Marko 8
8
Yesu Anyunɔ Banɔ Akpã Talɛ
1Nɛ ewi alɛlɛ nɛ mɛ banɔɛzagbla bhlatɔ zɛ ba xogo. Gɛ kɛdɔnyɛdɔ kɛdɛ za balɛ ahwɛ gɛ ba baŋa, Yesu eklu yɛ badɔkpasɛ nɛ ebunɔ ishu klɛ asɛ, 2“Eshutukubui ekum nɛ banɔa nɛ, ewi tata naa gɛ la ba lɛ mɛ ɔbha gɛ kɛdɔnyɛdɔ ma balɛ ahwɛ gɛ la ba ŋa. 3Onu gɛ ɛsɛ ba shɛ vɛ bapam nɛ bubhɛ, bee ti tsi abhɛbhɛ nɛ kidzo nɛ mɛ, alasɛ beteli idekɔ nɛ dze.”
4Yɛ Badɔkpasɛ nɛ be bui lɛ bunu asɛ, “Klɛ nɛ okpukpu kɔɔ nɛ, fakɔ anɔ ebe denɔ kɛŋɛŋa kɔ banɔ kplumua?”
5Yesu ebisi asɛ “gbɛgbɛvu egbaa tɛshɛ gɛ lɛ wɔnɔ ahwɛ?” Be bui lɛ nu sɛ, “Tigene.”
6Etsre banɔɛza nɛ asɛ ba za kesi nɛ kesukpa. Gɛ ayɛkɔ egbaa tigene nɛ ehu ahwɛ, klɛ aya ɛlɛ mɛ, klɛ ayɛkɔ ɛlɛ akpɛ yɛ badɔkpasɛ nɛ ahwɛ sɛ ba ma kɔ banɔ, klɛ balɛ tsyɛ ba bhɛtɛ ansɛ gɛ aɖɔ. 7Kenimɛdzya bhli tili tsyɛ za balɛ ahwɛ, ehu ahwɛ nɛ alɛ tsyɛ kɛtɔkpu klɛ etsre badɔkpasɛ nɛ asɛ ba ma lɛ. 8Banɔ na tã klɛ be xui. Kɛlɛ de badɔkpasɛ na tɔkɛ kiwiliwili nɛ gɛ gɔ nɛ ashwɛ tegene. 9Banyɛ ansɛ akpã talɛ balɛ aza ɔkɛlɛ. Klɛ gɛ akpɛ banɔ nɛ kidzo beke, 10ede woku keniabha opupu nɛ mɛ nɛ yɛ badɔkpasɛ klɛ ba shɛ avɛ Dalmanuta kibee.
11Farisianɛ na ba klɛ ba kpa ebui bisi Yesu. Tɛ ba yɛkɔ efeke yɛ edi nɔ, be bisi yɛ asɛ abhɛtɛ kɛdɔmumɔ tili gɛ kide owũsise. 12Afɔɛ vuu klɛa sɛ, “Kide so pɛ ɔtsɔ̃ nɛ mɛ banɔ nee bisi ebui gɛ eyiyinɔ anɔ sɛ tɛ ba mɔ? Itsre nɔ kɛgba sɛ, ba tɛ ba kasɛ kɛdɔmumɔ kanyaka nɛ kɛlɛ shu.” 13Klɛ ashɛ̃ lɔ balɛ, ede tsoku keniabha opupu nɛ mɛ klɛ atsɔkɛ avɛ ogbigbe bhla nɛa bha.
Farisianɛ Anɛ Heroɖesɛ Bunɛyekedɔ
14Badɔkpasɛ nɛ ba dzɛkɛ ba dɛ yɛkɔ kɛŋɛŋa kanyaka, ɔyɛkɔ dɛ gbɛgbɛvu ɔgbaa torikpo gɛ lɔ za balɛ ahwɛ nɛ opupu nɛ mɛ. 15Yesu etsre alɛ asɛ, “Nɔ dii mɔ.” “No vu awɔ̃hũ nɛ Farisianɛ anɛ Heroɖesɛ bunɛyekedɔ.”
16Ba nyɛna kibui nɛ edi nɛ aglɔ mɛ klɛ ba ɖɔ asɛ, “Alasɛ gɛ gbɛgbɛvu kanyaka kɛma blɔ ahwɛ nɛ so.”
17Gɛ enu balɛ ebui nyɛnyɛnadi nɛ, Yesu ebisi alɛ asɛ, “Kidee so pɛ gbɛgbɛvu nɛ gɛ ma wɔnɔ ahwɛ nɛ kibui no dzi ɔɖɔ? So ɔbɔ nanɔ ɔtsɔ̃ nɛ, nɔ kɔ mɔ, pɛ kibuiesi no bo nu dza? Wɔnɔ idzyi nɛ mɛ aza gɛganɛ atrɔ? 18Anhũ alɛ wɔnɔ ahwɛ flogo pɛ nɔ tɔɔ mɔ, klɛ batɔ alɛ wɔnɔ ahwɛ, pɛ nɔ sɛ no too nu dza? Klɛ nɔ tɔɔ baka? 19Gɛ ɛya gbɛgbɛvu ɛgba titi nɛ ɛkɔ banɔ akpã teti, be wiliwili nɛ ashwɛ tashɛ̃ nɔ tɔkɛ?”
Be bu klɛ nu asɛ, “Kɛfɔntabha.”
20“Klɛ gɛ ɛyɛ ɛgbaa tigene nɛ ɛkɔ banɔ akpã talɛ̃, bewiliwili ashwɛ tashɛ̃ nɔ tɔkɛ?”
Be bu klɛ nu asɛ, “Tegene.”
