Jǒn 20

Dyikun ńdyí ba/mû ba/ryii Jisos

(Mátyuu 28:1-8; Mâk 16:1-8; Lûk 24:1-12)

1Pirípirí ké dyicí-ékwâbashi, ányi byikit byi/tôong gbuma, Méryi mú o/fím Mágádála o-dim o-wâa ké dyikun. O-ri o/fu, baa/bâa buká ḿbú ba/mû ba/cít ké ocím-dyikun. 2O-zóngê o-kâm Sámon Pyíta ne ḿgbán-Jisos mú o/mû o-jang ng ejê Jisos, o-sét kámbé o/fu, baa/fîm Otu Kyítá ké dyikun. Nké byi*fí byi-nyît ng kyikit ńkyí ba/tî ǎ*.

3Pyíta ne ḿgbán-Jisos ámu ba-dim kâng ba-wâa ké dyikun. 4Mbé ashí afee ba/mû mbe ba-zóngê e ba-câ, nké ḿgbán-Jisos ámu o/zóngê o-ribi ké dyikun kpá o-sí Pyíta. 5O-siring kyísí, o-ri byídí-okpówo, nké o*da/nung ké kafâ-dyikun*. 6Sámon-Pyíta o-bâ ǎ ké kyikû, o-shwôm oshwǒm o-da-nung ké kafâ-dyikun. O-ri byídí ámbyi ányi kyísí 7ne kyídí ńkyí ba/mû ba/ním Jisos ké dyishí. Nkyí kyi/mû kyi*fí kyikit kyibónge ne byídí-okpówo* nké kyi/mû fútfút, cát. 8Ne ḿgbán-Jisos ámu mú o/mû o/bwóp kashú o-ribi ké dyikun o-nung to kâng ké kafâ-dyikun, o-ri, ne o-bángê ne dyityém emen. 9Mbé ba/mû ba/tôong ba*fí ba-nyît ng dyishí-ejá-Osówo nyí ba/sáng kyísí* nyí e/raa e/fu, nyǐ o-man o-jwóbê ké bukyû*. 10Ne bǎmgbán-Jisos ámbe ba-bwa kâng esim dyijê.

Jisos o/byí o-kâm Méryi mú o/fím Mágádála

(Mátyuu 28:9-10; Mâk 16:9-11)

11Nké Méryi o/bwom ké dyikun fáráng mu o-tii ng. Ńdyí o/tôong o-tii ng, o-siring kyísí o-jebe ké kafâ-dyikun, 12ne o-ri barím ḿbé banong ashí afee ányi me ké kyikit ńkyí kyikwóm-enyam-byiko-Jisos kyi/mû. Obónge ké kyikim ńkyí ba/mû ba/ren Jisos ba-tî dyishí, obónge ké byiká, ne byídí kpárádádát ké byiko ḿbyí ba/bwá. 13Ba-bí Méryi ba/fu, otu-onyinyi, ebóng kyi/chi ńkyí wo amu a-tii ng.

Nyǐ o-faa o/fu, baa/yip Otu Kyítá ejí ba-dim ne nyǐ. Nké me n*fí n-nyît ng kyikit ńkyí baa/da ǎ etî*.

14Ké nkéré mú nyǐ oo/raa ńkyín, nyǐ o/bírî o-ri Jisos ké mu ányi cip. Nké nyǐ o/mû o*da/cêe o/fu, ányi Jisos*. 15Jisos o-bí ǎ o/fu, otu-onyinyi, ebóng kyi/chi ńkyí wo amu a-tii ng. Wo amu a-kyé ng yeě.

Méryi o/mû mu o-kabe ng o/fu, nyǐ ntûn kyifát ńkyí kyi/mû ányi, ne o-raa kâng ne nyǐ o/fu, â wo nké a/yip ǎ, ǎ bonchí, sét mě kyikit ńkyí a/tî ǎ, ne me n/chi n-ca n-da-yip ǎ n-dim ne nyǐ.

16Jisos o-kó ǎ o/fu, Méryi.

Méryi o-bírî o-tún ǎ, ne o-kó ǎ ké ejá nyí banet-Jûs nyí badakó Hyíburu o/fu, Rabóna. Ńkyín ányi kyi/byí, ntánge byiraa-Osówo.

