Marko 9

1Klɛ etsre balɛ asɛ, “Itsre nɔ sɛ kɛgba lɛ nu sɛ, banɔ teli gɛ beli kititi nɛ ɔkɛ̃ nɛ batɛ ba mɔ butsi flogo pɛ Kpaya Bukusiɔzakɔ nɛ ɔbɔ ba nɛ kemi.”

Ishu Tsɛtsrakɛ

2Nɛ ewi tehloe de, Yesu agbanɔ Petro, Yakobo anɛ Yohanɛsɛ aplɛnɔ ishu klɛ ba vɛ butu ɖɛɖama tulia bha, gɛ anɔnyanɔ ama ɔkɛlɛ. Ɔkɛlɛ yɛ tɛzɛza mɛ tsyina nɛ balɛ amɛ. 3Yɛ bawi nɛ gɛ akpɛ nɛ petee baa tã frɛɖɛɛ ɖɛ ɔyɛkɔ dɛ kɛdɔ fufu kanyakaɛ di nɛ kanɔa nɛ mɛ, gɛ anɔnyanɔ atɛba na kɛlɛ bu plu pɛ kɛba fuli dɛ kana. 4Klɛ ba mɔ Eliya anɛ Mose gɛ be dzi aɖɔ kaɖɔ nɛ Yesu.

5Petro etsre Yesu asɛ, “Adɔkasɛ, kɛpɛ sɛ bu ba ɔkɛ̃. Kɔ lɔ dzu bugba tɔta nɛ ɔkɛ̃, wɔayɛ tierikpo, Mose yɛayɛ tierikpo, anɛ Eliya yɛayɛ tierikpo.” 6(Edi ti kibui nɔɔ nɛ gɛ aba ɖɔ, kifu kua lɛ tsutsɔmɔ tsɔmɔ.)

7Klɛ ɔmunɔ toli ɔbɔ dɔ kana balɛ, klɛ ogugu toli oyi denɔ ɔmunɔ nɛ mɛ sɛ, “Mɛ Eyi naa, gɛ ɛdɛmɛ yɛ kibui. Nɔ ta yɛ batɔ!”

8Ɔtsɔlɛ gɛ be lu awɔ̃ edi balɛ ɔbha nɛ, ba daa mɔ anɔnyanɔ ɔyɛkɔ dɛ Yesu nɛ ɔkɛlɛ.

9Gɛ be zhi butu nɛ pɛ baa ba, Yesu akpɛ balɛ ɔshã sɛ be ti tsre anɔnyanɔ kɛdɔnɔ gɛ ba da mɔ nɛ ɔkɛlɛ, ɔdɔ nanɔ kibelɛ gɛ Anɔdzyrame yɛ Eyi nɛ aba nyɛmɛ edenɔ bekpu mɛ. 10Be kpu kibui nɛ balɛ kpɛkpa nɛ kishi, klɛ be bisi nɛ aglɔm asɛ kide “tɛlulɔ denɔ bekpu mɛ nu.”

11Klɛ bee bisi Yesu asɛ, “Kidee so pɛ bagɛ baa kasɛ ɛshã na sɛ kɛ lɛ sɛ tɛ Eliya eputɔ aba?”

12Yesu asɛ, “Tɛ bu ka nɛ klɛa bha nɛ, kɛ lɛ sɛ tɛ Eliya aba eputɔnɔ, kɔ kɛdɔnyɛdɔ tɛŋuŋuse. Klɛ kidee so pɛ ba za ŋlɔmɛ elu asɛ Anɔdzyrame yɛ Eyi nɛ alasɛ tɛ aba tɔ gelee tsyɛ tɛ batɛ yɛkɛ yɛ? 13Pɔ itsre nɔ, Eliya atɛ ba, klɛ ba bhɛtɛ kɛdɔnyɛdɔ gɛ ba pɛɛ nɛ yɛ, anasɛ gɛ ba ŋlɔmɛ elu nɛ yɛ shu.”

