Axwɛwɛwa 7

Stefano Kaɖɔ Nɛ Gɛ Aɖɔ Tsre Busɔlɛebhuiklu

1Klɛ kpayanɔgbla nɛ ebisi asɛ, “Ebuia nɛ gɛ ba yɛkɔ nɛ wɔ shu nɛ nu kɛgba dza?”

2Ebui lɛ nu aɖɔ sɛ, “Madzyalɛ anɛ mɛakalɛ mɔ, nɔ tatɔ tɛ nɛ mɛ! Ishu dɛdanɛ Kpaya nɛ ebu ishu akasɛ bulɔ Aka Abraham nɛ kibe lɛ gɛ aka lɛ Mesopotemia, flogo pɛ aba za Haran. 3Kpaya etsrea sɛ, ‘shɛ nɛ wɔ kepi nɛ wɔanɔa lɛ nɛ ɔbha,’ ‘tɛ ɔvɛ kesukpa tielia bha gɛ ɛba kasɛ wɔ.’

4“So nɛ ashɛ̃ nɛ Tsyaldean klɛ avɛ ada lɛ Haran. Nɛ yaka butsi nɛe de, Kpaya aba sɛsɛ yɛ nɛ kesukpa nɛa bha nɛ ɔkɛlɛ gɛ nɔ lɛ ɔtsɔ̃. 5Adɛ kɔ yɛ ɔŋakɔ nɛ ɔkɛ̃, kesukpa katsrukpɔ tierikpo tsyɛ adɛ kɔ yɛ. Pɔ Kpaya atrɔ kɔɛ as yɛ anɛ yɛyameyialɛ nɛ gɛ ba dzyɔ nɛ yɛede nɛɛ kesukpa nɛ kaba za balɛ ahwɛ mɛ, kɛlɛ klɛm sɛ kibelɛ nɛ mɛ Abraham adɛ mɔ eyi. 6Kpaya aɖɔ kaɖɔ etsre yɛ nɛ kɛdzoe nɛa bha sɛ, ‘Wɔ beyi nɛ gɛ be de wɔm ekoeyi nɛ be dzi befu nɛ kesukpa gɛ ke di nu balɛa yɛ nɛm, be be dzi baxwɛdɛ klɛ ba ba nyagbã nɛ balɛ nɛ agɔ kɛfɔɛfɔ ɛzakɔ tɛlɛ. 7Pɔ ɛba tɛta amadi nɛ gɛ alɛ mɛ la dɛ axwɛ na tɔ,’ Kpaya asɛ, nɛ kɛlɛe de mɛ be be koeyi nɛ kɛmadi lɛ nɛesi klɛ ba ba kpɛ kɛtɔkpuesi kɔm nɛ ɔkɛ̃.’ 8Klɛ Kpaya anya onugbu nɛ Abraham nɛ bunyɛnyɛ bhubhui shu. Klɛ Abraham ebe dzi Isaaka yɛaka klɛ ekebhui bunyɛnyɛ akɔɛ nɛ ewi tasɔede gɛ ba mɔ yɛ. Kɛlɛede nɛɛ Isaaka ebe dzi Yakɔp yaka, klɛ Yakɔp ebe dzi aka kɔ bakashishe lɔfɔntɛabha.

9“Alasɛ bakashishe na kpɛ Yosɛfu awɔ̃ so, ba dɛ yɛ ansɛ anɔdzidzi akɔ Egibite. Pɔ Kpaya aza plɛnɔ yɛ 10klɛ ebui nɛ yɛ batɔ nɛ petee mɛ. Akɔ Yosɛfu kibuinyinyi klɛ kɛkɔ sɛ amɔ kabha yɛyɛkɛŋa denɔ Egibiteanɛ ekusi Farao ɔkɔ, so abhɛtɛ yɛ edzi anɔ gɛ aŋa anɔnyanɔa bha nɛ Egibite anɛ yɛ bupa nɛ peteea bha.

