Luka 11

Yesu Kɛdɔkɛkase Nɛ Kpayakuklu Shu

1Kiwui tirikpo Yesu eklukpaya nɛ ɔkɔ toli. Gɛ abhɛtɛ beke, yɛ badɔkpasɛ terikpo etsre yɛ asɛ, “Apalete, kasɛ lɔ kpayakuklu, anasɛ gɛ Yohanɛsɛ akasɛ yɛ badɔkpasɛ.”

2Aɖɔ tsre alɛ sɛ, “Onugɛ oklukpaya, ɖɔsɛ:

“ ‘Aka,

wɔe nyi mɛ bhui,

wɔ bukusi ɔŋakɔ nɛ ɔba.

3Kɔ lɔ kiwuinyɛwui dɔ ŋɛŋa.

4Yɛkɔ blɔ ebuizizi ɔtsye lɔ,

alasɛ bulɔ tsyɛ buyɛkɔ tsye anɔnyanɔ yɛ buizizi gɛ babhɛtɛ mɛna lɔ shu.

Klɛ tɛgbanɛ lɔ kpɛ tɛfifekedi mɛ.’ ”

5Kɛlɛ etsre alɛ sɛ, “Onugɛ ɔbhɛa lɛ wunɔ mayɛ teli ahwɛ, klɛ avɛ yɛ ɔkɔ elishi teti mɛ klɛ aɖɔ sɛ, ‘Ɔbhɛa, pa gbɛ̃gbɛvu ɛgba tɛta kɔ mɛ, 6alasɛ mɔ bhɛya teli gɛ agɛdzo aba mɔ kɔ klɛ kɛdɔnyɛdɔ ma mahwɛ gɛ ɛba kɔɛ yɛ sɛ aŋa.’

7Kɛlɛ agɛ akpasɛ kɛmɛnɛmɛ asɛ, ‘Tɔ kpɛ mɛ nuhu. Opupu nɔ tɛ da kukuku, klɛ me beyialɛ nɛ nawɔ̃sɔ kesi nɛ mɔ bha. Ɛtɛ ba na lɔ gɛ ɛba kɔ wɔ kɛdɔnyɛdɔ.’ 8Itsre nɔ sɛ, nɛ kɛlɛmɛ gɛ atɛ ba na lɔ tɛ akɔ yɛ gbɛ̃gbɛvu alasɛ enu yɛ ɔbhɛa, pɔ tsyɛ avɛ otugba nɛ kɛdɔ bibisi nɛ mɛ so aba lɔ klɛ aba kɔ yɛ kɛpɛɛ gɛ apɛɛ.

9“Kɛlɛso itsre nɔ sɛ: Bisi klɛ ba ba kɔ nɔ, pɛɛ klɛ nɔ bɔ mɔ, bho opupu klɛ ba ba danɛ kɔ nɔ. 10Alasɛ anɔnyanɔ gɛ ebisi aba yɛ kɛ, agɛ apɛɛ aba mɔ, klɛ kɔ agɛ ebho opupu, ba ba danɛ ɔlɛ.

11Baka ɖuweɖu, onugɛ wunɔ yialɛ bisi kɛnimɛdzya, gɛ aba kɔ yɛ eblidzya nɛ kɛlɛ ɔzakɔ? 12Pɛnɔ ebisi kidze, gɛ aba kɔ yɛ katabuadzɔ? 13Kɛlɛalɛ Onugɛ wɔ nɛlɛmɛ, onu anɔ kpã, tii kɛkɔ nɛ gɛ ɔbɔ kɔ wɔeyia lɛ kɛdɔ dzyɔgo, kɛlɛ wɔ Aka nɛ owũsise aba kɔ Ɔfufɔɛ Dzyɔgo bagɛ be bisi yɛ!”

Yesu Anɛ Ɔfufɔɛkpã Ekusi

14Yesu àkɛka ɔfufɔɛkpã nɛ omumu toli mɛ. Gɛ ɔfufɔɛkpã nɛ koeyi ɔshɛ̃, anɔ nɛ gɛ eku omumuu nɛ aɖɔaɖɔ, klɛ kɛbhɛtɛ banɔɛza nɛ bi. 15Pɔ be teli nɛ balɛ mɛ aɖɔ sɛ, “Beelzebub, Ɛfufɔɛ ekusi ayɛkɔ akɛka ɛfufɔɛ kpã koeyi nɔ.” 16Ba bhlatɔ feke yɛ edi nɛ tɛbibisi mɛ sɛ abhɛtɛ kibuiyinɔanɔ denɔ owũsise.

