Jénésis 38

Júda ne Táma

1Fáráng ne nkéré ámu, Júda o/dim o-mîng bwǎn-bané emen o-da-kpet ekyú ne onyinchéng obónge mú odabángê Hyíra, mú o/mû o/fím Adúlam. 2Ké oshê ámu nké Júda o/ri wǎn-onyinyi mú o/fím Kínan, mú bonchí emen o/mû o-bángê e Shwâ. O-bé ǎ, 3ne o-fwon ǎ wǎn-onyinchéng mú Júda o/fé ǎ dyizîn, Êe. 4O-chîkoo dyifít, o-fwon wǎn-onyinchéng okíri mú o/fé ǎ dyizîn, Ónan. 5Ne o-chîfwon wǎn-onyinchéng okíri mú o/fé ǎ dyizîn, Shíla. Júda o/mû ké Ákyizip ńdyí ba/fwon wǎn mún.

6Júda o/bé onyi mú odabángê Táma o-kye Êe mú mbwôp kashú-wǎn emen. 7Dyityém ńdyí Êe dyi/mû dii*nwa*. Kyi/mû kyi*fí kyi-nyîn n Óburúkpâbí ne nyǐ* ne o-ju ǎ. 8Ne Júda o-raa ne Ónan mú wǎn-boné-Êe o/fu, darí ne onyǐnkú mú wǎn-boné eyên. Fîm ǎ ké bunyǐnkú wǎ onyi mú wǎn-boné eyên, eringe nyí ba/chi ba-fwon bwǎn ba-kye wǎn-boné eyên. 9Nké Ónan o/mû mu o-nyît ng o/fu, â nyǐ o/fwon bwǎn ámbe, baa*ba/chi ba-kyú ḿbé emen*. Ké bubwô ámbu, nang nkéré orá nké o/rí ne Táma, o-zú burê o-pwó kyísí, eringe nyí oo*ba/chi o-fwon bwǎn o-kye wǎn-boné emen*. 10Ńkyí Ónan o/chi éné kyi*da/nyîn Óburúkpâbí* ne o-ju ǎ to. 11Ne Júda kâng o-sét Táma mú o/mû o-bé ng wǎn emen o/fu, bwa esim a-kâm ńchân, a-da-kyú áku ne nyǐ tete Shíla mú wǎn ejí o-kán. Júda o/raa ńkyín, ké nǎ, o/mû mu o-shî ng o/fu, Óburúkpâbí o/chi o-ju to Shíla wǎ eringe nyí o/ju bwǎn-bané emen. Ne Táma o-bwa dyijê ké kyikit-bonchí.

12Ńdyí ka/chîrí, onyi-Júda o-kpú. Ńdyí oo/mîng dyikán eta, nyǐ ne Hyíra mú ocín emen mú o/fím Adúlam ba/dim Tyímina, ké kyikit ńkyí ba/mû ba-pwát ng ebû emen eríp. 13Onet obónge o-sét Táma o/fu, bonchí-otyép eyên mu o-wâa ng Tyímina ebû emen eríp epwát. 14Ne Táma kâng o-yángê byídí-bunyǐnkú ḿbyí o/mû o-fâ, o-cít bushú emen ne kaǎsém o-da-kyú ké dyishí-bukwóp-oshê mú Ényam, oshê mú o/mû ké bukwóp ḿbú budajé Tyímina. Táma o/mû mu o-nyît ng o/fu, Shíla o/mû oo/kán, nké Júda o*fí o-sét ng ǎ o/fu, obé ǎ*.

15Ńdyí Júda o/ri ǎ, o/kabe o/fu, o-chi i onyinyi-akpara, ké nǎ, o/cít bushú emen. 16Júda o-dim o-kâm ǎ ké bukô-bukwóp, o-bí ǎ o/fu, wo amu a-koo ng nǎ ne onet o-rí ne wo. Júda o*da/nyît o/fu, o-chi i onyi mú wǎn emen*.