17Jisos o-sét Méryi o/fu, *da mě eníbî* ké ebóng, me n*da/bwa ne esim n-kâm Bonchí ejí*. Nké ca a-kâm bwǎn-bané ejí a-da-sét kámbé ké bubwô ejí a/fu, me n-kú m-bwa ng esim n-kâm ǎ nyǐ mú mu Bonchí ejí ne Bonchí enen, mú mu Osówo ejí ne Osówo enen.

18Méryi ámu kâng mú o/fím Mágádála o-dim o-da-sét bǎmgbán-Jisos o/fu, nyǐ oo/ri Otu Kyítá. Ne o-sét kámbé to ńkyí Otu Kyítá o/sét ǎ.

Jisos o/byí o-kâm Bǎmgbán Emen

(Mátyuu 28:16-20; Mâk 16:14-18; Lûk 24:36-49)

19Dyikurúku dyi/mû dii/fyi ké dyicí-ékwâbashi ándyi. Bǎmgbán-Jisos ba/mû ba/cibi kyikit kyibónge ba-fín afyi, ké ebóng, ba/mû mbe ba-shî ng batu-ashí ḿbé banet-Jûs. Jisos o-byí kâng o-ba-bwom ányi ne mbé. O-raa o/fu, bunyîn-dyityém bukyú ne ben. 20Ké nkéré mú oo/raa ńkyín, o-tông kámbé abwô emen ne ntô emen. Bǎmgbán emen ba-jêe kanong kanong ńdyí ba/ri Otu Kyítá. 21Ne o-chîraa ne mbé o/fu, bunyîn-dyityém bukyú ne ben. Eringe nyí Bonchí ejí o/twóm mě, éné to nké me mu n-twóm m běn. 22Nyǐ o/raa ńkyín, ne o-tuu kámbé kâng bufú ké byiko, o/fu, koo n̂g busa ḿbú Busun-Osówo. 23Nang yeě nké ben ba/pwoo ǎ byibî, Osówo to oo/pwoo ǎ kámbyí. Nang yeě to nké â ben ba*da ǎ epwoo* Osówo to oo*pwoo ǎ*.

Jisos ne Tómos mú Ḿgbán Emen

24Ḿgbán emen obónge mú o/mû ké burwám ḿbú ashí diǐkpú ne afee, mú odabángê Tómos, mú bada ǎ ekó Afúng o/mû o*fí ányi ne mbé ńdyí Jisos o/bê*. 25Bǎmgbán emen ḿbé áku kâng ba-sét ǎ ba/fu, be bii/ri Otu Kyítá.

Tómos o-sét kámbé o/fu, â me n*da/ri ne biintíngene-émúrúsún ké abwô emen* n-ta kafwa ejí ké mbyí* n-ta to bubwô ejí ké ntô emen* me mm*bángê*.

26Ké nkéré mú kyipyán kii/shwôm kyibónge, bǎmgbán-Jisos ba-chîcibi kyikit kyibónge ké kafâ-kyise. Tómos to o/mû ányi ne mbé. Afyi a/mû fínfín, nké Jisos o/byí o-ba-bwom ányi ne mbé. O-raa o/fu, bunyîn-dyityém bukyú ne ben. 27Ne o-sét kâng Tómos o/fu, ta kafwa eyên nyín, a-tún achi ké abwô ejí. Ne a-tan kâng bubwô eyên a-ta ntô ejí. Mîng ekán ké dyishí, a-bángê ne dyityém eyên.

28Tómos o-faa o/fu, Otu Kyítá ejí ne Osówo ejí.

29Jisos o-bí ǎ o/fu, wo aa/bángê ne dyityém eyên, ké ebóng, a/ri mě dí. Bunyîn-dyityém mbu ne banet ḿbé ba/bángê ne atyém ebe, ori ba*da mě eri*.

Chwǒm ńkyí kyi/chi ne ba-sáng Nwet mún

30Jisos o/chi biǐtí-akat byikíri chwóó ké bushú-bǎmgbán emen ḿbyí ba*da/sáng ké nwet mún*. 31Nké ḿbyín ba/sáng kámbyí eringe nyí ben badabángê ne atyém enen ba/fu, Jisos o-chi i Wǎn-Osówo, onet mú Osówo o/kúng ǎ butu. Ne ké obánge ámu ne nyǐ ne atyém enen, ben ba/chi ba-koo dyikpen ké bubwô emen.

Currently Selected:

Jǒn 20: BKY

Highlight

Copy