Yohanɛsɛ 12

Ba Balɛ Bubɔ Nɛ Yesu Abha Nɛ́ Betani

1Agɔ ewui tehlo tɛ ba ŋa Tɛfɛflawui, Yesu ede ku Betani, nɛ ɔkɛlɛ gɛ Lazarus alɛ, agɛ Yesu anyɛmɛ denɔ bekpu mɛ. 2Nɛ ɔkɛlɛ batɔɛdɔ aŋaɛwui sɛ tɛ bayɛkɔ akpɛ Yesu nyi nɛabha. Mata adɛ axwɛ, nɛlɛmɛ Lazarus aza kesi wɔɛ̃ nɛ kɛdɔnɛ ɔŋakɔ. 3Ɔkɛlɛ Maria ayɛkɔ bubɔ huhu kɛbɔpuli tirikpo gɛ buŋaedzi, abalɛ Yesu butsrɛkpɔ nɛabha kɛlɛ ayɛkɔ yɛ kɛtɔkputɛka etsuru butsrɛkpɔ. Klɛ bupa nɛ mɛ petee yuku nɛ bubɔ nɛ fufa.

4Pɔ yɛ adɔkpasɛ terikpo, Yuɖas Iskarɔtɛ, gɛ ebe dzi agɛ ába kpɛ yɛ ahwɛ nɛ adɛ dɛmɛ. 5“Kɛde so gɛ bata yɛkɔ bubɔ nɛ adɛ klɛ bata yɛkɔ kɔba nɛ akɔ betsyutsyuini? Bu lɛe dzi ŋɛŋa nɛ kɛgɔ zɛzɛ bhɛ, ” 6Adɛ ɖɔ kibui nɛ alasɛ ebu kitsyutsyuikpɛ̃ nɛ shu so, pɔ alasɛ edzi ezi, anasɛ agɛ edi kɔba ɔkpɛtɛ nɛabha, aganɛ ishu aplɛnɔ nɛ kɔba gɛ ba kpɛ ɔlɛ mɛ.

7Yesu aɖɔ sɛ, “Shɛnahwɛ adzɛ nɛ shu. Kinu tɛtutrɔ sɛ tɛ abala bubɔ nɛ elu kɔ kiwi nɔɔ nɛ gɛ ba bá vubɔ mɛ. 8Kibenyɛbe kitsyutsyuikpɛ̃ ba za wunɔ ɛshi, pɔ nɔ tɛ bɔ mɔ mɛ Kibenyɛbe.”

9Nɛ kɛlɛ mɛ banɔɛza gbla tili gɛ nu Yuɖanɛ na ba mɔ asɛ Yesu aba klɛ alɛ ɔkɛlɛ, ganɛ sɛ yɛ tite ko so pɔ sɛ tɛ ba mɔ Lazarusɛ tsyɛ, gɛ Yesu anyɛmɛ denɔ bekpu mɛ. 10Kɛlɛso kpayaɔzakɔanɔ gbla ba trɔ sɛ tɛ beyi Lazarus tsyɛ, 11alasɛ yɛ so Yuɖanɛ gelee bavɛ Yesu abha klɛ bayɛkɛ Yesu abhaŋa.

Tɛtsutsoku Yerusalɛm Nɛ Kabhaŋɛŋa

12Nɛ kiwui bhla nɛabha banɔɛza gbɛgbla ge ba ba kɔ kiwuiŋɛŋa be nu asɛ Yesu tsyɛ atɔnɛ dzo avɛ Yerusalɛm. 13Bayɛkɔ inuwãmɔɛ klɛ bavɛ sɛ tɛ ba da tsyanɛ yɛ, nɛ egugu sɛ,

“Hosanna!”

“Tɛyuyula kɔ anɔ nɛ gɛ aba nɛ Apalete nɛ nyimɛ!”

“Tɛyuyula kɔ Izraɛlanɛ Ekusi!”

14Yesu amɔ kitukuaga kebite klɛ aza kalɛabha anasɛ gɛ baŋlɔmɛ,

15“Nɔ to sifu, O Zion Beyiadzɛ,

di wunɔ ekusi na ba,

aza kitukuaga nɛabha.”

16Nɛ kesikpɛkpɛ yɛ badɔkpasɛ be di nu ebuianɛ petee esi. Ba kpɛ Yesu nyi nɛbha kɛlɛede flogo gɛ be ti sɛ ebuinɛ gɛ ba ŋlɔmɛ nɛ yɛ shu klɛ agɛ ba bhɛtɛ ebuianɛ nɛ yɛ shu.