Ɔfufɔɛkpã Tɛkɛkɛkabu Nɛ Anyɛnuvɔɛ Teli Mɛ

14Gɛ le be ku badɔkpasɛ gugɔɛ nɛ ɔbha, ba mɔ banɔɛza gɛ kana lɛ, klɛ ɛshãdɔkasɛ nɛ be dzi awlãkɛ ebui nɛ balɛ. 15Gɛ banɔ petee amɔ Yesu ko same ekua lɛ klɛ be si ada sɛnɛ yɛ.

16Yesu ebisi badɔkpasɛ nɛ asɛ, “Kidee shu nɔ wlãnkɛ kibui nɛ balɛ?”

17Anyɛ teli nɛ banɔɛza nɛ mɛ na ɖɔ asɛ, “Adɔkasɛ, ɛmɛna wɔ mɛ eyianyɛ gɛ ɛfufɔɛkpã kɔ sɛ eku omumu. 18Onu gɛ lɔɔ dɔ yɛa bha nɛ loo bu yɛ obho. Yɛ onugbu nɛ mɛ ɔtsa kɛfɔ, atã ele klɛ yaa nunɔ. Ibisi wɔ badɔkpasɛ nɛ sɛ ba kɛka kana mɛ ɔfufɔɛ nɛ ebu nɛ yɛ mɛ pɔ ba dɛ na.”

19Yesu ebui lɛ nu asɛ, “O ɔtsɔ̃ nɛ banɔ nɛ gɛ tɛyɛyɛkɛŋa ma balɛ mɛ,” “ɔdɔ na nɛ kibe ɖueɖu mɛ ɛba za wɔnɔ bha? Klɛɛ za mɛ ba za wɔnɔ ɔbha da tɔnɔ? Gbanɔ anyɛnuvɔɛ nɛ ɔmɛna mɛ.”

20So, ba gbanɛ yɛ amɛna. Gɛ ɔfufɔɛ nɔ mɔ Yesu ko, lɔ kpɛ anuvɔ nɛ bunuvɔnya mɛ. Klɛ awɔlɛ adɔ kesukpa klɛ eglebe atsya, nɛ kɛfɔ denɔ yɛ onugbu nɛ mɛ.

21Yesu ebisi eyi nɛ yaka nɛ asɛ, “Kibe ɖueɖuibe ke anuvɔ nɛ abhɛtɛ kana?”

Eyiaka nɛ aɖɔ asɛ, “Denɔ kɛnuvɔbe mɛ ke.” 22“Bunya nɛɛ ganɛ yɛ bu tii kpɛ kifu anɛ buni mɛ sɛ tɛ bu yi yɛ. Pɔ onu gɛ ɔbɔ na kɛdɔ tili ɔbhɛtɛ, klɛ tɛ odi bulɔ eshutukubui tɛ ɔplɛnɔ bulɔ.”

23Yesu asɛ, “ ‘Ɔsɛ onu gɛ ɛba na dza?’ Kibui nyɛbui lɛ bɔbɔɛbɔɛ kɔ anɔ nɛ gɛ ayɛkɛ aŋa.”

24Ko klɛ Aka nɛ akpɛ ogugu asɛ “Ɛyɛkɛ ɛŋa, plɛnɔ mɛ tɛ ɛŋa mɛ kabha mayɛkɛ mayɛkɛŋa nɛa bha!”

25Gɛ Yesu amɔ banɔɛza nɛ gɛ ba yalɛ aba sɛ tɛ le be di kɛdɔnɔ nɛ gɛ kɛlɛ vɛ kabha nɛ, alɛɛ nɛ ɔfufɔɛkpã nɛa bha. “Wɔ batɔpu anɛ omumu ɔfufɔɛ,” “Ɛkpɛ ɔshã kɔ wɔ, fla okoeyi nɛ anuvɔ nɛ mɛ, tɔɔ ba obo tsoku yɛ mɛ kiwinyɛwi.”

