Habákuk 2
2
Ejá nyi Óburúkpâbí o/faa Habákuk
1Habákuk o/raa o/fu, ne n/chi n-yú kiǐnyáám-kyikit-mbâm ejí m-bám n-ri ńkyí Óburúkpâbí o/chi o-sét mě o/fu, me nsét, ne ejá nyí o/chi o-kye ké ńkyí me m/bí ǎ.
2Óburúkpâbí o/faa mě ejá ńnyín o/fu, sáng kanong kanong ké aká-nwet ńkyí mu m-bâ ǒ ebasét, eringe nyí onet odaman etún achi ké nkyí o-kó ochéé óchee. 3Sáng kánkyí kyísí, ké nǎ, nkéré o*da/fyi ne mú kyi/chi kyi-chi*. Nké nkéré mu o-bâ ochéé óchee ne ńkyí mu n-tông ng kyi/chi kyi-chi. Kyi-man n ǒ echi wǎ kyi/chi kyi-bwon ne kyi-bâ, nké bám kánkyí. Kyi-man kyi-chi ne kii*ba/chi kyi-bên nkéré*. 4Kyitwóm ánkyi nkyi něen. Banchi byibî [baa*kpen*] nké banet ḿbé mbe kanong ba/chi ba-kpen, ké nǎ, Osówo mu kámbé ké dyityém.
Busông ḿbú bu/chi bu-róng Banchi Byibî
5Akpuga a-nîm m onet. Banshwam byěm ba-tông ng byiko, baa*jwo chwǒm*. Wǎ bukyû buyén, mbé baa*tigi ba-zût*. Nkyí nké kyi/chi ne mbe ba-kpógê ng eshê ba-câ, ba-koo ng ba-kyâ byiko ebe. 6Banet ḿbé baa/kpógê kámbé ba/chi ba-dángê banet ámbe ḿbé ba/kpógê kámbé, ba-tông kámbé eringe nyí kafâ nke ka-sa ng kámbé ne mbé. Ba/chi ba/sét kámbé ba/fu, ben bamu ba-kúng ng ńkyí kyi*da běn ejá* nké ben ba/firi ké busông. Ben ba-já ng esang ba-câ kashú ka-rí nǎ, ké banet-afwá enen ḿbé bamu ba-tírîng ng kámbé ké busa ba/fu, baré běn afwá enen.
7Nké ne ben ba-kûnyît kánkyí, ben bayén, mú baa/kpógê banet, ba/chi ba-firi ké afwá, ne ba/chi ba-tírîng běn ké busa ba-ré kányí ba-twôom akpuga kyíbóng. Banet-bushwôn ba/chi ba-bâ ba-ba-chi běn ba-tím banê. Ba/chi ba-kpógê běn. 8Ben baa/kpógê [banet-eshê chwóó], nké kántîk, banet ḿbé ba*da/kpú* ba/chi ba-kpógê běn, ké bubwô-banet ḿbé baa/ju ne ké bubwô-anwa nyí baa/nwa ne banet.
9Ben ba/firi ké busông. Ben baa/chi byikû-banet enen byi-fang ké byěm ḿbyí bamu ba-koo ng ké busa, ne baa/bi byise enen eringe nyí kyibî-chwǒm kii*ta kámbyí*. 10Nké byěm enen ḿbyí bamu ba-kabe ng bii/bê běn ne éshwân ké byikû-banet enen. Ké obên mú ba/bên eshê chwóó, baa/bê ne bukyû ké byiko enen. 11Nang aká nyí ké ekpe-byise enen nyi a-tii ng běn bukyû ké byiko, ne efang-byise nké nyi e-kúng ng bukyû ámbu bu-byí i kyíjí.
12Ben ba/firi ké busông. Ben ba/kpet oshê ebi ké kyibî echi, ba-bi kámú o-man ké banet eju. 13Eshê nyí ben ba/kpógê kányí ba/ju byiko ebe dyikáá ké bǎmkpóngé, ké nǎ, kángkáng byise ḿbyí ba/bi byi/koo okwâ. Óburúkpâbí mú o/rêe o-shwôm nké o/chi ńkyín. 14Nké ejíí e/chi e-sú ne byinyídíng ḿbyí akpee nyí Óburúkpâbí wǎ eringe nyí omu o/sú ké baya.
15Ben ba/firi ké busông. Ké busa-dyityém enen, ben ba/bwa ne barî-banet enen kyísí, ba-wuri kámbé éshwân. Ben ba/chi kámbé ba-kûcíng wǎ mbe ba-bwóm m bato. 16Ben to ba/chi ba-cít běn éshwân ba-mîng ofê. Ben bayén ba/chi ba-jwáp ba-cíng. Óburúkpâbí o/chi o-chi běn ba-jwáp nkôp-afaníkong mú enen, ne o/chi o-bírî ofê enen o-firi éshwân. 17Ben baa/ju byizinge ḿbyí Lebánon. Kántîk, ba/chi ba-ju běn to. Ben ba/ju enyam nyí e/mû ké kyizinge ánkyi, kántîk, enyam e/chi e-kû běn efé bushî. Ńkyín kyi/chi kyi-chi ké bubwô-[banet] ḿbé ben baa/ju ne ké bubwô-anwa nyí ben ba/nwa ne banet.
18Orím-bukye o-chi i ebóng. O*fí chwǒm kyikíri* kyi-cibi ne chwǒm ńkyí onet o/chi ké abwô emen* ne oo*sét ǒ chwǒm kyikíri* kyi-cibi ne byisédéng*. O-chi i ebóng kanong ńké onet mú o/chi kámú odafé dyityém ne mǔ, bukye ḿbú nang kyiraa kyíraa boo*man eraa*. 19Ben ba/firi ké busông. Ben bamu ba-sét ng kyikim-kyichí ba/fu, bûu nensang, ba/fu, kyirim-buká, bûu a-bwom cip. Orím-bukye o-man n ejwo kyiraa ne Osówo o-sét běn dí. Nang ba-cít kámú syílyíba ne gûl, o*fí ne dyikpen*.
20Óburúkpâbí mu ké kafâ-kiǐtí-kyise-kyifen echi emen ńkyí kyi/já ǎ. Nang yeě mú mu ké ejíí ocíbî pyêp ké bushú emen.
Currently Selected:
Habákuk 2: BKY
Highlight
Share
Copy
Want to have your highlights saved across all your devices? Sign up or sign in
Published by the Bible Society of Nigeria @ 1985
