KEKAMEN RASUL-RASUL 1

1 # Luk 1.1–4 Kuan kinanakku Téopilus:

Bang suratku luk atun ineh ui nengayud ratnan amung-amung luk inau' idi bida' Yésus rat kareb Ieh nengimun kekamenNeh, 2pad macing aco Ieh kinikit iné' surga. Kareb nateh Ieh kinikit, dengan lalud Roh Meligan Ieh nemada' rasul-rasul luk pangeh pinili'Neh. 3Ruked apat ngepulu' aco pangeh atéNeh Yésus nesilagan nedeh tuda'-tuda' kua; pad ngegala' kuandeh ratnan Ieh mulun. Ieh sinierdeh, idi nepebala nedeh ratnan Imet Allah. 4#Luk 24.29 Kareb ideh nepamung, idi Ieh nemebpeng nedeh na necan Yerusalim, kebalaNeh, “Do' muyuh nganét baré luk pijani' TamanKu, luk bilaKu nemuyuh. 5#Mat 3.11; Mrk 1.8; Luk 3.16; Yah 1.33 Yahya nengerereb dengan abpa', iamo' na mio teh muyuh ini rerebpen dengan Roh Meligan.”

Yésus Kinikit Amé' Surga

6Kareb rasul-rasul nepamung dengan Yésus, idi ideh nengitun Neneh, keburi'deh, “O Tuhan, miakké Iko ngelubed Imet kuan Israil nekini?”

7Kebala Yésus nedeh, “Na muyuh miak kali' aconeh idi karebneh, luk litep TamanKu maya' laludNeh sebuleng. 8#Mat 28.19; Mrk 16.15; Luk 24.47 Iamo' muyuh miak mepanu' ku lalud kareb Roh Meligan temurun luun muyuh, idi muyuh miak mangun ku lun nekali' Negku, do' déi' Yerusalim, do' aput tana' Yudia idi Samaria pad macing iring tana'pana'.” 9#Mrk 16.19; Luk 24.50–51 Idi pangeh Ieh nepebala kudeng ineh, idi Ieh ilap peh laba' ideh nier Neneh, idi aceh laput nengelinged Neneh rat pa kiungdeh.

10Idi laba' ideh netengook déi' langit kareb Ieh numak, denak-denak dueh burur lemulun dengan ayung luk mebuda', tuped muneng iringdeh. 11Idi kebala didueh, “O muyuh lun Galilia, ngudehké muyuh tuped idi netengook nier déi' langit? Yésus ini luk kinikit rat arang muyuh iné' surga, miak temurun mepad kudeng luk sinier muyuh kareb Ieh kinikit iné' surga ineh.”

Libal Yudas

12Pangeh ineh rasul-rasul nelemubed iné' Yerusalim rat Pegkung Saitun, luk lélé setangal batu rat Yerusalim. 13#Mat 10.2–4; Mrk 3.16–19; Luk 6.14–16 Ideh nesemuet bang bawang Yerusalim idi numak semuet bang takep luk pa luun, ieh ineh su luk inan Pétrus, Yahya, Yakub idi Andrias, Pilipus idi Tomas, Bartolomius idi Matius, Yakub Alpius, Simun lun Selot,#1.13 Selot, ieh ineh aceh pati luk sikal metueh ratnan imet Rum. idi Yudas Yakub. 14Idi amung-amungdeh megéi' perurum sembayang dengan tuda'-tuda'decur, idi Mariam tinan Yésus, idi dengan kinanak-kinanakNeh

15Pangeh tuda'-tuda' aco inan aceh tebubpun lun manu, ieh ineh lélé meratu dueh ngepulu' burur kinula'deh, idi Pétrus netuped idi nemada'. 16Kebalaneh, “O kinanak-kinanakku, na miak na bala bang Surat Allah uen ngacing, maya' kudeng luk bila Roh meligan dengan dila' Daud ratnan Yudas, luk mangun ku lun nguyut lemulun luk nengakem Yésus. 17Atun Yudas ineh bang rurum tau, ngaceku ieh pangeh pinili' ngalap babpat bang kekamen tau.”

18 # Mat 27.3–8 (Idi Yudas nengalap aceh babpat tana' dengan raga kekamenneh luk dat, su luk inanneh nebpeh mukit idi batekneh nebacit, pad tinéi'neh neremuat. 19Idi bala ineh naput kuan amung-amung lemulun déi' Yerusalim, pad tana' ineh titen dengan buri'deh sebuleng, Akeldama, ilungneh, “Tana' Dara'”.)

20 # Nani 109.8 “Ngaceku pangeh inayud bang surat Nani Ubur,

‘Aganeh dat ali luk inanneh tudo;

aleg maré lemulun tudo' déi'.’

Idi teh pangeh inayud,

‘Aganeh lun baken ngalap kekamenneh.’

21-22 # Mat 3.16; Mrk 1.9; Luk 3.21; Mrk 16.19; Luk 24.51 “Ngaceku ineh, do' seburur lemulun maya' netau mangun ku lun nekali' ratnan tui Tuhan Yésus. Do' ieh pilin rat arangdeh luk bang rurum tau, ruked Yésus idi dengan tau, ngimun rat kareb Yahya nemada' ratnan rerebneh, macing aco luk inan Yésus kinikit rat arang tau iné' surga.”

23Idi ideh nemili' dueh burur lemulun ieh ineh Yusup (luk titen Barsabas idi Yustus), idi teh Matias. 24Idi ideh nesembayang, kesembayangdeh, “O Tuhan, Iko luk kali' niat amung-amung lemulun, do' mada' rat arang dueh burur ini, idéké luk pinili'Mu, 25ngalap babpat bang kekamen ini idi bang kekamen rasul luk tican Yudas, kareb ieh iné' su luk inanneh.” 26Idi ideh nenala' udi kuan dueh burur ineh, idi Matias luk nekaneh pili' ineh. Idi ieh iniap dengan pulu' aceh rasul ineh.

Currently Selected:

KEKAMEN RASUL-RASUL 1: BLD

Highlight

Copy