LUKAS 9

Yésus Ngecuk Pulu' Dueh Anak Sekola'Neh Nalan

(Mat 10.5–15; Mrk 6.7–13)

1Yésus nenawar pulu' dueh anak sekola'Neh, idi nemaré tueh idi lalud kuandeh, pad ideh miak ngusu ada' idi ngedo' amung-amung luk mét. 2Idi Ieh nengecuk nedeh mada' Imet Allah idi ngedo' lemulun luk mét. 3#Luk 10.4–11 KebalaNeh nedeh, “Aleg muyuh nguit anun-anun kareb muyuh nalan; rukud pana' na, luk inan balu' pana' na, ruti pana' na, usin pana' na, kuyu' luk dueh pana' na. 4Idi ruma' iapeh luk inan muyuh semuet, do' tudo déi', idi rat déi' muyuh remuat teh. 5#Kek 13.51 Idi iapeh-iapeh lemulun na sikal nganak nemuyuh, do' muyuh nalan rat bang bawang ineh, idi ngegkar abuh ratnan kukud muyuh, mangun ku aceh bada' kuandeh.”

6Idi anak-anak sekola' ineh nenalan idi iné' bang anid-anid bawang idi nemada' Bala luk Do' idi nengedo' lemulun iapeh-iapeh pana'.

Tot Herodés

(Mat 14.1–12; Mrk 6.14–29)

7 # Mat 16.14; Mrk 8.28; Luk 9.19 Herodés, raca' sebabpat apat bawang ineh, neninger ratnan amung-amung luk pangeh nangun; idi ieh merapang ngaceku inan sebuang lemulun pebala, “Yahya pangeh netumui rat arang lun naté!” 8Idi lun baken nepebala, “Elia pangeh nesigala',” idi inan teh luk nepebala, “Seburur rat arang nabi luk mon pangeh netumui.” 9Idi kebala Herodés, “Ui pangeh nengaleb uluh Yahya; iamo' idéké lemulun ini, luk beléndeh nganau' kekamen ini?” Idi ieh nenakap dalan sikal nier Yésus.

Yésus Maré Akan Kuan Limeh Ngeribu Lemulun

(Mat 14.13–21; Mrk 6.30–44; Yah 6.1–14)

10Rasul-rasul Yésus nelemubed, idi nemada' Neneh ratnan amung-amung luk pangeh inau'deh. Idi Ieh nenguit nedeh nala amé' bang aceh bawang luk ngadanneh Baitsaida. 11Kareb lun mula' nekali' ratnan ineh, idi amung-amungdeh nemaya' Neneh. Yésus nenawar nedeh, idi nepegayam nedeh ratnan Imet Allah, idi Ieh nengedo' lemulun luk sikal uen ngedo'.

12Kareb aco macep, idi pulu' dueh anak sekola'Neh ineh iné' Neneh idi nepebala, “Ngecuk lun mula' ini muli' amé' déi' lati' idi ruma' luk muneng pad ideh miak tudo déi' idi nakap akan kuandeh sebuleng, ngaceku su luk inan tau ini mali tu.”

13Iamo' keburi' Yésus nedeh, “Do' muyuh maré nedeh kuman.”

Idi keburi' anak-anak sekola' ineh, “Na luk idi ruti nekai luk meluun ratnan limeh balad, idi dueh lawid mo'. PianMu kai amé' melih luk kenen kuan amungdeh iniké?” 14Ngaceku kinula'deh lélé limeh ngeribu amung lun deléi ineh.

Idi kebala Yésus kuan anak-anak sekola'Neh, “Ngecuk nedeh tudo setau'-setau' lélé limeh ngepulu' burur setebubpun.”

15Anak-anak sekola'Neh nenganau' kudeng ineh, idi nengecuk nedeh tudo. 16Yésus nengalap ruti luk limeh balad, idi lawid luk dueh ineh, idi Ieh netengook déi' langit nesembayang. Pangeh ineh Ieh nemuri' ruti idi lawid ineh, idi nemaré kuan anak-anak sekola'Neh. Idi ideh nenganid ineh kuan lun mula'. 17Idi amung-amungdeh nekuman macing mebor. Idi ideh nengamung tecehneh, pad macing panu' pulu' dueh ngebuan.

Amo Pétrus Ratnan Yésus

(Mat 16.13–19; Mrk 8.27–29)

18Kareb Yésus nesetau', idi nesembayang, idi anak-anak sekola'Neh iné' Neneh. Idi Ieh nengitun nedeh, keburi'Neh, “Idéké Ui ini, maya' terawé lun mula'?”

19 # Mat 14.1–2; Mrk 6.14–15; Luk 9.7–8 Idi kebaladeh Neneh, “Yahya luk Ngerereb.” Iamo' inan luk pebala, “Elia.” Idi inan teh luk pebala, “Seburur rat arang nabi luk mon pangeh netumui.”