17Ɔtsɔ̃nɛ banɔɛza nɛ gɛ baza yɛ ɔbha gɛ eklu Lazarus denɔ odzre nɛ mɛ klɛ anyɛmɛ yɛ edenɔ bekpuimɛ, ba za lɛabha nyɔnɛ kibui petee. 18Banɔ gelee avɛ sɛ tɛ ba da tsyanɛ yɛ alasɛ be nu sɛ abhɛtɛ kɛdɔmumɔ ebui gɛ eyinɔanɔ. 19Kɛlɛso Farisianɛ ba ɖɔ tsre ɛhaglɔ sɛ, “No di, kɛnɛ tɛ bagbanɛ lɔ vɛnɔ ɔkɔnyɔkɔ. Di kana gɛ kanɔ nɛ petee ba lɛ yɛ ede!”

Yesu Aɖɔ Yɛ Butsibui Elu

20Ɔtsyɔnɛ Griki anɛ teli ba vɛ sɛ tɛ ba da sɔlɛ nɛ Kiwui nɛ mɛ. 21Ba ba Filipo gɛ ede Betaida nɛ Galelia ɔkɔ, nɛ tɛbibisi asɛ, “Apalete,” ba ɖɔ sɛ, “bu pee sɛ tɛ bu mɔ Yesu.” 22Filipo avɛ ede tsre Andrɛasɛ, Andrɛasɛ nɛ Filipo ba vɛ ede tsre Yesu.

23Yesu etsre alɛ sɛ, “Kibe na sɛ tɛ bakpɛ Anɔdzyrame Yi nɛabha. 24Ɛtsre nɔ gbɛagba, ɔdɛsɛ kɛmɔɛyi wɔlɛ dɔ kesukpa klɛ kɛ tsi kɛ nu kiyi tirikpo ko. Pɔ onugɛ kɛ tsi kɛ ba yi klɛ kɛ ba yu gelee. 25Anɔ nɛ gɛ adɛmɛnɔ nɛ yɛ kpã aba lɛla lɛ, nɛlɛmɛ agɛ adɛ pɛɛ yɛ kpã nɛ kanɔ nɛ mɛ aba bala lɛ kɔ ɛkpã mabekemabeke. 26Anɔ nɛ gɛ aba dɛ xɔɛ kɔ mɛ alasɛ tɛ aza mɛede, ɔkɛlɛ gɛ ɛlɛ, mɛ axwɛdɛ nɛ tsyɛ ɔkɛlɛ aba za. Mɛ Aka aba kpɛ agɛ adɛ xwɔɛ kɔ mɛ nɛ nyi nɛabha.

27“Ɔtsɔnɛ mɛ dzyi amɔ butɔ, klɛ kide mɛ baɖɔ? Ɛbaɖɔ sɛ ‘Aka, bhui mɛ ɔyɛkɛ nɛ ɔɖɔ nɛ mɛ’? Ao, kɛnɛ nahwɛ so gɛ ɛba nɛ ɔɖɔ nɛ mɛ. 28Aka, kpɛ wɔɛ nyi nɛabha!”

Ɔkɛlɛ olimɛ toli yi de owũsise sɛ, “mɛ kpɛ yɛ nyi nɛabha, klɛ kɛ zɛa tsodzi akpɛ yɛ nyi nɛabha.” 29Banɔɛza gɛ ba za ɔkɛlɛ gɛ be nu kibui, ba ɖɔ sɛ sɛbha yɛ alɛ, babhlatɔ tsye asɛ, kpayaxwɛdɛ yɛ aɖɔaɖɔ kɔ yɛ.

30Yesu aɖɔ sɛ, “Wunɔ tɛpɛpɛ̃ so gɛ olimɛ kaɖɔ nɛ yi, anɛ mɛ tɛpɛpɛ̃. 31Ɔtsɔnɛ kɛbena kɔ kebhuikuklu nɛ kanɔ, ɔtsɔnɛ ba ba kɛka ekusieyi nɛ kanɔa nɛ mɛ. 32Pɔ mɛ, kibelɛlɛ gɛ befeke mɛ avɛnɔ kabha denɔ kesukpɛa nɛ mɛ, ɛba gbanɔ banɔ petee ɛmɛna me shu.” 33Aɖɔ kibuinɛ sɛ tɛ akasɛ butsi nɛdi gɛ ebe tsi.

34Banɔɛza baɖɔ gɛganɛɛ sɛ, “Bunu denɔ Ɛshã nɛ mɛ sɛ Kristo aba za vɛnɔ mabeke, so kɛlɛ nɔ bɔ nɛ aɖɔ sɛ, ‘Ba be feke Anɔdzyrame Yi avɛnɔ kabha’? Anɛ yɛ nu ‘Anɔdzyrame Yi’?”