11“Klɛ bubhɛ ba dɔ nɛ Egibite anɛ Kanaan, bu mɛna butɔ gbla, klɛ bulɔakalɛ na dɛ mɔ kɛŋɛŋa. 12Gɛ Yakɔp ebe nu sɛ kɛdɔŋɛŋa lɛ Egibite nɛɛ, akpɛ bulɔakalɛ nɛ tɛvɛvɛ tutɔpu nɛm. 13Nɛ balɛ Egibite vɛvɛ bubhla nɛ mɛ, Yosɛfu ebe tsre yɛadzyalɛ nɛ anɔ nɛ gɛ enu, klɛ Farao ebe ti kibui ede nɔ Yosɛfu yɛeshopoalɛ nɛ shu. 14Kɛɛnɛ nɛede, Yosɛfu aba kpɛ asɛ be klu yaka Yakɔp anɛ yɛeshopoalɛ nɛ petee, gɛ balɛ peteea lɛ afɛtegene nɛ tieti. 15Klɛ Yakɔp ebe zhi avɛ Egibite, ɔklɛ yɛ nɛ bulɔakalɛ nɛ be tsi. 16Be tsodzini balɛ betsitsi nɛ amɛna Shitsyɛm klɛ ba yɛkɔ aba vubɔ nɛ odzre nɛm gɛ Abraham nɛ edzi nɛ Hamɔ yeyialɛ nahwɛ nɛ Shitsyɛm nɛ ehoeyi teli.

17“Gɛ kibe nɛ he ba kɔ Kpaya sɛ tɛ abhɛtɛ kɛgɛ atrɔ kɔ Abraham nɛɛ, bulɔ banɔ tɛkpɛkpe nɛm ba vɛa bha gelee. 18Klɛ ekusi teli gɛ edi ti kibui nyɛbui edenɔ Yosɛfu shu ne ebe dzi anɔ gɛ aŋa Egibitea bha. 19Agɛganɛ kɛtɔkpum nɛ bulɔ banɔ nɛ shu klɛ etii bulɔ bakashishe nɛ akpesi ganɔ balɛa bha tutrɔ sɛ ba yɛkɔ balɛ beyivuvɔ nɛ atɛ̃ɛ sɛ tɛ be de tsi.

20“Nɛ kibe lɛ nɛ mɛ klɛ ba mɔ Mose, klɛ edi dzi anuvɔ tite ko. Nɛ wele tɛata mɛ baa nyunɔɛ nɛ yaka bupa mɛ. 21Gɛ be bui yɛ ede lu ɔtɔ nɛɛ, Farao yeyiadzɛ ada yɛkɔ yɛ klɛ ada nyunɔɛ ansɛ yɛnahwɛ yeyianyɛ. 22Ba nyunɔ Mose klɛ ayɛkɛ kɛdɔkɛkasɛ nɛ Egibiteanɛ kibuinyinyi kanyaka shu klɛ kemi ka za yɛ ahwɛ nɛ kaɖɔɖuɖɔ anɛ ebui bhɛbhɛtɛm.

23“Kibe lɛ gɛ Mose eshe ayɛkɛ agɔ afɛtalɛ̃ nɛɛ, aba pɛa sɛ tɛ akana yadzyalɛ Izraɛlanɛ nɛa bha. 24Amɔ balɛ ɔmayɛ teli gɛ Egibiteyi teli edzia nyagba nɔ, so nɛ avɛ ada wũlãkɛ yɛtɔkpu klɛ awa buwule etu Egibiteyi nɛ eyi. 25Mose yɛe di lɛ asɛ yɛnahwɛ banɔ na ba kpɛlɛ kɛxawũ asɛ Kpaya aga yɛa bha sɛ tɛ ayɛkɛ kɔa lɛ, pɔ ba dɛ mɔɛ lɛ ana. 26Nɛ kiwi bhla nɛa bha Mose aba tsyanɔ Izraɛlanɛ tɛabha teli gɛ be dzi ata ekpli. Etsyina ahwɛ sɛ tɛ akpalɛ terikpo ganɔ kaɖɔ ɖuɖɔ sɛ, ‘Banyɛ mɔ, badzya no nu, kide so pɛ nɔ pɛ sɛ tɛ nɔ kpɛ ɔhaglɔ apɔ?’

27“Pɔ anyɛ nɛ gɛ ye tu yadzya nɛɛ etii Mose avɛnɔ kɛwã klɛ aɖɔ asɛ, ‘Ane gɛ edzu wɔ sɛ tɛ ɔŋa lɔa bha tɛ ozo klu bubhui nɛ bulɔ? 28Ɔpɛɛ sɛ tɛ oyim ansɛ gɛ oyi Egibiteyi nɛ kivu?’ 29Gɛ Mose enu kibui nɛɛ, esi ashɛ̃ avɛ ada lɛ Miɖian, ɔklɛ gɛ ada za ansɛ efua na klɛ amɔ beyianyɛ tɛabha.