26Ɔfufɔɛ nɛ ɔxlɔ̃, klɛ lɔ hwa nɛ yɛ gɛganɛɛ, klɛ lɔ fla okoeyi. Anuvɔ nɛ awɛ̃ nɛ banɔ nɛ amɛ ansɛ anɔ tsitsi. So banɔ gelee aɖɔ sɛ, “Etsi.” 27Pɔ Yesu anyɛna anuvɔ nɛ ɔhwɛ klɛ efeke yɛ edzu yɛ ɛtsrɛa bha, klɛ alɔ kititi.

28Klɛɛ de mɛ gɛ Yesu etsoku buvu nɛ mɛ, yɛ badɔkpasɛ nɛ be bisi yɛ nɛ tɛkpukpu mɛ asɛ, “Kidee so pɛ bulɔ bu dɛ na ɔfufɔɛ nɛ bu kɛka bu?”

29Yesu asɛ, “Ɔnɛ nɛ kidi nɛ ganɔ Kpaya kuklu anɛ onugbu nyɛnya mɛ ko lo bo koeyi.”

30Ba shɛ nɛ ɔkɛlɛ ada ga Galelia. Yesu adɛ ka pɛɛ sɛ anɔnyanɔ eti ɔkɛlɛ gɛ ba lɛ, 31alasɛ aakasɛ yɛ badɔkpasɛ nɛ kɛdɔ. Etsre balɛ asɛ, “Ba baa ba ga Anɔdzyrame yɛ Eyi nɛ kesi ayɛkɔ akpɛ banɔ ahwɛ. Ba ebe yi yɛ, klɛ nɛ ewi tata kede nɛ ebe tsodzi alɔ.” 32Pɔ be di nu kibui nɔ nɛ gɛ aɖɔ nɛ kesi, klɛ kifu kua lɛ sɛ tɛ be bisi klɛ kesi enu.

Anee Yɛ Enu Agbɛgbla Dɛ

33Ba ebe ku Kapenaum. Gɛ beli bupa nɛ mɛ, Yesu ebisi balɛ asɛ, “kibui ɖue nɔ wlãnkɛ nɛ kidzo nɛ mɛ?” 34Pɔ badɔ sɛɛ̃ alasɛ baa wlãnkɛ anɔ nɛ gɛ ebe dzi agbɛgbla nɛ adɛ.

35Gɛ aza kesi beke nɛ, Yesu eklu yɛ banɔ lɔfɔntɛabha klɛ aɖɔ asɛ, “Onu gɛ anɔ teli aaba pɛ asɛ tɛ edzi atutɔpu, klɛ ebe dzi agɔgɔɛ anɛ axwɛdɛ kɔ balɛ petee.”

36Agbanɔ anuvɔ bhli teli amɛna klɛ akɔ yɛ alɔ kititi nɛ balɛ kishi. Gɛ agbanɔ yɛ akpɛ ete mɛ beke nɛ, klɛ etsre alɛ sɛ, 37“Aanɔ nɛ gɛ ayɛkɛ banuvɔ bhlia nɛ ɔmɛayɛ teli nɛ mɛ kinyi mɛ, mɛ ayɛkɛ, klɛ anɔɔ nɛ gɛ ayɛkɛ mɛ nɛ ganɛ mɛ ayɛkɛ, agɛ akpɛ mɛ nɛ ayɛkɛ.”

Aanɔ Nɛ Gɛ Aadɛ Lɔ Kititi Nɛ Bulɔ Shu Alɛ Kɔ Bulɔ

38Yohanɛsɛ aɖɔ asɛ, “Adɔkasɛ,” “Bu mɔ anyɛ teli gɛ akɛka ɛfufɔɛkpã nɛ wɔ kinyi mɛ klɛ bu tsre yɛ sɛ ataa bhɛtɛ, alasɛ edi nu blɔmɛayɛ teli.”

