Axwɛwɛwa 8

1Klɛ Saolo aza ɔkɛlɛ, atrɔahwɛ yɛ tɛyiyi nɛa bha.

Bakpatɔnɔ Busɔlɛ Ɔha Klɛ La Kaka Ɔlɛ

Nɛ kiwi lɛ nɛa bha klɛ kititi lulɔ gbla koeyi nɛ Ɔha nɛ shu nɛ Yerusalɛm, klɛ banɔkpɛkpɛ nɛ mazɛlɛ mɛ banɔ gɔgɔɛ nɛ petee ba kɛka ganɔ Yuɖea anɛ Samaria. 2Ayɛyɛkɛŋa teli aba yɛkɔ Stefano ada vubɔ klɛ be bi yɛ popoo po. 3Pɔ Saolo akpɛ busɔlɛ mɛha nɛ tɛ yɛyɛesi. Alɔ nɛ bupa mɛ avɛ bupa mɛ, klɛ evu banyɛ nɛ badzɛ ada kpɛ be vu.

Filipo Avɛ Samaria

4Banɔ nɛ mɛ gɛ bakpɛ ozi nɛ vunɔ Kpaya kibui na ɖɔ nɛ ɔkɔnyɔkɔ gɛ be ku ko. 5Flipo ede tsoku Samaria ɔmagbla nɛm klɛ ede bu Kristo kibui nɛ aɖɔ nɛ ɔkɛlɛ. 6Gɛ banɔɛza nɛ nu Flipo kɛdɔ klɛ la mɔ kɛdɔmumɔ nɛ gɛ bhɛtɛ bi nɛɛ, balɛ pete vu awɔ̃hũ nɛ agɛ aɖɔ. 7Ganɔ igugu kpɛkpɛ mɛ ɛfufɔɛkpã koeyi nɛ banɔ geleem, klɛ bagɛ bagba nɛ akpatanɛ banya ne beke. 8So nɛɛ same gelee aza ɔmagbla lɛ nɛm.

Simɔnɛ Gɛ Enu Ehuini

9Nɛ kibe tilim ɔnanɔ ɔtsɔ̃ nɛɛ anyɛ teli gɛ beklu asɛ Simɔnɛ abhɛtɛ ihuiebui nɛ ɔmagbla nɛm klɛ yɛ ebui nɛ abhɛtɛ banɔ kibi nɛ Samaria. Efeke shua sɛ enu anɔgbla teli, 10klɛ banɔ nɛ petee, ba gbɛgbla anɛ bebhliyi, bakɔ yɛ amɛ klɛ be bua ɖɔ nɛ yɛ shua sɛ, “Anyɛa nɛ yɛenu ɔfufɔɛ mɛ kemi gɛ beklu asɛ Kemi Gbɛgbla.” 11Ba za yɛede alasɛ yɛ ebui bhɛbhɛtɛ nɛ yinɔa lɛ nɛ kibe dzidzem. 12Pɔ kibe lɛ gɛ ba yɛkɛ Flipoa bha ŋa gɛ aɖɔ kibui dzyɔgo nɛ denɔ Kpaya bukusi ɔŋakɔ nɛ shu anɛ Yesu Kristo kinyi, ba kpɛ buni kɔa lɛ, banyɛ anɛ badzɛ. 13Simɔnɛ nahwɛ nɛ ayɛkɛaŋa klɛ ayɛkɛ bunikpɛkpɛ. Klɛ aza Flipoe de nɛ ɔkɔnyɔkɔɛ di, klɛ yɛ kɛdɔmumɔ gbla nɛ ebui yiyinɔanɔ gɛ amɔ nɛ abhɛtɛ yɛ bi.

14Kibe lɛ gɛ banɔkpɛkpɛ nɛ Yerusalɛm be nu sɛ Samaria ayɛkɛ Kpaya kibui nɛɛ, be bu Petro anɛ Yohanɛsɛ akɔ sɛsɛ alɛ. 15Gɛ bede ku nɛɛ be klu Kpaya nɛ balɛ kɛtɔkpu, sɛ tɛ ba yɛkɛ Ɔfufɔɛ Dzyɔgo, 16alasɛ Ɔfufɔɛ Dzyɔgo nɔ kɔ ba balɛ ɔmayɛ kanyakɛa bha, buni tite ko la tɛ kpɛ kɔ balɛ nɛ Yesu Apalete nɛ kinyim. 17Ɔkɛlɛ Petro anɛ Yohanɛsɛ ba trɔ ahwɛ nɛ balɛa bha, klɛ ba yɛkɛ Ɔfufɔɛ Dzyɔgo.

18Gɛ Simɔn amɔ kana gɛ Ɔfufɔɛ nɛ ɔba banɔ nɛa bha ganɔ banɔkpɛkpɛ nahwɛ tɛtrɔa lɛa bha, akɔa lɛ kɔba 19klɛa sɛ, “Nɔ kɔ mɛ tsyɛ tɛzɛzɛ nɛɛ di sɛ tɛ anɔnyanɔa bha gɛ ɛba trɔ ahwɛ tɛ ayɛkɛ Ɔfufɔɛ Dzyɔgo.”

20Petro ebui lɛ bunu asɛ: “Kɔ wɔ anɛ wɔ ehoeyi nɛ aga vɛ, alasɛ odi sɛ ɔbɔ na Kpaya kɛdɔkukɔ nɛ bu dzi nɛ ehoeyi! 21Ɔzakɔ ɔdɔgɔsɛ ɔŋakɔ kanyaka ma kɔ wɔ nɛ kibui kɛxwɛwɛwaɛ nɛm, alasɛ wɔ idzyim adɛ na nɛ Kpaya amɛ. 22Tsyina kitem anɛ wɔ kɛtɔkpum gɛganɛ tɛ oklu Apalete. Odibhi aba yɛkɔ etsye wɔ nɛ ebui nɛ di ga kpasɛ wɔɛ tɔkpum nɛ wɔ idzyi nɛ mɛ. 23Alasɛ ɛmɔ sɛ oyuku nɛ bukɛtɛkɛtɛ klɛ ɔkpasɛ buzizi ahwɛ mɛ.”