17Yesu eti balɛ atɔkpuɛmɛ ebui klɛ etsre alɛ sɛ: Bukusiɔŋakɔ kanyaka gɛ bu yɛ̀ bupɛ tubha nɛ aglɔ shu bu bawɔlɛ, klɛ onu gɛ bupa tuli lɔ kɛtiti nɛ aglɔ shu bu bayɛ. 18Onugɛ Satan alɔɛtiti nɛ yɛnahwɛshu, kɛlɛ yɛ bukusi baza kititi? Ɛɖɔ kibui nɛ, alasɛ nɔ ɖɔ sɛ ɛyɛkɔ Beelzebub ɛkɛka ɛfufɔɛ kpã bu nɔ. 19Ɔtsɔnɛ onugɛ ɛyɛkɔ Beelzebub ɛkɛka ɛfufɔɛ kpã bu nɔ, bagɛ balɛ wunɔe de kide bayɛkɔ akɛka ɛfufɔɛkpã nɛ ebu koeyi nɔ? So nɛ ɔkɛlɛ ba bedzi wunɔ bebhuiklu. 20Pɔ onugɛ ɛ́kɛka ɛfufɔɛkpã nɛ Kpaya wɔɛ, kɛlɛalɛ Kpaya kusi bu tɛ́ ba kɔ nɔ.

21“Onugɛ anɔ gɛganɛ, abala shu nɛ itu, gɛ ɛ̀po yɛnahwɛ bupa, yɛ ahwɛmɛ dɔnyɛdɔ shu yɔ. 22Pɔ onugɛ anɔ tɛli agɛganɛ adɛ aba kpa keyu nɛ yɛ klɛ aba ŋa yɛabha, aba nyana yɛ itu nɛ gɛ ɛlɛabha aka klɛ aba ma yɛ kɛdɔ nɛ mɛ.

23“Anɔ nɛ gɛ ama plɛnɔ mɛ alɔɛtiti nɛ mɛ shu, klɛ anɔ nɛ́ gɛ adɛ gbaxogo nɛ mɛ, apɔɛhle.

24Kibe nɔ nɛ gɛ ɔfufɔɛ kpã okoeyi nɛ anɔ mɛ, lɔ dɔ nyɔ nɛ ɔkpɛkpã kɔ gɛ lɔ pee omuenekɔ klɛ lɔ dɛ mɔ omuenekɔ. Ɔkɛlɛ lɔ bɔ ɖɔ sɛ, ‘Ɛba tsodzi ɔvɛ bupa nɛ mɛ gɛ ɛshɛ̃.’ 25Kɛbelɛlɛ nɛ gɛ lɔ vɛ lɔ, bɔ mɔ sɛ ba gba bupa nɛ mɛ lu bu bhui klɛ bu lɛ mɔmɔ. 26Ɔkɛlɛ lɔ bɔ vɛ klɛ lɔ dɔ yɛkɔ ɛfufɔɛ kpã tigene bhlatɔ gɛ ɛlɛtɔkpuimɛ gɛganɛ dɛ ɔlɛnahwɛ, klɛ lɛ da za ɔkɛlɛ. Klɛ anɔ alɛlɛ nɛ kpã zɛza gugɔɛ nɛ mɛ lɛ tsɔmɔ dɛ kana gɛ lɛza putɔnɔ.”

27Gɛ Yesu aɖɔ ebuia nɛ, adzɛ teli nɛ banɔɛza nɛ shi akpɛ ogugu gɛganɛ asɛ, “Bayula eni nɛ gɛ amɔ wɔ klɛ anyunɔ wɔ.”

28Ebuilɛnu asɛ, “Bayula bagɛ be nu Kpaya bui klɛ ba bhɛtɛ atrɔ kɛlɛ abha.”

