Luka 12

Ɔshãkpɛkpɛ Nɛ Kemikpɛkpɛ

1Nɛlɛbe, gɛ banɔɛza anasɛ akpã bexogo, so ba ga aglɔ abha, Yesu akpɛ kaɖɔɖuɖɔ oputɔnɔ kɔ yɛ badɔkpasɛ sɛ: “No di shuabha mɔmɔ nɛ Farisianɛ nɛ gɛ be bunɛyekedɔ, gɛ kinu otroebui bhɛbhɛtɛ shu. 2Kɛdɔnyɛdɔ ma gɛ badaɛ lɛ dɔ gɛ kɛtɛ ba wɔɛ̃, ɔdɔgɔsɛ bekpui lɛ gɛ ba tɛ be ti. 3Kibui nɛ gɛ ɔɖɔ nɛ otumu mɛ ba be nuɛ lɛ nɛ keli zɛza mɛ, klɛ kibui nɛ gɛ ɔɖɔ hunihuni kpɛ batɔɛmɛ nɛ ovuede ba baɖɔɛ lɛ denɔ ovutɔ abha.

4“Itsre nɔ, mɛ ɔbhɛalɛ, no ti sifu nɛ banɔ nɛ gɛ ebe yi ishuidzya nɛfu klɛ nɛ kɛlɛede ba tɛbana kɛdɔnyɛdɔ bhɛtɛ. 5Pɔ ɛbakasɛ nɔ ba gɛ balɛ nɔ bɔ sifu nɔ: Sifu nɛ agɛ eyi ishuidzya beke gɛ kemi alɛ yɛ ahwɛ gɛ aba yɛkɔ wɔ atɛ̃ akpɛ kifu nɛ gɛ tɛ ba ni mɛ. Ee, itsre nɔ sɛ, si yɛ fu. 6Anɛ bunyɛkpakpɛ tuti ba dɛ kaple tiabha? Pɔ tierikpoe bui tsyɛ Kpaya adɛ dzɛkɛ. 7Nɛlɛmɛ, kɛtɔkputɛka nɛ gɛ kitsri wɔ ada nɛ mɛ petee kuratsyɛ baklaɛ lɛ. Kifu ta ku wɔ, ɔŋaedzi dɛ bunyɛkpakpɛ gelee.

8“Itsre nɔ sɛ, anɔ nɛ gɛ aba dɛmɛ sɛ yɛ ayɛ enu nɛ́ banɔ amɛ, Anɔdzyrame Eyi tsyɛ aba dɛmɛ sɛ yɛ ayɛ yɛ nu nɛ Kpaya axwɛdɛ nɛ amɛ. 9Pɔ anɔ nɛ gɛ adɛ yɛkɛ mɛ nɛ́ banɔ amɛ ba dɛ yɛkɛ yɛ tsyɛ nɛ́ Kpaya axwɛdɛ nɛ amɛ. 10Klɛ anɔnyanɔ gɛ aɖɔ kibui zizi nɛ Anɔdzyrame Eyi nɛ shu ba ba yɛkɔ etsye yɛ, pɔ anɔ nɛ gɛ aɖɔ kibui zizi nɛ Ɔfufɔɛ Dzyɔgo nɛ shu ba tɛ ba yɛkɔ etsyɛ yɛ.

11“Onugɛ ba mɛna nɔ nɛ́ ɛxogokɔvu nɛ mɛ, bekusi anɛ́ ɛshãlete ɔkɔ, nɔ tɛganawɔ̃ nɛ kana gɛ nɔ bɔ bushunu ɔdɔgɔsɛ kɛ gɛ nɔ bɔ ɖɔ, 12alasɛ Ɔfufɔɛ Dzyɔgo nɔ bɔkasɛ nɔ kibe lɛlɛ kɛ gɛ nɔ bɔ ɖɔ.”

Kɛkpalɛ Nɛ Agã Ehueyielete Shu

13Anɔ teli nɛ banɔɛza nɛ shi aɖɔ tsre Yesu asɛ, “Adɔkasɛ, tsre madzya tɛ ama kɛdɔ ɔŋakɔ nɛ mɛ nɛ mɛ.”

14Yesu ebui lɛ nu sɛ, “Anyɛ, ane yɛ edzu mɛ ebhuiklu pɛnɔ eboevu nɛ wunɔɛ shi?” 15Kɛlɛ aɖɔ tsre alɛ sɛ, “Nɔ di mɔ! Nɔ zanawɔ̃ nɛ kɛdɔ gbɛgbla pɛpɛɛ shu, anɔdzyrame ɛkpã anɛ kɛdɔ gelee zɛza anɔahwɛ mɛ kɛlɛ.”

