Luka 7
7
Keyuotugbani Ovulo Agbɛgbanɔ Tɛyɛyɛkɛŋa
1Kɛbelɛlɛ gɛ Yesu aɖɔ ebuianɛ petee beke kɔ banɔ nɛ tɛ nunu, etsoku Kapenaum. 2Ɔkɛlɛ Keyutugbani ovulo agbɛgbanɛ axwɛdɛ teli gɛ adɛ dɛmɛ nɛ yishu, anya klɛ avɛ otsi kɔ. 3Rɔman anyɛ enu Yesu dɔ, klɛ akpɛ Yuɖa banyɛ shishe teli nɛ yɛ ɔkɔ, sɛ aba tɛ aba plɛnɔ ye axwɛdɛ te alɔ nɛ bunya nɛ mɛ. 4Gɛ Yuɖanɛ na ba Yesu ɔkɔ, bakpɛ kɛtɔkpuesi nɛ tɛbubɔɛ mɛ akɔ yɛ, “Anɔ anɛ alasɛ tɛ ayɛkɛ tɛpɛplɛnɔ nɛ wɔ kɔ, 5alasɛ adɛmɛ bulɔ kɛsukpa nɛ bui klɛ edzu bulɔ oxogokɔvu.” 6So Yesu atɔnɛ alɛ avɛ.
Yɛ ɔkɛlɛ gɛ alɛ nɛ odi dze nɛ bupa nɛ shu gɛ akpɛ yɛ ɛbhɛyalɛ nɛ yɔkɔ sɛ betsre yɛ asɛ: “Apalete, tɔkpɛ ishu tɔ, alasɛ edi dzyenɔ sɛ tɛ ɔba mɛ ovutɔɛ si. 7Kana so gɛ ɛdɛmɔ mɛ ishu tsyɛ sɛ ɛna gɛ ɛba ba wɔ bha. Pɔ ɖɔ kɛ bui, klɛ mɛ axwɛdɛ aba lɔ nɛ bunya nɛ mɛ. 8Alasɛ mɛnahwɛ ɛkpasɛ kabhaŋɛŋae si, ɔplɛnɔ keyutugbani nɛ mɛe si. Itsre ya nɛ sɛ, ‘Vɛ’, klɛ avɛ; klɛ ya nɛ, ‘Ba,’ klɛ aba. Itsre mɛ axwɛdɛ, ‘Bhɛtɛ kɛdɔɛ nɛ,’ klɛ abhɛtɛ lɛ.”
9Gɛ Yesu enu kibui nɛ, ki yinɔ yɛ nɛ anɔ nɛ shu, klɛ etsyina tɔ banɔɛza gɛ balɛ yɛ ede, aɖɔ sɛ, “Itsre nɔ, ɛka mɔ tɛyɛyɛkɛŋa gɛganɛ nɛɛ di nɛ Izraɛl kuratsyɛ.” 10Kɛlɛ banɔ nɛ gɛ ba kpɛ betsodzi avɛ bupa nɛ mɛ gɛ ba damɔ sɛ axwɛdɛ nɛ alɔ.
Yesu Anyɛmɛ Anyɛtsi Yɛ Eyianyɛ
11Nɛlɛe de kɛdɛ dze, Yesu ashɛ̃ avɛ ɔma toli mɛ gɛ be klu asɛ Nain, klɛ yɛ badɔkpasɛ nɛ̀ banɔɛza gelee baza yɛede avɛ. 12Gɛ etsobunɔ ɔma nɛe dunu, betuku anɔ tsitsi gɛ be tuku yɛ ekoeyi—yɛ ko ye nu anyɛ kɔ ye ni, klɛ eni nɛ etsianyɛ. Banɔɛza gbɛgbla denɔ ɔma nɛ mɛ ba lɛ yɛ shu. 13Gɛ Apalete amɔ adzɛ nɛ, yɛ dzyi tsyina nɛ yɛ shu klɛ etsre yɛ asɛ, “Tɔ biyo.”
14Ɔkɛlɛ ewu avɛ kabha ade hunɔ ekpu oputsogbla gɛ be tuku, klɛ ba gɛ tuku ekpu ba dzrɔ. Yesu aɖɔsɛ, “Anyɛnuvɔɛ, ɛtsre wɔ sɛ lɔ!” 15Anɔtsitsi nɛ alɔ azaesi klɛ etenɔ kaɖɔ ɖɔ, klɛ Yesu ayɛkɔ Anyɛnuvɔɛ akɔ ye ni.
16Kifu ku banɔ nɛ petee klɛ be hu Kpaya ahwɛ. “Banɔ nɛ baɖɔ sɛ atɔnu gbla ekoeyi nɛ bulɔɛ shi. Kpaya aba sɛ tɛ aba plɛnɔ yɛ banɔ.” 17Yesu bui bhɛbhɛtɛ nɛ kɛka ganɔ Yuɖea anɛ̀ ɛma nɛ gɛ lɛ kɛkpo nɛ mɛ.
