Jénésis 41

Josêf o/sét Kyikû-Burê ḿbú Otu o/ri

1Ńdyí kii/shwôm aje afee, otu mú Éjip o/ri burê ké o/bwom ké bukô-kace ńké badakó Nâl, 2o-ri bampong ḿbé baryên baryên káchâtkányi ké ba/byí ké kafâ-kace ba-kpet biǐbyâa eryí. 3Ne bampong bakíri káchâtkányi, ḿbé baa/sé ké byiko, ba/firi byikúú byíkuu, ba-byí to ba-ba-bwom ké bakô-bampong ḿbé kashú. 4Bampong ḿbé boǒsísé ámbe ba-ryí bampong ḿbé baryên baryên. Ne otu o-jwóbê ké burê. 5O-chîróng ké burê, ne o/chîri burê bukíri. O/ri ké biincicôk-esang-byichí káchâtkányi nyí ee/bwam ké dyisín-kyichí dyibónge. 6O-ri to biincicôk-esang-byichí nyí boǒníngéníngê nyí ee/jwóm afú, nyí kyikim-dyikán ké e/zím to ké dyisín-kyichí dyibónge. 7Ne boǒsáng-byichí ḿbú jwómjwóm bu-myii nyí eryên eryên. Otu o-jwóbê ne o-nyît o/fu, nyǐ o/mû o-ri ng burê. 8Ńdyí o/jwóbê nencófóróng, dyityém emen dyi*fí ǎ to kanong* ne o-twóm ba-kó kángkáng banchi bambirirím ne bannyît byinyídíng ḿbé ké Éjip. O-kúng barê emen ḿbé o/ri o-sét kámbé, nké onet nang obónge o*fí mú o/man ǎ esét eringe nyí ba/byí*.

9Ne ḿgbán-otu mú mu o-fâ bato ḿbé otu ámu o-sét otu o/fu, m-man n-sét gbúúl kurún n/fu, nn/chi kyibî. 10Kafâ ka/mû ka/sa ǒ ne onet-dyishí-banchi berêt ne me, ne a-kúng bě a-fé ké mgbokobá, ké kyise ńkyí onet-dyishí-basúja ḿbé kyibám-otu. 11Buchú bubónge, be ashí amúmú byi/ri burê, nang yeě nang yeě o/ri dyizong ńdyí emen cát. 12Wǎn-kyisat mú onet-Hyíburu, mú ósóng mú onet-dyishí-basúja ḿbé ké kyibám o/mû ne be. Byi/sét ǎ barê eten, ne o-sét bě eringe nyí ba/byí. 13Byěm byi/chi kerededet wǎ eringe nyí o/sét. Wo a/bwa ne me esim ké kyikit-bǎmkpóngé ejí, a-ju mú nchi berêt.

14Otu o-twóm o/fu, babâ ne Josêf, ne ba-da-fîm ǎ ochéé óchee ké mgbokobá. Ńdyí oo/kwárê kyiti o-yángê byídí, o/bê o-ba-bwom ké bushú ḿbú otu. 15Otu o-sét ǎ o/fu, me n/ri burê, nké onet o*fí mú mu o-man n mě esét kyikû emen*. Baa/sét mě ba/fu, wo a-man n esét eringe nyí barê ba/byí.

16Josêf o-faa o/fu, átá-otu, me mm*man esét* nké Osówo o/chi o-sét kyikû emen eringe nyí kyi/kwárê.

