Mateo 11

Yesu Nɛ Yohanɛsɛ Enikpɛ

1Gɛ Yesu aɖɔaɖɔ kɔ yɛ badɔkpasɛ lɔfɔntɛabha nɛ beke, ashɛ̃ nɛ ɔkɛlɛ atɔnɔ avɛ Galelia ɛma nɛ mɛ ada kasɛ dɔ anɛ kibui nɛ tɛɖuɖɔ.

2Kibe lɛ gɛ Yohanɛsɛ akpasɛ buvu enu kɛdɔnɔ nɛ gɛ Kristo edzia bhɛtɛ, akpɛ yɛ badɔkpasɛ nɛ asɛ, 3tɛ be bisi yɛ asɛ, “Wɔ onu agɛ ba sɛ aba ba, pɛnɔɔ bu di anɔ bhlatɔɛ dzoenu?”

4Yesu ebu klɛ nu asɛ, “No tsodzi ɔvɛ tɛ no do tsre Yohanɛsɛ kɛdɔnɔ nɛ gɛ no nu pɛ nɔɔ mɔ: 5awɔ̃hũ pupuelete nɛ ba kpaa mɔ, akpatanɛ alɔa ga, bunya dzɛdzãelete nɛ banya nɛ ba shɛ, batɔpu nɛ ba kpa nu, betsitsi nɛ ba nyɛmɛ, klɛ ba ɖɔ kibui dzyɔgo nɛ etsre betsyutsyuini. 6Ba yula aanɔ nɛ gɛ ataa wɔlɛ ekoeyi akpɛ mɛ so.”

7Gɛ Yohanɛsɛ badɔkpasɛ nɛ baa shɛ, Yesu akpa kaɖɔ ɖɔ tsre banɔɛza nɛ Yohanɛsɛ shu asɛ: “Kidee no koeyi ɔvɛ ɔdɔ mɔ nɛ ayakpa nɛ mɛ? Ɔsɔɔ gɛ odzi ofu kɛlɛɛ? 8Onu ganɛa na, klɛ kide okoeyi ɔvɛ ɔdɔ mɔ? Anɔ gɛ enyumu kɛdɔ pupudi? Ao, banɔ nɛ gɛ bee nyumu kɛdɔ pupudi nɛ balɛ bekusi nɛ bapa mɛ. 9Kɛlɛ kide okoeyi ɔvɛ ɔdɔ mɔ? Atɔnu ɔdɔ mɔ? Ee, mɛ itsre wɔ, klɛ kɛ dɛ atɔnu tsyɛ. 10Anɔa nɛ shu ba ŋlɔmɛ ebuia nɛ asɛ:

“ ‘Ɛba kpɛ mɛ axwɛdɛ putɔnɔ kɔ nɔ,

yɛ ebe wũse wɔ kidzo nɛ akpɛ otugba kɔ nɔ.’

11Itsre nɔ kɛgba sɛ: Nɛ banɔ nɛ gɛ badzɛ ba mɔ nɛ mɛ akanyaka aka vɛ otugba pɛ agbɛgbla dɛ Yohanɛsɛ Enikpɛ; pɔ agɛ enu ebhliyi nɛ owũsise bukusiɔŋakɔ agbɛgbla dɛ yɛ. 12Denɔ Yohanɛsɛ Enikpɛ nɛ kibe ɔbɔ nanɔ ɔtsɔ̃ nɛɛ, owũsise bukusiɔŋakɔ nɛ yɛkɔ amɛgɛganɛ vɛ otugba, klɛ banɔ amɛgɛganɛ ba nyɛna bulɛ evunɔ. 13Alasɛ batɔnu anɛ Ɛshã nɛ aɖɔɛ lɛ lu flogo pɛ Yohanɛsɛ. 14Klɛ onu gɛ ɔpɛɛ sɛ tɛ ɔyɛkɛ lɛ, yɛ enu Eliya nɛ gɛ aba ba. 15Anɔɔ nɛ gɛ batɔ alɛ yɛ, tɛ enu.

16“Kide mɛ ɛba yɛkɔ tɛmumɔɛ nɛ mɛ ɛsɔnɔ? Be dzi ansɛ bunuvɔɛ gɛ be zhiedzi budzi nɛ mɛ pɛ bee kulu bagɔgɔɛ nɛ asɛsɛ asɛ:

17“ ‘Bu bɔ kizhoe nɛ kɔ nɔ,

klɛ no di yu,

bu zha iyuyodzɛ

klɛ no di bi.’