39Yesu asɛ, “Nɔ tɛ dzu ahwɛ nɛ yɛa bha.” “Anɔnyanɔ ama gɛ abhɛtɛ kibui yiyinɔ anɔ nɛ mɛ kinyi mɛ, pɛ ebe tsyina aɖɔ kibui kpã nɛ mɛ shu, 40alasɛ aanɔ nɛ gɛ aadɛ lɔ kititi nɛ bulɔ shu nɛ enu bulɔa yɛ. 41Itsre nɔ kibuigba sɛ, anɔnyanɔ gɛ akɔ nɔ buniatse nɛ mɛ kinyi mɛ sɛ no nu Kristo ayɛ so, yɛ ahwɛhuhu nɛ atɛba lɛla.

Tɛtitikpɛ Kibuikpã Bhɛbhɛtɛ Mɛ

42“Klɛ so aanɔ nɛ gɛ aba kɔ sɛ banuvɔ bhli anɛ teli gɛ ayɛkɛ mɛ kabha aŋa nɛ awɔlɛ ku buzizi mɛ, onugɛ ba yɛkɔ buhɔgbla anya plɛnɔ yɛ oli pɛ ba yɛkɔ wɔ ada tɛɛ akpɛ aƒu mɛ tsyɛ, aba pɛ akɔ yɛ adɛ. 43Onu gɛ wɔ ɔhwɛ toli ɔkɔ sɛ oku buzizi mɛ, bhui ɔlɛ ɔtɛɛ̃. Abɔ kɔ wɔ sɛ tɛ ɔhwɛ torikpo ɔza wɔ ahwɛ nɛ ɛkpã mɛ, ɔyɛkɔ dɛ sɛ tɛ ɔyɛkɔ ɛhwɛ tɛbha ɔvɛnɔ butsutsɔmɔ mɛ, nɛ ɔklɛ gɛ kifu tii ni.” 44[Nɛ ɔklɛ gɛ asɔ̃ eti be tsi edi, klɛ kifu nɛ tsyɛ tɛ ba ni di.] 45Onu gɛ wɔ ɔtsrɛ toli ɔɔkɔ sɛ oku buzizi mɛ, bhui ɔlɛ ɔtɛ̃ɛ. Kɛ ba pɛ sɛ tɛ otsoku ɛkpã mɛ nɛ ɔtsrɛ torikpo, ɔyɛkɔ dɛ sɛ tɛ ɔza ɛtsrɛtɛbha kabha tɛ ba yɛkɔ wɔ ada tɛɛ̃ akpɛ butsutsɔmɔ mɛ. 46[Nɛ ɔkɛlɛ gɛ asɔ̃ eti be tsi edi, klɛ kifu tsyɛ tɛ ba ni di.] 47Klɛ onu gɛ wɔ kɛwɔ̃hũ tili kɔ sɛ ɔbhɛtɛ kibuikpã, kpa kɛlɛ obu. Kɛpɛ kɔ wɔ sɛ tɛ otsoku Kpaya bukusi ɔŋakɔ nɛ kɛwɔ̃hũ tirikpo ɔyɛkɔ dɛ sɛ tɛ awɔ̃hũ tabha aza wɔ ahwɛ tɛ ba yɛkɔ wɔ ada tɛɛ̃ akpɛ kifu gɛ tɛ ba ni di mɛ. 48ɔklɛ gɛ

“ ‘balɛ asɔ̃ nɛ etee tsi,

klɛ kifu tsyɛ tii ni.’

49Baa yɛkɔ kifu eplu anɔnyanɔ shu klɛ la ba yɛkɔ bumɔɛ akpɛ anɔnyanɔ sɛ tɛ eti zi.

50“Bumɔɛ nɛ kɛdɔ dzyɔgo bu nu, pɔ onu gɛ bu lɛla bulɛ ɔdzyɛ, klɛ ɔzɔ bɔ kɔ sɛ ɔdzyɛ ɔza lɛ? Nɔ kɔ bumɔɛ za nɔ mɛ, tɛ nɔ za ishu yuyɔ mɛ nɛ wɔnɔ hayɛalɛ.”

Currently Selected:

Marko 9: tcd

Highlight

Copy