30“Nɛ agɔ afɛtalɛ̃e de, Kpaya axwɛdɛ teli ebe bu ishu akasɛ Mose nɛ ayakpatɛtã ɔlɛklɛmɛm nɛ Sinai Butu shu. 31Gɛ amɔa na nɛɛ kɛ bhɛtɛ yɛ bi. Kibe lɛ gɛ etsobunɔ sɛ tɛ edi mɔmɔ, enu Apalete nɛ olim asɛ, 32‘Mɛ nu wɔakalɛ Kpaya, Abraham Kpaya, Isaaka anɛ Yakɔp.’ Mose eshuku nɛ kifu klɛ adɛ kpɛ kite sɛ tɛ efle di.

33“Klɛ Apalete nɛ etsre yɛa sɛ, ‘Bu wɔ butsrukpɔ aklɔ, ɔkɛlɛ gɛ oli kititi nɛ nu kesukpa gɛ kalɛ shu ebhui. 34Ɛtɛ mɔ butɔ nɛ mɛ gɛ mɛ banɔ na kpasɛ nɛ Egibite. Ɛtɛ nu balɛ tɛninimi klɛ mɛ zhiba sɛ tɛ ɛba bulea lɛ. Ɔtsɔ̃nɛ, ɛba tsodzini wɔ sɛsɛ nɛ Egibite.

35“Mosea lɛlɛ nɛ gɛ ba dɛ yɛkɛ yɛ anɛ yɛ ebui ɖuɖɔa ko naa, ‘Ane gɛ abhɛtɛ wɔa anɔ gɛ aŋɛa bha anɛ ebhuiklu?’ Kpaya nahwɛ akpɛ yɛa sɛ tɛ ede dzi anɔ gɛ aba ŋa balɛa bha anɛ anɔ gɛ ebe bua lɛ, ganɔ kpaya axwɛdɛ nɛ gɛ ebu shu akasɛ yɛ nɛ ayakpa nɛ mɛ. 36Agbanɔ alɛ ebu nɛ Egipte klɛ abhɛtɛ ebui gɛ abhɛtɛ bi kɛdɔmumɔ nɛ Egipte, nɛ Aƒu Dzɛdzã nɛ shu nɛ ayakpam zɛza agɔ afɛtalɛ̃.

37Mose alɛlɛ nɛ naa gɛ etsre Izraɛlanɛ na sɛ, ‘Kpaya aba sɛsɛ nɔ ebuiɖɔlu ansɛ mɛ ana edenɔ wɔnɔ nahwɛ banɔm. 38Aza tɛxuxogom nɛ ayakpa nɛ mɛ, ɔyɛkɔ plɛnɔ axwɛdɛ nɛ gɛ aɖɔaɖɔ nɛ yɛ nɛ Sinai Butu nɛa bha, nɛ bulɔakalɛ, klɛ ayɛkɛ ekpã ebui amɛna lɔ.

39“Pɔ bulɔa kalɛ nɛ ba dɛ ta yɛ butɔ. Nɛ klɛ mɛ, be tsyri yɛ klɛ nɛ balɛ idzyim nɛɛ be tsodzi avɛ Egibte. 40Be tsre Arɔn asɛ, Bhɛtɛ bakpaya kɔ lɔ gɛ ba za otugba kɔ lɔ. Mosea nɛ xũ nɛɛ gɛ agbanɔ lɔ denɔ Egibite—buti nyi kɛdɔnɔ nɛ gɛ bhɛtɛ yɛ!’ 41Ɔɖɔ lɛ lɛ nɛm la bhɛtɛ kɛdɔ fɛfatɛ nɛ nɛtsyɔɛeyi tɛzɛzam. Baa kɔ yɛ kɛdɔ yɛŋa klɛ baa ŋa kiwi akɔ kɛdɔ nɛ gɛ balɛ nahwɛ abhɛtɛ nɛ balɛ ahwɛ. 42Pɔ Kpaya etsodzi nɛ balɛe de klɛ ayɛkɔa lɛ akɔ sɛ ba kpɛ kɛtɔkpuesi kɔ owũsise mɛ dɔ. Kibui nɛ sɔnɔ kɛdɔ ŋuŋlɔmɛ anɛ batɔnu nɛe plukpam asɛ:

“ ‘Nɔ mɛna mɛ kɛdɔpupɔɛ nɛ kɛdɔkukɔ nɛ

agɔ afɛtalɛ̃ mɛ nɛ ayakpa mɛ dza, O Izraɛlanɛ mɔ?

43No feke Molɛk obudivu nɛ owunɔ

nɛ nɔ Rafam obudi kɛwũwɔɛ,

kɛdɔ fɛfatɛ nɛ gɛ nɔ bhɛtɛ sɛ tɛ nɔ kpɛ kɛtɔkpuesi kɔ.

Kɛlɛ so nɛɛ ɛbabu nɔ nɛ ɔma nɛm sɛsɛ Babilonia kede.’