24Klɛ Simɔnɛ aɖɔ asɛ, “Kulu Apalete nɛ ɔkɔm sɛ tɛ kibuinyɛbui gɛ ɔɖɔ nɛɛ kɛ tɛ ba mɛa bha.”

25Kibe lɛ nɛ gɛ ba mɔaɖɔ pɛ be bu Apalete nɛ bui na ɖɔ, Petro anɛ Yohanɛsɛ be tsodzi avɛ Yerusalɛm, klɛ baa ɖɔ kibui dzyɔgo nɛ Samarianɛ ɛmabhli nɛ mɛ.

Flipo Anɛ Etiopiaeyi

26Ɔtsɔ̃ nɛɛ Apalete nɛ axwɛdɛ teli ebe tsre Flipo asɛ, “Vɛ kidzo nɛ ozhizhi--ayakpamɛ kidzo--gɛ kizhi denɔ Yerusalɛm vɛnɔ Gaza.” 27Klɛ so alɔ klɛ atɔnɔ kidzo, gɛ aavɛ nɛ kidzo nɛa bha atsyanɔ Etiopiaeyi teli gɛ enu axwɛwa ŋɛŋaedzi teli gɛ abala Kandesɛ, Etiopia adzɛekusi nɛ kɔba. Anyɛa nɛ avɛ Yerusalɛm sɛ tɛ ada sɔlɛ, 28klɛ gɛ atɔnɔɛ dzo avɛ kepi nɛ yɛ ɛsɔopupu nɛa bha aakla atɔnu Yezaya keplukpa. 29Ɔfufɔɛ nɛ otsre Flipo sɛ, “Vɛ sɔopupuɔ lɛ nɛ ɔbha tɛ ɔza bunɔ ɔlɛ.”

30Klɛ Flipo esi tɔnɔ sɔopupu klɛ enu gɛ anɔ nɛ eza klɛ kɛdɔ edenɔ atɔnu Yezaya shu. Flipo ebisi yɛa sɛ, “Onu kɛdɔ nɛ gɛ ɔkla nɛesi dza?”

31Anyɛ na sɛ, “Klɛ mɛ ba na klɛe si nu, gɛ odi nu sɛ anɔ teli ye bui lɛ kesi akɔ mɛ?” So nɛ etsre Flipo sɛ ewu aba tɛ aba za yɛ ɔbha.

32Anyɛ nɛ edzi akla kɛdɔ denɔ Kpayaeplukpa nɛm asɛ:

“Bagbanɛ yɛ ansɛ obhoshi avɛnɔ aga oyikɔ,

klɛ eli ansɛ obhoshieyi gɛ lo li agɛ ashɛ tɛka nɛ amɛ, lɔ da onugbu,

so nɛ adɛ danɛ yɛ onugbu.

33Nɛ yɛ butsɔ kpɛkpɛ mɛ adɛ mɔ kebhui kuklu dzyɔgo.

Ane gɛ aba na yɛ yamɛeyi alɛ bui ɖɔ?

Alasɛ ba tɛ yɛkɛ yɛ ɛkpã nɛ kesukpa nɛa bha.”

34Anyɛtsutsrɔ ne bisi Flipo asɛ, “Ɛkɔ wɔ kɛtɔkpu, tsrem, ane shuibui atɔnu na ɖɔ, yɛ nahwɛ shu pɛnɔɔ anɔ bhlatɔ?” 35Klɛ Flipo akpɛ kɛsi nɛ kɛdɔ nɛ gɛ akla denɔ Kpay keplukpa nɛ mɛ klɛ aɖɔ Kpaya kibui dzyɔgo nɛ denɔ Yesu shu etsre yɛ.

36Gɛ ba vɛ nɛ kidzo nɛa bha, ba ba tɔnɔ buni tuli klɛ anɔgbla nɛ asɛ, “Di, buni tuli nũ. Kide so pɛ ɛta yɛkɛ bunikpɛkpɛ?” 37Flipo etsre yɛ asɛ, “Onu gɛ ɔyɛkɛɔŋa nɛ wɔ idzyim petee, klɛ ɔbɔ yɛkɛ bunikpɛkpɛ.” Anɔgbla nɛ bui lɛ nu asɛ, “Ɛyɛkɛ ŋa sɛ Yesu Kristo yɛ enu Kpaya yɛ Eyi.” 38Klɛ akɔ ɔshã sɛ sɔopupu nɔ dzrɔ. Klɛ Flipo anɛ anɔgbla nɛ zhieku buni nɛm klɛ Flipo akpɛ buni nɛ akɔ yɛ. 39Gɛ bede buni nɛm ekoeyi ko, klɛ Apalete nɛ Ɔfufɔɛ nɛ obo feke Flipo ɔshɛnɔ, klɛ anɔgbla na da mɔ Flipo ɔgakɔ, pɔ avɛ yɛ kidzo gɛga nɛa bha nɛ same mumɔ. 40Pɔ gɛ kɛ za na nɛɛ, Flipo ada wɛ̃ nɛ Azotus klɛ aga anyɔ akana, nɛ kpayakibui nɛ tɛɖuɖɔ nɛ ɛma nɛ peteem ɔdɔ nanɔ kibe lɛ gɛ ede ku Sizeria.

Currently Selected:

Axwɛwɛwa 8: tcd

Highlight

Copy