Táma o-bí ǎ o/fu, wo a-kyâ mě nǎ.

17Nyǐ o-faa ǎ o/fu, n/chi n-twóm ǒ kyisu-ebû ejí kyibónge.

Táma o-sét ǎ o/fu, m-bángê e, â a/sí mě butông ké chwǒm tete a-twóm ebû e-bâ.

18Nyǐ o-bí ǎ o/fu, n-sí ng ǒ butông ké ebóng.

Táma o-faa o/fu, kye mě ókpâl eyên ne ochí eyên mú a/níbî. Ne o-kúng byěm ámbyi o-kye ǎ, o-rí ne nyǐ, o-waa ányi o-koo dyifít. 19Táma o-bwa esim dyijê, o-da-pii kaǎsém ké bushú, o-yip byídí-bunyǐnkú emen o-fé.

20Júda o-twóm Hyíra mú ocín emen ne ebû o/fu, oda-kye mú onyinyi ámu, o-koo byěm ḿbyí o/mû o/sí ǎ butông, nké Hyíra o*da/chîri mú onyinyi*. 21O-bí banet bakíri ḿbé ba/mû ké Ényam o/fu, mú onyinyi-akpara mú o/mû nyín ké bukô-bukwóp mu nyá.

Mbé ba-faa ǎ ba/fu, be byi*da/ri ne onyinyi-akpara nyín*.

22O-bwa esim o-kâm Júda o-ba-sét ǎ o/fu, n*da/ri mú onyinyi*. Banet-oshê ámu ba/fu, mbé ba*da/ri ne onyinyi-akpara ányi*.

23Júda o-sét ǎ o/fu, mîng ǎ o-tî byěm ámbyi. Byi*fí byi-ryuu ng byi/fu, banet bakû bě ejwó*. Me m/mû m/bángê n/fu, n-kyâ ǎ ńkyí n/ryí ǎ, nké a*da ǎ eri*.

24Ńdyí kii/rí chwǒm wǎ etukáku echât, onet obónge o/sét Júda o/fu, onyi-wǎn eyên o-kú o-cen n wǎ onyi-akpara, ne oo/koo dyifít.

Júda o-kye busa o/fu, bafîm ǎ o-byí kyíjí, ba-fwá ǎ ké okwâ o-kpú.

25Ńdyí baa/kúng ǎ ba-kú ba-dim m ne nyǐ, Táma o/twóm ejá e-kâm bonchí-otyép emen o/fu, onet mú mu ne byěm ḿbyín nké o/fé mě dyifít. Tún kámbyí a-ri onet mú mu ne mbyí, ókpâl mún ne ochí mún.

26Júda o-cêe kámbyí, o-raa o/fu, mú onyinyi o*da/chi kyibî*. Me nké nn/róng ǎ ké ńkyí m/mû n/chi n-chi ǎ. Me m/mû n/chi n-kye ǎ Shíla mú wǎn ejí o-bé ǎ. Júda o*da/chîrí ne nyǐ*.

27Ńdyí nkéré emen o/fyi mú odafwon, ba/nyît ba/fu, o/chi o-fwon afúng. 28Ńdyí bufwon mbu bu-nwa ng ǎ, wǎn obónge o/tông bubwô kyíjí. Mú onyinyi mú o/mû o-kám m ǎ bufwon o-kám bubwô ámbu, o-ziri kaacat ńké shíshét ké mbú, o-raa o/fu, mún nké ba/fwon ǎ kpá. 29Nké o/bwa ne bubwô esim, ba-bwa ba-fwon wǎn-boné kpá. Mú onyinyi mú mu o-kám m Táma bufwon o-raa o/fu, něen nké wo a/cen ne a-byí? Ne ba-fé ǎ dyizîn, Pérez. 30Ne ba-fwon to wǎn-boné emen ne bucat ámbu shíshét ké bubwô, ne ba-fé ǎ dyizîn, Zéra.

Currently Selected:

Jénésis 38: BKY

Highlight

Copy