PUDUT 23
23
Sara Maté Idi Tinanem
1Idi Sara mulun meratu dueh ngepulu' tudu' lak. 2Idi ieh naté déi' Hebron bang bawang Kanaan; idi Ibrahim netemido neneh.
3Idi ieh neburo rat iring butung awanneh idi iné' nelun Hiti, kebalaneh, 4#Ibr 11.9, 13; Kek 7.16 “Ui ini seburur lun sakai luk tudo arang muyuh. Do' masuk aceh tana' nanku nanem awanku.” 5Idi kebaladeh, 6“Do' iko ninger bala kai, O tuan. Iko seburur pengulu luk rayeh arang kai, idi iapeh-iapeh lengutan kai luk buren, idi do' iko nanem awanmu déi'. Ngaceku seburur pana' rat arang kai na miak ngibpeng lengutandeh kuanmu pad iko miak nanem awanmu déi'.”
7Idi Ibrahim netekunal pa kiungdeh, 8kebalaneh, “Kudeng muyuh maré negku nanem awanku su ini, idi do' muyuh mutuh ni Epron Sohar lun Hiti ineh, 9pelé ieh masui lubang Makpéla luk iring lati'neh kuanku dengan petap raganeh pa kiung muyuh, pad tana' ineh mangun ku lengutanku.”
10Idi Epron idi tudo arang uned lun Hiti ineh, munung tanga' bawang su luk inan lun pegayam. Idi ieh nengor bala Ibrahim pa kiung amungdeh, kebalaneh, 11“O tuan, do' iko ninger balaku, ui miak maré amung tana' ineh kuanmu dengan lubang luk bang ineh. Ui sikal maré ineh namu pa kiung amung pupuku pad iko miak nanem awanmu déi.”
12Idi Ibrahim netekeradung pa kiung lun bang bawang ineh. 13Idi kebalaneh ni Epron pedingeren lun mula', “Do' iko ninger do'-do'. Ui sikal melih amung tana' ineh; do' ngalap usin ini rat negku ku raganeh, pad ui miak nanem awanku déi'.”
14Idi kebala Epron, 15“O tuan, na mekudeh ratnan raga tana' ineh, luk apat ngeratu balad pirak. Nanem mo' awanmu su ineh.” 16Idi Ibrahim nengamo idi ieh nenimang kinula' pirak luk bila Epron ineh pa kiung lun mula' ieh ineh 400 balad pirak, ieh ineh maya' timang lemulun luk pepua'.
17Kudeng ineh lawéneh tana' Epron luk déi' Makpéla luk pa busat aco Mamré mangun ku tana' Ibrahim, ieh ineh lati'neh idi lubang luk bang ineh pana', idi amung-amung lawa kayuh luun tana' ineh macing ku lakanneh. 18Amung lun Hiti luk idi neninger gayam ineh nengamo ratnan tana' ineh miak lapen Ibrahim.
19Pangeh ineh, Ibrahim nenanem awanneh, Sara, bang lubang ineh déi' bawang Kanaan. 20Idi tana' ineh, dengan lubang luk bang ineh teh biré lun Hiti ni Ibrahim miak mangun ku lengutanneh sebuleng.
Currently Selected:
PUDUT 23: BLD
Highlight
Share
Copy
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