16Klɛ akpɛ kɛkpalɛ nɛ akɔ alɛ sɛ, “Ehwelete teli kesukpa gɛ kɛdɔ pɛ̃ nɛ kalɛabha kɔ yɛ. 17Avɛ ishu mɛ, ‘Kɛde mɛ ɛba bhɛtɛ? Ɔzakɔ vɔ ma mahwɛ gɛ ɛba bala mɛ kɛdɔ nɛ gɛ ɛtsu.’

18“Ɔkɛlɛ aɖɔ sɛ ‘Kɛdɔɛ nɛ mɛ ba bhɛtɛ. Ɛba yɛ mɛ iwule klɛ ɛba bhɔ ɛgbɛgbla klɛ ɔkɛlɛ mɛ ba bala mɛ dɔ gɔgɔɛ petee anɛ kɛdɔ gugɔɛ kanyaka. 19Klɛ ɛba ɖɔ tsre ishu sɛ, “Kɛdɔ dzyɔgo gelee lɛ wɔ awhɛ gɛ kɛba za agɔ gelee. Yɛ kɔ kpã bubuɛbɔɛ, ŋɛdɔ, wɔɛ̃dɔ tɛ ɔmɔ same.” ’

20“Pɔ Kpaya etsre yɛ asɛ, ‘Agã wɔ nu! Elishianɛ ɛba yɛkɛ wɔ ɛkpã nɛ wɔ ahwɛ. Kɛlɛ ane yɛ aba yɛkɛ kɛdɔ nɛ gɛ ɔbala lu kɔ ishu?’

21Kɛlɛ Yesu asɛ “Kana lɛ ba za nɛ̀ anɔ kanyaka gɛ abala kɛdɔ lu kɔ shu pɔ adɛ mɔ ehueyi ɔvɛnɔ Kpaya kɔ.”

To Tsi Shu

22Kɛlɛ Yesu etsre yɛ badɔkpasɛ nɛ sɛ: “Kɛlɛso itsre nɔ sɛ, nɔ tɔ tsishu nɛ wunɔ kpã, kɛ dɔ gɛ nɔ bɔ ŋa, pɛnɔ denɔ wunɔ shuidzya, kɛde gɛ nɔ bɔ nyumu. 23Ɛkpã pɛ̃ dɛ kɛdɔŋɛŋa, klɛ ishuidzya pɛ̃ dɛ apɔtɛ. 24Nɔ di bahwalã: Bata ɖɛ dɔ, ɔdɔgɔsɛ be tsui dɔ, kɛdɔ balakɔvu ma balɛ ahwɛ pɛ ɔdɔgɔsɛ iwule, pɔ tsyɛ Kpaya anyɔnɔ alɛ. Nɛ kɛlɛ lɛ nɔ ŋaedzi ɔdɛ buzhuɔɛ! 25Ane nɛ wunɔɛ shi ge ebui la tɔ yɛ gɛ abana ɔɖɔtɛta torikpo ayɛkɔ aplɛnɔ yɛ kpã. 26Kibhliyi nɛ tsyɛ gɛ nɔ tɔ na bhɛtɛ, kɛdeso gɛ nɔ tsi shu nɛ ebui gugɔɛ nɛ shu?

27“Nɔ di kana gɛ bakpɔkɔɛ nɛ she. Ba ta wa kɛxwɛ pɛ ɔdɔgɔsɛ beyu kɛpɔtɛ. Pɔ itsre nɔ sɛ, Solomon yɛ tɛpupudi petee adɛ nyumu dɔ anasɛ kpɔkɔɛ fufu torikpo tsyɛ. 28Onugɛ kana Kpaya enyumuɛ dɔ akɔ tɛwa nɛ ayakpaɛ mɛ, gɛ kɛlɛ ɔkɛnɛ obonɛ, klɛ kivu ayikɔɛ lɛ akpɛ kifui mɛ, kɛlɛ lɛ ba za gelee dɛ sɛ ebe nyumui dɔ kɔnɔ, O wɔ tɛyɛyɛkɛŋa bhli elete! 29Klɛ tɛyɛkɔ wɔ idzyi ɔtrɔ kɛdɔ gɛ ɔbɔ ŋa pɛnɔ ɛbawɔɛ̃, tɛ tsishu kɔɛ lɛ. 30Alasɛ ibudi kanɔa banɔ balɛ akpatɔnɔ ebuia nɛ di petee, klɛ wunɔ Aka enyi asɛ nɔ pɛɛ kɛdɔɛ nɛ. 31Pɔ pɛɛ yɛ bukusiɔŋakɔ, klɛ ba bayɛkɔ anɛ nɛtsyɛ akɔ wɔ.