21Etsre balɛ asɛ, “So nɛ ɔtsiɔ̃ nɛɛ nɔ kɔ nu klɛesi dza?”
Anhũpuelete Teli Anhũdɛdanɛ Nɛ Besaɛda
22Ba ebe ku Besaɛda, klɛ banɔ teli agbanɔ anyɛ awɔ̃hũ pupu elete teli amɛna klɛ ba kpɛ kɛtɔkpu kesi akɔ Yesu asɛ tɛ ehunɔ yɛ. 23Anyɛna awɔ̃hũ pupu elete nɛ ɔhwɛ klɛ agbanɔ yɛ ebu avɛ nɔ ɔmabhli nɛe de. Kibe lɛ nɛ gɛ ebu bututu na kpɛ anyɛ na awɔ̃hũ nɛ mɛ, pɛ atrɔ ahwɛ nɛ yɛa bha nɛ, Yesu ebisi yɛ asɛ, “Ɔmɔ kɛdɔ tili dza?”
24Edi kabha klɛ asɛ, “Ɛmɔ banɔ; baa wɛ̃ anasɛ isi gɛ lɛ gaa fla.”
25Yesu aza trɔ ahwɛ nɛ anyɛ nɛ awɔ̃hũ nɛa bha. Ko klɛ yɛ awɔ̃hũ nɛ adanɛ, yɛ tɛmumɔ nɛ tsodzi ba kɔ yɛ, klɛ amɔ kɛdɔnyɛdɔ wee. 26Yesu asɛ gavɛ bupa mɛ, klɛ etsre yɛ asɛ, “Tɔɔ vɛ Besaɛda.”
Petro Adanɛ Kristo Shu
27Yesu anɛ yɛ badɔkpasɛ nɛ ba shɛ avɛ ɛmabhli nɛ gɛ kana Sizeria Filipi nɛ mɛ. Gɛ baa vɛ nɛ kidzo nɛ mɛ, Yesu ebisi alɛ asɛ, “Anee banɔ baa ɖɔ sɛ inu?”
28Be bu klɛ nu asɛ, “Banɔ teli asɛ Yohanɛsɛ Enikpɛ; be teli asɛ, Eliya; klɛ babhlatɔ teli tsyɛ asɛ, batɔnu nɛ ɔmɛayɛ teli.”
29Ebisi asɛ, “Pɔ wɔnɔ xũ xɔ̃?” “Anee wɔnɔ ɔsɛ inu?”
Petro ebui lɛ nu asɛ, “Wo nu Kristo.”
30Yesu akpɛ balɛ ɔshã sɛ, batɛ ɖɔ yɛ shuibui etsre anɔnyanɔ.
Yesu Aɖɔ Yɛ Titsitsi Nɛ Shuibui Elu
31Ɔkɛlɛ akpa kɛdɔ kasɛ balɛ asɛ, Anɔdzyrame yɛ Eyi alasɛ tɛ atɔ nɛ ebui gelee mɛ klɛ beshishe na tɛ ba yɛkɛ yɛ, kpayaɔzakɔanɔ anɛ ɛshãdɔkasɛ, klɛ kɛba za sɛ tɛ be yi yɛ klɛ nɛ ewi tataede ebe tsodzi alɔ. 32Aɖɔ kaɖɔ adanɛ kibuinyɛbui mɛ, klɛ Petro agbanɔ yɛ eyinɔ kide klɛ ada ka yɛ amɛ.
33Pɔ gɛ Yesu etsyina edi yɛ badɔkpasɛ nɛ, aka Petro amɛ asɛ, “Tsu ɔvɛ nɛ mɛ ɔbha, Satana!” “Kpaya ebui nɛ ama wɔnɔ kɛtɔkpu mɛ, banɔdzyrame ayɛ nɛ ala lɛ wɔnɔ mɛ.”
34Ɔkɛlɛ eklu banɔɛza anɛ badɔkpasɛ nɛ amɛna yɛ ɔbha klɛ asɛ, “Onu anɔ teli asɛ mɛ kede yɛ aba za nɛ, klɛ ashɛ̃nahwɛ yɛ ishu nɛ shu, tɛ yɛnahwɛ ayɛkɔ yɛ butsiosi tɛ aza mɛ kede. 35Alasɛ anɔnyanɔ gɛ aba pɛ sɛ tɛ ebu yɛ ɛkpã nɛ, aba lɛla ɛlɛ, pɔ anɔ nɛ gɛ aba lɛla yɛ ɛkpã nɛ akpɛ mɛ anɛ kibuidzyɔgo nɛ so ebe bui lɛ. 36Kɛdɔ dzyɔgo ɖue anɔ aba mɔ sɛ tɛ kanɔ nɛ petee kedzi yɛa yɛ tɛ ada lɛla yɛ kɛtɔwi? 37Klɛ kidee anɔ aba naa yɛkɔ atsrakɛ yɛ kɛtɔwi nɛ nɔ? 38Onu gɛ mɛ anɛ kibui nɛ ba ku anɔ teli kɛwɛ̃, nɛ aglɔbui anɛ buzizi kanɔa nɛ mɛ, klɛ anɔɔ nɛ tsyɛ ebe ku Anɔdzyrame yɛ Eyi nɛ kɛwɛ̃ onu gɛ ebe ku nɛ yɛ Aka nɛ kabhakpɛkpɛ mɛ ɔplɛnɔ kpayaxwɛdɛ nɛ gɛ balɛ shu bhui.”
Currently Selected:
Marko 8: tcd
Highlight
Share
Copy
Want to have your highlights saved across all your devices? Sign up or sign in
© Ghana Institute of Linguistics, Literacy and Bible Translation