17Otu o-sét ǎ o/fu, me n/ri burê ké m/bwom ké bukô-kace ńké Nâl, 18ne n-ri bampong ḿbé baryên baryên káchâtkányi ké ba/byí ké kafâ-kace ba-kpet biǐbyâa eryí. 19Ne bampong bakíri káchâtkányi ḿbé ba/mû sésé, byikúú byíkuu ba-byí to. Bampong ámbe ba/mû ba/sîi ké byiko ba-shwôm kángkáng bampong ḿbé me nn/ri ké Éjip. 20Bampong ḿbé boǒsîisîi ámbe ba/ryí ḿbé baryên baryên. 21Nké onet oo*man enyît o/fu, ba/ryí nang chwǒm* ké nǎ, ba/waa eringe ebónge wǎ ba*da/ryí chwǒm*. Ne n-jwóbê. 22N/ri to burê ké n/ri biincicôk-esang-byichí káchâtkányi nyí ee/bwam ké e/zím ké dyisín-kyichí dyibónge. 23N-ri to biincicôk-boǒsáng-byichí káchâtkányi ḿbú boo/jwóm afú nyí kyikim-dyikán ké bu/byí to, 24ne boǒsáng ḿbú boǒjínjwóm ámbu bu-myii esang nyí eryên eryên. Nn/sét banchi bambirirím barê ḿbén, nké onet o*fí mú o/man mě esét kyikû*.

25Josêf o-sét otu o/fu, barê ámbe bafee ba/byí eringe ebónge. Osówo oo/sét ǒ ńkyí nyǐ mu o-bâ ebachi. 26Bampong ámbe ḿbé baryên baryên káchâtkányi ne esang-byichí nyí eryên byi/bwom ké aje káchâtkányi. Mbyí byi/byí eringe ebónge. 27Bampong ḿbé sésé káchâtkányi ḿbé ba/byí ké nkuli kyikû ba-ba-bwom ne boǒsáng-byichí ḿbú boo/jwóm afú byi/bwom ké aje to káchâtkányi nyí esong e/chi e-róng. 28Nkyi wǎ eringe nyí me n/sét ǒ, n/fu, Osówo oo/tông ǒ ńkyí nyǐ mu o-bâ ebachi. 29Aje a/chi a-kyú káchâtkányi nyí byiryíng byi/chi byi-jê ké kángkáng esí nyí Éjip. 30Â aje ńnyín a/shwôm, aje akíri káchâtkányi a/chi a-bâ nyí esong e/chi e-róng, ne banet ba/chi ba-ráp kángkáng aje nyí byiryíng byi/mû chwóó ké esong ányi nyí e/chi e-fé oshê omúmú ké busông. 31Ba/chi ba-ráp kángkáng kyi-kim ne nkéré mú byiryíng byi/mû chwóó, ké nǎ, esong nyí e/chi e-róng e/chi e-jê kanong kanong. 32Burê ḿbú a/ri éné kafee kyi/tông kyi/fu, Osówo nké oo/tî chwǒm ánkyi ne o/chi o-chi kánkyí kyi-chi ké nkéré mú mu o-bâ ké kashú.

33Fîm onet kántîk mú mu ne byinyídíng ne bubong o-kyú ǒ onet-dyishí-oshê. 34A-man a-fîm to banet-ashí bakíri ḿbé ba/chi ba-cen ba-koo dyizu-byiryíng dyibónge ké azu atánge, ḿbyí ba/chi ba-fuu ké aje ńnyín káchâtkányi nyí byiryíng byi/chi byi-jê. 35Kye kámbé busa ḿbú badakoo kángkáng byiryíng ḿbyín ké aje ńnyín káchâtkányi nyí byiryíng byi/chi byi-jê, a-kye to kámbé busa ḿbú badakúng esang-byichí ba-tî ké eshê ké eshê, ba-kûbám kányí. 36Byiryíng ámbyi byi/chi byi-chwáp oshê omúmú ké nkéré mú aje-esong ányi káchâtkányi nyí esong e/chi e-róng ké Éjip. Â a/chi éné, banet eyên baa*ba/chi ba-kpú esong*.

