YAHYA 20

Tanem Luk Na Uang

(Mat 28.1–8; Mrk 16.1–18; Luk 24.1–12)

1Pekak uka-uka bang Aco Minggu, ieh ineh kareb medacem teh, idi Mariam Magdalina iné' inan tanem ineh, idi nenier batu ineh pangeh linubid rat munung lubang tanem ineh. 2Idi ieh nupun iné' nakap Simun Pétrus, idi anak sekola' luk baken luk inan Yésus mawa, idi nepebala nedidueh, “Lemulun pangeh nengalap Tuhan rat bang tanem, idi na kai kali' iapeh inandeh nengerareng Neneh.” 3Idi Pétrus neremuat dengan anak sekola' luk baken ineh idi iné' nan tanem ineh. 4Idi didueh nupun, iamo' anak sekola' luk baken nupun, meluun awer rat ni Pétrus, idi nacing atun inan tanem ineh. 5Ieh netekunal, idi ieh nenier amung-amung kibung ineh ketecan, iamo' na ieh nesemuet bang tanem ineh. 6Simun Pétrus pana' nacing rat pa puet, idi nesemuet bang tanem ineh, idi ieh nenier kibung ineh teh, 7idi aduk luk luun uluhNeh atun na rireng dengan kibung luk baken, iamo' linulun setau'. 8Idi anak sekola' luk baken luk nacing atun déi' bang tanem ineh pana' nesemuet, idi nenier idi manu. (9Nateh ideh nekali' ilung bala bang Surat Allah ratnan Ieh na miak na tumui rat arang lun naté.) 10Idi dueh anak sekola' ineh nuli'.

Yésus Nesilagan Kuan Mariam Magdalina

(Mat 28.9–10; Mrk 16.9–11)

11Iamo' Mariam nangi' pa atun tanem ineh. Kareb ieh nangi' ieh netekunal idi nenier bang tanem; 12idi ieh nenier dueh burur melaikat luk ayung mebuda' luk tudo, ieh ineh seburur pa uluh idi seburur pa kukud su luk inan nengerareng butung Yésus atun. 13Idi kebala didueh ni Mariam, “O decur, anunké punneh iko nangi'?”

Idi keburi' Mariam nedidueh, “Ngaceku lemulun pangeh nengalap Tuhanku, idi ui na kali' iapeh inandeh nengerareng Neneh.”

14Pangeh Mariam nepebala kudeng ineh, idi ieh nelumi, idi nenier Yésus tuped su ineh, iamo' na ieh miti Neneh Yésus. 15Idi Yésus nengitun neneh, kebalaNeh, “O decur, anunké punneh iko nangi'? Idéké luk tekapenmu?”

Mariam ngerawé Ieh ineh lun matar kabun, idi kebalaneh Neneh, “Tuan, kudeng iko nengalap Neneh rat ieni, mada' negku, iapehké inanmu nengerareng Neneh, pad ui miak amé' ngalap Neneh.”

16Kebala Yésus neneh, “Mariam!”

Idi Mariam nelumi idi nepebala bang buri' lun Iberani, “Rabbuni!” (Ilungneh “Guru.”)

17Idi kebala Yésus neneh, “Aleg iko ngakem Negku, ngaceku nateh Ui numak iné' inan TamanKu, iamo' amé' iko inan amung-amung kinanakKu, idi mala kuandeh, ‘Ui umak amé' inan TamanKu idi Taman muyuh, idi inan TuhanKu idi Tuhan muyuh.’ ”

18Idi Mariam Magdalina iné' mada' anak-anak sekola' ineh ratnan ieh pangeh nenier Tuhan, idi nemada' nedeh ratnan amung ini.

Yésus Nesilagan Kuan Anak-Anak Sekola'Neh

(Mat 28.16–20; Mrk 16.14–18; Luk 24.36–49)

19Idi kareb malem Aco Minggu, idi kareb amung-amung tanga' initek su luk inan anak-anak sekola' tudo ngaceku matot nelun Yahudi, idi Yésus nacing netuped arangdeh idi nemala kuandeh, “Awang kuan muyuh!” 20Kareb Ieh pangeh nemala kudeng ini, Ieh nemada' ticu'Neh idi sigarangNeh sirendeh. Idi anak-anak sekola' ineh mawang niat kareb ideh nenier Tuhan ineh. 21Idi Yésus nemala kuandeh sekua' teh, “Awang kuan muyuh! Mepad kudeng Taman pangeh nengecuk nemuyuh.” 22Idi kareb Ieh pangeh nemala kudeng ini, idi Ieh nenginiat kuandeh idi nepebala nedeh, “Lapen muyuh Roh Meligan. 23#Mat 16.19; 18.18 Kudeng idé-idé luk inan muyuh maré do' ratnan sala'deh, idi ideh miak ngalap do' ratnan sala', idi idé-idé luk inan muyuh na maré do', idi ideh mabeh sala'deh.”

Yésus Idi Tomas

24Idi Tomas, seburur rat arang pulu' dueh anak sekola' ineh, (luk titen Anak Rapid), na idi dengandeh kareb Yésus nacing. 25Idi anak-anak sekola' luk baken ineh nepebala neneh, “Amung-amung kai pangeh nepapu' dengan Tuhan ineh.”

Iamo' Tomas nepebala nedeh, “Kudeng ui na nier lubang paku' bang paladNeh, idi na ngerareng bua' ticu'ku bang lubang paku' di, idi na ngerareng ticu'ku bang sigarangneh, na ui miak manu.”

26Pangeh seminggu, idi anak-anak sekola' Yésus nepamung bang ruma' teh, idi Tomas pana' idi dengandeh. Kareb tanga' ruma' ineh initek, idi Yésus nacing netuped arangdeh idi nepebala, “Awang kuan muyuh!” 27Idi Ieh nepebala ni Tomas, “Ngerareng bua' ticu'mu su ini idi nier paladKu, idi natang ticu'mu idi ngerareng neneh bang sigarangKu, idi aleg iko merapang, iamo' manu.”

28Idi kebala Tomas Neneh, “O Allah, O Tuhanku!”

29Kebala Yésus neneh, “Manuké iko ngaceku iko nenier Negku? Samal kuan lemulun luk manu, sagan pana' na nenier Negku!”

Punneh Surat Ini Inayud

30Idi inan mula' tanu' luk baken teh luk inau' Yésus pa kiung anak-anak sekola'Neh luk na inayud bang surat ini. 31Amung-amung ini pangeh inayud, pad muyuh miak manu, idi Yésus ineh Keristus, Anak Allah, pad muyuh luk manu ineh miak ngalap ulun bang ngadanNeh.

Currently Selected:

YAHYA 20: BLD

Highlight

Copy