Yesu Anɛ Yohanɛsɛɛ Enikpɛ
18Yohanɛsɛ badɔkpasɛ nɛ tsre yɛ ebuianɛ petee. Eklu balɛ banɔ tɛabha, 19akpɛalɛ nɛ Apalete nɛ ɔkɔ sɛ tɛ be bisi asɛ, “Wɔnu anɔ nɛ gɛ aba ba, pɛnɔ budi dzoenu kɔ anɔ bhlatɔ?”
20Gɛ banɔ nɛ aba Yesu ɔkɔ, baɖɔsɛ, “Yohanɛsɛ Enikpɛ ya kpɛ lɔ nɛ wɔkɔ sɛ bu bisi sɛ, ‘Wɔ nu anɔ nɛ gɛ aba ba, pɛnɔ budi anɔ bhlatɔ dzoenu?’ ”
21Nɛ kɛbelɛlɛ nɛ mɛ Yesu ebu bunya nɛ banɔ gelee mɛ, banya nɛ̀ ɛfufɔɛ zizi, klɛ adanɛ banɔ gelee gɛ balɛ awɔ̃hu epu. 22So ebushunu etsre baxwɛdɛ nɛ asɛ, “Nɔ tsodzi vɛ tɛ nɔ dɔ tsre Yohanɛsɛɛ kɛdɔ nɛ gɛ nɔ mɔ klɛ no nu: Awɔ̃hũ pupuelete ba mɔɛ dɔ, bakpata ba lɔ agɛ, bagɛ bunyadzɛdzã lɛ ba lɛ shu mɛ balɛ shu bhui, bagɛ ba lɛ batɔ epu be nu, betsitsi na nyɛmɛ klɛ ba ɖɔ kibui dzyɔgo nɛ tsre betsutsuɛkpɛ̃. 23Bayula anɔ nɛ gɛ editsodzi nɛ mɛede nɛ mɛ bui bhɛbhɛtɛ shu.”
24Kɛlɛe de gɛ Yohanɛsɛ axwɛdɛ nɛ ashɛ̃, Yesu akpɛ kaɖɔ ɖɛɖɔesi denɔ Yohanɛsɛ shu etsre banɔɛza nɛ asɛ: “Kɛde nɔvɛ odzogbe nɛ mɛ sɛ tɛ nɔ do di? Ɔsɔɔ̀ ɖɛɖama gɛ kɛlɛ fu ɔlɛ odi kɔ nɔ vɛ? 25Odinuana, kɛde odi kɔ nɔ koeyi ɔvɛ? Anɔ nɛ gɛ enyumu apɔtɛ dzyɔgo? Oo, ba gɛ benyumu apɔtɛ gɛ aŋɛŋaedzi pɛ ba bhɛtɛ agbɛgblabui nɛ ekusiupa nɛ mɛ. 26Pɔ kɛde nɔ koeyi nɔ tɛ di? Atɔnu? Eɛ, Itsre nɔ sɛ adɛ atɔnu. 27Ye nu agɛ yɛ shu ebui ba ŋlɔmɛ elu:
“ ‘Ɛba sɛsɛ mɛ axwɛdɛ nɛ putɔnɔ kɔ nɔ,
gɛ ebe ŋuse wunɔɛ dzo ɔkpɛ otugba kɔ nɔ.’
28Ɛtsre nɔ, nɛ ba gɛ badzɛ amɔ nɛ shi anɔnyanɔ ama gɛ etri adɛ Yohanɛsɛ, pɔ agɛ enu ebhliyi nɛ Kpaya bukusi nɛ mɛ etri adɛ Yohanɛsɛ.”
29(Banɔ nɛ petee, badɔdzyɔ nɛ tsyɛ, kɛbe nɛ gɛ benu Yesu ebui nɛ, ba trɔ alɛabha sɛ Kpaya edzo alɛ nu adzyɔgo, alasɛ Yohanɛsɛɛ yɛ akpɛ buni kɔ alɛ. 30Pɔ Farisianɛ anɛ̀ ɛshã lete ba shɛnahwɛ Kpaya tɛtɛtrɔ kɔ balɛ nahwɛ, alasɛ anɛ Yohanɛsɛ yɛ akpɛ buni kɔ alɛ.)
31“Kɔ kide, ɔtsɔnɛ, ɛba ba na tɛmumɔɛ nɛ banɔ nɛ sɔnɔ? Kɛlɛ lɛ la lɛ? 32Ba lɛ anasɛ bunuvɔɛ gɛ bedziesi nɛ kɛdzimɛ klɛ ba kpɛ ogugu eklu ɔhaglɔ:
“ ‘Bu bɔ ezhoe kɔ nɔ,
klɛ nɔ dɛ yu,
bu zha iyuyodzɛ,
klɛ nɔ dɛ biyo.’
33Alasɛ Yohanɛsɛ Enikpɛ aba nɛ kɛdɔ maŋamaŋa ɔdɔgɔsɛ kɛdɔ wũwɔɛ̃, klɛ nɔ ɖɔ sɛ, ‘Ɔfufɔɛzizi ɔlɛ yɛ ahwɛ.’ 34Anɔdzyrame Yi nɛ aba, aŋɛdɔ klɛ awɔ̃ɛ bulu, klɛ nɔɖɔsɛ, ‘Ye nu adɔŋa gbɛgbla anɛ̀ eluwɔɛ, badɔdzyɔ anɛ̀ “banɔzizi” ɔbhɛa.’ 35Pɔ kibuinyinyi kasɛ kɛgbɛagba nɛ yɛ yialɛ petee.”
