kámbyí ba-fé ké okwâ. Kii*ba/chi kyi-kyú Osówo ké dyityém ńkyí oda běn ebwá to byídí dí*. Dyityém enen ńdyí ba/fé ne Osówo dyi*da/jê nang kaǎnyín*. 29Nké *da n̂g echi ba-kûkérê ké dyityém enen ba/fu, chwǒm ńkyí ndaryí, ne chwǒm ńkyí ndajwáp byi-fím m mě nyá*. 30Ké nǎ, byěm ḿbyín nké banet ḿbé baa*nyît chwǒm kyi-kim ne Osówo* ké ejíí ńnyín mbe ba-kyé ng. Bonchí enen mu o-nyît ng o/fu, ben bamu ba-ryuu ng byěm ḿbyín. 31Nké kyé n̂g kpá byěm ḿbyí byi/kim ne Butu ḿbú Osówo, ne Osówo o/chi o-kye běn to byěm ḿbyín.

Esang nyí Kyíbóng

(Mátyuu 6:19-21)

32*Da n̂g echi ba-shî* ben kaǎbóng-ebû ńké bamu ba-cen n ne me ké kyikû* ké ebóng, nkyi kyi-nyîn n Bonchí enen o/fu, nyǐ o-kyâ běn Butu emen. 33Shee n̂g kángkáng byěm enen, ba-yip akpuga ba-yárê banet-byikpu. Kan n̂ ba-kyú ne boombam ḿbú badafé akpuga ḿbú boo*kâa*. Ba-yip esang enen ba-rôo ké mbú kyíbóng, ké kyikit ńkyí e/chi e-waa ne banyá. Ké ebóng, onet-kajii oo*ba/chi o-nung* ebá to ee*ba/chi e-ryí kányí*. 34Ké ebóng, kyikit ńkyí adarôo esang eyên, ányi nké dyityém eyên dyidakyú.

Bǎmgbán ḿbé badakyú ba-kûbám

35Kpá n̂g byiko ké nang ebóng chwǒm ńkyí nkyi kyi-bâ, ba-bwá byídí enen kíngkíng, ba-mee etyuryíkáng enen ba-tî. 36Ba-kyú wǎ bǎmgbán ḿbé mbe ba-bám m bonchí ebe mú mu o-fyi ng dyijî-dyibé, eringe nyí mbé bada ǎ ekuu dyifyi ochéé óchee nang nkéré orá nké o/fyi o-ba-kíbî kámbé dyifyi. 37Bunyîn-dyityém mbu kanong kanong ne bǎmgbán ḿbé bonchí ebe o/chi o-fyi o-kâm kámbé achi fúú. Me mu n-sét ng běn ké ntûntû n/fu, bonchí ebe ámu o/chi o-yángê byiko, o-sét bǎmgbán emen ámbe o/fu, bakyú me ba-ryí byiryíng. Ne bonchí ebe ámu o/chi o-bwom o-kye bǎmgbán emen ámbe byiryíng ba-ryí. 38Bunyîn-dyityém mbu ne bǎmgbán ámbe kanong kanong, â nang bonchí o/fyi ké kyirê-buchú nang ké abwô-dyicófóróng, o-kâm kámbé achi fúú. 39Nyît n̂g ńkyín ba/fu, â oyén-kyise o/mû o/nyît nkéré mú onet-kajii o/chi o-bâ, onyinchéng ámu o/mû o-kyú u achi fúú, eringe nyí oo*ba/chi o-bángê onet-kajii ámu o-nung ké kyise emen*. 40Ben to kâng, kpá n̂g byiko, ké ebóng, Wǎn-Onet o/chi o-bâ ké nkéré mú ben ba*fí ba-tî ng achi ba/fu, o/chi o-bâ*.

Ḿgbán mú Onong ne Kyibî-Ḿgbán

(Mátyuu 24:45-51)

41Pyíta o-raa o/fu, Otu Kyítá, amu a-tím m dyitím-ekan ńdyín ké dyishí eten nké nke aa, aa ké dyishí ńdyí kángkáng banet.

42Otu Kyítá o-faa o/fu, yeě kâng mú bada ǎ ekó ḿgbán mú onong, mú mu ne bubong. Ḿgbán ámu o-chi i onet mú bonchí odayip kyise emen o-fé ǎ ké abwô o/fu, otún kánkyí, o-kûkye barî-bǎmgbán ḿbé áku byiryíng ké ochíchí-nkéré mú badaryí byiryíng. 43Bunyîn-dyityém mbu ne ḿgbán ámu kanong kanong, â bonchí emen o/fyi o-ba-ri o/fu, ḿgbán emen ámu mu o-chi i ńkyí nyǐ o/sét ǎ. 44Me mu n-sét ng běn ké ntûntû n/fu, bonchí emen ámu o/chi o-yip kángkáng byěm emen o-tî ké abwô nyí ḿgbán emen ámu o/fu, okûtún. 45Nké â ḿgbán ámu o/raa ne byiko emen o/fu, kyi/chi kyi-rí ne bonchí ejí o-fyi. O-kám bábe-bǎmgbán ḿbé áku o-kpet emín. O-yip ng byiryíng o-ryí i, o-wuri ng bato o-jwáp ng, o-kpet ebwóm. 46Bonchí-ḿgbán ámu o/chi o-fyi kâng dyicí ńdyí ḿgbán emen ámu o*da/kabe* ne ké ochíchí-nkéré to mú nyǐ o*da/tî ekpu*. Onyinchéng ámu o/chi o-kye ḿgbán emen ámu busông ḿbú boo*nwa eri* o-yip ǎ o-tî ké busông ḿbú burwám-banet ḿbé ba*fí ba-fâ Osówo*.