20 # Yah 6.68–69 Idi keburi'Neh nedeh, “Iamo' maya' terawé muyuh ini, idéké Ui?”

Idi kebala Pétrus Neneh, “Keristus luk ratnan Allah.”

Yésus Mada' Ratnan Dereh Idi AtéNeh

(Mat 16.20–28; Mrk 8.30—9.1)

21Idi Yésus nemebpeng na mala kuan seburur lemulun pana', 22keburi'Neh, “Anak-Lemulun na miak na mabeh mula' dereh, idi talan lun rayeh-rayeh, imam-imam rayeh, idi guru-guru Ukum, pad Ieh pitayen. Idi aco luk keteluh Ieh miak tuyen teh.”

23 # Mat 10.38; Luk 14.27 Idi kebalaNeh nelun mula', “Idé-idé luk sikal maya' Negku, do' ieh ngalum bururneh idi maan salibneh anid-anid aco, idi maya' Negku. 24#Mat 10.39; Luk 17.33; Yah 12.25 Lemulun luk ngerawé ulunneh sebuleng na ngalap ulun luk matu; iamo' lemulun luk na ngerawé ulunneh sebuleng ngaceku Ui, ieh miak ngalap ulun luk matu. 25Anunké ulekneh kuan seburur lemulun kudeng ieh ngalap amung tana' ini, iamo' ulunneh sebuleng metutu' kian talan lek? 26Ngaceku idé-idé luk migu' ngamo Negku idi balaKu, idi Anak-Lemulun ineh pana' migu' ngamo neneh, kareb Ieh macing dengan rayehNeh sebuleng idi dengan rayeh TamanNeh, idi dengan rayeh melaikat-melaikatNeh luk meligan. 27Ngerawé do'-do', inan sebuang rat arangdeh luk tuped ieni luk na miak kali' maté kareb nateh ideh nier Imet Allah.”

Yésus Rinayeh Luun Pegkung

(Mat 17.1–8; Mrk 9.2–8)

28 # 2 Pét 1.17–18 Idi lélé ualuh aco muci ratnan bala ineh, idi Yésus nenguit Pétrus, Yahya, idi Yakub amé' luun aceh pegkung sikal sembayang. 29Idi uned Ieh sembayang, idi ayu kiungNeh nisu', idi ayungNeh pana' mangun mebuda' idi merasat. 30Idi inan dueh burur lemulun luk pebala denganNeh, ieh ineh Musa idi Elia, 31luk siner dengan rasat. Idi didueh nepegayam ratnan até Yésus, luk ngacing pian Allah déi' Yerusalim. 32Idi Pétrus idi lun denganneh uned rudap, iamo' kareb diteluh nekulat idi diteluh nenier rayeh Yésus idi dueh burur lemulun luk tuped iringNeh ineh. 33Kareb dueh burur lemulun ineh sikal patad rat Neneh, keburi' Pétrus kuan Yésus, “O Guru, do' tau tudo ieni; nima' nekai mudut teluh lepo, sebuleng kuanMu, sebuleng kuan Musa, idi sebuleng kuan Elia.” Iamo' na ieh kali' anun luk pangeh bilaneh ineh.

34Uned ieh pebala kudeng ineh, aceh laput nacing ngelungung nedeh; idi ideh matot kareb ideh bang laput ineh. 35#Yes 42.1; Mat 3.17; 12.18; Mrk 1.11; Luk 3.22 Inan aceh, tang rat bang laput ineh luk nepebala, “Ini AnakKu luk pinili'. Do' muyuh ninger Neneh.”

36Kareb tang ineh pangeh nepebala, idi Yésus mo' luk sinierdeh sebuleng. Idi anak-anak sekola' pana' pirud, idi na nemala kuan seburur lemulun pana' ratnan anun-anun luk sinierdeh.

Yésus Ngedo' Seburur Anak Luk Sinuet Ada'

(Mat 17.14–18; Mrk 9.14–27)

37Kenebpa ideh netemurun rat luun pegkung ineh, idi mula' lemulun nacing papu' Yésus. 38Rat arang lun mula' ineh inan seburur lemulun nengitang, keburi'neh, “O Guru, ui mutuh Namu amé' nier anakku luk deléi; ngaceku ieh luk anak bulengku. 39Idi inan sebuleng ada' luk semuet bang bururneh, idi denak-denak ieh ngitang, idi ada' ineh ngeluka' neneh pad tangneh melapa', idi teh ieh ngurat bururneh. Idi ada' ineh na pian buro rat neneh. 40Idi ui nemutuh anak-anak sekola'Mu nala' ada' ineh, iamo' na ideh miak nala' neneh.”

