KEKAMEN RASUL-RASUL 5

Ananias Idi Sapira

1Inan selemulun luk ngadanneh Ananias idi awanneh Sapira. Ananias nemasui sebuang tana' didueh. 2Iamo' kareb nateh ieh nemaré raganeh kuan rasul-rasul ineh ieh nenganug sebuang ratnan raganeh kuan bururneh sebuleng. Idi awanneh pana' nekali' ineh. 3Iamo' kebala Pétrus neneh, “O Ananias, ngudehké Iko nenima' Sétan ngimet niatmu, pad iko mebalih inan Roh Meligan idi nenganug sebuang raga tana' ineh? 4Kareb nateh tana' ineh pinasui, bakenké ineh iko kuan? Idi kareb ieh pangeh pinasui, bakenké raganeh iko kuan? Ngudehké iko ngerawé nganau' kudeng ineh? Iko na mebalih pa kiung lemulun, iamo' pa kiung Allah.” 5Kareb Ananias neninger bala ini, idi ieh neluka' idi niatneh neputut. Idi nacing aceh tot luk rayeh kuan amung-amung lemulun luk neninger bala ineh. 6Idi anak-anak adi' luk idi déi' nesemuet idi nengelilib neneh. Idi ideh nemirir neneh idi nenanem neneh.

7Idi pangeh teluh jam awanneh ineh pana' nesemuet dengan na kali' anun-anun luk pangeh mangun. 8Idi kebala Pétrus neneh, “Do' iko mada' negku, matuké tana' ineh muyuh pangeh nemasui dengan raga kinula' ineh?”

Idi kebalaneh, “Mo, ini amung raganeh.”

9Idi kebala Pétrus neneh, “Anunké punneh medueh pangeh perurum sikal nutun Roh Tuhan? Siruh, lemulun luk nenanem awanmu ineh idi munung tanga', idi ideh miak mirir namu remuat teh.” 10Idi denak-denak ieh pana' neluka' iring kukud Pétrus idi niatneh neputut. Idi anak-anak adi' ineh nesemuet idi nenier decur ineh pangeh naté. Idi ideh nemirir neneh idi nenanem neneh iring awanneh. 11Idi nacing aceh tot luk rayeh tu-tu kuan amung lun sidang ineh idi kuan amung lun baken luk neninger bala ineh.

Kekamen Luk Nan Mawa

12Mula' tanu' idi kekamen luk nan mawa inau' rasul-rasul arang pupu ineh. Idi amung-amungdeh pana' netebubpun dengan sebuleng niat luun Tadur Selimun. 13Idi rat arang lun baken seburur pana' na mekuu' perurum nedeh, iamo' lun mula' nengubur nedeh. 14Idi inan teh lemulun luk manu inan Tuhan, ieh ineh meluun ratnan nedeh, do' decur idi deléi pana', 15pad ideh nenguit lun mét iné' iring dalan rayeh idi nengerareng nedeh luun pagau idi ugamdeh, pad aca' Pétrus mekaneh luundeh kareb ieh lemaba. 16Idi mula' lemulun rat bawang luk libut-libut Yerusalim ineh nenguit lun mét idi lemulun luk sinuet ada'; idi amung-amungdeh nedo'.

Rasul-Rasul Pidereh

17Iamo' Imam Rayeh idi amung luk rurumneh ineh luk ratnan babpat lun Saduki, ngimaruh nan rasul-rasul, idi pian metueh rat nedeh. 18Ideh nengakem rasul-rasul ineh idi nenipa nedeh bang tutup. 19Iamo' kareb medacem seburur melaikat Tuhan nengukab amung-amung tanga' tutup ineh idi nenguit nedeh remuat idi kebalaneh nedeh, 20“Amé' muyuh tuped bang Ruma' Allah idi mada' nelun mula' ratnan Ulun luk mebaruh ineh.” 21Rasul-rasul nemaya' balaneh ineh, idi ideh nesemuet bang Ruma' Allah kareb pekak uka-uka, idi nemada' nedeh.