Yona Yɛ Dɔmumɔ

29Gɛ banɔɛza nɛ kpetrɔ, Yesu aɖɔ sɛ, “Kɛnɛ kɛlɛ nu kɛtɔkpuɛ mɛ gɛganɛ tɛmumɔ. Be bisi ebuiyinɔanɔ dɔmumɔ, pɔ ba tɛ ba kɔ kɛkanyaka ɔdɛ Yona yɛ. 30Anasɛ gɛ Yona bui nɛ dzi kibuiyinɔanɔ kɔ Ninɛveanɛ, kana ke Anɔdzyrame Eyi nɛ yɛ baza kɔ wunɔ tɛmumɔɛ. 31Ozhizhi Badzɛekusi aba lɔnɛ kebhuikuklu nɛ tɛmumɔanɛ banɔ klɛ ebe bua lɛ pɔ, alasɛ ede kesukpa nɛ obekekɔ tɛ atatɔ nɛ Solomon kibuinyinyi, klɛ ɔtsɔnɛ agɛ ye triadɛ Solomon yɛ alɛ ɔkɛnɛ. 32Nineve banɔ ba lɔ aza nɛ kɛbhuikuklu nɛ tɛmumɔɛnɛ be be bualɛ pɔ, alasɛ balɛ be titsyinɛtem nɛ Yona kibui ɖuɖɔ nɛ mɛ, klɛ ɔtsɔnɛ agɛ adɛ Yona alɛ ɔkɛnɛ.

Kanɛgbɛ Nɛ Kɛdɔabha

33Anɔ etideke kanɛgbɛ gɛ ayɛkɔ akpɛ ɔkɛlɛ gɛ ebe kpu, ɔdɔgɔsɛ ada yɛkɔ akpɛ ketsukpue si. Kɛlɛmaza aba yɛkɔ trɔ kɛdɔabha, sɛ tɛ banɔ nɛ gɛ ba ba bupa nɛ mɛ tɛ ba mɔ kifu. 34Wɔ kɛwɔ̃hu kɛlɛ nu wɔ ishu nɛ kanɛgbɛ. Kɛbenɔ nɛ gɛ wɔ awɔ̃hu na pɛ̃, wɔ anɔ petee yuku nɛ kifu. Pɔ kɛbenɔ nɛ gɛ lamɛtã, wɔ anɔ nɛ petee yuku nɛ otumu. 35Kɛlalɛ di lɔkɔ sɛ kifu nɛ gɛ kɛ lɛ wɔ mɛ kɛtɛdzi otumu. 36Kɛlɛso, onugɛ wɔ anɔosi nɛ petee yuku nɛ kifu, klɛ wɔ kapɛnyapɛ adɛ dɔ otumu, kɛ ba tã petee, anasɛ kɛbenɔ nɛ gɛ kanɛgbɛ fu deke trɔ wɔabha.”

Batɔ Tiehlo

37Kɛlɛbe nɛ gɛ Yesu aɖɔ kaɖɔ nɛ beke, Farisi eyi teli eklu Yesu sɛ aba ŋaɛdɔ nɛ yɛ, so avɛ klɛ ada za kɛwɔ̃ɛ nɛ kɛdɔ nɛ ɔŋa kɔ. 38Pɔ gɛ Farisieyi, amɔ sɛ Yesu ediplu ahwɛ eputɔnɔ flogo gɛ etenɔ kɛdɔ nɛ ŋa, kɛbhɛtɛ yɛ bi.

39Ɔkɛlɛ Apalete nɛ etsre yɛ asɛ, “Ɔtsɔnɛ ɔkɛlɛ, wɔnɔ Farisianɛ no tsi bũtse nɛ busugba nɛede, pɔ wunɔ kɛmɛ nɛ mɛ kɛyuku nɛ kɛdɔ gbɛgbla pɛpɛɛ anɛ kɛtɔkpu mɛ gɛganɛ. 40Wunɔ bagã banɔ nɛ nu! Anɛ agɛ abhɛtɛ kede yɛ ke yɛ abhɛtɛ kɛmɛnɛmɛ tsyɛ? 41Pɔ yɛ kɔ kɛ gɛ kpasɛ kesugba nɛmɛ ɔkɔ betsyuitsyuini klɛ kɛdɔnyɛdɔ shu ba bhui kɔ wɔ.