47Ḿgbán mú mu o-nyît ng ńkyí bonchí emen o/fu, ochi, nké o*da/kpá byiko o-chi ńkyí bonchí emen ámu mu o-ryuu ng* o/chi o-ryí byimirî ḿbyí byiryên. 48Nké â ḿgbán mú o*fí o-nyît ng ńkyí bonchí emen mu o-ryuu ng* nké o/chi chwǒm ńkyí bada ǎ emín, bonchí emen oo*mín ǎ chwóó*. Onet mú Osówo o/kye ǎ byěm chwóó, Osówo o-ryuu ng byěm to chwóó ké abwô emen. Onet mú Osówo o/kye ǎ kyi-jê kyi-shwôm, Osówo o-ryuu ng to kyi-jê kyi-shwôm ńkyí nyǐ o/kye ǎ ké abwô emen.

Jisos o/bê Ejíí ekyii

(Mátyuu 10:34-36)

49Jisos o-raa o/fu, me m/bê n/fu, m-bâ ng efé okwâ ké ejíí. Kyi/mû kyi/chi kyi-nyîn mě! â ba/mû baa/wóngê kámú. 50Me mu ne osoo mú Osówo mú ndakoo. Dyityém ejí dii*shû mě kyísí* tete n-koo kámú. 51*Da n̂g echi ba-kabe ba/fu, me m/bê n/fu, m-bâ ng ekye ejíí bunyîn-dyityém*. Me mu n-sét ng běn n/fu, *chí bunyîn-dyityém* nké okyii. 52Kyi-fím kurún kyi-ca kashú, kyikû-banet ńkyí mbe ashí atánge kyi/chi kyi-kyii, ashí achât ba-nwa ng ne ashí afee, ashí afee ba-nwa ng ne ashí achât. 53Banchí-bwǎn ba/chi ba-kûnwa ne bwǎn ebe ḿbé banyinchéng. Bwǎn-banyinchéng ba-nwa ng ne banchí. Bané-bwǎn ba/chi ba-kûnwa ne bwǎn ebe ḿbé banyinyi. Bwǎn-banyinyi ba-nwa ng ne bané. Bané-bwǎn ḿbé mbe ne banyi ba/chi ba-kûnwa ne banyi ḿbé bwǎn ebe. Banyi-bwǎn ebe ba/chi ba-kûnwa ne bané-batyép ebe.

Kyikû enyît kyi-kim ne Nkéré

(Mátyuu 16:2-3)

54Jisos o-raa to ne banet ḿbé ba/mû ányi o/fu, â ben ba/ri bubóng ḿbú kyicê ńkyí óbyísû mu o-ríbî ng o-jâ bu-kú bu-jîi ng, ba-waa ng ké abe ányi ba-sét ba/fu, omu o-kú o-bâ ena, ne o-na ng to. 55Â ben ba/ri to bufú bu/fím ké kyicê ńkyí busyísen ne bu-kpet etugi, ba-sét ng ba/fu, nsísóngé o-kú o-bâ, kyi-chi éné to. 56Ben bannîm banet, ba-man n etún bubóng ne esí ba-sét eringe nyí kyikû kyi/byí, ebóng kâng ben baa*man enyît kyi-kim ne nkéré mú kántîk*.

Chi ba-kyú ké Bunyîn-Dyityém ne Onet-Bushwôn Eyên

(Mátyuu 5:25-26)

57Ebóng ben to baa*man epan mpan ké byiko enen ba-nyît chwǒm ńkyí kyinong* ńkyí ben badachi*. 58Â a/chi onet kyibî, nké o/kúng ǒ o-ca ne wo ké esuk, kyé kángkáng akwóp nyí adaman kyiraa ánkyi ké esim. Eringe nyí oo*ba/chi o-kúng ǒ o-byí ne wo ké bushú ḿbú mpan bampan* mú o/chi o-kúng ǒ o-kye bapuryíshi ḿbé ba/chi ba-fé ǒ ké mgbokobá*. 59Me mu n-sét ng běn n/fu, aa*ba/chi a-man ebyí ké mgbokobá ámu* tete a-kye nkuli kyikû-kóbo mú bada ǒ ekét.

Currently Selected:

Lûk 12: BKY

Highlight

Copy