PUDUT 25

Inul Ibrahim Luk Baken

(1 In 1.32–33)

1Idi brahim nengalap aceh awan baruh, ngadanneh Ketura. 2Idi ieh nenganak Simran, Yoksan, Medan, Midian, Isbak, idi Sua. 3Idi Yoksan teh nenginul Siba idi Dedan. Idi inul Dedan ineh luk titen lun Asurim, Letusim, idi Lumim. 4Idi amung-amung anak deléi Midian, ieh ineh Epa, Epir, Hanok, Abida, idi Elda. Idi amung-amungdeh ini inul Ketura.

5Idi Ibrahim nemaré amung binawehneh kuan Isak. 6Iamo' kareb ieh mulun ieh nemaré tuda'-tuda' baré kuan anak-anak deléi luk tinganak awanneh luk baken. Idi pangeh ineh ieh nengecuk nedeh amé' bawang luk pa busat aco, mado ratnan Isak anakneh ineh.

Até Idi Tanem Ibrahim

7-8Idi Ibrahim naté kareb ulunneh meratu tudu' ngepulu' limeh lak. 9Isak idi Ismail, dueh anakneh ineh nenanem neneh bang lubang Makpéla, luk luun tana' Epron Sohar, lun Hiti ineh, ieh ineh pa busat aco Mamré. 10#Pud 23.3–16 Ieh ineh natad luk bilih Ibrahim rat nelun Hiti. Idi Ibrahim idi Sara tinanem su ineh. 11Idi pangeh até Ibrahim, Allah nengeperuan anakneh Isak ineh. Idi Isak netebawang muneng ku “Subuk Tuhan luk Mulun idi luk Nier Negku.”

Inul Ismail

(1 In 1.28–31)

12Idi ini inul Ismail, luk tinganak Hagar decur lun Masir luk demulun Sara ineh, kuan Ibrahim. 13Ini ngadan anak-anak deléi Ismail, maya' rayehdeh: luk pun-pun, ieh ineh Nebayot, pangeh ineh Kedar, Adbil, Mibsam, 14Misma, Duma, Masa, 15Hadad, Tema, Yetur, Napis, idi Kedma. 16Idi ini anak-anak deléi Ismail — pulu' dueh tepun pupu — idi bawangdeh idi su luk inandeh nelupo titen ku ngadandeh ineh. 17Idi kareb Ismail naté, ulunneh meratu teluh ngepulu' tudu' lak. 18Idi inul Ismail tebawang arang Hawila idi Sur luk pa busat aco Masir, iring dalan luk amé' déi' Asur. Ideh tudo setau' ratnan inul Ibrahim luk baken.

Esau Idi Yakub Tinganak

19Idi ini inul Isak luk anak Ibrahim. 20Idi ulun Isak apat ngepulu' lak kareb ieh nengaweh Ribeka anak Betuil (lun Arami rat Mesopotamia) kinanak Laban ineh. 21Idi Isak nesembayang mutuh ratnan Tuhan kuan awanneh, ngaceku ieh na anak. Idi Tuhan nengua' sembayangneh, idi Ribeka pana' mali'. 22Idi anak rapid nesigio bang nakanneh. Idi kebalaneh, “Na ui tuman ku luk kudeng ini.” Idi ieh iné' ngitun inan Tuhan.

23 # Rum 9.12 Idi kebala Tuhan neneh,

“Inan dueh pupu bang nakanmu.

Iko miak nenganak dueh pupu luk pekedaluh.

Sebuleng meluun tueh ratnan sebuleng.

Seluk isuut miak ngimet seluk rayeh.”

24Kareb aconeh petap idi Ribeka nenganak anak rapid. 25Idi anakneh luk nebpeh atun mesia', idi kubilneh mepad kudeng kuyu' luk mebuluh. Ngaceku ineh ieh titen Esau. 26Kinanakneh luk nebpeh muci nengimet tumid Esau. Ngaceku ineh ieh titen Yakub. Idi ulun Isak anem ngepulu' lak kareb didueh tinganak.

Esau Aceh Luk Rayeh Nemasui Babpatneh

27Idi dueh anak ineh luk amé' rayeh, idi Esau ineh mileh nganup, idi ieh selemulun luk megéi' amé' bang pulung, iamo' Yakub selemulun luk tebawang. 28Idi Esau ineh inan Isak mawa, ngaceku ieh sikal kuman uang pung luk lapenneh; iamo' Ribeka mawa ni Yakub.

29Bang aceh kareb Yakub nenanek peretek sia', idi Esau nacing rat bang pulung. Idi ieh pelaba lau. 30Idi kebala Esau ni Yakub, “Do' maré luk mesia' ineh kenenku, ngaceku ui ini merur!” (Idi ratnan ineh ideh neneten neneh Edom.)

31Idi kebala Yakub, “Ui maré ineh namu, kudeng iko maré negku babpat anak luk atun.”

32Idi kebala Esau, “Mo! Ui lélé maté. Anun ulekneh babpat ineh kuanku?”

33 # Ibr 12.16 Idi kebala Yakub, “Do' iko pebulung negku atun.”

Idi ieh pana' nepebulung kuanneh, idi nemaré babpat anak luk atun ineh kuan Yakub. 34Pangeh ineh Yakub nemaré kuan Esau ruti idi peretek luk mesia' ineh. Kareb ieh pangeh nekuman idi nengirup, idi ieh netuped idi nenalan. Kudeng ineh lawéneh Esau nenala' babpat anak luk atun.

Currently Selected:

PUDUT 25: BLD

Highlight

Copy