SEKARIA 9
9
Ukum Kuan Pupu Baken Luk Libut Yerusalim
1 #
Yes 17.1–3; Yer 49.23–27; Am 1.3–5 Ini bala Tuhan:
Ieh pangeh nemutut ukum kuan tana' Hadrak idi bawang Damsik. Baken amung pupu Israil mo', iamo' bawang rayeh déi' Siria pana' Tuhan kuan. 2Hamat luk iring Hadrak, Tuhan kuan. Kudeng ineh teh bawang Sur idi Sidon, dengan maung ilehdeh. 3Sur pangeh nemudut libung luk meraben libut bawangneh, idi pangeh nengamung pirak idi amas mepad kinula' bada! 4#Yes 23.1–18; Yeh 26.1—28.26; Yo 3.4–8; Am 1.9–10; Mat 11.21–22; Luk 10.13–14 Iamo' Tuhan miak ngalap amung-amung binawehneh. Ieh miak nala' binawehneh ineh bang abpa' rayeh, idi bawang ineh pana' miak sabpen pad na luk ketecan su ineh.
5 #
Yes 14.29–31; Yer 47.1–7; Yeh 25.15–17; Yo 3.4–8; Am 1.6–8; Sep 2.4–7 Idi bawang Askelon miak nier amung ineh, pad ieh matot. Bawang Gasa pana' miak kali' dereh. Kudeng ineh teh Ekron—luk inanneh merapet na miak mangun. Raca' Gasa miak pitayen, idi bawang Askelon miak tacin. 6Puar-puar pupu miak tudo déi' Asdod. Idi kebala Tuhan, “Ui miak ngebeneh amung lun Pilistin luk medita' niat ini. 7Ideh na miak kuman uang dengan dara', idi akan baken luk bibpeng. Amung-amung lemulun luk ketecan miak mangun ku aceh babpat pupuKu, mepad kudeng aceh inul ratnan pupu Yahuda. Ekron pana' miak mangun ku aceh babpat pupuKu, mepad kudeng lun Yebusi. 8Ui miak matar tana'Ku idi mebpeng baweh pad ideh na miak lemaba ineh. Ui miak mebpeng amung raca' luk rayeh, pad ideh na miak ngedereh pupuKu sekua' teh. Ui pangeh nekali' dereh pupuKu ineh.”
Raca' Luk Miak Macing Muci
9 #
Mat 21.5; Yah 12.15 O lun Sion, do' muyuh mawang niat!
O lun Yerusalim, do' ngitang mawang niat!
Siruh, raca' muyuh amé' nemuyuh!
Ieh luk meluun tueh,
iamo' mebeneh niat,
idi nalan maya' anak keladai.
10 #
Nani 72.8
Kebala Tuhan,
“Ui miak ngusag keréta bunu' lun Israil
idi ngusu amung kuda rat Yerusalim;
idi busu luk pikai bang bunu' miak uen mutul.
Raca' muyuh miak nguit amung pupu pedo'.
Ieh miak ngimet rat abpa' rayeh selipa macing selipa,
idi rat abpa' Pirat macing iring tana'.”
Pupu Allah Uen Nuneb
11Kebala Tuhan,
“Ngaceku jani'Ku namu,
luk itu ku dara' baré,
Ui miak muit pupumu luk tiban ineh
rat bang lubang luk na abpa'.
12Lemubed, O muyuh lun luk tiban luk inan rapet;
amé inan bawang muyuh luk na susa'.
Ui mada' nemuyuh nekini, Ui miak ngua' kuan muyuh dueh kua'.
Peruan miak ngelibal dereh muyuh.
13Ui miak makai Yahuda mepad kudeng binor lun pebunu',
idi Israil mepad kudeng ilebneh.
Ui miak makai nelun Sion mepad kudeng pelapet,
pad ideh munu' nelun Grika.”
14Tuhan miak silagan pa luun pupuNeh;
Ieh mak ngelatik ilebNeh, mepad kudeng kilep.
Tuhan Allah miak ngiup serupit;
Ieh miak nalan maya' barui rat pa kabing busat aco.
15Tuhan luk Melalud miak matar pupuNeh,
pad ideh miak ngaté bunu'deh.
Bang bunu' ideh miak ngitang mepad kudeng lun mabuk;
ideh miak ngeruat dara' bunu'deh,
pad dara' ineh manud mepad kudeng dara' baré,
luk inutang luun bubpun rat bang bigan.
16Idi kareb aco sineh Tuhan miak ngulun pupuNeh,
mepad kudeng lun luk matar dumba
muit sengeriudan dumbaneh ratnan bunu'.
Ideh merasat bang bawangNeh
mepad kudeng batu luk mesilo luun pata.
17Pelaba do' bawang ineh!
Anak adi' miak temubu' ngaceku padé idi abpa' anggurneh.
Currently Selected:
SEKARIA 9: BLD
Highlight
Share
Copy
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
