PUDUT 16
16
Hagar Idi Ismail
1Sarai awan Abram ineh na anak; idi ieh inan seburur demulun rat Masir luk decur, ngadanneh Hagar. 2Idi kebala Sarai ni Abram, “Tuhan na nemaré anak kuanku. Ngaceku ineh do' iko pamung dengan demulunku, pad ui miak ngalap anak rat neneh.” Idi Abram nemaya' bala Sarai ineh. 3Idi Sarai nemaré Hagar ni Abram ku apidneh. (Ini mangun kareb Abram pangeh netudo déi' bawang Kanaan pulu' lak kinioneh.) 4Idi Abram nepamung dengan Hagar, idi ieh mali'. Idi kareb Hagar nekali' ieh pangeh mali', idi ieh medita' niat idi nengedat Sarai luk kuan neneh.
5Idi kebala Sarai ni Abram, “Sala'mu ini ngaceku Hagar ngedat negku. Ngaceku ui pangeh nemaré demulunku bang abinmu, idi kareb ieh kali' neneh mali' ieh nengedat negku. Ngaceku ineh Tuhan teh miak ngukum arangku denganmu!”
6Idi kebala Abram, “Demulunmu ineh inan bang paladmu. Nganau' anun luk pianmu kuanneh.” Idi Sarai megateh neneh, pad Hagar neburo rat neneh.
7Idi Melaikat Tuhan nepapu' neneh muneng ku aceh bued abpa' déi' su luk ali-ali, luun dalan amé' bawang Sur. 8Kebalaneh, “O Hagar, demulun Sarai, rat iapeh iko, idi amé' iapeh iko teh?”
Idi kebalaneh, “Ui neburo rat ni Sarai luk kuan negku.”
9Idi kebala Melaikat Tuhan neneh, “Lemubed iko mangun ku demulunneh.” 10Idi teh kebalaneh kuanneh, “Ui ngula' anak inulmu, pad ideh na mekiap. 11Iko ini mali' idi iko miak nenganak aceh anak deléi. Idi do' iko nganau' ngadanneh Ismail, ngaceku Tuhan neninger arod derehmu. 12Idi anakmu ineh mulun mepad kudeng keladai luk meliput, idi ieh sikal metueh ratnan amung-amung lemulun, idi amung-amung lemulun sikal metueh rat neneh teh. Idi ieh miak tudo setau' ratnan amung-amung kinanakneh.”
13Idi kebala Hagar, “Matuké ui pangeh nenier Allah, idi mulun teh?” Idi ieh neneten ngadan Tuhan luk nepebala nneh ineh, “Allah luk Nier.” 14Ngaceku ineh subuk luk arang Kadis idi Bered ineh titen “Subuk Tuhan luk Mulun idi luk Nier Negku.”
15 #
Gal 4.22
Idi Hagar nenganak sebuleng anak deléi kuan Abram; idi Abram nenganau' ngadanneh Ismail. 16Idi kareb ineh ulun Abram, ualuh ngepulu' anem lak.
Currently Selected:
PUDUT 16: BLD
Highlight
Share
Copy
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