Ba/chi Josêf Onet-Dyishí mú Éjip

37Otu ne banet-ashí-bǎmkpóngé emen ba/bángê ké ńkyí Josêf o/sét, 38ne otu o-raa ne mbé o/fu, bii*man to eri onet okíri mú o/kwárê o-shwôm Josêf* onet mú Busun-Osówo mbu ǎ ké byiko. 39Ne otu ámu o-raa ne Josêf o/fu, Osówo oo/tông ǒ wo ḿbyín kángkáng, ké bubwô ámbu, be byimu byi-nyît ng ké ntûntû byi/fu, wo amu ne bubong a-shwôm nang yeě nang yeě mú mu nyín. 40Me n/chi n-chi ǒ onet-dyishí mú oshê ejí ne kángkáng banet ba/chi ba-chi ńkyí wo adasét kámbé. Me kǎnchí nké n/chi n-jê ne busa n-shwôm ǒ. 41Kántîk, me nn/chi ǒ onet-dyishí mú Éjip emúmú. 42Otu ámu o-zú ókpâl mú ba/fé ekap-butu emen ké mǔ ké kafwa emen o-fé Josêf ké kafwa. O-fé ǎ byídí ḿbyí byinong byinong ké byiko ne kaǎré-kyitông-gûl ké kyitông. 43O-kye ǎ nnyinyěng-mútu-otu mú bubyî-orá budatut, o/fu, okûyú. O-kye banet-mbâm ḿbé bada ǎ ekûce kashú ba-raa ng ba-câ ba/fu, kye n̂g mpât, kye n̂g mpât. Ne otu ámu kâng o-chi Josêf onet-dyishí mú Éjip emúmú, 44o-sét ǎ o/fu, me nké mu otu. Onet o*fí ké Éjip emúmú* mú o/chi o-yip bubwô nang kyiká emen kyibónge* â wo a*da/kye busa*. 45-46O-fé Josêf dyizîn ńdyí Éjip, ńdyí badakó Záfénat-Panyá, ne o-kye ǎ onyi mú odabángê Asénat, mú wǎn-Potyiféra, mú o/mû nchi kyifen ké oshê mú Helópólis.

Josêf o/mû oo/rí aje bujam esim diǐkpú ké nkéré mú o/kpet ekyú ḿgbán mú otu mú Éjip. Josêf o/mîng kyibám ńkyí otu o-cen ké esí nyí Éjip emúmú. 47Ké aje káchâtkányi nyí byiryíng byi/mû, byifát byi/bát byiryíng chwóó, 48ḿbyí Josêf o/kúng kámbyí kángkáng o-tî ké oshê ké oshê. O/kúng byiryíng ḿbyí oshê nang orá o-tî ké oshê ámu. 49Byiryíng byi/mû byi/jê chwóó ḿbyí Josêf o/mîng kámbyí ekan. Byi/mû wǎ éshíshě nyí edakyú ké bukô-baya.

50Ne aje nyí esong a-kûfyi, Josêf o/fwon bwǎn-banyinchéng bafee ne Asénat, 51ne o-raa o/fu, Osówo oo/chi mě n-ráp kángkáng afaníkong ejí ne kángkáng kyikû-banet ńkyí bonchí ejí. Ne o-fé wǎn emen mú mbwôp kashú dyizîn, Manáse. 52O-chîraa to o/fu, Osówo oo/kye mě bwǎn ké esí nyí afaníkong ejí. Ne o-fé nnyinyěng-wǎn emen dyizîn, Éferem.

53Aje káchâtkányi nyí esí nyí Éjip e/mû ne byiryíng chwóó a/baman, 54ne aje káchâtkányi nyí esong a-kpet, wǎ eringe nyí Josêf o/mû o/sét. Esong e/róng ké eshê nyí áku kángkáng, nké Éjip emúmú e/mû ne byiryíng. 55Â esong e-kú e-nwa ng banet ḿbé Éjip, ba-tii ba-kó otu ba/fu, okye kámbé byiryíng. Otu o-sét kámbé o/fu, baca ba-kâm Josêf ba-da-chi ńkyí odasét kámbé. 56Esong e-yógê e-káng oshê omúmú, ne Josêf o-bâa kâng byikit ḿbyí ba/tî byiryíng o-kúng kámbyí o-shee banet-Éjip. 57Banet ba/fím ké ejíí emúmú ba-bâ ké Éjip byiryíng ebaré ne Josêf, ké nǎ, esong e/mû nyi e-nwa ng kángkáng byikit kanong kanong.

Currently Selected:

Jénésis 41: BKY

Highlight

Copy