LUKAS 17
17
Ratnan Sala'
(Mat 18.6–7, 21–22; Mrk 9.42)
1Yésus nepebala kuan anak-anak sekola'Neh, “Na miak na inan sabeng luk ngebpeh lemulun, iamo' mesusa' kuan lemulun luk ngacing sabeng ineh! 2Meluun do' kuanneh, kudeng aceh batu rayeh betin i dierneh, idi ieh talan bang abpa' rayeh, ratnan ieh ngesabeng seburur rat arang anak luk isuut ini. 3#Mat 18.15 Matar burur muyuh!
“Kudeng kinanakmu mesala', mebpeng neneh; kudeng ieh nginuud, maré do' kuanneh. 4Kudeng ieh nganau' sala' namu tudu' kua' bang seaco, idi tudu' kua' teh ieh lemubed amé' namu idi pebala, ‘Ui nginuud,’ do' iko maré do' neneh!”
Ratnan Anu
5Idi kebala rasul-rasul ineh kuan Yésus, “Do' ngerayeh anu kai!” 6Idi kebala Yésus, “Kudeng muyuh inan anu luk kirayeh aceh ngilung sesawi' pana', idi miak muyuh pebala kuan lawa gita' ini, ‘Mebubput iko idi uen nibu bang abpa' rayeh!’ Idi ieh pana' maya' balamu teh.’
Kekamen Demulun
7“Kudeng arang muyuh inan seburur demulun luk ngeradu, kian matar dumba lek, miakké iko pebala neneh kareb ieh muli' rat lati', ‘Miket amé' kuman'? 8Na tu! Iamo' iko pebala neneh, ‘Do' nganau' temina' luk kenenku, ngabet awa'mu idi ngasa' negku, pad ui kuman idi ngirup; idi pangeh ineh iko miak kuman idi ngirup'? 9Miakké demulun ineh buren ngaceku ieh maya' bala tuanneh? 10Kudeng ineh teh muyuh, kareb muyuh pangeh nenganau' amung-amung luk pangeh icuk kuan muyuh, do' muyuh pebala, ‘Kai ini demulun luk na ulek; kai pangeh nenganau' luk petulu ruen kai.’ ”
Yésus Ngedo' Pulu' Burur Lun Luk Mét Susud
11Kareb Yésus nenalan amé' Yerusalim, Ieh nelemaba arang Samaria idi Galilia. 12Kareb Ieh nesemuet bang sebuleng bawang, inan pulu' burur lemulun luk mét susud nepapu' Neneh, idi ideh netuped mado, 13idi ideh pana' nengitang, keburi'deh, “O Yésus, O Guru, méi' nekai.”
14 #
Uk 14.1–32
Kareb Yésus nenier nedeh, idi Ieh nepebala kuandeh, “Amé' muyuh mada' burur muyuh siren lun imam-imam.”
Idi uned ideh nalan, idi ideh nedo' peh. 15Idi seburur rat arangdeh ineh, kareb ieh nekali' bururneh nedo', idi ieh nelemubed idi nengerayeh Allah dengan arod luk rayeh. 16Ieh netekeradung iring kukud Yésus, idi nemaré ubur kuanNeh. Idi lemulun ineh seburur lun Samaria. 17Kebala Yésus, “Bakenké pulu' burur lemulun luk pangeh dino'? Iapehké iwa' burur ineh peh? 18Ngudehké sakai ini mo' luk lemubed amé' ngerayeh Allah?” 19Idi kebala Yésus kuan lemulun ineh, “Mudur iko idi nalan! Anumu pangeh nengedo' namu.”
Acing Imet Allah
(Mat 24.23–28, 37–41)
20Tuda'-tuda' lun Parisi nengitun Yésus ratnan idan Imet Allah macing. KebalaNeh, “Acing Imet Allah na miak siren dengan megala'. 21Na lemulun miak pebala, ‘Siruh tungé'!’ kian, ‘Déi'!’; ngaceku Imet Allah ineh idi arang muyuh.”
22Idi kebala Yésus kuan anak-anak sekola'Neh, “Karebneh miak macing idi muyuh pian nier sebuleng ratnan aco Anak-Lemulun ineh, iamo' na muyuh miak kali' ineh. 23Inan lemulun luk pebala nemuyuh, ‘Siruh déi'! Siruh tungé'!’ Aleg muyuh amé' nakap ineh! 24Ngaceku mepad kudeng kilep luk macang rat iring langit selipa macing iring langit selipa, kudeng ineh teh Anak-Lemulun kareb acoNeh. 25Iamo' atun na miak na Ieh mabeh mula' dereh, idi talan inul luk bang kareb ini. 26#Pud 6.5–8 Mepad kudeng luk nangun kareb Noh, kudeng ineh teh miak mangun kareb Anak-Lemulun. 27#Pud 7.6–24 Lemulun nekuman, nengirup, idi nengaweh, pad macing aco Noh semuet bang alud rayeh, idi abpa' pana' netemubu' ngaté amung-amungdeh. 28#Pud 18.20—19.25 Kudeng ineh teh, luk nangun kareb Lut, lemulun nekuman, nengirup, nemasui idi nemelih, idi nenibu idi nemudut ruma' pana'. 29Kareb aco Lut remuat rat bang Sodom ineh, idi udan apui idi batu apui pana' netemurun rat déi' langit nengaté amung-amungdeh. 30Mepad kudeng ineh teh mangun kareb Anak-Lemulun miak uen ngegala'.
31 #
Mat 24.17–18; Mrk 13.15–16 “Kareb aco ineh lemulun luk luun buduk ruma' aleg temurun nguit binawehneh remuat, idi aleg lemulun luk déi' lati'neh muli'. 32#Pud 19.26 Ngerawé ratnan awan Lut ineh. 33#Mat 10.39; 16.25; Mrk 8.35; Luk 9.24; Yah 12.25 Lemulun luk ngerawé ulunneh sebuleng na miak ngalap ulun luk matu; iamo' lemulun luk na ngerawé ulunneh sebuleng, ieh miak ngalap ulun luk matu. 34#Mat 23.12; Luk 14.11 Ui pebala nemuyuh, kareb malem ineh teh, inan dueh burur lemulun luun aceh bitaran; seburur miak lapen, idi seburur tacin. 35Idi inan teh dueh burur decur luk peruyung tupeh, ineh pana' seburur teh miak lapen idi seburur tacin. 36Idi inan dueh burur luk déi' lati', seburur miak lapen idi seburur tacin.”
37Idi kebala anak sekola'Neh, “Iapehké, O Tuhan?”
Idi kebala Yésus nedeh, “Iapeh-iapeh inan butung, idi su ineh teh inan suit kanui mepamung.”
Currently Selected:
LUKAS 17: BLD
Highlight
Share
Copy
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