32No ti sifu, bagɛha bhli, alasɛ kɛku wɔ Aka awɔ̃ sɛ tɛ akɔ wɔ bukusiɔŋakɔ. 33Dɛ wɔ kɛdɔnyɛdɔ tɛ ɔyɛkɔ kɔ betsyutsyuini. Nɔ bala akpɛtɛ gɛ la tɛ ba tsa kɔ ishu, bala wɔ ehoeyi nɛ owũsise gɛ kɛdɔ tɛ ba beke nɛ ɔlɛ mɛ di, ɔkɛlɛ gɛ bezi be ti be tsobunɔ nɛ gɛ bugɔɛ tɛ batã lɛ. 34Alasɛ ɔkɛlɛ gɛ wɔ ehoeyi na lɛ, ɔkɛlɛ wɔ idzyi tsyɛ alɛ.

Awɔ̃ Zɛza

35“Nyumui dɔ tɛ ɔbala kɔ kɛxwɛwɛwa tɛ nɔ kɔ wɔnɔ bakanɛgbɛ nɛ aza tã, 36anasɛ banɔ gɛ bepo balɛ apalete sɛ tɛ ede adzɛ gbɛgbanɛ kɛdɔ ŋakɔ ba, kɛlɛ so onugɛ aba klɛ ebho opupu ba ba nalɔ zia adanɛ akɔ yɛ. 37Kɛ ba dzi kibui dzyɔgo kɔ baxwɛdɛ nɛ gɛ ba lɛ apalete aba mɔalɛ sɛ belinawɔ̃ epo yɛ gɛ aba. Itsre nɔ kɛgbɛagba, aba nyumu dɔ yɛnahwɛ tɛ adɛ kɛxwɔɛ, ebe tsrea lɛ sɛ bada za kesi nɛ kɛdɔŋa kɔ klɛ aba ba klɛ aba ba dɛ axwɛ kɔa lɛ. 38Kɛ ba pɛ̃ kɔ baxwɛdɛ nɛ gɛ balɛ apalete aba mɔ sɛ beli nɛ awɔ̃, kibenyɛbe onugɛ aba, nɛ elishimɛ, ɔdɔgɔsɛ olizatɔ aba tsyɛ aba mɔ alɛ. 39Pɔ nɔ nu kibui niesi: Onugɛ apalete enyi ɔɖa nɔ nɛmɛ gɛ bezi na ba ba, atɛ ba shɛ̃nahwɛ bupa nɛ shu elu asɛ bezi nɛ ba bɛ tsoku. 40Wunɔ tsyɛ nɔ za tɛbɛbalɛmɛ, alasɛ Anɔdzyrame Yi aba ba nɛ ɔɖɔ nɛmɛ gɛ nɔ tɛ bo ti.”

41Petro ebisi asɛ, “Apalete, blɔ wɔ kpɛ kɛkpalɛ nɛ ɔkɔ, pɛnɔ banɔ nɛ petee?”

42Apalete ebu shunu asɛ, “Ane ɔtsɔnɛ gɛ enu ebuiti nɛ axwɛdɛdɛ mɛ nɛ gɛ ba bayɛkɛ yɛabhaŋa, gɛ apalete nɛ ayɛkɔ edzu yɛ baxwɛwa nɛ nu tɛ akɔ alɛ kɛdɔŋɛŋa kɔba nɛ́ kibe dzyɔgo? 43Kɛba pɛ̃ kɔ axwɛdɛ alɛlɛ gɛ apalete naba mɔ sɛ aza wa axwɛ flogo gɛ abe tsodzi aba. 44Itsre nɔ kibui gbɛagba, aba yɛkɔ axwɛdɛ alɛlɛ edzu yɛ axwɛ nɛ petee nu. 45Pɔ kɛbɛlɛ mɛ sɛ axwɛdɛ aɖɔ tsre yɛ shu asɛ, ‘Mapalete aba yɛ kɛ kɛbe dzidze flogo gɛ aba ba,’ klɛ etenɔ banyɛ axwɛdɛ anɛ badzɛ axwɛdɛ nɛ tu klɛ gɛ ba wa axwɛ klɛ aŋa, awɔɛ klɛ ebuku. 46Apalete kɔ axwɛdɛ aba ba nɛ kiwui tili gɛ edulu awɔ̃ nɛ yɛ shu klɛ nɛ ɔɖɔ nɛ mɛ gɛ lɔ ma tɛtiti mɛ. Ebe tẽ yɛ efli klɛ ebe lu yɛ nɛ bagɛ ba dɛyɛkɛŋa nɛ ɔbha.