35Ɔkɛlɛ Yesu etsre alɛ sɛ, “Nɔ bɔ yɛkɛ kifu nɛ kibebhli ko. Ga kibelɛlɛ nɛ gɛ nɔ yɛkɛ kifu, flogo tɛ otumu lo bo vu nɔ. Anɔ nɛ gɛ aga nɛ otumuɛ mɛ eti nyi ɔkɔnɔ nɛ gɛ avɛ. 36Nɔ yɛkɔ wɔnɔ tɛyɛyɛkɛŋa nɛ ɔtrɔ kifu nɛabha nɛ kibe lɛ gɛ kɛ lɛ wɔ ahwɛ, sɛ tɛ no bo dzi kifu nɛ be yi.” Kibe lɛ nɛ gɛ aɖɔaɖɔ nɛ beke, Yesu ashɛ̃ klɛ ede kpu ishua lɔ balɛ.

Yuɖanɛ Ba Ka Za Balɛ Mayɛkɛŋa Nɛabha

37Kɛlɛede Yesu abhɛtɛ kɛdɔmumɔ ebui gɛ eyinɔanɔ ba lɛ amɛ tsyɛ, ɔdɔtɔnɔ ɔtsɔ̃ nɛ ba dɛ yɛkɛ yɛ abhaŋa. 38Kɛnɛ kɛlɛ nu kibui gɛ kɛ ba belɛmɛ gɛ atɔnu Yezaya aɖɔlu sɛ,

“Apalete, ane gɛ ayɛkɛ bulɔ bui ɖɛɖɔ nɛabhaŋa

klɛ kɔ ane be bu Apalete nɛ kemi nɛ akasɛ?”

39Alasɛ kibui nɛ so ba de yɛkɛŋa, alasɛ, anasɛ gɛ Yezaya aɖɔ nɛ ɔkɔ bhlatɔ sɛ

40“Epu ba lɛ awɔ̃hu

klɛ eyi ba lɛ dzyi,

so tɛ ba tɛ na kɛdɔ mɔnɛ balɛ awɔ̃hu,

ɔdɔgɔsɛ be nu kibuiesi nɛ balɛ idzyi,

ɔdɔgɔsɛ be tsyina—klɛ ɛba beke balɛ banya.”

41Yezaya aɖɔ kibui nɛ alasɛ amɔ Yesu yɛ kabhaŋɛŋa klɛ aɖɔaɖɔ denɔ yɛ shu.

42Nɛ kibe lɛlɛ mɛ be gelee tsyɛ nɛ bagbɛgbanɔ nɛ mɛ ba yɛkɛ yɛ abhaŋa. Pɔ alasɛ Farisianɛ nɛ so ba dɛ bu ba lɛ tɛyɛyɛkɛŋa na kasɛ, alasɛ bɛ sifu sɛ ba be bu alɛ nɛ oxogokɔvu nɛ mɛ, 43alasɛ ba dɛmɛnɔ kɛnyi kpɛkpɛ nɛabha denɔ banɔ kɔ dɛ kɛnyi kpɛkpɛ denɔ Kpaya kɔ.

44Ɔkɛlɛ Yesu akpɛ ogugu aɖɔ sɛ, “Kibenɔ nɛ gɛ anɔ ayɛkɛ mɛabhaŋa, adɛ yɛkɛ mɛ tite abhaŋa, pɔ ayɛkɛ anɔ nɛ gɛ akpɛ mɛ abhaŋa. 45Kibelɛlɛ nɛ gɛ edi mɛ, amɔ agɛ akpɛ mɛ. 46Ɛba kanɔ nɛ mɛ anasɛ kifu, sɛ tɛ anɔ nɛ gɛ ayɛkɛ mɛabhaŋa atɛ ba za otumuɛ mɛ.

47“Anɔ nɛ gɛ enu mɛ ebui pɔ adɛ nyɛna lɛ, mɛ ɛtɛ ba klu kebhui nɛ yɛ. Alasɛ ɛdɛ ba sɛ tɛ ɛba klu kebhui nɛ kanɔ, pɔ ɛba sɛ tɛ ɛba bhui alɛ yɛkɛ. 48Kebhui kuklu alɛ kɔ anɔ nɛ gɛ adɛ pɛɛ mɛ ebui klɛ adɛ yɛkɛ mɛ ebui, kɛ bui lɛlɛ nɛ gɛ ɛɖɔ kɛ ba bu yɛ pɔ nɛ kiwui gugɔɛ nɛabha. 49Alasɛ ɛdɛ ɖɔ kibui nɛ nɛmɛnahwɛ shu ahwɛ, pɔ Aka nɛ gɛ akpɛ mɛ yɛ akɔ mɛ ɔshã sɛ tɛ ɛɖɔ kɛ gɛ ɛba ɖɔ nɛ ka na gɛ ɛba ɖɔɛ lɛ. 50Ɛnyi sɛ yɛ ɛshã nɛ mɛna ɛkpã mabekemabeke. Kɛlɛso kibuinyɛbui gɛ ɛɖɔ kɛ nu kɛbui gbɛagba gɛ Aka nɛ tsre mɛ sɛ ɛɖɔ.”

Currently Selected:

Yohanɛsɛ 12: tcd

Highlight

Copy