41Idi kebala Yésus, “O inul luk na manu idi luk neraruh ini. Tuda' ioké Ui tudo dengan muyuh idi mekadang niat nemuyuh? Do' nguit anakmu ineh amé' tungé'.”

42Laba' anak adi' ineh nalan-nalan, idi ada' ineh nengeluka' neneh luun tana' idi nengurat neneh. Iamo' Yésus nemebpeng ada' ineh, idi nengedo' anak ineh, idi nemaré neneh lemubed kuan tamanneh. 43Idi amungdeh ineh mawa ratnan lalud Allah ineh.

Yésus Mada' Sekua' Teh Ratnan AtéNeh

(Mat 17.22–23; Mrk 9.30–32)

Uned ideh mawa ratnan amung luk inau' Yésus ineh, idi Ieh nepebala kuan anak-anak sekola'neh, 44“Aleg kelupan luk belénKu nemuyuh, ngaceku Anak-Lemulun miak barén bang palad lemulun.” 45Iamo' ideh na kali' ilung bala ineh. Ilungneh inalum rat nedeh, pad ideh na kali'. Idi ideh matot ngitun Neneh ratnan ineh.

Idéké Luk Meluun Rayeh

(Mat 18.1–5; Mrk 9.33–37)

46 # Luk 22.24 Idi arang anak-anak sekola' ineh mangun aceh kedaluh ratnan idé' luk meluun rayeh. 47Yésus nekali' ratnan terawé niatdeh ineh, idi Ieh nengalap aceh anak luk isuut, idi nenaped neneh iringNeh, 48#Mat 10.40; Luk 10.16; Yah 13.20 kebalaNeh nedeh, “Idé-idé luk nganak anak luk isuut ini bang ngadanKu, ieh ineh nganak Negku; idi idé-idé luk nganak Negku, ieh ineh nganak Neneh luk nengecuk Negku. Ngaceku luk pelaba isuut rat arang amung-amung muyuh, ieh ineh luk meluun rayeh.”

Lemulun Luk Na Sikal Metueh Rat Nemuyuh Ieh Ineh Lun Dengan Muyuh

(Mrk 9.38–40)

49Idi Yahya nepebala, “O Guru, kai pangeh nenier seburur lemulun luk nala' ada' bang ngadanMu; idi kai nemebpeng neneh ngaceku na ieh maya' nekai.”

50Iamo' keburi' Yésus ni Yahya, idi kuan anak sekola'Neh luk baken, “Aleg mebpeng neneh, ngaceku lemulun luk na sikal metueh rat nemuyuh, ieh ineh lun dengan muyuh.”

Aceh Bawang Lun Samaria Ara' Nganak Yésus

51Kareb Yésus malé uen ngikit amé' surga, idi Ieh nenalan petacu iné' Yerusalim. 52Ieh nengecuk tuda'-tuda' lun duken amé' pa atunNeh. Idi ideh nenalan, idi nesemuet bang aceh bawang lun Samaria sikal nganau' temina' luk inan kuanNeh. 53Iamo' na ideh pian nganak Neneh, ngaceku megala' Ieh amé' Yerusalim. 54#2 Rac 1.9–16 Kareb anak sekola'Neh Yakub idi Yahya nekali' ratnan ineh, idi kebala didueh, “O Tuhan, pianké Iko kai ngecuk apui temurun rat bang langit pad ngeseb nedeh?”

55Iamo' Yésus nelumi idi nemebpeng nedidueh, 56idi ideh nenalan iné' inan aceh bawang luk baken.

Teluh Burur Lemulun Luk Sikal Maya' Yésus

(Mat 8.19–22)

57Uned ideh nalan, idi seburur lemulun nepebala Neneh, “Ui sikal maya' Namu pad iapeh luk suetMu.”

58Idi keburi' Yésus neneh, “Bungalé inan lubangdeh, idi suit-suit déi' arang gawa' inan arardeh, iamo' Anak-Lemulun na luk idi luk inan Neh ngerareng uluhNeh.” 59Idi kebala Yésus kuan seburur luk baken, “Do' maya' Negku.”

Iamo' keburi' lemulun ineh, “O Tuhan, nima' negku amé' nanem tamanku atun.” 60Iamo' keburi' Yésus neneh, Nima' lun naté nanem lun dengandeh luk naté; iamo' iko ini amé' mada' Imet Allah.”

61 # 1 Rac 19.20 Idi keburi' selemulun luk baken teh, “Ui sikal maya' Tuhan; iamo' nima' negku muli' amé' mala, “Do' tudo', kuan lun uang ruma'ku.”

62Idi keburi' Yésus neneh, “Lemulun luk ngimet etun radu idi lumi pa puet na mayu semuet bang Imet Allah.”

Currently Selected:

LUKAS 9: BLD

Highlight

Copy