Idi Imam Rayeh dengan amung lun rurumneh nenawar amung lun rayeh lun Yahudi tebubpun pegayam. Idi ideh nengecuk nguit rasul-rasul rat bang tutup, pad ideh papu' tebubpun ineh. 22Iamo' pulis luk iné' ineh na nekali' lemulun ineh bang tutup, idi ideh nelemubed idi nemada', keburi'deh, 23“Kai kali' tutup ineh pangeh initek do'-do' idi lun luk matar ineh pana' tuped munung amung-amung tanga' ineh; iamo' pangeh kai nengukab tanga' ineh idi kai nenier na luk idi seburur pana' bang tutup ineh.” 24Kareb lun rayeh lun matar Ruma' Allah idi imam-imam rayeh neninger bala ineh, idi ideh merapang ku ineh. 25Idi nacing selemulun nepebala kuandeh, “Siruh, lemulun luk sinuet muyuh bang tutup ineh tuped bang Ruma' Allah idi mada' pupu ineh.” 26Idi lun rayeh lun matar Ruma' Allah ineh dengan pulis iné' idi nenated nedeh, iamo' baken dengan metueh niat ngaceku ideh matot bitungin pupu ineh ku batu.

27Ideh nenguit rasul-rasul ineh amé' matun tebubpun besara'. Idi kebala Imam Rayeh nedeh, 28#Mat 27.25 “Kai nemebpeng nemuyuh na mada' dengan ngadan ini, iamo' muyuh pangeh manu' bawang Yerusalim ku bada' muyuh, idi muyuh sikal maré nekai mabeh dara' lemulun ini.”

29Iamo' kebala Pétrus idi rasul-rasul, “Tau na miak na maya' Allah meluun ratnan lemulun. 30Allah Tuhan tepun tau pangeh nenui Yésus luk pangeh pinaté idi sinalib muyuh. 31Ieh kinikit Allah tudo pa tinuehNeh mangun ku Raca' idi Lun Nengulun, pad nguit nelun pupu Israil uren idi ngalap do' ratnan sala'. 32Kai ini lun nekali' ratnan amung-amung kekamen ini, idi kudeng ineh teh Roh Meligan luk biré Allah kuan amung-amung lemulun luk maya' Neneh.”

33Kareb lun rayeh tebubpun besara' neninger bala ini, idi ideh megateh niat pad ideh sikal ngaté rasul-rasul ineh. 34Iamo' seburur lun Parisi, ngadanneh Gamalil, ieh ineh selemulun luk mada' Ukum Musa luk rinayeh amung pupu ineh, netuped bang tebubpun besara' ineh idi nengecuk nguit lemulun ineh remuat. 35Idi kebalaneh nan tebubpun besara' ineh, “O lun Israil, matar do'-do' muyuh ratnan luk ruen muyuh kuan lemulun ini. 36Ngaceku atun ratnan ini inan selemulun ngadanneh Tudas, luk nengerayeh ngadanneh sebuleng, idi lélé apat ngeratu lemulun nemaya' neneh; iamo' ieh pangeh pinaté idi amung-amung lemulun luk nemaya' neneh nepatad idi na luk idi anun-anun luk mangun. 37Pangeh ineh Yudas lun Galilia nacing kareb ideh nengiap lemulun. Idi ieh pana' nengeruid sebuang pupu maya' neneh. Iamo ieh pinaté teh, idi amung lemulun luk nemaya' neneh nepatad peh. 38Idi nekini ui pebala nemuyuh, aleg muyuh ngukum lemulun ini. Nima' nedeh, ngaceku kudeng terawédeh idi kekamendeh ratnan lemulun, kali' rungen gio ini miak ugka'. 39Iamo' kudeng kekamen ineh ratnan Allah, na muyuh miak metueh ratnan lemulun ineh, ngaceku kian, ayuneh muyuh sikal metueh ratnan Allah lek.”

Idi tebubpun besara' ineh pana' nemaya' bala Gamalil. 40Ideh nenawar rasul-rasul ineh idi ideh nemebal nedeh idi nemebpeng nedeh na mada' dengan ngadan Yésus. Idi ideh nemuit nedeh. 41Idi rasul-rasul ineh neburo rat pa kiung tebubpun besara' ineh dengan mawang niat ngaceku ideh tirawé Allah mayu mekaneh dereh ngaceku ngadan Yésus. 42Idi anid-anid aco ideh mada' bang Ruma' Allah idi bang ruma' lemulun pana' Bala luk Do' ratnan Yésus Keristus.

Currently Selected:

KEKAMEN RASUL-RASUL 5: BLD

Highlight

Copy