Adzɛ Zizi Abalɛ Bubɔ Nɛ Yesu Abha
36Ɔtsyɔnɛ Farisianɔ teli eklu Yesu asɛ aba ŋaɛdɔ nɛ yɛ ɔbha, so avɛ Farisianɔ nɛ bupa nɛ mɛ klɛ azaɛwɔ̃ɛ aŋaɛdɔ. 37Gɛ adzɛ teli gɛ azanɛkpa zizi nɛ ɔma lɛlɛ nɛ mɛ enu sɛ Yesu aba ŋaɛdɔ nɛ Farisi bupa nɛ mɛ, amɛna kɛbɔpuli gɛ alabasta bubɔhuhu kpasɛ lɛ mɛ, 38klɛ alɔ kititi nɛ Yesu ede nɛ yɛ butsrukpɔ nɛ shu ebi iyuyo, gɛ yɛ butsrukpɔ nɛ yɔ nɛ ɛwɔ̃mɛ. Ɔkɛlɛ ayɛkɔ yɛ kɛtɔkputɛka etsru ɛwɔ̃mɛ nɛ yɛ butsrukpɔ, eminu lɛ, klɛ ayikɔ bubɔhuhu abalɛ balɛa bha.
39Gɛ Farisianɔ nɛ gɛ eklu Yesu amɔ kibui nɛ, aɖɔ tsre yɛ nahwɛshu sɛ, “Ɔtɔsɛ anɔa enu atɔnu, ete ti anɔ nɛ gɛ ehunɔ yɛ klɛ adzɛ nɔ nɛdi gɛ enu—sɛ enu adzɛ zizi.”
40Yesu ebushunu asɛ, “Simɔn, kibui tili lɛ mahwɛ gɛ ɛba tsre wɔ.”
Aɖɔ asɛ, “Tsremɛ, adɔkasɛ.”
41Yesu aɖɔsɛ, “Banɔ tsɛabha ba dɔɛbhɛ nɛ anɔ teli gɛ apa kɔba kɔ banɔ shu. Anɔ terikpo apa dinario kɛfɔɛfɔ tieti, klɛ abhla nɛ apa afeti. 42Akanyaka adɛ mɔ kɔba abuya kɔ anɔ, kɛlɛ so anyɛ atsa odi akpɛ kɛbhɛ nɛ mɛ kɔ banɔ tsɛabha. Ɔtsɔnɛ anɛ yɛ aba dɛmɛ anyɛ nɛ bui dɛ?”
43Simɔn ebu ishunu asɛ, “Mɛ mɔ sɛ agɛ yɛ dɔɛbhɛ gbɛgbladɛ gɛ ba tsaodi akpɛ.”
Yesu aɖɔsɛ, “Ɔbhui lɛ mɛ lɛ na.”
44Etsyina amɛ atɔ adze klɛ etsre Simɔn asɛ, “Ɔmɔ adzɛ anɛ? Ɛba wɔ bukpa nɛ mɛ. Ɔdɛ kɔ mɛ buni se ɛyɛkɔ plu butsrukpɔ nɔ, pɔ adzɛ ayɛkɔ yɛ ɛwɔ̃mɛ eplu mɛ butsrukpɔ klɛ ayɛkɔ yɛ kɛtɔkputɛka etsru lɛ nɔ. 45Wɔ ɔdɛ mini mɛ butsrɔ, pɔ adzɛ anɛ, denɔ kɛbelɛlɛ gɛ etsoku ɔkɛnɛ, adɛzukɔlɔ mɛ butsrukpɔ mimini. 46Wɔ ɔdɛ balɛ bubɔ trɔ mɛ tɔkpu abha, pɔ yɛ ayɛkɔ bubɔhuhu abalɛ atrɔ mɛ butsrukpɔ abha. 47Klɛso, ɛtsre wɔ sɛ, ba tsaodi akpɛ yɛ ebuizizi nɛ petee mɛ—alasɛ adɛmɛ anɔ kibui mɔmɔ dɛ. Pɔ agɛ ba yɛkɔ kibhliyi etsye adɛmɛ bhliyi.”
48Ɔkɛlɛ Yesu etsre adzɛ nɛ asɛ, “Ba yɛkɔ wɔ ebuizizi nɛ etsye wɔ.”
49Banɔ gugɔɛ ba kpɛesi aɖɔ nɛ aglɔmɛ asɛ, “Anɛ nanɛ gɛ ayɛkɔ ebuizizi etsye?”
50Yesu etsre adzɛ nɛ asɛ, “Wɔ tɛyɛyɛkɛŋa kɛ bu wɔ; vɛ nɛ ishuyuyɔ mɛ.”
Currently Selected:
Luka 7: tcd
Highlight
Share
Copy
Want to have your highlights saved across all your devices? Sign up or sign in
© Ghana Institute of Linguistics, Literacy and Bible Translation