44“Kibuimɔɖɔ akpanda na za bulɔaka lɛ nahwɛ nɛ ayakpa nɛm. Mose abhɛtɛ lɛ ansɛ gɛ Kpaya akasɛ yɛ, nɛ kɛzabi nɛ mɛ gɛ amɔ lɛ. 45Gɛ bu yɛkɛ akpanda nɛɛ, bulɔaka lɛ nɛ Yosuaesi ne vunɔ yɛ amɛna plɛnɔa lɛ nɛ kibe lɛ nɛ mɛ gɛ ba yɛkɛ kesukpa nɛm gɛ Kpaya akɛka amadi nɛ ebu flogo pɛ ba ba. Kɛ za kesukpa nɛ mɛ ɔbɔ nanɔ Daviti kibe, 46gɛ aba ŋa Kpaya ɛyamyuyɔ klɛ ebisi sɛ tɛ abhɛtɛ ɔzakɔ kɔ Yakɔb Kpaya. 47Pɔ Salomo yɛ be dzu buvu na kɔ Kpaya.

48Pɔ nɛ, Kpaya gɛ enu Apalete nɛ ata za bevu nɔ nɛ mɛ gɛ banɔ be dzu. Ansɛ gɛ atɔnu na ɖɔ asɛ,

49“Owũsise ɔlɔ nu mɛ kegbu,

klɛ kesukpa kalɛ nu mɛ katsrukpɔe gbu.

Bupa ɖueɖui di obo bhui kɔ mɛ?

Apalete nɛ aɖɔa na.

Ɔdɔgɔsɛ fakɔ mɛ omuenekɔ nɛ ɔbɔ za?

50Mɛ ahwɛ aka bhɛtɛ ebuia nɛ petee?’

51“Wɔnɔ ili gɛganɛ banɔ, idzyim anɛ batɔ mɛ gɛganɛ elete! No ko dzi ko ansɛ wɔnɔa kalɛ, Nɔ wɔ̃lãkɛ ishu nɛ Ɔfufɔɛ Dzyɔgo nɛ kibenyɛbe! 52Kpaya atɔnu teli atɛ za di sɛ wɔnɔa kalɛ na dɛ kpatɔnɔɛ ede yi edi xãa? Be yi bagɛ eputɔ aɖɔ Banɔ Nɛna nɛ tɛbɛba nɛ tsyɛ. Klɛ ɔtsɔ̃ nɛ tsyɛ nɔ zɔ ga yɛesi klɛ no yi yɛ. 53wɔnɔ gɛ ɔyɛkɛ ɛshã nɛ gɛ ga Kpaya baxwɛdɛ nɛa bha pɔ no gbe sɛ nɔ tɛ bɔ tatɔ.”

Aklãgbu Huhu Stefano

54Gɛ be nu ebuia nɛ denɔ Stefano ɔkɔ nɛɛ bamɔ oblo klɛ la tã ele nɛ akpɛ yɛ. 55Pɔ Stefano gɛ eyuku nɛ Ɔfufɔɛ Dzyɔgo nɛ edi owũsise klɛ amɔ Kpaya ishuyuyɔ, anɛ Yesu gɛ eli kititi nɛ Kpaya kɛŋam. 56Asɛ, “Di mɔ,” “Ɛmɔ owũsise lɔ danɛ klɛ Anɔdzyrame yɛ Eyi nɛ li kititi nɛ Kpaya kɛŋam.”

57Nɛ ebuia nɛ mɛ ba da balɛ batɔ, klɛ ba kpɛ igugu gɛganɛɛ, klɛ balɛ petee si ekoeyi, 58be vui klɛ be he yɛ ekoeyi nɔ nɛ ɔmagbla nɛm klɛ ba kpa yɛ aklãgbu hu. Nɛ kɛlɛ mɛ bebuimɔɖɔ nɛ be bu balɛ bawi nɛ ayɛkɔ lu ayɛsɔ̃ teli ɔbha gɛ be klu sɛ Saolo.

59Kibe lɛ gɛ be hu yɛ aklãgbu nɛ, Stefano eklu Kpaya sɛ, “Apalete Yesu, yɛkɛ mɛ kɛtɔwi.” 60Klɛ avɛ ekuisia bha klɛ ebi gɛganɛa sɛ, “Apalete, yɛkɔ balɛ buzizi nɛ ɔmɔa lɛ nɔ.” Kibe lɛ gɛ aɖɔa na beke ko klɛ ada onugbu.

Currently Selected:

Axwɛwɛwa 7: tcd

Highlight

Copy