47“Axwɛdɛ alɛlɛ gɛ enyi yɛ apalete nɛ tɛpɛpɛ klɛ adɛ bala ɔdɔgɔsɛ adɛ bhɛtɛ atrɔ kɛgɛ yɛ apalete nɛ apɛɛ ba be tui yɛ nɛ̀ ekpli gelee. 48Pɔ agɛ etinyi klɛ abhɛtɛ ebui gɛ kɛdzyenɔ batɔ tɛtɛta ba be tui yɛ nɛ ekpli bɔɛ ko. anɔnyanɔ gɛ ba kɔ yɛ dɔ gelee, ba bapɛ kɛdɔ gelee denɔ yɛ ɔkɔ, klɛ anɔnyanɔ gɛ ba yɛkɔ kɛdɔgelee akpɛ yahwɛ, ba be bisi kɛdɔ gelee edenɔ yɛ ahwɛmɛ.

Anɛ Ishuyuyɔ Pɔ Tɛpupɔɛhle

49“Ɛba sɛ tɛ ɛyɛkɔ kifu mɛna kesukpa nɛabha, klɛ kana gɛ ɛpɛɛ lɛ kɛ flɛ tãɛfu! 50Pɔ bunikpɛkpɛ lɛ sɛ tɛ ɛyɛkɛ, klɛ kɛtrɔ mɛabha ɔdɔtɔnɔ kibelɛlɛ mɛ gɛ ɛyɛkɛ lɛ beke! 51No di sɛ ishuyuyɔ mɛ mɛna kesukpa nɛabha? Ao, itsre nɔ, pɔ tɛpupɔɛhle mɛ mɛna. 52Denɔ ɔtsɔnɛ ɔvɛnɔ banɔ tieti nɛ kɛpatsu tirikpo mɛ ba ba pɔ́ aglɔ mɛ, tiata nɛ tiabha shu klɛ tiabha nɛ tiata shu. 53Ba ba pɔ́ aglɔ mɛ, aka aba lɔ kititi nɛ eyi shu klɛ eyi nɛ aka shu, klɛ eni nɛ eyiadzɛ shu klɛ eyiadzɛ nɛ eni shu, andze nɛ eyinidze shu klɛ eyinidze nɛ andze shu.”

Ebe Nɛesi Bubu

54Yesu etsre banɔɛza nɛ asɛ: “Kibe nɛ gɛ nɔ mɔ ɔmunɔ gɛ lɔ lɔwu nɛ kiwui ɔyɛkɔ, nɔ ɖɔ zia sɛ, ‘Sɛbha badɔ,’ klɛ àdɔ. 55Klɛ kibe nɛ gɛ ozhizhi lɛ fu, nɔ ɖɔ sɛ, ‘Kanɔɛmɛ baza huhuhu,’ klɛ kaza. 56Itroelete! Nɔ nyi kana gɛ nɔ bɔ bu kesukpa anɛ̀ owũsise mɛ tɛzɛzae si. Kide so gɛ nɔ tɛ nyi kana gɛ nɔ bɔ bu ɔtsɔnɛ ebui nɛesi?

57“Kide so gɛ nɔ tɔ klu kebhui kɔ ishu kɛ gɛ nu kɛdzyɔgo? 58Anasɛ gɛ ɔvɛ kebhui mɛ nɛ wɔ apɛplɛnɔ, wlãkɛ gɛganɛ tɛ ɔbhɛtɛ terikpo nɛ yɛ nɛ́ kidzo nɛ mɛ, ɔdɔgɔsɛ aba gbanɛ wɔ avɛnɔ kibuimɛ klɛ ebhuiklu aba yɛ kɔ wɔ akɔ awuitutu elete gɛ yɛ tsye aba tɛ kpɛ wɔ vu. 59Itsre nɔ sɛ, nɔ tɛ bu koeyi nɛ buvu ɔdɔtɔnɔ kibenɔ nɛ gɛ ɔbuya kɛbhɛ nɛ petee gɛ ɔdɔ.”

Currently Selected:

Luka 12: tcd

Highlight

Copy