18Alasɛ Yohanɛsɛ aba nɛ maŋa maŋa ɔdɔgɔsɛ awɛ̃ dɔ, klɛ baa ɖɔ asɛ, ‘Evunɔ ɔfufɔɛkpã.’ 19Anɔdzyrame yɛ Eyi nɛ aba nɛ kɛdɔŋɛŋa nɛ kɛdɔwɛ̃wɛ̃, klɛ baa ɖɔ asɛ, ‘Adɔŋagbla anɛ eluwɛ̃ naa, badɔdzyɔ anɛ buziziabhɛtɛ nɛ ɔbhɛa.’ Pɔ kibuinyinyi bu kasɛ nɛ yɛ axwɛwɛwa nɛ mɛ.”

Butɔ Kɔ Ɛmagbla Nɛ Gɛ Dɛ Tsyina Kitem

20Ɔkɛlɛ Yesu ebu ɛmagbla nɛ mɛ gɛ aba bhɛtɛ yɛ ebuiyiyinɔ anɔ nɛa bha agɔ, alasɛ lɛ di tsyina kitem. 21“Butɔ kɔ wɔ, Korazin! Butɔ kɔ wɔ, Bɛtsaɛda! Otɔsɛ Taɛre anɛ Sidɔn ɛma mɛ ba bhɛtɛ ebuiyiyinɔ anɔa nɛɛ, anlo ɛlɛ xũ nɛ tɛ tsyina etem kukuuku nɛ kpekpeawim zɛza anɛ butɔ sɛsra shu. 22Pɔ itsre nɔ sɛ, kɛ ba za bubɔɛbɔɛ kɔ Taɛre anɛ Sidɔn nɛ kebhuiwi nɛa bha dɛ wɔnɔ. 23Klɛ wɔ, Kapenaum, be be feke wɔ ewunɔ akpɛ kɛlɛɛ mɛ dza? Ao, obo zhi okue si ɔyɛkɔ vɛnɔ odzudzukɔ. Otɔsɛ ebui yiyinɔanɔ gɛ babhɛtɛ nɛ wɔ mɛ edzi asɛ Sodom la bhɛtɛ alɛ, la ta wɔ ɔkɛlɛ ɔbɔ nanɔ oboe wi. 24Pɔ itsre nɔ sɛ, kɛba za bubɔɛbɔɛ kɔ Sodom nɛ kebhuiwi nɛa bha ɔyɛkɔ dɛ wɔ.”

Bumuene Kɔ Bagɛ Baa Tɔɔ

25Nɛ kibe lɛ nɛ mɛ Yesu aɖɔ asɛ, “Ɛkpɛ wɔ, nɛabha, mɛ Aka, owũsise nɛ kesukpa Apalete, alasɛ ɔyɛkɔ ebuia nɛ okpu bebuinyi anɛ badɔkpasɛ, klɛ obua lɛ ɔkasɛ bunuvɔɛ bhli. 26Ee, Aka, alasɛ kɛnɛ nɛ nu wɔ tɛpɛpɛɛ dzyɔgo.

27“Ebui nɛ petee mɛ Aka nɛ atɛ yɛkɔ akpɛ mɛ ahwɛ. Anɔnyanɔ etinyi Eyi gɛ odinu sɛ Aka, klɛ anɔ nyanɔ etinyi Aka gɛ odinu sɛ Eyi nɛ banɔ nɛ gɛ Eyi nɛ apɛa sɛ tɛ ebu yɛ akasɛ.

28“Nɔ ba mɛ ɔkɔ, wɔnɔ ba gɛ nɔɔ tɔ klɛ ebui nɛ adɛ nɔ, tɛ ɛkɔ nɔ bumuene. 29Nɔ yɛkɔ mɛ ɔkpakasi nɛ ɔtrɔ shu tɛ nɔ kpasɛ kɛdɔ denɔ mɛ ɔkɔ, alasɛ ɛyɔ klɛ mɛ dɔfɔ̃ɔ nɛ idzyi mɛ, klɛ nɔ bɔ mɔ omuenekɔ kɔ wɔnɔ atɔwi. 30Alasɛ mɛ ɔkpakasi nɛ ɔlɛ bubɔɛbɔɛ klɛ mɛ kituku nɛ dzi fukuu.”

Currently Selected:

Mateo 11: tcd

Highlight

Copy