42“Butɔ kɔ wunɔ Farisianɛ, alasɛ nɔ kɔ Kpaya kɛdɔ tirikpo nɛ kɛfɔnɛmɛ nɛ wunɔ ehoeyi anɛ buya mɛdɔ, pɔ nɔ shɛnahwɛ kibui gbɛagba nɛ Kpaya bui dɛdɛmɛnɔ lu. Nɔ tɔ yɛkɔ kɛgɔgɔɛ nɛ ɔkpɛ tɛbhɛbhɛtɛmɛ tɛ nɔ tɛ shɛnahwɛ kɛ tɛtɔpu nɛ tsyɛ shu.

43“Butɔ kɔ wɔnɔ Farisianɛ, alasɛ nɔ pɛɛ ɛzakɔ ɖɛɖamadɛ nɛ ɛxogokɔvu nɛ mɛ nɛ tɛsɛsɛnɔ nɛ budzi nɛ mɛ.

44“Butɔ kɔ nɔ, alasɛ nɔ lɛ anasɛ idzre gɛ ba dɛ kpɛ lɛ kɛxãwũ, gɛ banɔ aga ɛlɛabha nɛ́ matimati mɛ.”

45Ɔshã adɔkasɛ teli ebulɛnu akɔɛ yɛ asɛ, “Adɔkasɛ, onugɛ ɔɖɔ ebuanɛ, klɛ ɔkula lɔ tsyɛ.”

46Yesu ebuilɛnu asɛ, “Klɛ wunɔ ɛshã badɔkasɛ, butɔ kɔ nɔ, alasɛ nɔ trɔ banɔ etuku gɛ la lupu gɛ kɛ lɛ gɛganɛ kɔ alɛ sɛ tɛ bana, klɛ wunɔ nahwɛ nɔ tɛ bɔyɛkɔ kɛwɔɛ tirikpo tsyɛ ɔplɛnɔ alɛ nɔ.

47“Butɔ kɔ nɔ, alasɛ nɔ bu idzre kɔ batɔnu, klɛ wunɔ bakashishe alɛ balɛ yi alɛ. 48Kɛlɛso nɔ mɔɖɔ kasɛ sɛ nɔ trɔ ahwɛ nɛ kɛ gɛ wunɔ bakashishe alɛ babhɛtɛ nɛabha, be yi batɔnu, klɛ nɔ kpɛ balɛ idzre. 49Ebuia nɛ so, Kpaya nɛ yɛ ebuinyinyi mɛ ɖɔ sɛ, ‘Ɛba sɛsɛ alɛ batɔnu anɛ banɔkpɛkpɛ, beteli gɛ ba be yi klɛ bagugɔɛ ba kpatɔnɔ alɛ.’ 50Kɛlɛso tɛmumɔɛ nɛ banɔ ba be bisi denɔ balɛ ahwɛ mɛ batɔnu petee dzyosu gɛ bezi denɔ kanɔ nɛ kesikpɛkpɛ, 51denɔ Abel dzyosu nɛabha ɔdɔtɔnɔ Zakaria gɛ be yi nɛ busɔlɛvumokpo nɛ obhubhui kɔ nɛ katsya. Ee, ɛtsre nɔ, tɛmumɔɛnɛ ba ba nyɛna nɔ kɔ ebuianɛ.

52“Butɔ kɔ ɛshã badɔkasɛ, alasɛ nɔ nyɛna kibui titi kedunaɖɛ ayɛkɔ ɔshɛnɔ. Wunɔ nahwɛ nɔ dɛ tsoku klɛ nɔ dɛ kɔɛdzo sɛ bagɛ ba pee asɛ tɛ betsoku tsyɛ tɛ be tsoku.”

53Gɛ Yesu ashɛ̃ nɛ ɔkɛlɛ, Farisianɛ anɛ́ eshã badɔkasɛ betenɛ kɛtiti lɔ nɛ yɛ shu gɛganɛ klɛ ba yɛ kɔ ebui bibisi atrɔ yɛ, 54bepo sɛ tɛ bɛ vu yɛ nɛ kibui tili gɛ aba ɖɔ nɛ shu.

Currently Selected:

Luka 11: tcd

Highlight

Copy